Siusinaartumik pensionisiassavit amerlassusiligaanerannut tunngatillugu  Kommunip 7. December 2012 aalajangiinera naammagittaalliuutigisat Isumaginninnermi Naammagittaalliuteqartarfiup siulittaasuata 25. Oktober 2013 suliaraa imatullu aalajangiilluni:

Aalajangiineq

Kommunip aalajangiinera utertinneqarpoq. Imaappoq Kommuniap suliaq nutaamik suliareqqissavaa nutaamillu aalajangiilluni.

Suliaq aalajangiiffigineqassaaq siusinaartumik pensionisiat pillugit Inatsisartut peqqussutaat nr. 4, 7. Maj 2007-imeersoq naapertorlugu.

Nassuiaat:

Suliami takuneqarsinnaavoq illit 1. November 2011-miit siusinaartumik pensionisiaqarsimasutit. Oqaatigineqarpoq katissimasannik aappaqartutit uiillu pensionisiaqanngitsoq sulisorli.

Oqaatigineqarpoq illit 2012-imi tamakkiisumik pensionisiaqartutit, imaappoq qaammammut 8.333,00 koruunit pisartagaralugit akileraarutit ilanngaatiginagit. Naatsorsuinermi tunngavigineqarpoq isertitat amerlassusaat 0 koruuniusoq. Naatsorsuineq suliarineqarpoq illit aapparpillu 2012-imi isertitassassitut naatsorsuutigisasi tunngavigalugit.

Kommunip 7. December 2012 aalajangiinerani illit siusinaartumik pensionisiatit appartinneqarput 1.767,00 koruuninut akileraarutit ilanngaatiginagit.

Naatsorsuinermi Kommunip tunngavittut atorsimavai 275.953,00 koruunit, tassa illit aapparpillu 2011-imi katillugit isertitarisimasasi. Oqaatigineqarpoq aappat 2011-imi isertitaqarsimasoq 129.954,00 koruuninik, illillu ukiumi tassani 145.999,00 koruunit isertitarisimagitit siusinaartumik pensionisiat ilanngaatigalugit.

Naammagittaalliuutinni ilaatigut allapputit illit qaammammut marloriartumik siusinaartumik pensionisiassatit tigusaritit, naammagittaalliuutigigillu januarimi tunniunneqartut siulliit 883,50 koruuniinnaammata.

Inatsisitigut tunngavigisat:

Siusinaartumik pensionisiat pillugit Inatsisartut peqqussutaanni nr. 4-mi, 7. Maj 2007-imeersumi § 11 malillugu siusinaartumik pensionisiat ukiut tamaasa 1. Januarimi, ukioq kingulleq isertitarisimasat ilisimaneqartut tunngavigalugit akinut nalimmassarneqartassapput.

Imm. 2 malillugu siusinaartumik pensionisiat tunniunneqartartut ukiup ingerlanerani, siusinaartumik pensionisiallip inuttut imaluunniit aningaasaqarnikkut pissutsit atugarisaasa pingaarutilimmik ataavartumillu allannguuteqarsimaneri naapertorlugit nalimmassarneqartassapput Nalimmassaatit, allannguinermiit qaammatip tulliuttup ullua siulleq aallarnerfigalugu atuutilertassapput.

Naliliineq:

Isumaginninnermi Naammagittalliuuteqartarfiup siulittaasua isumaqarpoq suliaq Kommunimut utertinneqassasoq, kommuni illit 2013-mi siusinaartumik pensionisassannik nutaamik naatsorsuissammat, tassani ilissi ukiumi 2013-imi isertitassatut naatsorsuutigisasi tunngavigalugit.

Tamatumunnga tunngaviuvoq illit 2011-mi isertitatit 2013-imi naatsorsuinermut ilaatinneqassanngimmata, pissutigalugu taamani siusinaartumik pensionisiaqalernissat pissutigalugu suliunaaravit.

Taamaattumik ukioq isertitaqarfiusutut kingullertut ilisimaneqartoq tunngavigalugu nalimmaassaasoqassanngilaq, pissutigalugu taamanikkut atugarisatit annertuumik ataavartumillu allannguuteqarmata.

Tamatumunnga tunngatillugu innersuussutigineqassaaq nalimassaaneq pisarmat allannguuteqartitsinerup kingorna qaammatip tulliuttup ulluisa siulliat aallarnerfigalugu.

Aalajangiineq:

Isumaginninnermi Naammagittaalliuuteqartarfiup siulittaasuata suliaq Kommunimut utertippaa nutaamik naatsorsuineq suliarisassanngorlugu.

Inussiarnersumik inuulluaqqusillunga

Naja Joelsen

Siulittaasoq

Inatsisit toqqammaviit

 

Siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq

-11. Siusinaartumik pensionisiat ukiut tamaasa 1. januarimi, ukioq kingulleq isertitarisimasat ilisimaneqartut tunngavigalugit akinut nalimmassarneqartassapput.

- Imm. 2. Siusinaartumik pensionisiat tunniunneqartartut ukiup ingerlanerani, siusinaartumik pensionisiallip inuttut imaluunnit aningaasaqarnikkut pissutsit atugarisaasa pingaarutilimmik ataavartumillu allannguuteqarsimaneri naapertorlugit nalimmassarneqartassapput. Nalimmassaatit, allannguinermiit qaammatip tulliuttup ullua siulleq aallarnerfigalugu atuutilertassapput.