Siusinaartumik pensionisiat pingaartumik tunniunneqartalerfissaat pillugu A Kommuneata aalajangiinera naammagittaalliuutigisat Isumaginninnermi Naammagittaalliuuteqartarfiup ulloq 25. juni 2010 suliaraa imatullu

Aalajangiilluni

Ulloq 1. januar 2007 aallarnerfigalugu siusinaartumik pensionisiaqarsinnaatitaalerputit. Tamanna isumaqarpoq illit naammagittaalliuutinni taperserneqanngitsutit.

Suliaq aalajangiiffigineqassaaq siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq naapertorlugu.

Nassuiaat:

Ulloq 27. november 2006 siusinaartumik pensionisianik qinnuteqarputit.

Ulloq 22. maj 2007 pingaartumik siusinaartumik pensionisiaqarsinnaatitaalerninnut ulluliussaq pillugu A Kommuneata aalajangiinera naammagittaalliuutigaat. Oqaatigaat siusinaartumik pensionisiaqalernissat allartittussaasoq november 2005-imiit november 2006-iminngaanniinngitsoq, pissutigalugu ukioq 2005 novemberimi suliunnaaravit.

Paasissutissat nassiunnerinut atatillugu A Kommunea paasissutissanik allanik saqqummiussaqanngilaq.

Suliamik ingerlatsisup allakkatigut naliliineranit takuneqarsinnaavoq talinni talerpillermi aammalu qatiggavit talerpiata tungaani anniartartutit 2005-imi sakissakkut kræftimik nappaateqarnerit pissutigalugu pilatsinnerpit kingunerisaanik, aammalu sumik arlaannik ilinniagaqarnak. Aamma takuneqarsinnaavoq ulloq 1. december 2006 aallarnerfigalugu siusinaartumik pensionisiaqalertussatut inassuteqaatigineqartariaqarsimasutit. Taamaattorli misissortariaqartoq sulisinnaanerit ataavartumik appariaateqarnersoq.

Ulloq 17. december 2006 nakorsap misissuineranit paasisat malillugit tununni/qatiggavit nalaani talerpiata tungaani ippiuuteqarputit, timivit talerpiata tungaata nukillaariartornera malunnarluni, talinni talerpillermi anniartarlutit, tamannalu pissutigalugu talivit aalatittarnera killeqalerluni, kiisalu qasoqqajaasarlutit.

Paasissutissanik nassiussinermut atatillugu allakkatigut aalajangiinermik kommuni ilanngussaqanngilaq, taamaalilluni takuneqarsinnaanani allakkatigut  aalajangiisoqarsimanersoq tunngavilikkamik, naammagittaalliorsinnaanermut ilitsersuutitalimmik inatsisitigullu tunngavigisamut innersuussutitalimmik kiisalu inatsisini maleruaqqusanik issuaanertalimmik.

 

Inatsisitigut tunngavigisat:

Inatsisartut peqqussutaanni nr. 4-mi, 7. maj 2007-imeersumi § 6, imm. 1 tunngavigalugu inuit timikkut, eqqarsartaatsikkut inooqataanikkulluunniit pissutsinik patsiseqartumik inuussutissarsiorsinnaanermikkut ataavartumik appariaateqarsimasut siusinaartumik pensionisianik tunineqarsinnaapput.

Inatsisartut peqqussutaanni nr. 4-mi, 7. maj 2007-imeersumi § 17 malillugu qinnuteqaatip tunniunneqarnerata aammalu piumasaqaataasut naammassineqarnerisa kingorna qaammatip qinnuteqarfiusup aallaqqaataa aallarnerfigalugu siusinaartumik pensionisianik pisartagaqarsinnaatitaalerneq atuutilersinneqartassaaq.

Naliliineq:

Isumaginninnermi Naammagittaalliuuteqartarfik naliliivoq ulloq 1. januar 2007 aallarnerfigalugu siusinaartumik pensionisiaqarsinnaatitaalertussaasutit.

Isumaginninnermi Naammagittaalliuuteqartarfiup pingaartutut isigaa nakorsap misissuineranit paasisat malillugit sulisinnaanerit ataavartumik appariaateqartoq ukioq 2005 novemberimi sakissanni talerpiup tungaani kræftimik nappaateqarnerit pissutigalugu pilatsillutit suliaritinnerpit kingunerisaanik pissuteqartumik. Timivit talerpiata tunngaani tamarmi nukillaariartornermik pissuteqartumik ippiuuteqarneq, qatiggavit talerpiata tungaani talinnilu talerpillermi anniarneq, tamannalu pissutigalugu talivit aalatissinnaanera killeqalerluni kiisalu qasoqqajaasunngorneq.

Aammattaaq isumaginninnermi Naammagittaalliuuteqartarfiup pingaartutut isigaa sulisinnaanerpit ataavartumik appariaateqarsimaneranik naliliineq nakorsamit Y-mit misissuinermi ulloq 17. december 2006 pisumi suliarineqarsimammat, taamaattumik illit Inatsisartut peqqussutaanni nr. 4-mi, 7. maj 2007-imeersumi § 17 malillugu sulisinnaanerpit ataavartumik appariaateqarsimanerata paasineqarnerata kingorna siusinnerpaamik qaammammit tulliuttumit siullermit siusinaartumik pensionisiaqalersinnaatitaassasutit. 

Kommunip nammineq inassuteqaammi malinnissaa qinersimagaluaruniuk, taanna malillugu illit ulloq 1. december 2006 aallarnerfigalugu siusinaartumik pensionisiaqalerlutit, taava Isumaginninnermi Naammagittaalliuuteqartarfiup tamanna akuerisimassagaluarpaa, kommunillu qaammammi tassani siusinaartumik pensionisiat utertillugit akilerneqarnissaat ilinnit piumasarisinnaassanngikkaluarpaa, pissutigalugu  siusinaartumik pensionisiat ilinnut tunniunneqartut illit pisassarivitatut tigugakkit.

Kommunip siusinaartumik pensionisiaqarsinnaatilersimappatit 1. januar 2007-ip kingorna, taava kommunip siusinaartumik pensionisiassatit ullormit 1. januar 2007-imit kingumoortumik ilinnut tunniutissavai.   

Kiisalu Isumaginninnermi Naammagittaalliuuteqartarfiup siulittaasuata uparuassavaa kommunip naammagittaalliuummik suliassamut tunngatillugu paasissutissat suliamut tunngassuteqartut Isumaginninnermi Naammagittaalliuuteqartarfimmut nassiuttussaammagit, taamaalilluni Isumaginninnermi Naammagittaalliuuteqartarfik suliamik naliliinissaminut pitsaanerpaamik tunngavissaqaqqullgu.

Aalajangiineq:

Ulloq 1. januar 2007 aallarnerfigalugu siusinaartumik pensionisiaqarsinnaatitaalerputit.

Inussiarnersumik inuulluaqqusillunga

Naja Joelsen

Siulittaasoq