Sags nr.2012-062038

Maalaaruteqartoq imigassamik ajornartorsiuteqarpoq, aammalu angajoqqaajusut arlaleriarlutik maalaaruteqartoq inunnik isumaginnittunut saaffiginnissutigisarsimagaluarpaat, maalaaruteqartup pisortanit ikiorsiissutinik pisartakkami ilaminiinnannguit nerisassanut atortarmagit sinnerilu imigassamut atortarlugit. Isumaginninnermi Naammagittaalliuteqartarfik isumaqarpoq kommunip allagartamik pisissutissamik tunniussinera pissusissamisoortoq, maalaaruteqartoq ukiuni arlalinni imigassamik ajornartorsiuteqarsimammat, taamaalilluni nammineq panini iluameersumik isumagisinnaasimanagu.

AALAJANGIINEQ

Kommunip aalajangigaa atuutiinnassaaq. Taamaasilluni kommunip aalajangiinera eqqortutut nalilerneqarmat maalaarutit ilalerneqanngilaq.

Suliaq Pisortanit ikiorsiissutit pillugit Inatsisartut peqqussutaat nr. 15, novembarip 20-ani 2006-imeersoq kiisalu Pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, marsip 15-ani 2007-imeersoq naapertorlugit aalajangiivigineqarpoq.

 

Nassuiaat:

Suliamut atatillugu paasissutissat naapertorlugit imigassamik atornerluisuuvutit.

Kommunip allatugaataani novembarip pingajuani 2011 nalunaarsimasoq naapertorlugu, pisortanit ikiorsissutit ilaminiinnanngui nerisassanut atorlugit sinnerisa imigassanut atortarnerat pillugu, angajoqqaavit arlaleriarlutik inunnik isumaginnittoqarfimmut nalunaarutigisimavaatsit. Angajoqqaavit meerarisat sapaatip akunnerisa naanerini paarisarpaat, taamaammallu suna pillugu kommunip ikiorsiissutinik aningaasanngorlugit tunniussisarnera paaserusuppaat. Angajoqqaatit oktobarip 28-ani 2011 unnukkut oqarasuaatikkut attaveqarlutik ikiorsiissutit aningaasanngornagit pisinnaaneritit paasiniarpaat.

Allakkiami tassani pisortanit ikiorsiissutisiavit novembarip pingajuaniit 2011, pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, marsip 15-ani 2007-imeersoq § 16 imm. 1 naapertorlugu allagartanngorlugit pisiutissanngornissaat aamma nalunaarsimavoq. Sap. ak. 44-mut atugassatut 650 koruunit ilinnut tunniunneqarput.

Pisortanit ikiorsiissutit pisissutissatut allagartanngorlugit tigusarnissaat pillugu kommuni januaarip 24-ani 2012 aalajangiivoq. Kommunip aalajangiinerminut, aalakoornerit pissutigalugu ulluni arlalinni meeqqanut attaveqartannginnerit pillugu arlaleriarlutit oqarasuaatikkut attavigineqartarsimanerit tunngavilersuutigaa.


Inatsit tunngaviusoq pillugu kommunip pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, marsip 15-ani 2007 -imeersumi § 16 innersuussutigaa. Kommuni maalaaruteqarsinnaaneq pillugu ilitsersuivoq.

Februaarip pingajuani 2012 maalaarutinni pisortanit ikiorsiissutisiatit imigassarsiutigisannginnerarpatit. Ikiorsiissutit nerisassanut atortarnerapatit qaammatinilu arlalinni aningaasaateqannginnerit qatsunnerarpat.

Inatsisit tunngaviusut:

Pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersumi § 17 imm. 2 naapertorlugu pisortanit ikiorsiissutit pilersuinermut akiligassanullu aalajangersimasunut atugassat- pissutsit immikkut ittut pisariaqalersitsippata- aningaasanngornagit imal. akiitsoqarfimmut toqqaannartumik akilerneqarsinnaapput.

Peqqussummi pineqartumi § 18 imm. 2 naapertorlugu kommunalbestyrelsi qaqutigoorluinnartumik piffissamut sivikinnerusumut tunniussisinnaavoq, qinnuteqartup ikiorsiissutit nammineerluni aqussinnaanngikkai naliliisoqarpat. Kommunip naliliinerminut atatillugu immikkut ilaqutariinni meeqqat pisariaqartitaasa iluaquserneqarnissaat pingaartissavaa.

Pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, marsip 15-ani 2007-imeersumi § 16 naapertorlugu, aningaasanngornagit ikiorsiissutinut ikiorsiinermi akiliuteqartarneq imaluunniit toqqaannartumik akiligassanngortitsilluni allatsitsisarneq siullermeerlutik saaffiginnissuteqartunut tunniunneqarsinnaanngillat, aatsaalli paasineqarsimatillugu, pineqartumit ikiorsiissutit atornerlunneqartartut, imaluunniit ikiorsiissutinik nammineerluni aqutsisinnaanngitsoq, takuulli imm. 3.

Nalunaarummi pineqartumi imm. 2 naapertorlugu aningaasanngornagit ikiorsiissutinut tunniussinermut aalajangiilernermi, qitornaasinnaasut pisariaqartitsinerat eqquutsinneqarnersoq kommunalbestyrelsimit immikkut isiginiarneqassaaq.

Naliliineq:

Isumaginninnermi Naammagittaalliuteqartarfiup isumaa naapertorlugu pisortanit ikiorsiissutit pisissutissatut allagartanngorlugit tunniussinissamut kommuni pisinnaatitaavoq.

Ukiuni arlertuni imigassamik ajornartorsiuteqarnerpit nassatarisaanik panivit iluamik paarisinnaasannginnera tamatumunnga tunngavilersuutaavoq. Isumaginninnermi Naammagittaalliuteqartarfiup naliliinera naapertorlugu pisortanit ikiorsiissutit illit panippillu pisariaqartitaannut atortarsimanngilatit.

Taamaammat tunngaviusumik pisariaqartitassi pisiarinissaat qulakkeerniarlugu, pisortanit ikiorsiissutisiavit pisissutissatut allagartanngorlugit tunniunneqarnissaat pillugu kommunip aalajangigaa Isumaginninnermi Naammagittaalliuteqartarfiup akuersaarpaa.

Aalajangiineq:

Kommunip aalajangigaa atuutiinnassaaq.


Inussiarnersumik inuulluaqqusillunga


Naja Joelsen
Siulittaasoq


Inatsisit tunngaviusut


Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq
§ 17. Pilersuinermut akiligassanullu aalajangersimasunut pisortanit ikiorsiissutisiat aningaasanngorlugit qinnuteqartumut tunniunneqarsinnaapput, aningaaserivimmut assigisaannullu ikineqarsinnaapput, taamaattoq takuuk imm. 2.
Imm. 2. Pilersuinermut akiligassanullu aalajangersimasunut pisortanit ikiorsiissutisiat aningaasanngornagit tunniunneqarsinnaapput imaluunniit akiligassamik nassitsisumut toqqaannartumik tunniunneqarsinnaapput, pissutsit immikkut ittut tamanna pisariaqalersippassuk.

§ 18. Pilersuinermut akiligassanullu aalajangersimasunut pisortanit ikiorsiissutisiat siumoortumik ullut 14-ikkaarlugit tunniunneqartassapput. Taamaattoq akiligassanut aalajangersimasunut pisortanik ikiorsiissutit tunniunneqarsinnaapput piffissami akiligassat akilerneqarfissaasa nalaani.
Imm. 2. Kommunalbestyrelsi qaqutigoorluinnartumik piffissamut sivikinnerusumut tunniussisinnaavoq, qinnuteqartup ikiorsiissutit nammineerluni aqussinnaanngikkai naliliisoqarpat. Kommuunip naliliinerminut atatillugu immikkut ilaqutariinni meeqqat pisariaqartitaasa iluaquserneqarnissaat pingaartissavaa.
Imm. 3. Pisortanit ikiorsiissutit tunniunneqartarnerat pillugu Naalakkersuisut malittarisassanik aalajangersaasinnaapput, tassunga ilanngullugu uppernarsaatinik tunniussinissamut malittarisassanik.

Pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, 15. marts 2007-imeersoq
§ 16. Aningaasanngornagit ikiorsiissutinut ikiorsiinermi akiliuteqartarneq imaluunniit toqqaannartumik akiligassanngortitsilluni allatsitsisarneq siullermeerlutik saaffiginnissuteqartunut tunniunneqarsinnaanngillat, aatsaalli paasineqarsimatillugu, pineqartumit ikiorsiissutit atornerlunneqartartut, imaluunniit ikiorsiissutinik nammineerluni aqutsisinnaanngitsoq, takuulli imm. 3.
Imm. 2. Kommunalbestyrelsimit aningaasanngornagit ikiorsiissutinut tunniussinermut aalajangiilernermi immikkut isiginiarneqassaaq, qitornaasinnaasut pisariaqartitsinerat eqquutsinneqarnersoq.
Imm. 3. Nammineerluni pissuussutigalugu pissaaleqisoqalersimappat, imaluunniit meeqqat immikkut ittumik isiginiarneqalersillugit, aningaasanngornagit ikiorsiissutinik siullermeertumik saaffiginnissuteqartumut pisortanit ikiorsiissutinik akiliussisoqartassaaq.