Ulloq 1. november 2008 aallarnerfigalugu siusinaartumik pensionisiaqarnissannut tunngatillugu inassuteqaat pillugu S Kommuneata ulloq 20. oktober 2008 aalajangiinera naammagittaalliuutigisat Isumaginninnermi Naammagittaalliuuteqartarfiup ulloq 25. juni 2010 suliaraa imatullu

Aalajangiilluni

S Kommuneata ulloq 20. oktober 2008 aalajangiinera allanngortinneqarpoq, imaalillugu illit 1. november 2008 siusinaartumik pensionisiaqarnerit aallartittoq  ingerlaannassasoq. Imaappoq illit naammagittaalliuutinni taperserneqarputit.

Suliaq aalajangiiffigineqassaaq siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq naapertorlugu.

Nassuiaat:

Oqaatigineqarpoq nakorsaq 1995-imi naliliisimasoq illit qitikkut anniaateqartarnitit ilinniarteqqitaanissannullu periarfissaqannginera pissutigalugit siusinaartumik pensionisiaqalertariaqartutit. Taamaattoq suliffeqartarnerit ingerlatiinnarpat, kisiannili taamaatittariaqartarlutit anniartarnermik, taamaammallu 2005-imi siusinaartumik pensionisiaqalerlutit.

S Kommuneata ulloq 20. oktober 2008 aalajangiinermini siusinaartumik pensionisiaqarnerpit ullormit 1. november 2008 unitsinneqarnissaa inassuteqaatigaa.

Kommunip pingaartutut isigaa nakorsap misissuinerata takutimmagu sulisinnaassuseqartutit.

Kiisalu kommuni allappoq siusinaartumik pensionisiallit tamarmik sulisinnaassuseqarnermikkut ingerlaavartumik naliliiffigineqartalissasut.

Inatsisini tunngavittut S Kommuneata innersuussutigalugulu issuarpaa Inatsisartut peqqussutaanni nr. 4-mi, 7. maj 2007-meersumi § 18, imm. 1 aamma 2.

Allakkatigut 7. november 2008 tiguneqartutigut kommunip aalajangiinera Isumaginninnermi Naammagittaalliuuteqartarfimmut naammagittaalliuutigaat. Oqaatigaat 2005-imi augustimiit siusinaartumik pensionisiaqalersimallutit ujalunni gigteqarnerit pissutigalugu, kiisalu 1995-imiilli suleqqissimanak.

Aamma oqaatigaat 2008-mi nakorsap misissuinerisa marluk tamarmik inernerigaat suliunnaarnissat, taamaammat kommunip naliliinera paasisinnaanngikkit.

Paasissutissat suliamut tunngassuteqartut ulloq 18. maj 2009 Isumaginninnermi Naammagittaalliuuteqartarfimmut nassiunnerinut atatillugu S Kommunea paasissutissanik allanik saqqummiussaqanngilaq.

Nakorsap X ulloq 15. juni 1995 misissuisimaneranit takuneqarsinnaavoq illit 1981-imiilli makitsinni annertusiartortumik anniaateqartartutit annernartoq nissunnut atasarluni, taamanili aamma paasineqarpoq tunukkut gigteqartutit.

Aamma takuneqarsinnaavoq anniaateqartuarnerpit erloqisittaraatit, pingaartumik nukinni anniaateqarlutit, ilinniakkatit oqaatsitigullu pisinnaasatit allaagaluarpata ilinniarteqqitaanikkut allatut sulilersinnaagaluartutit.

Ulloq 17. september 2008 nakorsap misissuinerani paasineqarpoq nukitsigut naggussatigullu anniaateqartutit kisianni tallitit, nissutit qimerluutit pukutsullu aalalluarsinnaallutik. 

Nakorsap Y ulloq 13. november 2008 misissuinerani paasineqarpoq nukitsigut naggussatigullu, seeqqunni illugiinni, tuinni saamerlermi makitsinnilu anniaateqartutit.

Aamma takuneqarsinnaavoq kivitsinermi tuinnik aalatitsisinnaanerit killeqartoq, makitsinni qeratatitsineq seeqqutillu illugiit anniarigitit.

Ilinnut tunngatillugu oqartariaqarpoq arlalinnik ippiuuteqartutit taamaattoq naapertuilluarneq tunngavigalugu oqassagaanni oqartariaqarpoq timikkut qanoq issutsit ataatsimut isigalugu nalinginnaasutut oqaatigisariaqartoq siuliini oqaatigineqartut eqqaassanngikkaanni. Nakorsap inassutigaa sulisinnaanerit misilinneqartariaqartoq.

Assigiinngitsunik ilinniagalinnik Ataatsimiititaliap ataatsimiinneranit imaqarniliaq malillugu nalilerneqarpoq siusinaartumik pensionisiaqarnerit unitsittariaqartoq, pissutigalugu nakorsap misissuinerata takutimmagu sulisinnaanerpit killeqalersimanera tunngavigalugu immikkut suliassatigut akissarsiatigullu aaqqissuussiffiusumik suliffeqartariaqartutit. Kommunip pingaarutilittut isigaa timivit ilaani arlalinni anniaateqarnerit, taamaattoq nakorsap paasisai tunngavigalugit timit aalalluarsinnaasutut oqaatigineqarluni.

Taamaattumik kommuni naliliivoq oqitsumik suliffeqarsinnaasutit.   

Inatsisitigut tunngavigisat:

Siusinaartumik pensionisiat pillugit Inatsisartut peqqussutaanni nr. 4-m i, 7. maj 2007-imeersumi § 18, imm. 1 tunngavigalugu utoqqalinermi pensionisiaqartut kommunimut Naalakkersuisunulluunniit nalunaaruteqarnissamik pisussaatitaapput, utoqqalinermi pensionisiamik iluarsiivigineqarnissaannik unitsinneqarnissaannilluunniit kinguneqarsinnaasunik inuttut atugarisamigut aningaasaqarnermigullu allannguuteqartoqarpat.

- 18, imm. 2 malillugu siusinaartumik pensionisiaqarsinnaatitaaneq atorunnaassaaq piumasaqaataasut naammassineqarsinnaajunnaarpata imaluunniit tunniussineq eqqunngitsumik tunngaveqarsimappat.

Naliliineq:

Isumaginninnermi Naammagittaalliuuteqartarfik naliliivoq 1. november 2008-miit siusinaartumik pensionisiaqarnerit ingerlaannarallassasoq  sulisinnaaninnik misiliivigineqareernerpit takutippagu suliffimmik nalinginnaasunik atugassaqartitsiviusumik, immikkulluunniit aaqqissuussiffiusumik tamatumunngaluunniit assingusumik ingerlatsisinnaasutit.

Sulisinnaaninnik misileereernerup takutippagu suliffimmi siuliini atugassarititaasunik atuiffiusumi sulisinnaasutit, taava siusinaartumik pensionisiatit unitsinneqassapput sulisinnaanerpit misiliiviginerata naammassinerani, imaappoq sulilivikkuit.

Sulisinnaaninnik misiliinerup takutippagu siuliini atugassarititaasut tunngavigalugit suliamik ingerlatsisinnaanngitsutit siusinaartumik pensionisiat 1. november 2008-miit atuuttut pisartagarineri ingerlaqqiinnassapput.

Tamanna isumaqarpoq S Kommuneata, 1. november 2008 aallarnerfigalugu sulinermik misiliinerup naammassereerneragut nalinginnaasumik sulilernerup immikkulluunniit aaqqissuussamik sulilernerup aallartinnera tikillugu  kingumoortumik siusinaartumik pensionisiat tunniutissagai.

Imaluunniit kommunip sulinermik misiliinerpit naammassinerani suliamik ingerlatsisinnaassanngikkuit kommunip 1. november 2008-miit ingerlaannartumik siusinaartumik pensionisiat tunniuttassavai.

Isumaginninnermi Naammagittaalliuuteqartarfiup pingaartutut isigaa kommunimit siusinaartumik pensionisianik unitsitsinissamik aalajangiineq taamaallaat pisinnaammat nakorsap nalunaarusiaata nutaap pissarsiarereerneratigut, aammalu sulinermik misiliinerup naammassereerneragut, misiliinerup takutippagu pineqartup inuussutissarsiorsinnaanermigut periarfissai pitsaanerulersut.

Taamaattumik Isumaginninnermi Naammagittaalliuuteqartarfik naliliivoq, kommunip uppernarsanngikkaa siusinaartumik pensionisianik pissarsinissamut piumasaasut naammassineqarnerisa atorunnaarnerat atorunnaarsitsisarneq pillugu Inatsisartut peqqussutaanni nr. 4-mi, 7. maj 2007-imeersumi § 18, imm. 2 malillugu piumasaasut naammassineqareerneranni.

Aalajangiineq:

S Kommuneata ulloq 20. oktober 2008 aalajangiinera allanngortinneqarpoq.

Inussiarnersumik inuulluaqqusillunga

Naja Joelsen

Siulittaasoq