Sags nr.2012-065729

Kommune-p marsip 12-ani 2012 pisortanit ikiorsiissutinik utertitsinissamut  tunngatillugu aalajangiinera pillugu maalaarutit, Isumaginninnermi Naammagittaalliuteqartarfiup februaarip 15-ani 2013 suliarai imalu aalajangiivigalugu: 

AALAJANGIINEQ

Kommune-p aalajangigaa eqqunngimmat maalaarutit ilalerneqarpoq.

Suliaq pisortanit ikiorsiissutit pillugit Inatsisartut peqqussutaat nr. 15, novembarip 20-ani 2006-imeersoq kiisalu pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8, juunip 13-ani 1994-imeersoq naapertorlugit aalajangiivigineqarpoq.

Nassuiaat:

Aggusti qaammat 2011 ernuttavit F-p arnami nappaammik peruluuteqarnera pissutigalugu Qallunaat Nunaanniit Nuummut angalanissaanut aningaasartuutit matussutissaannik Kommune qinnuigaat.

Qinnuteqaatit Kommune-p aggustip 29-ani 2011 akueraa aningaasallu F-p kontoanut ilinnut taarsigassanngorlugit ikineqarput.

Novembarip 28-ani 29-ani kiisalu decembarip aallaqqaataani, mailikkut kommunip taarsiinissamik piumasaqaataata naapertuuttuunera apeqquserlugu saaffiginnissutigaat.  

Saaffiginnissutinnut akissutitut marsip aqqaneq aappaani 2012 suliap nukinginnartutut suliarineqarnera utertitsinissamut tunngaviusoq, kommuni allappoq. Qanigisat arlaat ataaseq tassalu angajoqqaaq, aapparisaq, qatanngut qitornarluunniit angalanissamut akiliunneqareersimammat, inatsimmi allamik periarfissaqanngitsoq, Kommunip oqaatigaa. Taamaammat F-p angalanissaanut aningaasartuutinut akiliunneqarnissaanut periarfissatuaasoq tassaavoq taarsersugassanik ikiorsiissuteqarneq. F-p Qallunaat Nunaanni atuarnernini pissutigalugu pisortanit ikiorserneqarsinnaannginnera tamatumunnga patsisaavoq.

Marsip 15-ani 2012 F-p angalaneranut ikiorsiissutit utertinnissaannut kommunip aalajangiinera Isumaginninnermi Naammagittaalliuteqartarfimmut maalaarutigaat.

Maalaarummi ilaatigut ima allapputit:

Siorna panitta M-p nappaamminik peruluuteqarnerani uia meeraallu nukarliit marluk X-mmut angalanerat X inunnik isumaginnitoqarfianiit akililerneqarpoq. M-p pania angajulleq tamatuma nalaani oqaatsitigut nammineq piumassutsi naapertorlugu ilinniarluni X-miippoq. Nakorsat oqaasiat naapertorlugu M peruloqimmat pania angajulleq X-liartariaqarpoq. Taamaammat X inunnik isumaginnittoqarfimmut saaffiginnillunga X angalanissaminut  akiliunneqarsinnaanera paasiniaavigaara. Taamaaliornissaq periarfissaqanngitsoq aningaasalli taarserneqarnissaannut isumaqatigiissusiorsinnaasugut – Pisoq nukinginnarmat allamillu periarfissaqanngimmat - neqeroorut taanna akuerisariaqarparput; ilumulli F angalanissamut akiliunneqarsinnaannginnersoq apeqqutaalerpoq.

Inatsisit tunngaviusut:

Pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq § 4, imm. 2 naapertorlugu pisortanit ikiorsiissutinik tunniussisoqarsinnaavoq, pisariaqartitsineq ikiorsiissutit allat atorlugit pisinnaanngikkaangat.

Peqqussummi tassani § 27 naapertorlugu kommunalbestyrelsip pisortanit ikiorsiissutinik tunniunneqartussaanngitsunik utertitsinissamik aalajangiissaaq, ikiorsiissutisisartoq:
1) Paasissutissanik kommuunalbestyrelsimut tunniussisussaalluni ilisimaarereerlugu tunniussisisimanngippat, takuuk § 26.
2) Taamaaliortussaanani ilisimaarereeraluarlugu pisinnaatitaaffiginngisaminik peqqussut manna naapertorlugu ikiorsiissutisisarsimappat.
3) Kingusinnerusukkut taarsiivigineqarpat, nalinginnaasunik akilersuutisisalerpat assigisaannilluunniit pissarsippat, piffissamut ikiorsiissutisiffigisimasaminut taassungalu assingusumik siunertalimmut.

 -  28, imm. 1 naapertorlugu aammattaaq kommunalbestyrelse pisortanit ikiorsiissutit utertinneqarnissaat pillugu aalajangiisinnaavoq:

1)  Inuup aningaasaqarnikkut sulinikkulluunniit mianersuaalliorluni iliuuseqarnera pissutigalugu pineqartoq ikiorneqartariaqarpat.
2)  Piffissami pisortanit ikiorsiissutisinissamik qinnuteqarfiusumi takuneqarsinnaappat qinnuteqartoq piffissap sivikitsup ingerlanerani pisortanit ikiorsiissutinik utertitsisinnaasoq.

-28, imm. 2 naapertorlugu kommunalbestyrelsi aalajangerpat pisortanit ikiorsiissutinik imm.1-imi nr. 2 naapertorlugu utertinneqartussanik, tamanna ikiorsiissutisisumut allakkatigut nalunaarutigineqassaaq kingusinnerpaamik pisortanit ikiorsiissutit tunniunneqarneranni.

Pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8 juunip 13-ani 1994-imeersoq § 22 naapertorlugu aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

- 24, imm. 1 aamma 2 naapertorlugu tunngavilersuummut makku ilanngunneqassapput:

- Inatsimmi maleruagassanut aalajangiinermi tunngavigineqartunut innersuussineq.

- Missingersuinermi tunngaviusut pingaarnerit.

- Suliamut tunngatillugu pisut piviusut naatsumik nassuiarneqarnerat

 

Naliliineq:

Pisortanit ikiorsiissutit tunniunneqareersut taarserneqarnissaannik piumasaqaateqassagaanni, pisortat utertitsinissamik piumasaqarnissamut inatsisitigut tunngavissaqarnissaat piumasaqaataavoq.

Kommune-p ilinnik taarsiisitsiniarnermini inatsisitigut tunngavissaqarsimanngitsoq taamaammallu F-p anaanami nappaammik peruluuteqarnerani angalanermut aningasartuutaanik taarsiinissamik kommunip aalajangiinera  atortussaanngitsoq, Isumaginninnermi Naammagittaalliuteqartarfik naliliivoq.

Tamatumunnga tunngatillugu Naammagittaalliuteqartarfiup makku oqaatigissavai:

- Ernuttat F sinnerlugu pisortanit ikiorsiissutinik qinnuteqaravit, F-lu qinnuteqarnerup nalaani 18-ileereersimammat, sinnerlugu pisortanit ikiorsiissutinik piniarnermi pisinnaatitsissummik kommun F piniarsimasussaagaluarpoq. Pisinnaatitsissuteqanngimmalli, taamaammallu F sinnerlugu qinnuteqaatit atortussaanngimmat, kommuni pisinnaatitaaffeqarani iliuuseqarsimavoq.

- Pisinnaatitsissummik F-mit piniartoqarsimagaluarpat, F-p qinnuteqaataatut kommunip suliarissagaluarpaa. Illit F sinnerlugu qinnuteqartuugavit kommunip illit inissisimanerit aallaaviginagu, F-lli inissisimanera aallaavigalugu suliamik naliliisimasussaagaluarpoq. Taamaammat ikiorsiissutit taarserneqassappata kommunip F tamatuminnga piumaffigisimassagaluarpaa.

- Suliamut tunngatillugu allattugaatit naapertorlugit qinnuteqarnerup nalaani F ilinniartuuvoq. Pisortanit ikiorsiissarneq pillugu maleruagassat naapertorlugit pisariaqartitat, ikiorsiissutinik allanik soorlu ilinniartuunersiutinik akilerneqanngippata aatsaat pisortanit ikiorsiisoqarsinnaavoq. F pisortanit ikiorserneqarnissamut pisinnaatitaanngitsoq kommunip ilisimatitsissutigaa. Oqaatigineqareersutut inatsimmi periarfissaqarpat aatsaat pisortanit ikiorsiissutinik taarsiisitsisoqarsinnaavoq. Taamaasilluni ikiorserneqartup ikiorsiissutaasullu inatsimmit tunngavissaqarnissaa piumasaqaataavoq. F pisortanit ikiorserneqarnissamut pisinnaatitaaffeqanngippat kommunilu ikiorsiisimappat, inatsimmi tunngavissaqannginneq pissutigalugu kommuni F-mut taarsiinissamik piumasaqaateqarsinnaassanngilaq.

- Napaammik peruluutilimmut qanigisaasup ataasiinnaap angalanissamut pisortanit ikiorserneqarsinnaanera inatsimmi allassimanngilaq. Kommuni nammineq ilumini taamaattumik malitttarisassiorsimappat, tamanna inatsimmik unioqqutitsineruvoq.

- Ikiorsiissutinik taarsiititsinissamik piumasaqaateqarnermi inatsimmi piumasaqaatit eqquutsinneqarpata - tassalu ikiorsiineq inatsimmik toqqammaveqarpat - taarsiinissamut piumasaqaatip inatsimmi piumasaqaatinik eqquutitsinissaa piumasaqaataavortaaq. Pisortanit ikiorsiissutinut tunngatillugu taarsiinissamut piumasaqaateqarnermi tunngaviit pisortanit ikiorsiissutit pillugit inatsisartut peqqussutaat nr. 15 novembarip 20-ani 2006-imeersumi §§ 27-imi 28-imiluunniit takuneqarsinnaapput.

Kommune-p marsip aqqaneq aappaani 2012 aalajangiinermini, inatsimmut tunngavigisamut innersuussuteqannginneq pissutigalugu, pisortat ingerlatsineranni suliassat suliarineqartarnerat pillugu inatsimmi piumasaqaatinik eqquutitsinngitsoq, Naammagittaalliuteqartarfiup naggasiullugu oqaatigissavaa.

Aalajangiineq:

Kommune-p marsip aqqaneq aappaani 2012 aalajangigaa allanngortinneqarmat, F-p arnami nappaammik peruluuteqarnerani angalanermut atatillugu aningaasartuutit utertissanngilatit. Aningaasat tamakkerlugit ilaannakorlugilluunniit akilersimagukkit kommunip akiliutigisimasatit utertissavai.

Inussiarnersumik inuulluaqqusillunga

Naja Joelsen

Siulittaasoq

Inatsisit toqqammaviit

 

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

Kapitali2

Piumasaqaatit nalinginnaasut

 - 3. Kinaluunniit Kalaallit Nunaanniittoq tassanngaannartumik pisariaqavissumik pissaaleqilernermi pisortanit ikiorserneqartussaatitaavoq, tamatumani imminut ilaquttaminillu pilersuisinnaanngikkuni.

 - 4. Pilersuinermut akiligassanullu aalajangersimasunut kiisalu immikkut ittumik pisoqartillugu pisortanit ikiorsiissutinik pisinnaanermut piumasaqaataapput qinnuteqartup Kalaallit Nunaanni najugaqartuunissaa inuillu allattorsimaffiannut nalunaarsimanissaa makkuninngalu naammassinnissimanissaa:

1) danskit nalagaaffianni innuttaanissamik,

2) danskit naalagaaffianni innuttaasumut katissimanissaa imaluunniit kingullermik katikkami danskit naalagaaffianni innuttaasumut katissimanissaa imaluunniit

3) nunanut allanut imaluunniit nunat tamalaat akornanni kattuffinnut isumaqatigiissutini, danskit nalagaaffianni innuttaanngitsut Kalaallit Nunaanniinnerminni ataavartumik pilersuinermut akiligassanullu aalajangersimasunut ikiorsiissutisisinnaatitaanerannik imalinni, ilaanissaa.

Imm. 2. Inatsisartut peqqussutaat una naapertorlugu pisortanit ikiorsiissutinik tunniussisoqarsinnaavoq, pisariaqartitsineq ikiorsiissutit allat atorlugit pisinnaanngikkaangat.

Kapitali 8
Utertitsisarneq

 - 27. Kommunalbestyrelsip pisortanit ikiorsiissutinik tunniunneqartussaanngitsunik utertitsinissamik aalajangiissaaq, ikiorsiissutisisartoq: 

1) Paasissutissanik kommuunalbestyrelsimut tunniussisussaalluni ilisimaarereerlugu tunniussisisimanngippat, takuuk § 26.
2) Taamaaliortussaanani ilisimaarereeraluarlugu pisinnaatitaaffiginngisaminik peqqussut manna naapertorlugu ikiorsiissutisisarsimappat.
3) Kingusinnerusukkut taarsiivigineqarpat, nalinginnaasunik akilersuutisisalerpat assigisaannilluunniit pissarsippat, piffissamut ikiorsiissutisiffigisimasaminut taassungalu assingusumik siunertalimmut.

 

- 28. Aammattaaq kommunalbestyrelse pisortanit ikiorsiissutit utertinneqarnissaat pillugu aalajangiisinnaavoq:

1) Inuup aningaasaqarnikkut sulinikkulluunniit mianersuaalliorluni iliuuseqarnera pissutigalugu pineqartoq ikiorneqartariaqarpat.
2) Piffissami pisortanit ikiorsiissutisinissamik qinnuteqarfiusumi takuneqarsinnaappat qinnuteqartoq piffissap sivikitsup ingerlanerani pisortanit ikiorsiissutinik utertitsisinnaasoq.
Imm. 2 . Kommunalbestyrelsi aalajangerpat pisortanit ikiorsiissutinik imm.1-imi nr. 2 naapertorlugu utertinneqartussanik, tamanna ikiorsiissutisisumut allakkatigut nalunaarutigineqassaaq kingusinnerpaamik pisortanit ikiorsiissutit tunniunneqarneranni. Kommunalbestyrelsi utertitsinissamik kinguartitsigallarnissamik akuersissuteqarsinnaavoq pisartagaqartoq aamma katissimallugu aapparisanilu imaluunniit naligalugu inooqatigisanilu pisortanit ikiorsiissutaannarnik pisartagaqarpata.
Imm. 3 . Kommunalbestyrelsi immikkut pisoqartillugu ikiorsiissutisisalernermiit ukiup ataatsip qaangiunnerani aalajangiisinnaavoq ikiorsiissutisiap utertitassanngorsimanera atorunnaassasoq.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq.

Kapitali 6
Tunngavigisat il.il.

 - 22. Aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

 - 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

Imm. 3. Tunngaviusumik nalunaarutip imarisai killiliiffigineqarsinnaapput suliami peqataasup tamakkununnga ilisimasaqarnini nammineq iluaqutigiumallugu atuiumasinnaanerminik soqutiginninnera inuk taanna nammineq eqqarsaatigalugu imaluunniit inuinnaat allat pisortalluunniit soqutigissat pissutiginerullugit minnerutittariaqartutut isumaqarfiginarpat, tak. § 15.