AALAJANGIIVOQ

Kommunip aalajangernera attatiinnarneqarpoq. Tamanna isumaqarpoq kommunip aalajangiinerani inerniliunneqartoq eqqortuummat, naammagittaalliornerillu ilalerneqanngimmat. 

Meeqqanut tapiissutit pillugit Inatsisartut inatsisaat nr. 9, 7. decembari 2009-imeersoq naapertorlugu aalajangiisoqarpoq.

Nassuiaat:                                                                                             

Suliami takuneqarsinnaavoq, aalajangiinerup nalaani nukangasumik paneqartutit YY ulloq XXXXXX inunngortoq.

Ulloq 5. juuni 2015-imi Kommunep aalajangiusimavaa, paninnut YY-mut meeqqanut tapiissutinik tunisisarneq unitsinneqartoq. Tamatumunnga tunngaviuvoq, YY-ip pisortanit ikiorsiissutinik pisartagaqarnera. Kommunip Meeqqanut tapiissutit pillugit Inatsisartut inatsisaat nr. 9, 7. decembari 2009-meersormi § 1 nr. 4 innersuussutigaa.

Ulloq 12. juuni 2015-imi Isumaginninnermi Naammagittaalliuuteqartarfimmut naammagittaalliuuteqarputit. Meeqqap 18-it inorlugit ukioqarnera pissutigalugu suli tapiissutinik qinnuteqarputit. Suliffeqarsimanngilatit pisortanit ikiorsiissutinillu pisartagaqarnak.

Inuit allattorsimaffianni takuneqarsinnaavoq, YY najukkanniit ulloq 15. apriili 2015-imi nuussimasoq. YY aalajangiinerup nalaani 17-inik ukioqarpoq, nukangasunillu marlunnik meeraqarluni. Ulloq qulaani allassimasoq meeqqat angutaat nooqatigaa.

YY-ip nalunaarsorneqarnerani takuneqarsinnaavoq, 2014-imi sapaatit akunnera 24-imiilli ullut 14-nikkaarlugit pilersuinermut akiligassanullu aalajangersimasunut ingerlaavartumik pisortanit ikiorsiissutisisarsimasoq.

Aalajangiinerup nalaani YY ullut 14-nikkaarlugit pilersuinermut akiligassanullu aalajangersimasunut pisortanik ikiorsiissutisisarpoq 1.338,- kr.-nik.

Naliliineq:

Isumaginninnermi Naammagittaalliuuteqartarfik isumaqarpoq, paninnut nukangasumut  YY-mut juunimi 2015-imi meeqqat tapiinik pisartagaqartussaasimanngitsutit.

Isumaginninnermi Naammagittaalliuuteqartarfiup pingaartippaa, panivit YY-p  pilersuinissamut akiligassanullu aalajangersimasunut pisortanit ikiorsiissutit ullut 14-ikkaarlugit pisartagaqarsimanera, taamaalillunilu pisortanit pilersorneqarluni.

Suliap sivisuallaartumik suliarineqarsimanera allaffissornermut tunngasunik pissuteqartoq Inunnik Isumaginninnermut Naammagittaalliuuteqartarfiup ajuusaarutigaa. 

                     

Aalajangiineq:                                                                       

Kommunep aalajangiinera 5. juuni 2015--meersoq atuutsinneqarpoq.

Inussiarnersumik Inuulluaqqusillunga

Naja Joelsen                                                           

Siulittaasoq                                                           

  

Aalajangikkap assilineqarnera ukununnga nassiunneqassaaq: Kommune, aamma illoqarfigisami kommunimi allaffimmut.   

         

Inatsisit toqqammaviit:

Meeqqanut tapiissutit pillugit Inatsisartut inatsisaat nr. 9, 7. december  2009-meersoq

§ 1.  Inatsit manna tunngavigalugu meeqqanut tapiissutisisinnaatitaanermi makku piumasaqaataapput:
1) meeraq 18-it inorlugit ukioqassasoq,
2) meeraq Kalaallit Nunaanni kommunimi innuttaaffeqartuussasoq aamma meeqqanut tapiissutinik tigusisinnaatitaasoq Kalaallit Nunaanni aalajangersimasumik najugaqartuullunilu inuit aqqisa allattorsimaffianni nalunaarsorneqarsimassasoq,
3) meeraq meeqqanulluunniit tapiissutinik tigusisinnaatitaasoq qallunaatut innuttaassuseqassasoq, imaluunniit meeraq meeqqanulluunniit tapiissutinik tigusisinnaatitaasoq ukiumi kingullermi Kalaallit Nunaanni najugaqarsimassasoq,
4) meeraq meeqqanik inuusuttunillu ikiorsiisarneq pillugu peqqussut tunngavigalugu pisortanit angerlarsimaffiup avataanut inissinneqarsimassanngitsoq imaluunniit pisortanit allatigut pilersorneqartoq aamma
5) meeraq katissimassanngitsoq.
Imm 2.  Inunnut Nunat Avannarliit Isumaqatigiissutaat isumaginninnikkut isumannaallisaaneq pillugu imaluunniit nunat tamalaat isumaqatigiissutaat allat naapertorlugit isumannaallisaatitut ikiorsiissutinik tigusisinnaatitaasunut meeqqap Kalaallit Nunaanni kommunimi innuttaaffeqartuunissaanik piumasaqaat atuutinngilaq.