Sags nr.2012-069607

Pisortanit ikiorsiissutinik qinnuteqaativit kommunimit januaarip aqqaneq aappaani 2012 itigartitsissutaanera pillugu maalaarutit, Isumaginninnermi Naammagittaalliuteqartarfiup decembarip 13-ani 2012 suliaraa imalu aalajangiivigalugu:                                                                        

AALAJANGIINEQ

Kommunip aalajangigaa atuutiinnassaaq, taamaasillunilu kommunip aalajangiinera eqqortutut nalilerneqarmat, maalaarutit ilalerneqanngilaq.

Suliaq pisortanit ikiorsiissutit pillugit Inatsisartut peqqussutaat nr. 15, novembarip 20-ani 2006-imeersoq kiisalu Pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8 juunip 13-ani 1994-imeersoq naapertorlugit aalajangiivigineqarpoq.

Nassuiaat:

Januaarip aqqaneq aappaani 2012 pisortanit ikiorsiissutinik kommuni qinnuigaat.  

Kommuni ulloq taanna suliamut tassunga tunngatillugu, Inatsisartut peqqussutaat nr. 15 novembarip 20-ani 2006-imeersoq § 13 imm. 2 innersuussutigalugu- decembari qaammat 2011 isertitat aningaasartuutillu naatsorsorneqarnerini sinneqartoorutit tunngavigalugu- itigartitsinini nalunaarutigaa.

Inummut namminermut, aningaasaqarnermut inuttullu atukkanut tunngasunik aalajangersimasunik aalajangiinermi ilanngunneqarsimanngillat.

Inatsimmi aalajangersagaq taaneqartoq issuaavigineqarsimanngilaq.

Maalaaruteqarsinnaaneq ilitsersuutigineqarpoq.

Allakkatigut februaarip 21-ani 2012 ullulikkatigut, Isumaginninnermi Naammagittaalliuteqartarfimmut maalaaruteqarputit. Maalaaruteqarninnut pisortanit ikiorsiissutisiavit nalinginnaasumik pingaartumillu sukkorninnut atatillugu aningaasartuutinnut naapertuutinnginneri tunngavilersuutigaatit.

Isertitat akiitsullu pillugit allattugaatini nalunaarsukkat kommunip nassiuppai. Tamatuma saniatigut naatsorsukkat kommunimit aamma nassiunneqarput.

Suliamut tunngatillugu allattugaatit naapertorlugit decembarip aqqaneq aappaani 2011 suliunnaarsinneqarputit 23-aniillu suliffeqanngikkallarnermi ikiorsiissutinik pisartagaqalerlutit.

Kommunip sulifeqanngikkallarnermi ikiorsiissutinik pisartagaqalernissannut aalajangiinera maalaarutiginngilat.

Decembarip 23-ani 2011 3869 koruunit tunniunneqarput, januaarillu arfernani 2012 3734 koruunit qaammammut isertitat 8236 koruunit nalingi tunniunneqarlutik. Ineqarnermut 3996 koruunit innaallagissamullu 448 koruunit akiliutigisarpatit. Nerisassanut allanullu pisariaqartitanut atugassat 1505,17 koruuninut naatsorsuunneqarput.

Suliami paasissutissat naapertorlugit kisimiittuuvutit 18-illu inorlugit ukiulinnik meeraqarnak.

Inatsisit tunngaviusut:

Pisortanit ikiorsiissutit pillugu Inatsisartut peqqussutaat nr. 15 novembarip 20-ani 2006-imeersoq § 13 naapertorlugu, pilersuinermut akiligassanullu aalajangersimasunut naapertuuttunngorlugu pisortanit ikiorsiissutisiat annertussusaat missiliuussinikkut aalajangerneqartarpoq qinnuteqartup maannamut inuuniarnikkut atugarisai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit.

Taamaallaat pisartagaqartup taassumalu ilaqutaasa pisariaqavissutigut pilersornissaannut ikiorsiissutinik kiisalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik tunniussisoqarsinnaavoq.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, juunip 13-ani 1994-imeersoq § 22 naapertorlugu, aalajangiineq suliami peqataasumut tassunga tapersiisuulluinnanngippat, allakkatigut nalunaarutigineqarnerani aalajangiinermut tunngaviusumik ilaqartinneqassaaq.

Inatsisartut Inatsisanni pineqartumi § 24 naapertorlugu, aalajangiinermut tunngaviusumik nalunaarummi inatsisini maleruaqqusat aalajangiinermi tunngavigineqartut innersuussutigineqassapput. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat, tunngaviusumik nalunaarummi pissutaasut pingaarnerusut isummat tamakkua atornerannut aalajangiisuunerusut taaneqassapputtaaq.

Tunngaviusumik nalunaarummi pisariaqarpat naatsumik paasissutissat suliami pissusiviusunut tunngasut aalajangiinermi annertuumik pingaartinneqartut erseqqissarneqassapputtaaq.

Naliliineq:

Aalajangiinermi pisortat ingerlatsineranni suliassat suliarineqartarnerat pillugu inatsimmi piumasaqaatit malinneqanngimmata, maalaarut kingusinaarluni tunniunneqaraluaq Isumaginninnermi Naammagittaalliuteqartarfiup suliaraa.

Kommunip januaarip aqqaneq aappaani aalajangiinerat, Isumaginninnermi Naammagittaalliuteqartarfiup eqqortutut nalilerpaa.

Isertitavit qaammammut 8236 koruunisut naleqarnerat Isumaginninnermi Naammagittaalliuteqartarfiup pingaartippaa. Innaallagissamut, ineqarnermut, nerisassanut pisariaqartitanullu allanut aningaasartuutitit 5949 koruuniummata, qaammammut 2287 koruunit sinneraatit.

Aningaaserivimmi aningaasat atukkavit akilernissaannut isertitatit naammanngitsut oqaatigaat. Pisortanit ikiorsiissutit pilersuinermut aningaasartuutinullu aalajangersimasunut taamaallaat atugassanngorlugit pisartagaqartup ilaqutaasalu pisariaqartitaannut atugassanngorlugit tunniunneqartarmata, akilersuineq toqqaannanngikkaluamik pigisanut qaffaataasarmat, nalinginnaasumik aningaaserivimmi atukkanut matussutissanik pisortanit ikiorsiisoqarneq ajorpoq. Tamannali ass. aningaasat pingaarnertut inuussutissarsiummut atortunik pisariaqartitanik assigisaannilluunniit pisiniarnermut atatillugu atorniagaappata atuutinngilaq.

Taamaammat isumaqatigiissuteqarnissaq anguniarlugu aningaaserivimmut innersuunneqarputit.

Suliffeqanngikkallarnermi ikiorsiissutisinissamut kattuffimmut imal. suliffissaaleqilersinnaanermut sillimmasiivimmut ilaasortaanissaq inatsisitigut piumasaqaataanngimmat, kattuffimmut ilaasortaaneq pisortanit ikiorsiissutinik matussuserneqartanngilaq.

Isertitavit aningaasartuutinnut pingaartumik sukkorninnut tunngatillugu naapertuutinnginnerat ilanngullugu oqaatigaat. Nakorsaatit nakorsamit allagartalikkat akeqanngimmata, sukkornerillu pissutigalugu pisarialimmik aningaasartuuteqarnerusariaqarnerit uppernarsarsimannginnakku, tamanna allatut inerneqarsinnaasimanngilaq.

Kommunip aalajangiinermini inatsisit naapertuuttut issuaavigisimasariaqarluarai pissutillu aalajangiinermi tunngavigineqartut ilanngussimasariaqaraluarai,  Isumaginninnermi Naammagittaalliuteqartarfik naliliivoq.

 

Aalajangiineq:

Kommunip januaarip aqqaneq aappaani 2012 aalajangiinera atuutiinnassaaq.

Inussiarnersumik inuulluaqqusillunga

Naja Joelsen

Siulittaasoq

Inatsisit tunngavigineqartut:

 

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

  7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.
  1. § 8, imm.  1 ima oqaasertaqarpoq:
    ”§ 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu
    1) suliffeqanngikkuni, suliffissaminillu naammaginartumik neqeroorfigineqarsimanngikkuni, suliffissanillu pimoorullugu periarfissarsiortuuguni,
    2) sulisinnaanngitsutut nalilerneqarsimaguni sungiussiniarnermigut ajornartorsiornini, imaluunnnit peqqinnginnini pissutigalugit imaluunniit
    3) napparsimaguni imaluunniit erninermut atatillugu sulinngiffeqaruni taamaattumillu sulilernissamut piareersimasinnaanani.”

Imm. 2. Naalakkersuisut pilersuinermut akiligassanullu aalajangersimasunut kiisalu ataasiaannartumik aningaasartuutissanut pisortanit ikiorsiissutisisinnaanermut piumasaqaatit pillugit maleruagassanik aalajangersaasinnaapput, tassunga ilanngullugu sulilernissamut piareersimanissamut piumasaqaatinik qaqugukkullu qinnuteqartoq sulisinnaanngitsutut nalilerneqartassanersoq.

13. aalajangerneqartarpoq qinnuteqartup maannamut inuuniarnikkut atugarisimasai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit.

Imm. 2. Taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik.
Imm. 3. Aningaasartuutiviusut tunngavigalugit kiisalu najugaqatigiissinnaanermi iluaqutissat aallaavigalugit aningaasat aalajangersarneqassapput. Pilersuinermut aningaasartuutinullu aalajangersimasunut pisortanit ikiorsiissutit annerpaamik SIK-p Naalakkersuisullu akornanni isumaqatigiissutit naapertorlugit ilinniarsimanngitsumut aningaasarsiarititat ikinnerpaaffiisa 65%-erisinnaavaat, taamaattorli imm. 4 takuuk.


Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq.

22. Aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

§ 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.
Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.
Imm. 3. Tunngaviusumik nalunaarutip imarisai killiliiffigineqarsinnaapput suliami peqataasup tamakkununnga ilisimasaqarnini nammineq iluaqutigiumallugu atuiumasinnaanerminik soqutiginninnera inuk taanna nammineq eqqarsaatigalugu imaluunniit inuinnaat allat pisortalluunniit soqutigissat pissutiginerullugit minnerutittariaqartutut isumaqarfiginarpat, tak. § 15.