Sags nr. 2013-088214

Ulloq 22. august 2014 Isumaginninnermut Naammagittaalliuteqartarfiup Kommunip ulloq 6. juni 2013 tarnip pissusaanik ilisimasalimmik ikiorserneqarnissaq pillugu qinnuteqaatit suliarivaa, imalu aalajangiilluni:

AALAJANGIUSSAQ

Kommunip aalajangigaa attatiinnarneqassaaq. Tamanna isumaqarpoq Kommunip aalajangigaa eqqortuusoq, taamaalillutit naammagittaaliutinni taperserneqanngilatit.

Suliaq Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq aammalu Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq aallaavigalugit aalajangiiffigineqarpoq.

Nalunaajaat:

Suliami erserpoq xxxx Pinerluuteqarsimasunut inissiisarfimmiissimasutit. 2009-mi ukiuni qulingiluani inoqammik toqutsineq, inoqammik toqutseriaraluarsimaneq aammalu peqqarniisaarsimaneq pissutigalugit parnaarussassanngortitaasimallutit.

Ulloq 24. april 2013 Pinerlussimasunik Isumaginnittoqarfiup illit sinnerlutit Kommunimut tarnip pissusaanik ilisimasalimmik ikiorserneqarnissat imaluunniit oqaloqatigiinneq atorlugu katsorsartinnissat qinnutigisimavaa.

Ulloq 6. juni 2013 aalajangiiffigineqartumik qinnuteqaatit itigartinneqarpoq. Itigartitsinermi peqqutigineqarpoq tarnip pissusaanik ilisimasalimmik ikiorserneqarnissat imaluunniit oqaloqatigiinneq atorlugu katsorsartinnissat aningaasatigut tunngavissaqanngitsoq.

Erseqqissaatigineqarpoq, kommuni isumaqarsimammat Pinerlussimasunut isumaginnittoqarfik taassumalu ataani naalagaaffik tarnip pissusaanik ilisimasalimmik ikiorserneqarnissamut akiliisussatut isigineqarmata, pineqartoq Pinerlussimasunut isumaginnittoqarfiup ataani isertitsivimmi inissisimasimappat.

Kommuni inatsisitigut toqqammavissamik nalunaaruteqarsimanngilaq, aammalu maalaaruteqarnissamut ilitsersuummik tunniussaqarsimanani.

Allakkani 12. juli 2013 ullulerneqarsimasuni Kommunip Pinerlussimasunut Isumaginnittoqarfik ilisimatissimavaa isumaqarluni pisussaaffiginagu tarnip pissusaanik ilisimasalimmut aningaasartuuteqassalluni, innersuussutigalugulu ilaatigut siornatigut xxxx tarnip pissusaanik ilisimasalimmik ikiorserneqarnikuusimanerit.

Pinerlussimasunut Isumaginnittoqarfiup erseqqissaassutigivaa pissutsini oqimaassinnaasuni aammalu peroriartornermi akornusiisinnaasuni, ilaatigut angerlarsimaffimmi imigassamik atornerluiffiusumi persuttaaffiusumilu peroriartorsimasutit. Atuarnerup tungaatigut ajornartorsiuteqarsimavutit, ilaatigut ilikkagaqarniarnikkut malinnaaniarnikkullu ajornartorsiuteqarsimallutit, taassumalu kingunerisaanik sakkortuumik aammalu avatangiisinnut qisuariaatigisannik ilinnut aserorsaataasumik pissusilersortarsimasutit.

Sianissutsikkut misissorneqarninni nakorsaanerup, psykiatri pillugu immikkut nakorsap xxx xxxx-p aammalu tarnip pissusaanik ilisimasallip xxx xxxx-ip innersuussutigisimavaat illit inuttut aammalu misigissutsikkut ataatsimut pissusitit piffissami sivisunerusumi tarnikkut ajoqutinik aaqqiinniarneq atorlugu nukittorsarneqarsinnaasut.

Tamatuma kingorna Pinerlussimasunut Isumaginnittoqarfiup Inatsisartut peqqussutaat nr. 15 20. November 2006-imeersoq innersuussutigivaat erseqqissaatigalugulu § 7 malillugu tassanngaannartumik pisariaqavissumik pissaaleqilernermi pisortanit ikiorsiissuteqarsinnaaneq, qinnuteqartoq inooqatigiinnermi pisimasumut navianartumiissimappat. Pinerlussimasunut Isumaginnittoqarfiup isigaa pisumi tassani illit pineqartutit, ilaatigut innersuussitigalugu aalajangersaanermi ilaatigut inooqatigiinnermi pisimasumut navianartumiissimanerit, ilaatigullu tassanngaannartumik pisariaqavissumik pisariaqavitsinerit.

Allakkani 24. juli 2013 ullulerneqarsimasuni Kommunip aalajangikkani aalajangiusimaannarpaa. Kommuni maalaaruteqarnissamut ilitsersuummik ilanngullugu nassiussaqarpoq.

Ulloq 13. august 2013 Isumaginninnermut Naammagittaalliuteqartarfimmut naammagittaalliutinni erseqqissaatigisimavat kommunip aalajangiinera atorsinnaanngitsoq aammalu Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersumut naapertuutinngitsoq. Innersuussutigivat tunngavilersuut amigaateqartoq, aammalu eqqartuussivimmi inatsisinut innersuussinngitsoq, aammalu maalaaruteqarnissamut ilitsersuut amigaataasoq, aammalu suliamut tunngatillugu illit oqaaseqarnissat periarfissiissutaasimanngitsoq, ilaatigut illit inissisimaninnut tunngatillugu siunnersuuteqarnissami aggersarneqarsimanngitsutut, aammalu kommuni ikiortigalugu illit inuttut ataasiakkaatut iliuusissamik sanasoqarsimanngitsoq.

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq pillugu Pinerluuteqarsimasunut Isumaginnittoqariup innersuussutigivaa, illit inooqatigiinnermi pisumut navianartumiissimanerit, tassa illit piumasarinagu isertitsivimmi inissitaagavit.

Pinerluuteqarsimasunut Isumaginnittoqarfiup allakkani nukingisaarutini 12. august 2014-imeersuni Isumaginninnermut Naammagittaalliuteqartarfimmut ilisimatitsissutigaa paasisinnaanagu suliaq suli suliarineqarsimanngimmat, naak ukioq ataaseq sioqqulluguli naammagittaalliut tunniunneqarsimasoq. Taamaammat kissaatigineqarsimavoq suliaq ataatsimiinnissami ulloq 22. august 2014 suliarineqassasoq. Ilaatigut piumasarineqarpoq tarnip pissusaanik ilisimasalimmut katsorsartinnissat, misiligutaasumik iperagaanissat sioqqullugu, kisiannili tamanna Pinerluuteqarsimasunut Isumaginnittoqarfiup aningaasaliiffigissanngikkaa, tassa tarnip pissusaanik ilisimasalimmit katsorsarneqarnissat pillarneqarneqaatiginnginnakku. Suliaq nukingiuttariaqalerpoq, tassa misiliutaasumik iperagaagallarnissaq ukiup affaata missaani pisinnaammat.

Inuit allattorsimaffiani takuneqarsinnaavoq massakkut iperagaasimasutit.

Inatsisitigut toqqammavissat:

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersumi § 1-imi ersippoq aalajangersakkani siunertaasoq aningaasatigut qularnaaruinissaq kikkunnut tamanut nunatsinni najugaqartunut atuuttoq, allatigullu aaqqiivigineqarsinnaanani.

Aalajangersakkap aamma qulakkiissavaa pisortanit ikiorsiissutit inunnut nammineq pilersorsinnaanngitsunut ilaqutaanullu atuunnissaa.

Aalajangersakkani § 3-mi aamma ersippoq kinaluunniit nunatsinni najugaqartoq pisortanit ikiorsiissummik ikiorneqarnissaminut pisinnaatitaaffeqartoq, pinartumik ikiortariaqalernermi, pineqartoq nammineerluni ikiortissamik imminut ilaquttaminullu inuunerup atugassarititaani aqqusaakkani imminut ikiorsersinnaanngippat.

Peqqussummi § 13-imi aamma ersippoq pisortanit ikiorsiissutit annertussusissai ikiorsiissummik pisussap aalajangersimasumik aningaasartuutigisai aallaavigalugit angissusilerneqassasut, ikiorneqartussap inuunermini atugassarisai, pilersuisussaatitaanera aammalu ilaatigut aapparisap, nalunaarsorneqaatigisamik aapparisap imaluunniit naligisamik inooqatigisap isertitai, aalajangersimasumik aningaasartuutai aammalu najugarisami atugassarititaasut aallaavigalugit annertussusilerneqassasut. Taamaallaat pisortanit ikiorsiissummik pisoqarsinnaavoq akiligassanut aalajangersimasunut ikiorserneqarnissaq, qinnuteqartumut ilaqutaanullu pisariaqartinneqarpat, aammalu inigisamut aningaasartuutinut, ulluinnarni pisariaqartitanut aammalu aningaasartuutinut nalinginnaasunut allanut.

Peqqussummi § 20-imi takuneqarsinnaavoq kommunalbestyrelse pisortanik ikiorsiissutinik ikiorsiissuteqarsinnaasoq, tunngavissaqarluartumik inuttut ataasiakkaatut aningaasartuuteqarpallaaranni, soorlu qinnuteqartup piumasaqaataasuni § 4 imm. 1 aammalu § 8 naammassisimappagit, aammalu namminerisamik akiligassat akilerniarnerini qinnuteqartup ilaqutaasalu periarfissaasa siunissami ajorseriaateqarnissaat pineqarpat. Pisortanit ikiorsiissutit inuttut ataasiakkaatut tunniunneqassappata taamaallaat tunniunneqarsinnaapput, aningaasartuutit pisussani ilisimariinngisani pilersimappata. Kommunalbestyrelseli misissuilluareernermini immikkut iliuuseqarsinnaatitaavoq, inuttut ataasiakkaatut pisortani ikiorsiissutit pillugit, tassani aningaasartuutigiumaakkat siumut takuneqarsinnaappata, qinnuteqartup ilaqutaasalu inuunerminni ingerlariaqqinnissaannut aalajangiisuuppata.

Naliliineq:

Isumaginninnermut Naammagittaalliuteqartarfiup nalilerpaa, pisortanit ikiorsiissutit aqqutigalugit tarnip pissusaanik ilisimasalimmik imaluunniit oqaloqatigiinneq atorlugu katsorsarneqarnissannut ikiorserneqarnissannut pisussaaffeqanngitsutit.

Tunngavilersuut tassaavoq Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq tunngavigineqarsinnaanngitsoq ikiorserneqarnissamut.

Isumaginninnermi Naammagittaalliuteqartarfiup isiginiarsimavaa Inatsisartut peqqussutaata siunertarisaa, aningaasatigut inunnut imminnut ilaquttaminnulluunniit pilersuisinnaanngitsunut atuutinngitsoq.

Isumaginninnermi Naammagittaalliuteqarfiuttaaq aamma isiginiarsimavaa peqqussummi § 13 imm. 2-mi taamaallaat pisortanit ikiorsiissutinik tunniussisoqarsinnaammat taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik § 13 imm. 2 malillugu.

Tarnip pissusaanik ilisimasalimmik ikiorserneqarnissaq peqqussut malillugu ikiorserneqarsinnaanermi ilaanngilaq.

Aammalu aningaasartuutit tunniunneqarsinnaanngillat § 20 malillugu ataasiaannartumik aningaasartuutitut.

Tunngavilersuut unaalerpoq, ataasiaannartumik aningaasartuutit pineqanngimmata, kisiannili piffissami sivisunerusumi ingerlasussamik aningaasartuutit pineqarlutik.

Isumaginninnermi Naammagittaalliuteqarfiuttaaq isiginiarpaa ataasiaannartumik aningaasartuutit, ilanngussat malillugit, peqqussummi nalinginnaasumik pineqartut tassaammata ilaqutariit aningaasaqarnermikkut akilersinnaanngisaat.

Isumaginninnermi Naammagittaalliuteqartarfiup kommunimut erseqqissaatigaa kommunip aalajangiussaa amigaateqarmat, tassa Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq naammassineqarsimanngimmat. Aalajangersakkat inatsit taaneqartut pillugit erseqqissarneqarput.

Isumaginninnermi Naammagittaalliuteqartarfiup ulloq 2. september 2013-imili suliamut tunngatillugu paasissutissanik qinnuteqaraluartoq, aatsaat ulloq 12. august 2014 Isumaginninnermut Naammagittaalliuteqartarfiup paasissutissat tiguai. Taamaammallu Isumaginninnermi Naammagittaalliuteqartarfiup suliamut tunngasoq siusinnerusukkut aalajangiiffigisinnaasimanagu.

Isumaginninnermi Naammagittaalliuteqartarfiup isornartoqartippaat, naak arlaleriarluni Isumaginninnermi Naammagittaaliuteqartarfiup kommune qinnuteqarfigisaraluraa, sulianit tunngasut piaartumik nassiussimanngimmagit, tassa kommunip Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq § 32 malillugu pisussaaffigigaluaraa.

Aalajangiineq:

Isumaginninnermut Naammagittaalliuteqartarfiup Kommunip ulloq 6. juni 2013 aalajangigaa attatiinnarpaa.

Inussiarnersumik inuulluaqqusillunga

Siulittaasoq

Allakkat assilinerat Kommunimut, qitiusumik allaffeqarfimmut aammalu xxxx allaffimmut nassiunneqarput.

Aammattaaq kommuni piumaffigineqarpoq allagaq aalajangiussaq maalaaruteqartumut tunniutissagaa.

Inatsisit toqqammaviit:

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

§ 1. Peqqussummi matumani siunertarineqarpoq inunnut Kalaallit Nunaanniittunut allatut iliornikkut imminnut pilersorsinnaanngitsunut tamanut aningaasaqarnikkut isumannaallisaaviginninnissaq. Inuit imminnut ilaquttaminnillu pilersuisinnaanngitsut pilersuinermut akiligassanullu aalajangersimasunut aningaasatigut ikiorserneqarnissaat peqqussutikkut aamma isumagineqassaaq.

§ 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

  1. inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
  2. imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

1. § 8, imm. 1 ima oqaasertaqarpoq:

§ 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu

  1. suliffeqanngikkuni, suliffissaminillu naammaginartumik neqeroorfigineqarsimanngikkuni, suliffissanillu pimoorullugu periarfissarsiortuuguni,
  2. sulisinnaanngitsutut nalilerneqarsimaguni sungiussiniarnermigut ajornartorsiornini, imaluunnnit peqqinnginnini pissutigalugit imaluunniit
  3. napparsimaguni imaluunniit erninermut atatillugu sulinngiffeqaruni taamaattumillu sulilernissamut piareersimasinnaanani.”

§ 13. aalajangerneqartarpoq qinnuteqartup maannamut inuuniarnikkut atugarisimasai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit.

Imm. 2. Taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik.

§ 20. Kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm.1 aamma § 8-imi piumasaqaataasut naammassisimappagit aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq ani-ngaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq.

§ 22. Aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

§ 24. Aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

Imm. 3. Tunngaviusumik nalunaarutip imarisai killiliiffigineqarsinnaapput suliami peqataasup tamakkununnga ilisimasaqarnini nammineq iluaqutigiumallugu atuiumasinnaanerminik soqutiginninnera inuk taanna nammineq eqqarsaatigalugu imaluunniit inuinnaat allat pisortalluunniit soqutigisat pissutiginerullugit minnerutittariaqartutut isumaqarfiginarpat, tak. § 15.

Kapitali 7.

Naammagittaalliornissamut ilitsersuineq.

§ 25. Aalajangiinerit ingerlatsinermut oqartussaasunut allanut naammagittaalliuutigineqarsinnaasut allakkatigut nalunaarutigineqarunik naammagittaalliorsinnaanermut ilitsersuummik ilaqartinneqassapput tassuuna nalunaarlugit naammagittaalliortarfik naammagittaalliussagaannilu qanoq iliortariaqartoq immaqalu aamma ullut qassit qaangiutsinnagit naammagittaalliortariaqartoq. Tamakkuninngali ilaqartinneqassanngillat aalaajangiineq aalajangiiffigineqartumut tapersiisuulluinnarsimappat.

§ 32. Ingerlatsinermut oqartussaasut paasissutissamik ingerlatitseqqinnissamut pisinnaatitaappata oqartussaasut ingerlatsinermut oqartussaasut allat qinnuteqarneratigut paasissutissaq ingerlateqqissavaat oqartussaasut taakkua sulinerannut imaluunniit aalajangigassaannut annertuumik pingaaruteqarpat.