Pisortanit ikiorsiissutit pillugit november 2007-imi O Kommuneata itigartitsilluni aalajangiinera naammagittaalliuutigisat  Isumaginninnermi Naammagittaalliuuteqartarfiup ulloq 12. februar 2010 suliaraa imatullu

Aalajangiilluni

O Kommuneata aalajangiinera atortussaatinneqarpoq. Tamanna isumaqarpoq kommunip aalajangiinerata inernera eqqortuusoq, illillu naammagittaalliuutinni taperserneqanngitsutit.

Suliaq aalajangiiffigineqassaaq  pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq aamma pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq naapertorlugit.

Nassuiaat:

Ulloq 21. november 2007 O Kommunea innaallagissamut akiligassat matussutissaannik pisortanit ikiorsiissutinik qinnuteqarfigaat.

O Kommunea qaammat november 2007 suliaq pillugu aalajangiivoq, tassani qinnuteqaatit pillugu itigartinneqarninnik nalunaarfigineqarlutit.

Takuneqarsinnaasutut aalajangiineq allaganngorlugu ilinnut nalunaarutigineqanngilaq.

Allakkatigut 3. december 2007 ullulerneqartutigut kommunip aalajangiinera Isumaginninnermi Naammagittaalliuuteqartarfimmut naammagittaalliuutigaat. Naammagittaalliuutinnut tunngavittut makku allappatit: ”O Kommuneani isumaginninnermut allaffeqarfimmit itigartinneqarpugut, taakku tunngavigisaat tassaavoq uanga namminersortuunera. (inuussutissarsiutigalugu piniartuuneq). Takusinnaasassitut ukioq 2006 isertitakitsuararsuuvugut, naatsorsuutigaarpullu ukioq manna suli isertitakinnerussalluta. Pingasunik meeraqarpugut 14-inik, 11-nik arfineq pingasunillu ukiullit.”

Paasissutissat suliamut tunngassuteqartut  Isumaginninnermi Naammagittaalliuuteqartarfimmut nassiunnerinut atatillugu O Kommunea suliaq pillugu paasissutissat saqqummiunneqareersut saniatigut saqqummiussaqanngilaq.

Suliami paasissutissat malillugit qinnuteqarnerpit nalaani nuliat najugaqatigaat, taamalu meeqqat pingasut tamarmik 18 inorlugit ukiullit najugaqatigalugit.

Inatsisitigut tunngavigisat:

Pisortanit ikiorsiissutit pillugit Inatsisartut peqqussutaanni § 20, imm. 2 malillugu aatsaat immikkut illuinnartuni akiligassanut kinguaattoorutinut matussutissanik ikiorsiissutinik tunisisoqarsinnaavoq.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq malillugu piumasaqaataanngilaq aalajangiinerit allaganngorlugit nalunaarutiginissaat. Taamaattorli ingerlatsinermi aalajangiinerit nammakkiisut allaganngorlugit nalunaarutigisarnerat ileqquuvoq kusanartoq.

Pisortat ingerlatsineranni suliassat suliarineqartarnerat pillugu Inatsisartut peqqussutaanni nr. 8-mi, 13. juni 1994-imeersumi § 24 malillugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat  tamakkua atornerannut aalajangiisuunerusut

Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

Naliliineq:

Isumaginninnermi Naammagittaalliuuteqartarfik isumaqarpoq O Kommuneani aalajangiigamik aalajangiineq allaganngorlugu ilinnut nalunaarutigisimasariaqaraluaraat, aalajangiineq ilinnut nammakkiisuummat.

Isumaginninnermi Naammagittaalliuuteqartarfik isumaqarpoq innaallagissamut akiligassannut matussutissanik pisortanit ikiorsiissutinik tunineqarsinnaanngitsutit.

Aalajangiinermi tunngavigineqarpoq aatsaat immikkut illuinnartuni akiligassanut kinguaattoorutinut matussutissanik ikiorsiissutinik tunisisoqarsinnaammat, illillu pissutsinik immikkut ittunik aalajangersakkamik pingaarnermik saneqqutsinissamut tunngavissamik taasaqarsimanak.

Taamaattoq Isumaginninnermi Naammagittaalliuuteqartarfik isumaqarpoq O Kommuneata aalajangiinermini tunngavik taanna allassimasariaqaraluaraa kiisalu pisortanit ikiorsiissutit pillugit Inatsisartut peqqussutaanni nr. 15-imi, 20. november 2006-imeersumi § 20, imm. 2 inatsisitigut tunngavigisatut allassimasariaqaraluaraa issuarlugulu.

Taamaattoq Isumaginninnermi Naammagittaalliuuteqartarfiup uparuassavaa O Kommunea ilumini inatsisit atuuttut avaqqullugit malittarisassaliorsimanera, taamaalilluni inuit aalajangersimasunik inuussutissarsiutillit pisortanit ikiorsiissutinik pissarsisinnaajunnaarlugit.

Taamaattoq inuit siornatigut namminersorlutik inuussutissarsiortuusimasut  namminersortutut inuussutissarsiortuujunnaarlutik  uppernarsassavaat suliffissarsiuussisarfimmut suliassarsiortutut suliffissarsiortutullu nalunaarlutik.

 

Aalajangiineq:

O Kommuneata aalajangiinera atortussaatinneqarpoq.

Inussiarnersumik inuulluaqqusillunga

Naja Joelsen

Siulittaasoq