Sags nr. 2011-055239

Initaarninnut atatillugu aningaasartuutit akilernissaannut qinnuteqaativit Kommunimit  aggustip 15-ani 2011 itigartitsissutaanera pillugu maalaarutit, Isumaginninnermi Naammagittaalliuteqartarfiup decembarip 14-ani 2012 suliaraa

imalu aalajangiivigalugu:

AALAJANGIINEQ

Kommunip aalajangigaa atuutiinnassaaq, taamaasillunilu kommunip aalajangiinera eqqortutut nalilerneqarmat, maalaarutit ilalerneqanngilaq.

Suliaq pisortanit ikiorsiissutit pillugit Inatsisartut peqqussutaat nr. 15, novembarip 20-ani 2006-imeersoq naapertorlugu aalajangiivigineqarpoq.

Nassuiaat:

Initaarninnut atatillugu aningaasartuutit katillugit 7.011 koruunit matussutissaannik ikiorserneqarnissamik qinnuteqarputit.

Kommunip aggustip 15-ani qinnuteqaammut itigartitsivoq. Kommunip nalilinera naapertorlugu ikiorsiinissaq inatsisitigut tunngavissaqanngilaq. Kommunip itigartitsinerminut inigisat qimallugu minnerpaamik ukiuni marlunni peqassanak oqarsimanerit tunngavilersuutigaa. Taamaammat inuttut atukkat arlaatigut pisariaqalersitsimanngimmata ikiorsiinissaq kommunip tunngavissaqarsorisimanngilaa.

Septembarip 21-ani 2011 kommunip suliaq nassuiaateqarfigaa. Tamatumunnga atatillugu marsip aappaani 2011 nutsernermut atatillugu aningaasartuutinut ikiorsiinissaq, illit nammineq nutserniarninnut atatillugu piareersaateqartussaanerit pillugu itigartitsissutaasoq, kommunip oqaatigaa. Tamatuma saniatigut februaarip 15-ani 2011 qinnuteqarninnut atatillugu inissiaatileqatigiiffik aqqutigalugu initaarsimanerit, attartornermullu isumaqatigiissut atsioreersimagakku akiligassat aalajangersimasut akilerneqassasut ilisimatitsissutigaat. Inooqativit ilinniarnerminut atatillugu aallaqqanerani orninniarit minnerpaamillu qaammatini marlunni najornissaaa naatsorsuutigigit qaqugorpiarli uternissat oqaatigisinnaanngikkit, ilisimatitsissutigaattaaq. Inooqativit arnaanut inigisat atukkiunniarit ilisimatitsissutigaat. aallarnissat aalajangiutereerit ikiorsiissutinik akuersissuteqartoqarpat, qinnuteqartumut iluaqutaassanngimmat kommuni itigartitsiniarluni aalajangerpoq.

Inuit allattorsimaffiat naapertorlugu 25-inik ukioqarputit katissimanallu meeraqanngilatit.  

 

Inatsit tunngaviusoq:

Pisortanit ikiorsiissutit pillugit Inatsisartut peqqussutaat nr. 15, novembarip 20-ani 2006-imeersoq § 7 naapertorlugu kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq:
1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

Peqqussummi pineqartumi § 8 naapertorlugu Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu
1) suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliffissarsiortuuguni

Peqqussummi pineqartumi § 20 naapertorlugu Kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm.1 aamma § 8-imi piumasaqaataasut naammassisimappagit aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq ani-ngaasartuutinut siumoortumik naatsorsuutigineqareersinnaasunut, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat, kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq

- § 7 aamma 8-mi aalajangersakkat eqquutsinneqarnissaat piumasaqaataavoq.

Peqqussummi pineqartumi § 21 imm. 1 naapertorlugu Kommunalbestyrelsi nuunnermut qinnuteqartup imaluunniit ilaqutariit ineqarnikkut suliffissaqarnikkulluunniit atugaannut pitsaanerulersitsisumut ikiorsiissuteqarsinnaavoq, tamatumani qinnuteqartoq taassumaluunniit katissimallugu aappaa, akuerisaasumik aapparisaa taamaaqataanilluunniit inooqatigisaa, takuuk § 13, imm. 6, aningaasartuutinik akiliisinnaanngippata kiisalu qinnuteqartup § 4-mi imm. 1-imi piumasaqaatit naammassisimappagit.

 
Naliliineq:

Initaarninnut atatillugu aningaasartuutinnut 7.011 koruuninut matussutissannik  ikiorserneqarsinnaanngitsutit, Isumaginninnermi Naammagittaalliuteqartarfik naliliivoq.

Nutsernermut atatillugu aningaasatigut ikiorserneqarnissami qinnuteqartup ilaqutariillu inigisaannut inuussutissarsiutaannullu pitsanngorsaataanissaa- qinnuteqartullu aappaasup imal. taamaaqataanik inissisimalluni inooqataasup aningaasartuutinik akiliisinnaanissamut periarfissaqannginnerat piumasaqaataavoq. Illit nammineq kommunimut aappat najorumallugu illoqarfimmut allamut nuunniarnerit inigisallu allamut atukkiunnerit ilisimatitsissutigaat.

Ineqarnikkut atukkannut pitsanngorsaataanngitsoq Isumaginninnermi Naammagittaalliuteqartarfik naliliivoq. Taamaammat pisortanit ikiorsiissutit pillugit Inatsisartut peqqussutaanni § 21 imm. 1-imi naapertorlugu aningaasatigut ikiorsiinissamut piumasaqaatit eqquutsinneqanngillat.

Peqqussummi pineqartumi § 20 imm. 1 naapertorlugu ataasiaannarluni ikiorsiissutisinissap akuersissutigineqarnissaa, Isumaginninnermi Naammagittaalliuteqartarfiup aamma tunngavissaqarsorinngilaa.

Inuttut atukkatigut arlaannik nalaataqarsimanerup ilisimatitsissutaannginnera- taamaasillutillu pisortanit ikiorserneqarsinnaanermut piumasaqaatinik equutsitsinnginnerit, taama naliliinermut tunngavilersuutaavoq.

Kommunip ikiuunissamut pisussaaffeqarnera pillugu oqaatigisannut tunngatillugu, kommuuni peqqussummi piumasaqaataasut eqquutsinneqarpata aatsaat ikiorsiisinnaasoq, Isumaginninnermi Naammagittaalliuteqartarfiup oqaatigissavaa.

Aalajangiineq:

Kommunip aalajangigaa attatiinnarneqassaaq.

Inussiarnersumik inuulluaqqusillunga                                                                            

Naja Joelsen                                                      

Siulittaasoq

 

Inatsisit tunngaviusut:

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

- 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

- 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu
1) suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliassarsiortuunngikkuni
2) sungiussiniarnermigut ajornartorsiornini, peqqinnginnini assigisaallu pissutigalugit sulisinnaanngitsutut nalilerneqaruni imaluunniit
3) napparsimaguni imaluunniit erninermut atatillugu sulinngiffeqaruni taamalu sulisinnaanani.
Imm. 2. Naalakkersuisut pilersuinermut akiligassanullu aalajangersimasunut kiisalu ataasiaannartumik aningaasartuutissanut pisortanit ikiorsiissutisisinnaanermut piumasaqaatit pillugit maleruagassanik aalajangersaasinnaapput, tassunga ilanngullugu sulilernissamut piareersimanissamut piumasaqaatinik qaqugukkullu qinnuteqartoq sulisinnaanngitsutut nalilerneqartassanersoq.

- 20. Kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm.1 aamma § 8-imi piumasaqaataasut naammassisimappagit aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq ani-ngaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.

Imm. 2. Aatsaat immikkut illuinnartuni akiligassanut kinguaattoorutinut matussutissanik ikiorsiissutinik tunisisoqarsinnaavoq.
Imm. 3. Kommunalbestyrelsi aamma pisortanit ikiorsiisinnaavoq ilaquttat qanigisat napparsimaneranni aamma/imaluunniit toquneranni ilisaanerannilu angalanissamut aningaasartuutinut. Kommunalbestyrelsimit piumasarineqarpat nakorsamit uppernarsaammik tunniussisoqassasoq, uppernarsaammik piniarnermut aningaasartuutit kommunalbestyrelsip akilissavai.

Nuunnermi ikiorsiissutit

- 21. Kommunalbestyrelsi nuunnermut qinnuteqartup imaluunniit ilaqutariit ineqarnikkut suliffissaqarnikkulluunniit atugaannut pitsaanerulersitsisumut ikiorsiissuteqarsinnaavoq, tamatumani qinnuteqartoq taassumaluunniit katissimallugu aappaa, akuerisaasumik aapparisaa naligaluguluunniit inooqatigisaa, takuuk § 13, imm. 6, aningaasartuutinik akiliisinnaanngippata kiisalu qinnuteqartup § 4-mi imm. 1-imi piumasaqaatit naammassisimappagit.

Imm. 2. Kommuunimut allamut nuuttoqarpat, kommuunimit nuuffiusussamit kommunalbestyrelsimit akuersissummik pissarsisoqaqqaassaaq nuunnermut ikiorsiinnginnermi. Taama pisoqanngippaat kommunalbestyrelsi nuunnermut ikiorsiissutinik tunisisoq kommuuniussaaq ukiuni marlunni akiliissussaq.