Pisortanit ikiorsiissutit itigartitsissutigineqarnerat pillugu V Kommuneata 5. oktober 2007, 28. november 2007, 5. december 2007 aamma 10. januar 2008 aalajangiineri naammagittaalliuutigisatit Isumaginninnermi Naammagittaalliuuteqartarfiup siulittaasuata ulloq 8. oktober 2010 suliarai imatullu aalajangiilluni

Aalajangiineq

V Kommuneata aalajangiineri utertinneqarput, taamaalilluni V Kommunea, massakkut V Kommunea 1. oktober 2007-imiit 15. januar 2008 ilanngullugu naatsorsuinermi tunngavigineqartup allanngortinnera tunngavigalugu pisortanit ikiorsiissutinik qinnuteqaatit naliliivigisussanngorlugu. Tamanna isumaqarpoq illit naammagittaalliuutinni taperserneqartutit.

Suliaq aalajangiiffigineqassaaq pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq aamma pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq naapertorlugit.

Nassuiaat:

akiligassanut aalajangersimasunut atugassanik siullermeerlutit 1. oktober 2007 pisortanit ikiorsiissutinik qinnuteqarputit.

V Kommunea ulloq 5. oktober 2007 aalajangiivoq, aalajangiinerlu malillugu qinnuteqaat itigartitsissutigineqarpoq.

Kommunip pingaartutut isigaa illit naatsorsuinerit malillugit 5.121,12 koruuninik sinneqartooruteqarsimanerit.

Tamatuma kingornatigut 26. oktober 2007, 29. november 2007 aamma 29. december 2007 pisortanit ikiorsiissutinik qinnuteqarputit akiligassanut aalajangersimasunut atugassannik, kommunilu itigartitsivoq siuliini tunngavigisani tunngaviliullugit.

Kommuni aalajangiinermini inatsisitigut tunngavigisat eqqortut innersuussutigai  kisianni aalajangersakkat atorneqartut issuaaviginagit.

Allakkatigut 18. december 2007 tiguneqartutigut aalajangiineq Isumaginninnermi Naammagittaalliuuteqartarfimmut naammagittaalliuutigaat.

Oqaatigaat arlaleriarlutit kommunimut saaffiginnittarsimallutit akiligassanut aalajangersimasunut atugassanik aningaasatigut ikiorserneqarnissamik qinnuteqarlutit, pissutigalugu suliffeqanngikkallaravit suliffissarsiortuullutilli.

Aamma oqaatigaat tamatigut itigartitaasarlutit pissutigalugu illoqatigisavit isertitai naatsorsuinermi ilanngunneqartarmata ikiorsiissutinik pisinnaatitaanerit takuniarlugu.

Paasissutissat suliamut tunngassuteqartut ulloq 21. februar 2008 Isumaginninnermi Naammagittaalliuuteqartarfimmut nassiunnerinut atatillugu V Kommunea paasissutissanik allanik saqqummiussaqanngilaq.

Paasissutissani takuneqarsinnaavoq piffissami 1. oktober 2007-imiit 15. januar 2008-mut ingerlaavartumik pisortanit ikiorsiissutinik qinnuteqartarsimasutit.

Kiisalu takuneqarsinnaavoq kommuni itigartitsisarsimasoq akiligassat tamarmik akilerneqareernerisigut aningaasatigut sinneqartoortaravit.

Tamatumunnga tunngatillugu kommunip pingaartutut isigaa illusimasoqarnerit siusinaartumik pensionisialimmik.

Immersugassani naatsorsuinermut atorneqartuni takuneqarsinnaavoq kommunip naatsorsuinermi illoqatigisavit siusinaartumik pensionisiai ilannguttarsimagai takuniarlugu pisortanit ikiorsiissutinik tunineqarnissamut pisinnaatitaanersutit.

Inatsisitigut tunngavigisat:

Pisortanit ikiorsiissutit pillugit Inatsisartut pequssutaanni nr. 15-imi, 20. november 2006-imeersumi § 13, imm. 1 tunngavigalugu aalajangerneqartarpoq pilersorneqarnermut akiligassanullu aalajangersimasunut atugassatut pisortanit ikiorsiissutit amerlassusissaat aalajangersarneqassaaq qinnuteqartup maannamut

- inuuniarnikkut atugarisimasai,

- pilersuisutut pisussaaffii,

- katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai,

- akiligassat aalajangersimasut

- najukkamilu pissutsit tunngavigalugit.

 - 13, imm. 2 malillugu taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik. 

- 13, imm. 3 oqaaseqatigiit siulliit malillugit aningaasartuutiviusut tunngavigalugit kiisalu najugaqatigiissinnaanermi iluaqutissat aallaavigalugit aningaasat aalajangersarneqassapput.

Pisortanit ikiorsiissutit pillugit Inatsisartut peqqussutaanni nr. 15-imi, 20. november 2006-imeersumi § 10, imm. 1 tunngavigalugu kinaluunniit pilersuinermut akiligassanullu aalajangersimasunut pisortanit ikiorsiissutinik qinnuteqartoq kommunalbestyrelsimit siunnersorneqarnissamik piumasaqarsinnaavoq, tassanngaannartumik imaluunniit nalaakkumaakkaminik aningaasatigut ajornartorsiulissaguni sapinngisamik nammineerluni qaangiiniarnissamut, ungasinnerusorlu isigalugu imminut ilaquttaminillu pilersuisinnaanissaminut.

- 10, imm. 2 malillugu siunnersuinermi inuup atugai ataatsimut isigalugit isummerfigineqassapput pilersuisinnaannginnermut tunngaviusoq kisiat pinnagu. Siunnersuineq saaffigisinnaasamut allamut attaveqalernissamut ikiuinerusinnaavoq, soorlu suliffissarsiuussisarfimmut, atornerluineq pillugu katsorsaasarfimmut, peqqinnissaqarfimmut inissiaatileqatigiiffinnulluunniit. Siunnersuineq inunnut ataasiakkaanut ataatsimoortunulluunniit ingerlanneqarsinnaavoq.

 

Inatsisartut peqqussutaanni nr. 15-imi, 20. november 2006-imeersumi § 11 tunngavigalugu  pilersuinermut akiligassanullu aalajangersimasunut pisortanit ikiorsiissutisisartut imminut tunngasumik iliuusissatut pilersaarusiuunneqarnissamut pisinnaatitaavoq kommunalbestyrelsi suleqatigalugu, takuulli imm. 3. 

- 11, imm. 2 malillugu iliuusissatut pilersaarusiaq siunnersuisimanermik aallaaveqassaaq aammalu makku pillugit ilitsersuutinik imaqassalluni:

 
1) Atornerluineq kingunerisaalu pillugit katsorsarneqarneq.
2) Inuttut ineriartorneq.
3) Pisinnaanngorsarneq.
4) Ilinniartitaaneq.
5) Sulilersitaaneq.
6) Suliffimmi aalajaatsuuneq.
7) Piginnaanngorsaqqinneq
8) Suliamut nutaamut ilinniaqqinneq.

- 11, imm. 4 malillugu imminut tunngasumik iliuusissatut pilersaarut malinnaatinneqassaaq pilersuinermut akiligassanullu aalajangersimasunut pisortanit ikiorsiissutinik pisoq aalajangersakkat allat naapertorlugit ikiorneqalerpat, imminut tunngasumik iliuusissatut pilersaarusiortoqarnissaanik imaluunniit piginnaanngorsaaqqinnermut pilersaarusiortoqarnissaanik piumasaqaateqartoqarluni. Aalajangersagaq alla naapertorlugu taamatut pisoqassappat imminut tunngasumik iliuusissatut pilersaarusiaareersoq imaluunniit piginnaanngorsaaqqinnermut pilersaarusiaareersoq najoqqutassatut aallaaviusinnaavoq.

 -  12 malillugu kommunalbestyrelsip iliuusissatut pilersaarut naliliiffigeqqissinnaavaa iluarsiiffigalugulu, takuuk § 11, pisariaqartitsineq naapertorlugu, taamaaliornikkut pilersuinermut akiligassanullu aalajangersimasunut pisortanit ikiorsiissutisinissamut piumasaqaatit naammassineqarnerat qulakkeerniarlugu.

Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi § 7 malillugu ingerlatsinermut oqartussaaffiup inuit oqartussaaffigisamini suliassat pillugit apeqquteqarlutik saaffiginnittut pisariaqarneratut annertutigisumik ilitsersorlugillu ikiortassavai .

 

Peqqussummi pineqartumi § 22 malillugu aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

 - 24 malillugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Naliliineq:

Isumaginninnermi Naammagittaalliuuteqartarfiup siulittaasua naliliivoq piffissami 1. oktober 2007-imiit 15. januar 2008 ilanngullugu pisortanit ikiorsiissutinik tunineqarnissamut pisinnaatitaasimasinnaagaluartutit.

Isumaginninnermi Naammagittaalliuuteqartarfiup siulittaasuata kommunip pisortanit ikiorsiissutinik tunineqarsinnaanerit pillugu naliliinissaminut atatillugu naatsorsuisimanerisa amigartumik suliarineqarsimanerat pingaartutut isigaa, pissutigalugu V Kommuneata  naatsorsuinerni illusimasuit isertitai tamaasa ilanngussimammagit ilanngunnissaannut tunngatillugu pissusiviusut tunngavigalugit isertitat taakku tamakkerlugit ilanngunnissaannut tunngavissaqarnersoq nalileeqqaarani.

Naliliinermi tassani ilanngunneqarpoq katissimallugu aapparisap, nalunaarsorneqarsimasumik aapparisap naligisatullu inooqatigisap isertitaat § 13, imm. 1 malillugu qinnuteqartup pisortanit ikiorsiissutinik tunineqarnissamut pisinnaatitaaneranut, pineqartoq pisinnaatitaappat, ikiorsiissutisiassalu amerlassusilerneqarnissaannut atatillugu naatsorsuinernut ilanngunneqassagaluarpataluunniit, illusimasup isertitai pisortanit ikiorsiissutisiassanik naatsorsuinermi katissimallugu aapparisap, nalunaarsorneqarsimasumik aapparisap, naligisatulluunniit inooqatigisap isertitaasa ilanngunneqartarnerattulli ingerlaannartumik ilanngunneqarsinnaanngillat, pissutigalugu illusimasoq tunngaviatigut katissimallugu aapparisamut, nalunaarsorneqarsimasumik aapparisamut naligisatullu inooqatigisamut naligitinneqarsinnaanngimmata.

Taamaattoq peqqussummi pineqartumi § 13, imm. 3 tunngavigalugu, ataasiakkaat inuuniarnermikkut atugarisimasaat, pilersuisut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit, illusimasuit akiligassanut akileeqataassutissaasa naatsorsornerinut isertitai ilaatinneqassapput, pissutigalugu pissusiviusut aallaavigalugit najugaqatigiinnerup iluaqutissartai ilaatinneqassammata.

Taamaalilluni Isumaginninnermi Naammagittaalliuuteqartarfiup siulittaasua isumaqarpoq kommuni 1. oktober 2007-imiit 15. januar 2008-mut piffissaq tamaat pillugu nutaamik aalajangiisariaqartoq piffissat qinnuteqarfiusut tamaasa immikkut piffissani taakkunani isertitat attuumassuteqartut ilanngullugit naatsorsuiffigalugit.

Isumaginninnermi Naammagittaalliuuteqartarfiup siulittaasuata  tamatumunnga tunngatillugu pingaartutut isigaa piffissamut qulaani taaneqartumut tunngatillugu naatsorsuinermi immersukkat tunngavigalugit pisortanit ikiorsiissutinik pisinnaatitaasinnaassagaluartutit, illusimasuit isertitai tamakkerlugit ilaatinneqarsimanngikkaluarpata.

Illusimasuit isertitaasa ilaat qanoq amerlatigisut naatsorsuinermi ilanngunneqartussaanerat pillugu naliliineq tunngavilerneqassaaq.

Isertitat aningaasartuutillu attuumassuteqartut tamaasa aalajangiinermi ilanngunneqassapput, inatsisinilu aalajangersakkat allassimassapput issuarneqarlutillu.

Isumaginninnermi Naammagittaalliuuteqartarfiup siulittaasuata oqaatigissavaa kommuni pisortanit ikiorsiissutit pillugit Inatsisartut peqqussutaanni nr. 15-imi, 20. november 2006-imeersumi § 10 aamma § 11 malillugit siunnersuinissamut pisussaammat innuttaasullu, pisortanit ikiorsiissutinik qinnuteqartut iliuusissatut pilersaarusiuullugit, innuttaasut ullut 14 sinnerlugit pisortanit ikiorsiissutinik pisartagaqartussaappata.  

Oqaatigineqassaaq kommunip suliaq pillugu nutaamik aalajangiinerisa naammagittaalliuutiginissaannut periarfissaqassagavit.

Aalajangiineq:

V Kommuneata aalajangiineri utertinneqarput.

 

Inussiarnersumik inuulluaqqusillunga

Naja Joelsen

Siulittaasoq