B maanna decembarip 22-ani 2008 siusinaartumik pensionisiassavit annertussusissaanik aalajangiinera pillugu naammagittaalliutit Isumaginninnermi Naammagittaalliuteqartarfiup apriilip 8-ni 2011 suliaraa imalu

AALAJANGIILLUNI:

B aalajangigaa allamik tunngavilersuuserlugu atuutsiinnarneqassaaq. Kommunip aalajangiinera eqqortuummat naammagittaalliutit taperserneqanngilaq. 

Siusinaartumik pisortanit pensionisiaqarneq pillugu Inatsisartut peqqussutaat nr. 4 maajip 7-ani 2007 –imeersoq tunngavigalugu suliaq aalajangiivigineqassaaq.

Nassuiaat:

Aappariillusi siusinaartumik pensionisiaqarnersi ilisimatitsissutaavoq.

Decembarip 22-ani 2008 aalajangiinermi, 2009-mi januaarip aallaqqaataaniit akileraarutit suli ilanngaatiginagit qaammammut 5.551 koruuninik siusinaartumik pensionisiaqalernissannik nalunaarfigineqarputit. Kommunip akissarsianut nalunaarusiaa naapertorlugu 2009-mi 301 koruunit qaammammut akileraarutaapput. Nuliat illit pensionisiavit angeqqataanik qammammut pisartagaqartussaavoq. Qaammammut inigisassinnut innaallagissamullu 1.993,55 koruunit akilertarisi ilisimatitsissutaavortaaq.

Aalajangiineq naapertorlugu 2007-imi aapariillusi isertitasi tunngavigalugit pensionisiassat naatsorsorneqarput. 2007-imi siusinaartumik pisortanit pensionisiat saniatigut allanik isertitaqanngilasi.

B inatsit tunngavigisatut innersuussutaa tassaavoq Inatsisartut peqqussutaat nr. 4 maajip 7-ani 2007-imeersumi § 11, taanna naapertorlugu isertitat ilisimaneqartut kingulliit tunngavigalugit, siusinaartumik pensionisiat januaarip aallaqqaataani nalimmassaavigineqartarput.

Maalaarutinni akiligassat annertusisimagaluit pensionisiat annikinnerulersimanerat oqaatigaat.

B juulip 23-ani 2009 Isumaginninnermi Naammagittaalliuteqartarfimmut allakkamini ilaatigut oqaatigaa, aappariillusi qaammatit tamaasa 10.500 koruuninik siusinaartumik pensionisisartusi; ineqarnermut, innaallagissamut kiassarnermullu akiligassat akilereerneranni 8.506,65 koruunit sinneruttarisi, taakulu kommunalbestyrelse-p aappariinnut tamarmik siusinaartumik pisortanit pensionisialinnut annikinnerpaaffissatut aalajangiussaannit 8.000 koruuniusunit qaffasinnerupput.

Inummut tapit pisariaqartitanik pisut ataasiakkaarlugit naliliineq tunngavigalugu akuersissutigineqartarnissaat, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiaannartumik ikiorsiissutitut pineqartarnissaannik, siusinaartumik pisortanit  pensionisiaqarneq pillugu Inatsisartut peqqussutaat nr. 4 maajip 7-ani 2007-imeersoq § 15, Kommuneqarfik Sermersuup innersuussutigaa.

Inatsisit tunngaviusut:

Inatsisartut peqqussutaat nr. 4 maajip 7-ani 2007-imeersoq § 11 naapertorlugu siusinaartumik pisortanit pensionisiat isertitat ilisimaneqartut kingulliit tunngavigalugit januaarip aallaqqaataani nalimmassaavigineqartarput.

Siusinaartumik pensionisiaqalerneq pillugu Inatsisartut peqqussutaat nr. 4 maajip 7-ani 2007-imeersoq § 15 imm. 1 naapertorlugu, immikkut naliliivigineqarnikkut tapisisoqarsinnaavoq taakkulu ingerlaavartumik pisartakkatut sivisunerpaamik ukiumut ataatsimut atuuttussanngorlugit aalajangersarneqartunik-, imaluunniit immikkut pisariaqartitanut matussutissatut ataasiaannartumik ikiorsiissutitut- akuersissutigineqartassapput.

Naliliineq:

Pensionisiannit akileraarutigisatit 301 koruunit  ilanngaataasimanngimmata, B-p naatsorsuinera Isumaginninnermi Maalaarutinik Aalajangiisartoqatigiit eqqortuusorinngilaat. 

Nuliavit akileraarutaanut tunngasunik paasissutissaqanngilaq.

Siusinaartumik pensionisiassassinnik naatsorsuinermi peqqussummi § 11 naapertorneqarsimasoq, Isumaginninnermi Maalaarutinik Aalajangiisartoqatigiit naliliipput. Taamaasillusi siusinaartumik pensionisianik qaffasinnerpaanik 2009 aappariinnut 11.101 koruuniusunik pisarpusi.

Ineqarnermut innaallagissamut kiassarnermullu akiligassat akilereerlugit aningaasat sinneruttut nalinginnaasumik inuussutigisinnaagassigit, aappariillusi inuttut tapisiaqartitaasinnaanngitsusi, Isumaginninnermi Maalaarutinik Aalajangiisartoqatigiit naliliipputtaaq.

Inuttut tapisinissamut qinnuteqarnermi pensionisiallip pisariaqartitsinerata immikkut naliliivigineqartussaanera, Isumaginninnermi Maalaarutinik Aalajangiisartoqatigiit kommunimut oqaatigissavaa.

Taamaasilluni inuttut tapisititsinermi tunngavissamik nalinginnaasumik killiliinissamut peqqussut periarfissiinngilaq.

Pisoq aallaavigalugu kommunip aalajangigaata allanngortinneqarnissaa tunngavissaqanngitsoq, Isumaginninnermi Maalaarutinik Aalajangiisartoqatigiit naliliipput.

Aalajangiineq:

B maanna B aalajangiinera tunngavilersuutaa allanngortillugu atuutsiinnarneqassaaq.

Inussiarnersumik inuulluaqqusillunga

Naja Joelsen

Siulittaasoq