2011-048931

Pisortanit ikiorsiissutit pillugit Kommuni 6. april 2011 aalajangiinera naammagittaalliuutigisat Isumaginninnermi Naammagittaalliuuteqartafiup siulittaasuata ulloq 13. april 2012 suliaraa imatullu aalajangiilluni

Aalajangiineq

Kommunip aalajngiinera nutaamik suliassanngorlugu utertinneqarpoq. Tamanna isumaqarpoq kommuni nutaamik aalajangiisariaqartoq.

Suliaq aalajangiiffigineqassaaq pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq aamma pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il. il. pillugit Namminersornerullutik Oqartussat nalunaarutaat nr. 4, 15. marts 2007-imeersoq naapertorlugit.

Nassuiaat:

Oqaatigineqarpoq illit inooqatigisallu ullormi 5. februar 2010 erniffissatut naatsorsuutigisaq qaammatinik pingasunik sioqqullugu inunngortumik ernertaartusi.

Meeraq arlaleriarluni Islandimi pilatsittarpoq inalukkamigut pinartumik ajoquteqarnini pissutigalugu, tamassuminngalu pissuteqartumik isaannarmik takuneqarsinnaanngitsunik timikkut aseruunneqalersitsisartunik (virus) timaaniittoqalersimalluni tinguanut sunniuteqartumik.

Nakorsaanerup nalunaarusiaa 3. januar-imeersoq malillugu meeraq suli mikisuaraavoq saluttuaraallunilu ukioqarneranullu naleqqiullugu oqimassusia angissusialu nalinginnaasumit malunnaatilimmik appasinnerullutik. Nakorsaaneq nalunaarusiamini aamma allappoq meeraaraq inorpallaarnermigut erlavimmigut ajoquteqaqisoq sulilu alliartornermigut nalorninartumik inissisimalluni. Taamaattumik inassutiginartoq sivikinnerpaamik qaammatini arfinilinni angerlarsimaffimmi paaqqutarineqarnissaa timimigut aseruuttoornerisa ajorseriannginnissaat sianigeqqissaarlugu.

Oqaatigineqarpoq erninersiutitit ulloq 18. december 2010 nunguttut. Tamatuma saniatigut oqaatigineqarpoq inooqatigisat ilinniagaqartuusoq qaammammullu 5.500,00 koruunit pisartagaralugit.

Ulloq 25. januar 2011 Kommuni pilersornerqarnermut atugassanik pisortanit ikiorsiissutinik qinnuteqafigaat.

Kommunip ullormi 6. april 2011 aalajangiinerani pisortanit ikiorsiissutinik qinnuteqaatit itigartitsissutigineqarpoq. Aalajangiinermi makkua atuarneqarsinnaapput: “ Qinnuteqaatit ataatsimiinnermi 1. april 2011-mi pisumi oqaluuserineqarpoq itigartinneqarlunilu, pisortanit ikiorsiissuteqarnissamut periarfissaqannginnera pissutigalugu, aamalu inooqatigisat cpr. nr. XXXX ilinniarnersiuteqarmat innersuussutigissavara Inatsisartut peqqussutaanni nr. 15-imi, 20. November 2006-imeersumi kap. 5 § 13, imm. 2 malillugu qaammammut aningaasaqarnissigut amigartoorutissi matussusernissaannut periarfissassitut atoqqullugu, tamatuma saniatigut misissuininni paasivara illit cpr. n r.XXXX  inortumik ernertaarninnut atatillugu qaammatini arfinillini napparsimmavimmiittariaqarnerpit kingunerisaanik  Inatsisartut peqqussutaat nr. 17, imm. 1 tunngavigalugu erninersiuteqarnerit sapaatit akunnerinik 13-inik sivitsortissinnaagit.

Tamanna tunngavigalugu  pisortanit ikiorsiissutinik qinnuteqaatit akuerineqanngilaq, taarsiullugu periafissaq alla, tassalu  erninersiuteqarnerpit sivitssornissaa nassaarineqarluni innersuussutigineqarluni, taamatuttaarlu qaammammut aningaasaqarnikkut missingersuutitigut amigartoorutit uppernarsaasikkat matussusernissaat innersuussutigineqarluni.

Ulloq 7. april 2011 Kommunip qinnuteqaatinnik itigartitsinera naammagittaalliuutigaat. Oqaatigaat inooqatigisavit ilinniarnersiuteqarnera pissutigalugu erninersuteqarnerpit 23. december 2010 unimmatali ikiorsiissutinik pisartagaqarsimanak. Ulloq 7. april 2011 pisortanit ikiorsiissutit pillugit kommunimut saaffiginneqqissimagaluarputit kinguneqanngitsumilli.

Kommunimi pisunik allattuiffinni ulloq 18. april 2011 allattukkani atuarneqarsinnaavoq erninersiuteqarnerup sivitsornissaanut periarfissaqanngitsoq piffissami 9. september 2010-miit 18. december 2010-mut sivitsuisoqareersimammat.

Tamatuma kingorna Kommunip pisunik allattuiffinni allassimasut malillugit innersuussutigaa pisortanit ikiorsiissutinik pisinnaatitaasutit peqqussummi § 8, imm. 1 malillugu sapaatip akunneranut 630,00 koruuninik. Naatsorsuineq suliami takussutissaqanngilaq.

Aalajangiineq taanna naammagittaalliuutigisimanngilat.

Inatsisitigut tunngavigisat:

Inatsisartut peqqussutaanni nr. 15-imi, 20. november 2006-imeersumi § 2-mi atuarneqarsinnaavoq inatsisartut peqqussutaat manna naapertorlugu kinaluunniit  imminut pilersornissaminut, kiisalu katissimallugu aapparisaminik qitornaminillu 18-it inorlugit ukiulinnik pilersuinissaminut pisussaavoq.

Peqqussummi pineqartumi § 7 malillugu  kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

- Inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat aamma

- Imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

Peqqussummi pineqartumi § 8 malillugu kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu

- Suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliffissarsiortuuguni

- Sungiussiniarnermigut ajornartorsiornini, peqqinnginnini assigisaallu pissutigalugit sulisinnaanngitsutut nalilerneqaruni imaluunniit

- Napparsimaguni imaluunniit erninermut atatillugu sulinngiffeqaruni taamalu sulisinnaanani.

Pisortanit ikiorsiissutit tunniunneqartarnerat pilugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaanni nr. 4-mi, 15. marts 2007-imeersumi § 7 malillugu suliffissaaleqinermi ajornartorsiutit qaavisigut ikiorserneqarnissamik qinnuteqartoqarpat pisartagaqartoqarpalluunniit, pissutsinit ataasiakkaanit § 5-imi taaneqaartunit allaanerusunik pissuteqartoqarnersoq kommunalbestyrelsimit naliliivigineqassaaq, pineqartup sulisinnaanerminut periarfissaminik atuisinnaanerminik pisussaaffeqanngineranut tunngavigineqarsinnaasunik.

Naliliineq:

Isumaginninnermi Naammagittaalliuuteqartarfiup siulittaasua isumaqarpoq ullormit saaffiginniffinniit, tassalu 25. januar 2011-miit pisortanit ikiorsiissutinik tunineqarnissamut pisinnaatitaasutit.

Kommunip pisortanit ikiorsiissutinik qinnuteqarnerpit nalaani ernininnut atatillugu ullormusiaqarsinnaatitaanerpit ingerlaannarnissaanut pisinnaatitaaninnik paasinninnera tunngavigiinnarlugu saaffiginninnerit allarnerfigalugu pisortanit ikiorsiissutinik pisinnaannginnissat kingunerissanngilaa.

Isumaginninnermi Naammagittaalliuuteqartarfiup siulittaasua isumaqarpoq suliffeqarnermi sulisussarsiarineqarsinnaasutut piareersimanissat pisortanit ikiorsiissutinik pissarsinissannut piumasaqaatigissallugu pisariaqarsimanngitsoq. Tamatumunnga tunngaviuvoq ernertaannguarpit qanoq innera tunngavigalugu inunngornerata  kingorna piffissami sivisujaami angerlarsimaffimmi paaqqutarineqarnissaa nakorsat inassutigimmassuk.

Isumaginninnermi Naammagittaalliiuuteqartarfiup siulitaasua isumaqarpoq illit pisortanit ikiorsiissutinik pisartagaqarnissannut inooqatigisavit suliffeqarnermi suliasussarsiarineqartussatut piareersimanissaa piumasaqaatigineqarsinnaanngitsoq.

Tamatumunnga tunngaviuvoq inooqatigiitut aappariinnersi, katissimanasili. Taamaammat akornassinni pilersoqatigiinnissamik pisussaaffeqarneq atuutinngilaq

Aalajangiineq:

Tamatuma kingunerisaanik Kommunimut 25. januar 2011 aallarnerfigalugu pisortanit ikiorsiissutinik naatsorsuissaaq.

Inussiarnersumik inuulluaqqusillunga

Naja Joelsen

Siulittaasoq

 

Inatsisit tunngavigineqartut:

 

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

- 2. Inatsisartut peqqussutaat una naapertorlugu kialuunniit pisussaaffigaa imminut, katissimallugu aapparisaminik qitornaminillu 18-it inorlugit ukiulinnik pilersuinissani.

- Imm. 2. Katissimallugu aapparmik pilersuisussaatitaaneq atuukkunnaartarpoq averusernikkut imaluunniit avinnikkut.

- Imm. 3. Qitornamik pilersuisussaatitaaneq makku pissutigalugit atuukkunnaartarpoq

- 1) qitornaq nammineq katissimallugu aapparminik imaluunniit qitornaminik pilersuisussaatitaaleraangat, imaluunniit

- 2) paniusoq naartunerminut atatillugu pisortanit ikiorsiissutisiaqaleraangaat.

 - 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

- 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu
1) suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliassarsiortuunngikkuni
2) sungiussiniarnermigut ajornartorsiornini, peqqinnginnini assigisaallu pissutigalugit sulisinnaanngitsutut nalilerneqaruni imaluunniit
3) napparsimaguni imaluunniit erninermut atatillugu sulinngiffeqaruni taamalu sulisinnaanani.
Imm. 2. Naalakkersuisut pilersuinermut akiligassanullu aalajangersimasunut kiisalu ataasiaannartumik aningaasartuutissanut pisortanit ikiorsiissutisisinnaanermut piumasaqaatit pillugit maleruagassanik aalajangersaasinnaapput, tassunga ilanngullugu sulilernissamut piareersimanissamut piumasaqaatinik qaqugukkullu qinnuteqartoq sulisinnaanngitsutut nalilerneqartassanersoq.

Pisortanit ikiorsiissutit tunniunneqartarnerat pillugu, iliuusissatut pilersaarutit, sulisinnaassuseq il.il. pillugit Namminersornerullutik Oqartussat nalunaarutaat nr. 4, 15. marts 2007-imeersoq

§ 7. Suliffissaaleqinermi ajornarsiutit qaavisigut ikiorserneqarnissamik qinnuteqartoqarpat pisartagaqartoqarpalluunniit, kommunalbestyrelsimit naliliivigineqassaaq, pissutsini ataasiakkaani § 5-imit taaneqartunit allaanerusunik pissuseqartoqarnersoq, pineqartup sulisinnaanerminut periarfissaminik atuisinnaanerminik pisussaaffeqannginneranut tunngavigineqarsinnaasunik.