Siusinaartumik pensionisiaqalernissamut piffissaliussamut tunngatillugu Kommune-p septembarip 13-ani 2011 aalajangiinera-, pensionisiat nalimmassarnissaat pillugu oktobarip 23-ani 2012 aalajangiinera kiisalu taarsersugassanngorlugit inummut tapiissutisinissaq pillugu januaarip 27-ani 2012 aalajangigaa pillugu maalaarutit, Isumaginninnermi Naammagittaalliuteqartarfiup februaarip 15-ani 2013 suliaraa, imalu aalajangiivigalugu:

AALAJANGIINERIT

Kommune-p januaarip 27-ani 2012 kiisalu oktobarip 23-ani 2012 aalajangigai allanngortinneqarput. Kommuni kukkusumik aalajangiisimammat maalaarutit ilalerneqarpoq. Tamatuma qanoq sunniuteqarnissaa allakkiap matuma naggataani takusinnaavat.

Kommune-p septemnbarip 13-ani 2011 siusinaartumik pensionisiaqalernissamut piffissaliussaq pillugu aalajangiinera atuutiinnassaaq. Kommuni tassani eqqortumik aalajangiimmat, maalaarutit ilalerneqanngilaq.

Suliaq siusinaartumik pensionisiat pillugit Inatsisartut peqqussutaat nr. 4, maajip arfineq aappaani 2007 –imeersoq kiisalu pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8 juunip 13-ani 1994-imeersoq naapertorlugit aalajangiivigineqarpoq.

Nassuiaat:

Juunip 14-ani 2011, 2010-mi novembari qaammat suliaritinninnut atatillugu aanaartoorsimanerit pissutigalugu siusinaartumik pensionisiaqalernissaq qinnutigaat. Qinnuteqaatit naapertorlugu 1998-imi social-sundhedshjælperitut ilinniarsimavutit, juuni qaammat 2010 tikillugu ilinniakkat tunngavigalugu sulisimavutit inissanillu majuartarfeqanngitsumik qunnuteqarlutit.

Novembarip 25-ani 2010 X-ip napparsimaviani universititimut attaveqartumi X-milu nakorsartinnerit, X-mit uppernarsineqarpoq. Tullianik nakorsartinnerpit naammassinissaata tungaanut sulisinnaanngikkallarnissat, X-p inassutigaa.

X-p Napparsimavissuani Nakorsartittunut immikkoortortaqarfimmi aqutsisup nakorsaanerup juunip 22-ani 2011 allakkamini inunnguuseralugu taqqatigut innarluummik nassaarfiusimanerit oqaatigaa. Nappaat taanna noqarnermik niaqorlunnermillu nassataqarsinnaasarpoq navianaatilimmillu aanaatoortitsisinnaalluni. Erninni najugaqaannarsinnaannginnerit taamaammallu innarluutilinnut piukkunnarsakkamik inissarsiornissannik innersuunneqartariaqarnissat, nakorsaanerup ilanngullugu oqaatigaa. Tamatuma saniatigut 2010-mi napparsimalerninniilli sulisinnaasimannginnerit, ajoqutillu ataavartutut nalilerlugu siusinaartumik pensionisiaqalernissannut innersuuppaatit.

Septembarip 13-ani 2011, juulip aallaqaataani 2011 atuutilersumik siusinaartumik pensionisiaqalersussanngorputit. Kommunip Timikkut ajoquteqarneq tunngavigalugu sulisinnaanerup anigugassaanngitsumik annikillisimanera, aalajangiinermut tunngavilersuutigaa aallarnerfissaanulli tunngavilersuuteqarsimanani. Inatsisit tunngavigisani- siusinaartumik pensionisiat pillugit Inatsisartut peqqussutaat nr. 4 maajip arfineq aappaani 2007-imeersoq § 6 imm. 1 kiisalu § 17- kommunip innersuussutigai. Aalajangersakkat issuaavigineqanngillat. Maalaaruteqarsinnaanermut ilitsersuisoqarpoq.

Januaarip 27-ani 2012, 10.702,50 koruuninik siusinaartumik pensionisiat pillugit Inatsisartut peqqussutaat nr. 4, maajip arfineq aappaani 2007-imeersoq § 15 naapertorlugu taarsigassannik inuttut tapiiffigineqarputit. Aningaasat taakku ineqarnermut akiliutissatut siullertut qularnaveeqqusiissummullu atugassatut, Kommune-mit akuersissutaapput. Akiitsorqarnermut uppernarsaatitut atsiugaq januaarip 27-ani 2012-imeersoq naapertorlugu, marsip aallaqqaataani 2012 utertitassavit tamakkernissaasa tungaanut, qaammammut 1000 koruuninik akilersuinerit aallartissavat.

Oktobarip 23-ani 2012 Kommune-p aalajangiinera naapertorlugu novembarip aallaqqaataani 2012 siusinaartumik pensionisiatit nalimmassarneqassapput. Pensionisiavit saniatigut isertitaqanngivikkavit, suna nalimmassaanissamut tunngaviunersoq aalajangiinermi ilanngunneqarsimanngilaq. Aalajangiinermi siusinaartumik pensionisiaqarneq pillugu Inatsisartut peqqussutaat nr. 4 maajip arfineq aappaani 2007-imeersoq § 11 imm. 1 naapertorlugu, siusinaartumik pensionisiat ukiut tamaasa nalimmassarneqartartussaanerat innersuussutigineqarpoq. Aalajangersagaq issuaavigineqarpoq. Tamatuma saniatigut aalajangiinerup maalaarutigineqarsinnaanera pillugu ilitsersuisoqarpoq.

Kommune-p allattugaataanut oktobarip 23-ani 2012 nalunarsukkat naapertorlugit, siusinaartumik pensionisiaqalerfimmiit pisortanit ikiorsiissutisiarisimasat ilanngaataasimapput.

Taamaasillutillu taakku tamarmik utertsinneqareermata, kommunip siusinaartumik pensionisiat novembarip aallaqqaataaniit 2010 tunniunneqartut, inunnut kisimiittunut isertitaqanngitsunut siusinaartumik pensionisiaritinneqartartunut qaffasinnerpaanut nalimmassagassanngortsippai.

Novembarip tallimaani 2012 maalaarutinni X-p Napparsimavissuani nakorsat oqaasii naapertorlugit 2011-imi juuni qaammat aallarnerfigalugu siusinaartumik pensionisiaqalersussaasimanerit  oqaatigaat. Tamatuma saniatigut Kommune-mut qaammammut 1000 koruuninik taarsersuinikkut, siusinaartumik pensionisiavit naammagunnaarlugit ilanngarneqartarnerat maalaarutigaat.

 

Inatsisit tunngaviusut:

Siusinaartumik pensionisiat pillugit Inatsisartut peqqussutaat nr. 4 maajip sisamaani 2007-imeersoq § 6 imm. 1 naapertorlugu inuit timikkut, eqqarsartaatsikkut inooqataanikkulluunniit pissutsinik patsiseqartumik inuussutissarsiorsinnaanermikkut ataavartumik appariaateqarsimasut siusinaartumik pensionisianik tunineqarsinnaapput.

- 11 imm. 2 naapertorlugu siusinaartumik pensionisiat tunniunneqartartut, ukiup ingerlanerani siusinaartumik pensionisiallip inuttut imaluunnit aningaasaqarnikkut pissutsit atugarisaasa pingaarutilimmik ataavartumillu allannguuteqarsimaneri naapertorlugit nalimmassarneqartassapput. Nalimmassaatit, allannguinermiit qaammatip tulliuttup ullua siulleq aallarnerfigalugu atuutilertassapput.


Siusinaartumik pensionisiat pillugu Inatsisartut peqqussutaat nr. 4 maajip arfineq aappaani 2007-imeersoq § 15 naapertorlugu inummut tapit pisariaqartitanik pisut ataasiakkaarlugit naliliineq tunngavigalugu akuersissutigineqartassapput, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiaannartumik ikiorsiissutitut.

 - 15 imm. 2 naapertorlugu inummut tapit utertillugit akileqquneqarsinnaapput:

1) illersorneqarsinnaanngitsumik aningaasanik aqutsinerlunneq pissutigalugu inummut tapit tunniunneqarpata, imaluunniit
2) siusinaartumik pensionisialik inummut tapinik pisartagaqartoq, kingusinnerusukkut aningaasanik, piffissamut pineqartumut inummullu tapiutit assinganik, siunertaqartumik pissarsisimappat.

Tamatuma saniatigut imm. 3 naapertorlugu taarseeqqusineq aatsaat piumasarineqarsinnaavoq, siusinaartumik pensionisialimmut tapinik tunniussinermut atatillugu utertitsisussaatitaanermik ilisimatinneqarsimappat.

Siusinaartumik pensionisiat pillugu Inatsisartut peqqussutaat nr. 4 maajip arfineq aappaani 2007-imeersoq § 17 naapertorlugu, qinnuteqaatip tunniunneqarnerata aammalu piumasaqaataasut naammassineqarnerisa kingorna qaammatip qinnuteqarfiusup allaqqaataa aallarnerfigalugu, siusinaartumik pensionisianik pisartagaqarsinnaatitaaneq atuutilersinneqartassaaq.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8 juunip 13-ani 1994-imeersoq § 24 naapertorlugu aalajangiinermut tunngaviusumik nalunaarummi inatsisini maleruaqqusat aalajangiinermi tunngavigineqartut innersuussutigineqassapput. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat, tunngaviusumik nalunaarummi pissutaasut pingaarnerusut isummat tamakku atornerannut aalajangiisuunerusut taaneqassapputtaaq.

Naliliineq:

Kommune-p septembarip 13-ani 2011 aalajangiinera  eqqortutut Isumaginninnermi Naammagittaalliuteqartarfiup nalilerpaa. Juunip 14-ani 2011 aatsaat siusinaartumik pensionisiaqalernissannut qinnuteqarnerit qinnuteqarfillu sioqqullugu siusinaartumik pensionisititsisoqarsinnaannginnera, taama aalajangiinermut tunngavilersuutaapput. Juunip 14-at 2011 sioqqullugu siusinaartumik pensionisiaqalernissaq pillugu kommunimut saaffiginnissimaninnut uppernarsaatissaqannginnera pingaartutut tunngavigineqarpoq. Taamaakkaluaq Isumaginninnermi Naamagittaalliuteqartarfiup isumaa naapertorlugu, Kommune-p siusinaartumik pensionisiat pillugit Inatsisartut peqqussutaat nr. 4 maajip arfineq aappaanni 2006-imeersoq § 17 issuaavigisariaqaraluarpaa taamatullu eqqarsaatigisassat pingaarutillit aalajangiinermi tunngavigineqartut nasuiaatigisimasariaqaraluarpai.

Siusinaartumik pensionisiat pillugit Inatsisartut peqqussutaat nr. 4 maajip arfineq aappaani 2006-imeersoq § 15 naapertorlugu inummut tapiissutinut tunngatillugu januaarip 27-ani 2012 aalajangiineq, Isumaginninnermi Naammagittaallliuteqartarfiup isumaa naapertorlugu aningaasat utertitassanngortinneqarsinnaanngillat. Inummut tapit taarsigassanngortsinneqarsinnaapput aatsaat:

- Tapisititsineq aningaasanik aqutsinerliornermik patsiseqarpat imal.

- Siusinaartumik pensionisiallip inuttut tapisitinneqarnerani, piffissaq siunertarlu pineqartoq assigiippata.

Ineqarninnut qaammat siulleq siumoortumillu qularnaveequsiinermut akiliutissatut inummut tapit akuersissutaasimanerat, tamatumunnga tunngavilersuutaavoq. Inummut tapit aningaasanik aqutsinerliornermik patsiseqartumik tunniunneqarsimanerannut tunngasunik imal. siunertap tamatuma assinganik tunineqarsimaninnut paasissutissaqanngimmat, Kommune-p aningasat tunniussat utertsitassanngortissinnaanngilai. Tamannalu akiitsoqarnermut uppernarsaammik januaarip 27-ani 2012 ullulikkamik atsioraluaraannilluunniit atuuppoq.

Ikiorsiissut tamakkiisumik ilaannakortumilluunniit taarsersimagukku akiliutigisimasat utertsissinnaavat.

Kommune-p oktobarip 23-ani 2012 aalajangiinera  Isumaginninnermi Naammagittaalliuteqartarfiup kukkusutut nalilerpaa. Siusinaartumik pensionisiaqalersinnaanermiit aningaasat pisinnaasat,

piffissaq pineqartoq tamaat pensionisiavit saniatigut isertitaqarsimannginnerit pissutigalugu, kisimiittunut siusinaartumik pensionisiat qaffasinnerpaajusariaqarnerat pissutigalugu, siusinaartumik pensionisianik nalimmassaanerunnginnera, tamatumani tunngavilersuutaavoq.

Siusinaartumik pensionisiaqalernissat sioqqullugu pisortanit ikiorsiissutisiannik taarsersuineq siusinaarlutit pensionisiannik nalimmassaanerunngimmat, aalajangiineq eqqortuunngilaq.

Aalajangiineq:

Kommune-p septembarip 13-ani 2011 aalajangiinera atuutiinnassaaq.

Kommune-p januaarip 27-ani 2012 aalajangiinera inuttut tapiissutisiannik taarsersuisussaajunnaarlutit allanngortinneqarpoq; tamakkiisumik ilaannakortumilluunniit taarsersuisimaguit aningaasat taakku utertsinnissaat pisinnaatitaaffigaat.

Kommune-p oktobarip 23-ani 2012 aalajangigaa atorunnaarsinneqarpoq, taamaasillutit pensionisiaqalerninniit akiliutaasartut qaffasinnersaannik tunineqartussaanerit pissutigalugu, siusinaarluni pensionisiat nalimmassarneqarsimanngillat.

Inussiarnersumik inuulluaqqusillunga

Naja Joelsen

Siulittaasoq