Sags nr.2011-043916

Ineqarnermut akiitsunnik akiliunneqarnissaq pillugu qinnuteqaativit kommunimit itigartitsissutaanera pillugu decembarip 15-ani 2010 maalaarutit, Isumaginninnermi Naammagittaalliuteqartarfiup decembarip 13-ani 2012 suliaraa imalu aalajangiivigalugu:

                                                    

AALAJANGIINEQ

Kommunip aalajangigaa atuutiinnassaaq, taamaasillunilu kommunip aalajangiinera eqqortutut nalilerneqarmat, maalaarutit ilalerneqanngilaq.

Suliaq pisortanit ikiorsiissutit pillugit Inatsisartut peqqussutaat nr. 15, novembarip 20-ani 2006-imeersoq, Pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, marsip 15-ani 2007-imeersoq, Pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8, 13. juni 1994-imeersoq kiisalu Pisortat ingerlatsineranni suliassat suliarineqartarnerat pillugu Inatsisartut Inatsisaat nr. 9 juunip 13-ani 1994-imeersoq naapertorlugit aalajangiivigineqarpoq.

Nassuiaat:

Decembarip qulaaluaani 2010 pisortanit ikiorsiissutinik oktobarip novembarillu qaammataanni 2010 ineqarnermut akiligassannut atugassanik qinnuteqarputit. Illit inooqatillu H apriili qammat 2010 pisortanit ikiorsiissutinik taamanikkut ineqarnermut akiligassat 24.611,69 koruuniusut akilernissaannut atugassanik qinnuteqarpusi. Qinnuteqaat siulleq maajip qulingani 2010 itigartitsissutaavoq. Aalajangiinerli taanna Isumaginninnermi Maalaaruteqartarfimmut maalaarutigineqanngilaq. Aggustip 23-ani 2009 inigisassinnut nutserpusi akiitsullu tamatuma kingorna pinngorput.

Illit L qinnuteqarnerup nalaani 18-nit inorlugit ukiulinnik marlunnik najugaqateqartigisassinnik meeraqartutit, suliamut tunngatillugu ilisimatitsissutaavoq.

Decembarip 15-ani 2010 aalajangiinermi qinnuteqaatersi itigartinneqarpoq.  Pisortanit ikiorsiissutinik qinnuteqarnermi suliffissarsiortuunissaq suliffeqanngitsutullu naqitsisarnissaq aalajangiinermut tunngavilersuutituaavoq. Pisortanit ikiorsiisarneq pillugu Inatsisartut peqqussutaat nr. 15 novembarip 20-ani 2006-imeersumi kaptali 1 aamma 2 innersuussutaapput, aalajangersakkalli naapertuuttut ilanngunneqarsiman-ngillat issuaavigineqarsimanatillu. Pissutsit piviusut suut aalajangiinermi tunngavilersuutaanerat ilanngunneqarsimanngilaq.

Illit L decembarip 17-ani 2010 e-mailikkut aalajangiineq maalaarutigaat. Ernininnut atatillugu sulinngiffeqarninni aningaasanik pisartagaqarnerit illillu H ilinniagaqarninnut atatillugu ilinniagaqarnersiuteqarnerit pissutigalugit, maalaarummut kukkusumik aalajangiisoqarsimaneranik isumarsi oqaatigaarsi. Ineqarnermut akiliisarneq akiliinissamut kiffartuussivik aqqutigalugu akilerneqartarsorigissi ilanngullugu oqaatigaarsi – taamaattoqannginnerali ilissi malugisimanngilarsi.

Apriilip pingajuani 2012 kommunip Isumaginninnermi Maalaaruteqartarfimmut allakkamini oktobarimi novembarimilu 2010 aamma ineqarnermut akiitsup akilerneqarnissaanut ikiorserneqarnissaq pillugu saaffiginnissimasutit- qinnuteqaatilli ilaqutariillusi aningaasatigut oktobarimi 6.438,81 koruuninik novembarimilu 8.300,08 koruuninik sinneqarnersi, taamaasillusilu akiitsussinnik nammineq akiliisussaanersi pissutigalugu tamarmik itigartitsissutaasimasut, kommunip ilisimatitsissutigaa. Tamannali pillugu kommunip allattugaataani suliamullu tunngasuni allani nalunaarsimasoqanngilaq.

Suliamut tunngatillugu paasissutissat naapertorlugit paniit T xxxx inuueqarpoq.


Inatsisit tunngaviusut:

Pisortanit ikiorsiissutit pillugit Inatsisartut peqqussutaat nr. 15, novembarip 20-ani 2006-imeersoq § 20 imm. 1 naapertorlugu kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm.1 aamma § 8-imi piumasaqaataasut naammassisimappagit aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq ani-ngaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.

Imm. 2-mi aalajangersagaq naapertorlugu aatsaat immikkut illuinnartuni akiligassanut kinguaattoorutinut matussutissanik ikiorsiissutinik tunisisoqarsinnaavoq.

Pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, 15. marts 2007-imeersoq § 5 naapertorlugu pisortanit ikiorsiissutinik suliffissaaleqinerinnaq pissutigalugu qinnuteqartut pisartagaqartullu sulisinnaanerminnik periarfissanik atuisinnaanissaminnut suliffeqalernissaq sulilersitaanissarlu pillugit, neqeroorummit akuersaarinninissamut pisussaaffeqanngillat: qinnuteqartoq pisartagaqartorluunniit naartuneq, ernineq qitornarsiartaarnerluunniit pissutigalugit sulinngiffeqarsinnaatitaavoq, naartunermi, erninermi qitornarsiartaarnermilu sulinngiffeqartarneq il.il. pillugit Inatsisartut peqqussutaanni malittarisassat naapertorlugit, suliffeqareersimanissamut piumasaqaataasoq eqqaassanngikkaanni.

Pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8, 13. juni 1994-imeersoq § 22 naapertorlugu suliami peqataasumut tassunga tamakkiisumik tapersiisoqanngippat, aalajangiineq allakkatigut nalunaarutigineqartoq aalajangiinermut tunngaviusumik ilaqartinneqassaaq.

Pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8, 13. juni 1994-imeersoq § 24 naapertorlugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat, tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Paasissutissat suliami pissusiviusunut tunngasut aalajangiinermi annertuumik pingaartinneqartut tunngaviusumik nalunaarummi pisariaqarpat naatsumik erseqqissarneqassapputtaaq.

Pisortat ingerlatsineranni suliassat suliarineqartarnerat pillugu Inatsisartut Inatsisaat nr. 9, 13. juni 1994-imeersoq § 6 naapertorlugu suliassani ingerlatsinermut oqartussaasunit aalajangiiffigineqartussani oqartussaq paasissutissanik suliamut tunngassuteqarluinnartunik suliassap aalajangiiffigineqarnissaanut pingaaruteqartunik oqaasiinnakkut pissarsisoq, paasissutissanilluunniit taamaattunik allatut iliorluni paasisaqartoq, paasissutissat taakku imaat pillugit allakkiussaaq. Taamaattorli paasissutissat taakku suliassap allakkiartaasa ilaanni takuneqarsinnaappata tamanna atuutinngilaq.

 

Naliliineq:

Ineqarnermut akiitsut akilernissaannut pisortanit ikiorsiissutisinissamut pisinnaatitaaffeqanngitsutit Isumaginninnermi Naammagittaalliuteqartarfiup nalilerpaa.

Tamatumunnga pisuni immikkorluinnaq ittuni aatsaat akiitsunut ataasiakkaanut atugassanik pisortanit ikiorsiissutisisoqarsinnaanera, illillu immikkorluinnaq ittunik pisoqarsimaneranut qularnaallisitsisumik ilisimatitsisimannginnerit tunngavilersuutaavoq. Ineqarnermut akiliummik aningaaserivik aqqutigalugu akilerneqartarsimasorinninneq kingornalu taamaattoqannginneranik paasinninneq, illit nammineq ineqarnermut akiliisarnissaq akisussaaffigigakku, immikkorluinnaq ittumik pisutut naatsorsuunneqarsinnaanngilaq.

Akerlianik erninermut atatillugu sulinngiffeqartussaatitaanerit pissutigalugu suliffissarsiortutut inissisimasussaannginnermi maleruagassat tunngavigalugit, kommunip suliffissarsiortutut inissisimanissat piumasaqaatigisinnaanngilaa.

Katissimannginnersi pissutigalugu aappassinnut pilersuisussaatitaannginnassi H-lu ilinniarnini pissutigalugu pisortanit ikiorserneqarsinnaanngimmat, illit pisortanit ikiorserneqarsinnaanissat anguniarlugu H-p suliffissarsiortutut inissisimanissaa, kommunip piumnasaqaatigisinnaanngilaattaaq.

Aalajangersakkat aalajangiinermut naapertuuttut ilanngunneqarsimasussaagaluartut aalajangiinermilu issuaavigineqarsimasussaagaluartut taamatullu pissutsit aalajangiinermut eqqortumik tunngavilersuutaasut qulaani taaneqartut aamma ilanngunneqarsimasussaagaluartut, Isumaginninnermi Naammagittaalliuteqartarfik naliliivoq.  

Kommunimut saaffiginninnitit allatugaatinut nalunaarneqarsimasussaagaluartut aalajangiinerillu tamakkiisumik akuersissutaanngitsut allakkianngorlugit assilineqarsimasussaagaluartut, Isumaginninnermi Naammagittaalliuteqartarfik naliliivortaaq.

Isumaginninnermi Naammagittaalliuteqartarfiup januaarip pingajuani 2011 allagai tiguniariarlugit kommunip aalajangiinerup maalaarutaasup assilinera suliamullu tunngatillugu allakkiat naapertuuttut tamaasa piaarnerpaamik nassiussimasussaagaluarai, Isumaginninnermi Naammagittaalliuteqartarfiup ilanngullugu oqaatigissavaa.

Aalajangiineq:

Kommunip aalajangiinera allamik tunngavilersuuteqarluni atuutiinnassaaq.

                                              

Inussiarnersumik inuulluaqqusillunga

Naja Joelsen

Siulittaasoq