Ataatavit Danmarkimi toqusup ilisaanissaani peqataanissannut atatillugu Nuummit Danmarkimut taavalu uterluni Ilulissanut timmisartumut billettimut pisortanit ikiorsiissutit utertinnissaat pillugu C Kommune ulloq 2. februar 2007 oqaasiinnarmik aammalu 27. september 2007 allaganngorlugu itigartitsineri naammagittaalliuutigisatit Isumaginninnermi Naammagittaalliuuteqartarfiup ulloq 8. oktober 2010 suliaraa imatullu aalajangiilluni

Aalajangiineq

C Kommuneata 2. februar aamma 27. september 2007 aalajangiineri allanngortinneqarput, imaalillugit illit pisortanit ikiorsiissutit utertillugit akilertussaajunnaarlugit. Tamanna isumaqarpoq illit naammagittaalliuutinni taperserneqartutit.

Suliaq aalajangiiffigineqassaaq pisortanit ikiorsiissutit pillugit Inatsisartut peqqussutaat nr. 10, 1. november 1982-imeersoq, aamma pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq oqaaseqaatillu tassunga tunngasut naapertorlugit.

Nassuiaat:

Ulloq 2. februar 2007 ataatavit Danmarkimi toqukkut qimaguttup ilisaanissaani peqataajartorninnut atatillugu Nuummit Danmarkimut, Danmarkimiillu Ilulissanut timmisartumik billettimut akissannik 11.905,00 koruuninik amerlassusilinnik pisortanit ikiorsiissutinik qinnuteqarputit.

C Kommunea siullermik ulloq 2. februar 2007 oqaasiinnarmik aalajangiivoq, aalajangiineq malillugu pisortanit ikiorsiissutinik tunineqarlutit utertillugit akiligassanik.

Anaanavit naammagittaalliuutaata Inatsisartut Ombudsmandianut ulloq 14. februar 2007 nassiunneranut atatillugu anaanavit C Kommuneanut qinnutigaa namminerminut tunngatillugu ilinnullu tunngatillugu allaganngorlugu kommuni aalajangeeqqullugu.

Tamanna tunngavigalugu C Kommunea ulloq 27. september 2007 anaanannut ilinnullu tunngatillugu allakkatigut aalajangiivoq.

C Kommuneata ulloq 27. september 2007 aalajangiinermini oqaatigaa pingaartutut isigalugu illit inuusunnerit sulisinnaalluarnerillu.

Tamanna tunngavigalugu kommuni naliliivoq piffissami sivikitsumi suliamik ingerlatsisinnaasutit taamalu imminut pilersorsinnaallutit, taamaalillutit pisortanit ikiorsiissutit akilersinnaassallugit.

C Kommuneata innersuussutigaa pisortanit ikiorsiissutit pillugit Inatsisartut peqqussutaanni nr. 10-mi, 1. november 1982-imeersumi § 10, imm. 1 nr. 4.

C Kommuneata inatsisini tunngavigisat eqqortut innersuussutigai aalajangersagarlu atorneqartoq issuarlugu, kisianni aalajangersakkat aalajangiinissamut attuumassuteqartut tamaasa atorsimanagit.

Anaanavit allakkatigut 12. oktober 2007 tiguneqartutigut illit sinnerlutit aalajangiineq Isumaginninnermi Naammagittaalliuuteqartarfimmut naammagittaalliuutigaa.

Anaanavit oqaatigaa C Kommuneata aningaasat angalanissamut atugassat ilinnut tunniunneqartariaqartut utertitassaanngitsutut, imaammat kommuni tassaammat inunnik ajornartorsiortunik ikiuisussaq.

Anaanat aamma isumaqarpoq ataatavit toqunera pissutigalugu illit aningaasatigut artukkerneqassanngitsutit. 

Paasissutissat suliamut tunngassuteqartut ulloq 5. november 2007 Isumaginninnermi Naammagittaalliuuteqartarfimmut nassiunnerinut atatillugu C Kommunea suliamut tunngatillugu allanik oqaaseqaateqanngilaq.  

Paasissutissani takuneqarsinnaavoq ulloq 2. februar 2007 timmisartumik angalanissamut billettip akia 11.905,00 koruuninik aningaasartalik ilinnut pisortanit ikiorsiissutit pillugit aalajangersakkat tunngavigalugit utertitassanngorlugu akuersissutigineqartoq.

Pisunik allattuiffinni 2. februar 2007 allatani takuneqarsinnaavortaaq anaanavit Ilulissaniit Nuummut timmisartumik angalanissannut billettip akia akilersimagaa.

Ulloq 20. februar 2007 C Kommuneata timmisartumut billettissat Air Greenlandimut akilerpaa.

Ulloq 15. juni 2007 C Kommuneanut utertillugit akiligassat uppernarsaataat atsiorpat, taanna malillugu C Kommunea utertitsinissamik piumasaqaateqarnikkut imaluunniit akissarsiat pingajorarterutaannik ilanngaassisarnissaanut pisinnaatillugu akiligassat tamarmik akilerneqarnissaasa tungaanut.

Inatsisitigut tunngavigisat:

Pisortanit ikiorsiissutit pillugit Inatsisartut peqqussutaanni nr. 10-mi, 1. november 1982-imeersumi § 19 malillugu pisariaqartitsisoqartillugu ilisinermut aningaasartuutinut pisariaqarluinnartunut ikiorsiissuteqartoqarsinnaavoq, qinnuteqartoq aningaasartuutissanut tamakkununnga akissaqanngippat.

Peqqussummi pineqartumi § 10, imm. 1. nr. 4 malillugu ikiorserneqarnissamik qinnuteqarnerup nalaani paasinarsereersimappat inuup pineqartup ikiorsiissutit piffissap sivikitsup ingerlanerani utertillugit akilersinnaalissagai.

Pisortanit ikiorsiissutit pillugit Inatsisartut peqqussutaanni nr. 15-imi, 20. november 2006-imeersumi § 20, imm. 3 tunngavigalugu kommunalbestyrelsi aamma pisortanit ikiorsiisinnaavoq ilaquttat qanigisat napparsimaneranni aamma/imaluunniit toquneranni ilisaanerannilu angalanissami aningaasartuutinut.

Peqqussummi pineqartumi § 28, imm. 1 nr. 2 malillugu piffissami pisortanit ikiorsiissutisinissamik qinnuteqarfiusumi takuneqarsinnaappat qinnuteqartoq piffissap sivikitsup ingerlanerani pisortanit ikiorsiissutinik utertitsisinnaasoq.

Aalajangersakkat qulaani taaneqartut pillugit oqaaseqaatit malillugit oqaatsit ”piffissap sivikitsup iluani” paasineqassapput imatut: qaammatip ataatsip iluani, pissutigalugu malittarisassaq pingaarneq malillugu aningaasanik utertitassanngorlugit tunisisoqarsinnaanngimmat.

Naliliineq:

Isumaginninnermi Naammagittaalliuuteqartarfik naliliivoq C Kommunea 11.905 koruunit utertillugit akilerneqarnissaannik piumasaqarnissamut pisinnaatitaanngitsoq.

Isumaginninnermi Naammagittaalliuuteqartarfiup pingaartippaa oqaatsini ”piffissap sivikitsup iluani” isumaammat innuttaasup aningaasat utertillugit akilernissaannut periarfissaa qanittuararsuussasoq.

Tamatumunnga tunngatillugu Isumaginninnermi Naammagittaalliuuteqartarfiup pingaartutut isigaa pisortanit ikiorsiissutit pillugit Inatsisartut peqqussutaanni nr. 15-imi, 20. november 2006-imeersumi § 28, imm. 1, nr. 2-mut tunngatillugu oqaaseqaatini takuneqarsinnaammat oqaatsit ”piffissap sivikitsup iluani” paasineqassasut: Qaammatip ataatsip iluani.

Naliliinermi tassani ilaatinneqarpoq qinnuteqarnerpit nalaani suliffeqannginnerit, taamaammallu naatsorsuutigineqarsinnaasimassanngitsoq qaammatip ataatsip iluani inatsimmi piumasarineqartutut aningaasat utertillugit akilersinnaassagitit.

Tamatumunnga tunngatillugu Isumaginninnermi Naammagittaalliuuteqartarfiup oqaatigissavaa kommunip imminut pilersorsinnaaleqqinnissat anguniarlugu iliuusissatut pilersaarusiornissamik neqeroorfigisimasariaqaraluaraatit.

Tamanna isumaqarpoq aningaasat taakku 11.905,00 koruunit  tamaasa utertillugit akilersimagukkit ilaannaalluunniit utertillugit akilersimagukkit, taava C Kommuneata, massakkut C Kommune aningaasat akilikkatit ilinnut utertillugit akilissavai.

Isumaginninnermi Naammagittaalliuuteqartarfiup uparuassavaa C Kommuneata oqaasiinnarmik allakkatigullu aalajangiinissaq qinersimagamiuk, taava kommuni  inatsisini tunngavigisat taakku marluk immikkut tamaasa isummerfigissallugit pisussaavoq, tassunga ilanngullugit Inatsisartut peqqussutaannut nr. 15-imut, 20. november 2006-imeersumut oqaaseqaatit, pissutigalugu inatsimmi aalajangersakkat oqaaseqaatini ersarinnerusumik allaaserisaammata.

Tamatumunnga tunngatillugu Isumaginninnermi Naammagittaalliuuteqartarfiup pingaartutut isigaa peqqussutit tamarmik siunertaat assigiimmata, peqqussutinilu taakkunani malittarisassat assigiimmik isumaqarmata.

Isumaginninnermi Naammagittaalliuuteqartarfiup oqaatigissavaa suliassat pineqartut taakku marluk imminnut attuumassuteqaraluartut, suliassani naammagittaalliuutaasut assigiinngillat, illillu suliassami anaanannut tunngasumi pisinnaatitsissummik tunniussaqarsimannginnavit, naammagittaalliuuteqartarfiup suliassat immikkut tamaasa suliarinissaat aalajangiuppaa.

Aalajangiineq:

C Kommuneata 2. februar 2007 aamma 27. september 2007 aalajangiineri allanngortinneqarput.

Inussiarnersumik  inuulluaqqusillunga

Naja Joelsen

Siulittaasoq