H pisortanit ikiorsiissutit ilaannakortumik sap. ak. qulaaluani katsorsartinnerpit, kiisalu W Zmut uterlugulu bilitsit akiisa 2007-imi  akileraarutinit utertoorutinnik akilerneqarnissaannik aalajangiinera pillugu maalaarutit, Isumaginninnermi Naammagittaalliuteqartarfiup apriilip 8-ni 2011 suliaraa imalu

AALAJANGIILLUNI:

H aalajangiinera allanngortinneqarpoq taamaasillutit 2007-imi akileraarutinnit utertoorutitit utertinneqassapput. Kommunep aalajangiinera equunngimmat naammagittaalliutit taperserneqarpoq.

Tamatuma saniatigut pisortanit ikiorsiissutitut 2008-mi Z katsorsartinninnut tamatumunngalu atatillugu angalaninnut aningaasartuutaasut utertissanngilatit.

Suliaq, pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq, pisortallu ingerlatsineranni suliassat suliarineqartarnerat pillugu Inatsisartut inatsisaat nr. 8 juunip 13-ani 1994-imersoq naapertorlugit, aalajangiivigineqarpoq.

Nassuiaat:

Oktobarip 8-ni 2007 Z katsorsartinniarlutit akiliunneqarnissamik H nut qinnuteqarputit.

H februaarip 25-ani 2008 aalajangiinera tunngavigalugu Nuummi katsorsartinnissannut angalanissannullu aningaasartuutissat utertinneqartussanngorlugit akuersissutigineqarput.

H  tunngavigisatut inatsimmi kapitali 8 § 28 imm. 2  innersuussutigaa.

H aningaasatigut ikiorsiiniarnerminut ikiorsiissutinillu utertitsiniarnerminut tunngavilersuuteqanngilaq.

Kommunep inatsisit tunngaviusut issuaaviginngilai naammagittaalliorsinnaanermullu ilitsersuinani.

2007-imi akileraarutinnik 10.494 koruuninik utertoornissannik Kommunellu akiitsoqarnerit pissutigalugu aningaasat taakku 10.172 koruuninik ilanngarsimagai, Akileraarnermut Pisortaqarfiup allakkatigut nalunaarfigaatit.

Juunip 24-ani 2008 katsorsartinninnut angalaninnullu aningaasartuutit  katillugit 32.141 koruunit utertinnissaannut uppernarsaammik atsiorputit.

Allakkanni januaarip 9-ani 2009 tiguneqartuni aalajangiineq Isumaginninnermi Naammagittaalliuteqartarfimmut maalaarutigaat.

2007-imi akileraarutinit aningaasat utertut Kommunep akiitsunnut ilanngaatigisinnaammagit paasisinnaanagu ilisimatitsissutigaat.

Imigassamik ikiaroornartumillu qaammatini arfinilinni atuisimannginnerit pissutigalugu, H-ta novembarip 20-ani 2008 akiitsuit 25 %-imik ilanngaavigineqarnissaat aalajangerpaa.

Suliamut tunngatillugu allagaatit naapertorlugit, 2007-imi aalajangersimasumik suliffittaarsinnaannginnerit pissutigalugu, taartaagallartarninni pisortanit ikiorsiissutinik pisarsimavutit.

Inatsisit tunngaviusut:

Pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq § 20 imm. 1 naapertorlugu aningaasartuutinut siumoortumik naatsorsuutigineqareersinnaasunut aningaasartuuteqarnissaq, qinnuteqartup ilaqutariilluunniit inuuniarneranni pingaaruteqarluinnartuusimappat, Kommune ataasiakkaatigut naliliinermigut qaqutigoortumik ikiorsiisinnaavoq.

Peqqussummi tamatumani § 28, imm. 1 naapertorlugu Kommune pisortanit ikiorsiissutit utertinneqarnissaat pillugu aalajangiisinnaavoq:
1)  Inuup aningaasaqarnikkut sulinikkulluunniit mianersuaalliorluni iliuuseqarnera pissutigalugu pineqartoq ikiorneqartariaqarpat imal.
2)  Piffissami pisortanit ikiorsiissutisinissamik qinnuteqarfiusumi takuneqarsinnaappat qinnuteqartoq piffissap sivikitsup ingerlanerani pisortanit ikiorsiissutinik utertitsisinnaasoq.

Pisortanit ikiorsiissutit nalinginnaasumik utertinneqartussaannginnerat pissutigalugu, Inatsimmi aalajangersakkap nassuiaatitaa naapetorlugu ”piffissap sivikitsup ingerlanerani” qaammatip ataatsip iluani pisussatut paasineqassaaq.

Pisortat ingerlatsineranni suliassat suliarineqartarnerat pillugu Inatsisartut peqqussutaat nr. 8 juunip 13-ani 1994-imeersoq § 22 naapertorlugu suliaq pineqartumut tunngasoq akuersaarneqanngippat, allakkatigut aalajangiineq tunngavilersuutitaqartinneqassaaq.

 

Naliliineq:

Kommunep katsorsartinnermut tassungalu atatillugu angalanermut pisortanit ikiorsiissutit utertinnissaannut pisinnaatitaanngimmat, Kommunemut akiitsuit 2007-imi akileraarutinit utertoorutinnit ilanngaatiginissaat Aasiaat Kommuneata pisinnaatitaaffiginngikkaa, Isumaginninnermi Naammagittaalliutinik Aalajangiisartoqatigiit naliliipput.

Aningaasaqarnikkut sulinikkulluunniit mianersuaalliorluni iliuuseqarneq pissutigalugu ikiorneqartariaqarneq, imal. piffissami pisortanit ikiorsiissutisinissamik qinnuteqarfiusumi, piffissap sivikitsup ingerlanerani pisortanit ikiorsiissutinik utertitsisinnaanerup Kommunemit uppernarsaatissaqartinneqannginnera, Naliliisartunit pingaartinneqarpoq.

Sap. ak. qulaaluani katsorsartinnissat sioqqullugu aalajangersimasumik suliffittaarsinnaannginnerit pissutigalugu taartaaginnartarnerit, taamaammallu piffissap sivikitsup ingerlanerani suliffittaarnissavit ilimanaateqannginnera, Naliliisartut tamatumani pingaartippaat.

”Piffissap sivikitsup ingerlanerani” qaammatip ataatsip ingerlanerani –pisussatut paasineqarnissaa Aalajangiisartut pingaartippaattaaq.

Taamaasillutik pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq § 28, imm. 1 nr. 1 aamma 2-mi aalajangersakkat eqquutsinneqanngillat, taamaammallu H a aningaasanik utertitsinissamut  2007-imiluunniit akileraarutivit utertoorutaannik ilanngaassinissamut pisinnaatitaanngilaq.

Kommune tassaanngimmat atorniartarfik inatsimmilu piumasaqaatit eqquutsinneqarpata aatsaat utertitsisinnaammat, Aalajangiisartut matumani erseqqissatigissavaat.

Katsorsartinninnut aningaasartuutit tamaasa ilaannaaluunniit utertissimagukkit, H ta maanna H ta taakku maannakkut ilinnut utertissavai.

H ta akileraarutinit utertoorutitit 10.172 koruunit ilinnut utertissavai.

Innuttaasup katsorsartinnermini, ilinniarnermini assigisaanniluunniit qanoq iluatitsitiginera tunngavigalugu, akiitsunik utertitsinissamut annikillisaanissamulluunniit Kommune nammineq maleruagassiorsinnaannginnera, Aalajangiisartut oqaatigissavaattaaq.

 

Aalajangiineq:

2007-mi akileraarutinit utertoorutinnik pisortanit ikiorsiissutit utertinnissaannut H-ata februaarip 25-ani 2008 aalajangiinera allanngortinneqarpoq.

Inussiarnersumik inuulluaqqusillunga

Naja Joelsen

Siulittaasoq