Siusinaartumik pensionisianut atatillugu angalanissamut aningaasartuutit matussutissaattut inummut tapiutitut qinnuteqaatigisatit pillugit Kommune-p aalajangiinera naammagittaalliuutigisat Isumaginninnermi Naammagittaalliuuteqartarfiup 25. Oktober 2013 suliaraa imatullu aalajangiilluni:

Aalajangiineq

Kommune-p 14. Marts 2013 aalajangiinera atortussaatinneqarpoq, kisianni tunngavigineqartoq allanngortillugu. Imaappoq kommunip aalajangiinera eqqortuusoq, illillu naammagittaalliuutinni taperserneqanngitsutit.

Suliaq aalajangiiffigineqassaaq siusinaartumik pensionisiat pillugit Inatsisartut peqqussutaat nr. 4, 7. Maj 2007-imeersoq naapertorlugu.

Nassuiaat:

Suliame takuneqarsinnaavoq illit sunngakkut ujarattaqarnerit pissutigalugu xxx-mmut pilatsikkiartornissanut atatillugu uivit angalaqataanissaanut atugassanik aningaasanik tapiiffigineqarnissaq siunertaralugu Kommune qinnuteqarfigisimagissi.

Ullormi 14. Marts 2013 angalanissamut aningasartuutinut atugassanik inummut tapiutinik qinnuteqaat itigartitsissutigalugu Kommune aalajangiivoq. Kommuni aalajangiinissaminut atatillugu nakorsat qullersaannit oqaaseqaammik piniarsimavoq, oqaaseqaammi tassani sunngakkut uajrattap pilatsinnikkut peernera allaaserineqarpoq inuunermut navianaateqanngitsuusoq. Taamaattumik  sunngakkut ujarattap pilatsinnikkut peernerata inuunermut navianartorsiortitsisuunnginnera Kommune-p aalajangiinerminut tunngaviliuppaa.

Inatsisitigut tunngavittut kommunip innersuussutigaa siusinaartumik pensionisiat pillugit Inatsisartut peqqussutaanni nr. 4-mi, 7. Maj 2007-imeersumi § 15.

Illit Isumaginninnermi Naammagittaalliuuteqartarfimmut allakkatigut 15. Marts 2013 ullulerneqartutigut naammagittaalliorputit. Naammagittaalliuutinni allapputit uiit kommunimit tapiissutinik qinnuteqaassimallugu Nuummi pilatsikkiartortutit ilaginiassammatit. Allakkanni aamma taavat sanngiitsutut misigisimallutit uissanngusarlutillu, tassanngaannarlu annialertarlutit.

Inatsisitigut tunngavigisat:

Siusinaartumik pensionisiat pillugit Inatsisartut peqqussutaanni nr. 4-mi, 7. Maj 2007-imeersumi § 15, imm. 1 malillugu inmmut tapit pisariaqartitanik pisut ataasiakkaarlugit naliliineq tunngavigalugu akuersissutigineqartassapput, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiaannartumik ikiorsiissutitut.

Naliliineq:

Isumaginninnermi Naammagittaalliuuteqartarfik isumaqarpoq Kommune-p aalajangiinera eqqortuusoq tunngaviali allanngortinneqarluni.

Isumaginninnermi Naammagittaalliuteqartarfiup Inatsisartut peqqussutaat nr. 4, 7. Maj 2007-imeersoq malillugu immikkut ittumik pisariaqartitsisoqarnissaa pingaartippaa.

Isumaginninnermi Naammagittaalliuuteqartarfik isumaqarpoq sunngakkut ujarattap peernissaa pllugu xxx-mmut pilatsikkiartornissannut uivit angalaqataanissaanut aningaasartuutit matussitissaannik inummut tapimik tunineqarnissannut pisinnaatitaanngitsutit, pissutigalugu pilatsinnissat  inuuninnut uloriarnartorsiortitsisussaanngimmat, taamaalilluni immikkut pisariaqartitsisoqannginnera tunngavigalugu aningaasartuutinut matussutissiinissaq tunngavissaqarani.

Tamatuttaaq Isumaginninnermi Naammagittaalliuuteqartarfiup oqatigissavaa taamaallaat inummut tapinik akuersissuteqartoqarsinnaammat siusinaartumik pensionisialimmut, imaappoq aappaasumut tunniussisoqarsinnaanani. Taamaalilluni siusinaartumik pensionisialik aapparisami aningaasartuutaanut matussitissanik inummut tapimik qinnuteqarsinnaanani.

Taamaattumik Isumaginninnermi Naammagittaalliuuteqartarfiup kommunimut oqaatigissavaa B-ip pisortanit ikiorsiissutinik aningaasartuutiminut matussutissanik qinnuteqarsinnaanera kommnip eqarsaatigisimasariaqaraluaraa.

Aalajangiineq:

Kommune-p 14. Marts 2013 aalajangiinera atortussaatinneqarpoq.

Inussiarnersumik inuulluaqqusillunga

Naja Joelsen

Siulittaasoq 

 

Inatsisit toqqammaviit:

Siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq

Inummut tapit

§ 15. Inummut tapit pisariaqartitanik pisut ataasiakkaarlugit naliliineq tunngavigalugu akuersissutigineqartassapput, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiaannartumik ikiorsiissutitut.