Sags nr.2012-066566

Pisortanit ikiorsiissutinik qinnuteqaativit itigartitsissutigineqarnera pillugu Kommune 26. April 2012 aalajangiineranut tunngatillugu naammagiuttaalliuutit Isumaginninnermi Naammagittaalliuuteqartarfiup ulloq 19. April 2013 suliaraa imatullu aalajangiilluni

Aalajangiineq

Kommune-p aalajangiinera  allanngortinneqarpoq. Imaappoq kommunip aalajangiinera eqqortuunngimmat illit naammagittaalliuutinni taperserneqartutit.

Suliaq aalajangiiffigineqassaaq pisortanit ikiorsiissutit pillugit Inatsisartut peqqussutaat nr. 15, 20. November 2006-meersoq aamma pisortat ingerlatsineranni suliassat suliarineqartarnerat pillugu Inatsisartut peqqussutaat nr. 8, 13. Juni 1994-imeersoq naapertorlugit.

Nassuiaat:

Suliami takuneqarsinnaavoq illit 16. April 2012 Kommune-p angalaninni aningasartuutinnut atugassanik pisortanit ikiorsiissutinik qinnuteqarfigisimagit, pissutigalugu aappat xxxx erniartormat najoriartorniarakku.

Ulloq 26. April Kommune-p qinnuteqaatit itigartitsissutigaa. Kommunip itigartitsinermini innersuussutigaa pisortanit ikiorsiissutit pillugit Inatsisartut peqqussutaanni nr. 15-imi, 20. November 2006-imeersumi § 20, imm. 3. Kommunip aalajangersagaq issuaavigaa, aalajangiinerminullu tunngaviliullugu oqaatigalugu erninermut atatillugu angalanissamut inatsisitigut tunngavissaqanngitsoq.

Naammagittaalliornissamut ilitsersuut ilangullugu nassiunneqarsimavoq.

Aalajangiineq pineqartoq ulloq 7. Maj 2012 Naammagittaalliuuteqartarfimmut naammagittaalliuutigaat. Oqaatigaat aappat inuummarluttarsimasoq qasoqqasartorlu, aamma xxx-mi ilaqutaqannginnami illit xxx-mut ilaanissat pisariaqartissimagaa.

Paasissutissani suliamut ilanngunneqartuni takuneqarsinnaavoq aappat x. xx 20xx ernertaarsimasoq.

Qinnuteqarfigineqaraluarluni kommuni suliamut tunngatillugu nassuiaamik aamma aningaasartuutinut isertitanullu uppernarsaatinik nassiussaqanngilaq. Kisianni suliami takuneqarsinnaavoq suliffeqanngitsutit.

Inatsisitigut tunngavigisat:

Pisortanit ikiorsiissutit pillugit Inatsisartut peqqussutaanni nr. 15-imi, 20. November 2006-imeersumi § 7 malillugu kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

-Inooqatigiinnermi pisimasumik, soorlu nappaammik, erninermik, sulifissaarunnermik inooqatigiikkunnaarnermilluunniit nalaataqarsimappat, aamma

- Imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnanngippat.

Peqqussummi pineqartumi § 8 malillugu kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu

- Suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliffissarsiortuuguni

- Sungiussiniarnermigut ajornartorsiornini peqqinnginnini assigisaallu pissutigalugit sulisinnanngitsutut nalilerneqaruni imaluunniit

- Napparsimaguni imaluunniit erninermut atatillugu sulinngiffeqaruni taamalu sulisinnaanani

Peqqussummi pineqartumi § 20, imm. 1-mi atuarneqarsinnaavoq kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaasoq, qinnuteqartup § 4, imm. 1 aamma § 8-mi piumasaqaataasut naammassisimappagit, kiisalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq aningaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.

Pisortat ingerlatsineranni suliassat sulirineqartarnerat pillugu Inatsiartut inatsisaat nr. 8, 13. Juni 1994-imeersoq malillugu  aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Naliliineq:

Isumaginninnermi Naammagittaalliuuteqartarfik isumaqarpoq aapparpit xxx-mi erniartorneranut atatillugu xxx-nissannut angalaninnut aningaasartuutinut matussutissanik ikiorserneqarnissannut pisinnaatitaasutit.

Isumaginninnermi Naammagittaalliuuteqartarfiup pingaartutut isigaa aningaasartuutit siumoortumik naatsorsuutigineqarsinnaareeraluartut illit akissannik katersinissannut periarfissaqarsimanngilatit, pissutigalugu piffissap ilaani suliffeqarsimannginnavit taamalu akissarsisarsimanak.

Tamatuma saniatigut Isumaginninnermi Naammagittaalliuuteqartarfiup pingaartutut isigaa, matumani pineqarmat aningaasartuut naammaginartumik nassuiaaserneqarsinnaasoq, taamalu ilinnit aningaasartuutigineqassagaluaruni illit ulluinnarni inuuninarninnut annertuumik aningaasaqarnikkut nammakkiinermik kinguneqartusaasssammat, tamatuma nalaani akissarsiorfigisannik suliffeqannginnavit.

Aalajangiineq:

Taamaalilluni Isumaginninnermi Naammagittaalliuuteqartarfiup Kommune-p illoq 26. April 2012 aalajangiinera allanngortippaa.

Inussiarnersumik inuulluaqqusillunga

Naja Joelsen

Siulittaasoq

Inatsisit tunngavigineqartut:

 

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

- 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat

- 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu 

1) suliffeqanngikkuni, suliffissaminillu naammaginartumik neqeroorfigineqarsimanngikkuni, suliffissanillu pimoorullugu periarfissarsiortuuguni,
2) sulisinnaanngitsutut nalilerneqarsimaguni sungiussiniarnermigut ajornartorsiornini, imaluunnnit peqqinnginnini pissutigalugit imaluunniit
3) napparsimaguni imaluunniit erninermut atatillugu sulinngiffeqaruni taamaattumillu sulilernissamut piareersimasinnaanani.”

Imm. 2. Naalakkersuisut pilersuinermut akiligassanullu aalajangersimasunut kiisalu ataasiaannartumik aningaasartuutissanut pisortanit ikiorsiissutisisinnaanermut piumasaqaatit pillugit maleruagassanik aalajangersaasinnaapput, tassunga ilanngullugu sulilernissamut piareersimanissamut piumasaqaatinik qaqugukkullu qinnuteqartoq sulisinnaanngitsutut nalilerneqartassanersoq.

Imm. 5. Nammineq pisuussutigisamik pissaaleqisoqarpat aallaavittut taamaallaat tunniunneqarsinnaapput pilersuinermut akiligassanullu aalajangersimasunut pisortanit ikiorsiissutissat affaannai. Pilersuinermut ikiorsiissutit aningaasanngornagit tunniunneqassapput. Kommunalbestyrelsip naliliinermini immikkut isiginiartussaavai meerartaasinnaasut pisariaqartitaat isiginiarneqarsimanersut.

 - 20. Kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm.1 aamma § 8-imi piumasaqaataasut naammassisimappagit aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq ani-ngaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.

- Imm. 2. Aatsaat immikkut illuinnartuni akiligassanut kinguaattoorutinut matussutissanik ikiorsiissutinik tunisisoqarsinnaavoq.

- Imm. 3. Kommunalbestyrelsi aamma pisortanit ikiorsiisinnaavoq ilaquttat qanigisat napparsimaneranni aamma/imaluunniit toquneranni ilisaanerannilu angalanissamut aningaasartuutinut. Kommunalbestyrelsimit piumasarineqarpat nakorsamit uppernarsaammik tunniussisoqassasoq, uppernarsaammik piniarnermut aningaasartuutit kommunalbestyrelsip akilissavai.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq.

- 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.