AALAJANGIIVOQ

 

Kommunip aalajangersimasaa utertinneqassaaq nutaamillu suliareqqitassanngorlugu. Tamanna ima isumaqarpoq kommuni ilinnut tunngatillugu nutaamik aalajangiissasoq.

Taamaattumik suliaq aalajangerneqassaaq uku atuuttut malillugit siusinaartumik soraarnerussutisiat pillugit Inatsisartut Peqqussutaat nr. 4, 7. Maaji 2007-meersoq kingusinnerusukkut allannguuteqartinneqartoq aamma piginnaanngorsaqqinneq pillugu Inatsisartut Peqqussutaat nr. 4, 31. Maaji 2001-meersoq kingusinnerusukkullu allannguuteqartinneqartoq.

Nassuiaat:

 

Suliami takuneqarsinnaavoq, katissimasuusutit, nuliallu siusinaartumik soraarnerussutisianik pisartoq. Meeraqanngilasi pilersugassanik.

Paasissutigineqarnikuuvoq, piniartutut aalisartutut inuussutissarsiortuusutit. Piniarnerpillu nalaani qitikkut ajoqusersimavutit 2009-mi. Tamatuma kingorna nakorsap innersuussimavaatit siusinaartumik soraarnerussutisiaqalernissamut qinnuteqaateqassasutit. Tamannalu 2010-mi qinnuteqaatigisimavat.

Siusinaartumik soraarnerussutisianik qinnuteqaateqarninnut atatillugu piginnaanngorsaqqinnissamut imal. sulinermik misiliinissamut misilinneqanngilatit.

Ajoqusernerpit kingorna qanoq annertutigisumik piniartutut aalisartutut sulisarsimanerit paasissutigineqanngilaq.

Suliami takuneqarsinnaavoq, piffiup ilaani ikiorsiissutinik tunineqartarsimasutit, kiisalu 2012-mi 2013-milu isertitaqarsimanngitsutit nuliavit naatsorsuutsissimaneranit takuneqarsinnaalluni.

Qitikkut ajoqusernerit pillugu nakorsamiit paasissutissanik soqanngilaq, taamaattorli qitikkut anniartarnerpit saniatigut allanik ajoquteqanngilatit. Annerusumik piniariartarunnaarsimavutit, pitsorluttunngorsimagavit.

Aalajangiinermi siusinaartumik soraarnerussutisiaqalernissamut qinnuteqaatit itigartitsisutigineqarpoq ulloq 29. Oktobari 2014. Kommunip aalajangiinermi innersuussutigisimavaa § 6 Inatsisartut Peqqussutaat nr. 4 7. maaji 2007-meersoq kingusinnerusukkut allannguuteqartinneqartoq § 6 malillugu Inuit timikkut, eqqarsartaatsikkut inooqataanikkulluunniit pissutsinik patsiseqartumik inuussutissarsiorsinnaanermikkut ataavartumik appariaateqarsimasut siusinaartumik pensionisianik tunineqarsinnaapput. Tamannalu aalajangiinermi peqqutitut takuneqarsinnaanngilaq, suullu tunngavigalugit kommuuni aalajangiisimanersoq takuneqarsinnaanani.

Naammagittaalliuutinni ulloq 2. Decembari 2014 paasititsivutit, qitikkut atasuinnarmik anniartarnerit pissutigalugu piniartutut aalisartutullu sulisarnerit annertuumik kinguariaateqarsimasoq. Akiligassanut inuuniutissanullu malinnaasinnaajunnaarsimavutit.

 

Inatsisitigut tunngavigisaq:

Siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq kingusinnerusukkut allannguuteqartinneqartoq § 6 malillugu Inuit timikkut, eqqarsartaatsikkut inooqataanikkulluunniit pissutsinik patsiseqartumik inuussutissarsiorsinnaanermikkut ataavartumik appariaateqarsimasut siusinaartumik pensionisianik tunineqarsinnaapput.


Imm. 2. Inuit siusinaartumik pensionisianik tunineqarsinnaalersinnagit pineqartoq piginnaanngorsaqqinniarlugu kommuni misiliisimassaaq.

Siusinaartumik pensionisiat pillugit Inatsisartut inatsisaat nr. 40, 9. december 2015-imeersoq kingusinnerusukkut allannguuteqartinneqartoq

8. Siusinaartumik pensionisiaqalersitsisinnaanerup isummerfiginnginnerani, sutigut tamatigut qulaajaanikkut misissuiffigineqassaaq, ilumut qinnuteqaateqartoq sulileqqissinnaanissaa siunertaralugu suliniuteqartoqarsinnaanersoq, taamaattorli takujuk § 9, imm. 2.

Imm. 2.  Qinnuteqaateqartoq qulaajaaffigineqassaaq. Qulaajaanermilu ersersinniarneqassallutik qinnuteqaateqartup piginnaasai, ilumut qinnuteqaateqartup sulisinnaalernissaq siunertaralugu suliniuteqarfigineqarnermigut sulisinnaassutsini tamakkerlugu imaluunniit ilaannakortumik pissarsiareqqissinnaaneraa.


 Imm. 3.  Kommunalbestyrelsip qulaajaasoqarneranut atatillugu nalilersimassappagu, sulisinnaassuseq inuup pineqartup immikkut suliniuteqarfigineqarneratigut ineriartortinneqarsinnaasoq, taava kommunalbestyrelse tamatuminnga aalajangiissaaq qinnuteqartorlu piginnaanngorsaqqinnissamut innersuullugu.


 Imm. 4. Ataatsimiigiaqqusinermut aggersaanermut najuutinngitsoornermi aamma qulaajaaffigineqarnermi imaluunniit piginnaanngorsarneqarnermi peqataanngitsoqartillugu kingunerisassanik Naalakkersuisut malittarisassanik ersarinnerusunik aalajangersaasinnaapput.

 9. Inuit utaqqiisaagallartumik sulisinnaassutsimikkut annikillisitsisimasut piginnaanngorsaanermik ingerlatsissanngillat, qulaajaavigineqarnerup takutippagu maannakkut piginnaanngorsaaneq neriunaateqanngitsoq aamma sulisinnaassuseq pitsanngortinneqarsinnaanngitsoq. 

Imm. 2.  Piginnaanngorsaanissaq pissanngilaq uppernarsarneqarpat, imaluunniit pissutsit immikkuullarissut tunulequtaralugit ersarippat, pineqartoq sulisinnaassuseqanngitsoq siunissamilu sulisinnaassusaa ineriartortinneqarsinnaassanngitsoq.

Naliliineq:

Suliaq Kommunimut utertinneqassaaq nutaamillu suliareqqitassanngorlugu.

Matumunnga peqqutigineqartoq tassaavoq, suliamut paasissutigineqartut ajorpallaartut, taamaattumik Isumaginninnermut Naammagittaalliortarfiani aalajangiisinnaanngilaq, ilumut siusinaartumik soraarnerussutisiaqalersinnaanersutit.

Maluginiarneqarporlu, maannakkumut atuuttoq Inatsisartut Peqqussutaat nr. 4 7.maaji 2007-meersoq siusinaartumik soraarnerussutisiat pillugit kingusinnerusukkullu allannguuteqarsimasoq ullumimut atuuttumut Inatsisartut Inatsisaat nr. 40 9. Decembari 2015-meersoq siusinaartumik soraarnerussutisiat pillugit taarserneqarsimanersoq.

Siusinaartumik soraarnerussutisiat pillugit maleruaqqusat allanngornikuupput ilaatigut imatut, qinnuteqaateqartup sulisinnaassusaa nalilersorneqassaaq aamma aalajangerneqartassallunilu tamakkiisumik sulisinnaassusaata agguarneqarneratut.

Qinnuteqartumut pitsaanerpaaq anguniarlugu, Kommunip aalajangiinissani malittariaqaraluarpaa, pissutigalugu inatsimmi nutaami naliliisoqarsimanngimmat, sorliit malitassat qinnuteqartunut imal. sulianut aalajangiinissaq malinneqassanersoq.

Malitassat sorliit aalajangiiffigissanerlugit, qinnuteqaateqartumut pitsaanerpaaq anguniarlugu, ilaatigut ima malitseqarsinnaavoq, kommuni naliliinissat marluk tigusinnaasariaqassagai, ima oqaatigalugu naliliineq Inatsisartut Peqqussutaat nr. 4 7. Maaji 2007 siusinaartumik soraarnerussutisiat pillugit kingusinnerusukkullu allannguuteqartoq malittarissagaa aamma naliliineq Inatsisartut Inatsisaat nr. 40 9. Decembari 2015 siusinaartumik soraarnerussutisiat pillugit kingusinnerusukkullu allannguuteqartinneqartoq malinneqartoq.  Illit pillutit, taamaattumik Kommunip innuttaasunut pitsaanerpaamik toqqaassasoq.

Suliap kingumut suliareqqilerneranut atatillugu Kommunip illit peqqissusernut paasissutissat paasiniaassaaq.

Kiisalu kommunip misissussavaa, illit inuussutissarsiutinnut qanoq annertutigisumik sulisinnaassuseqarnersutit, ilanngullugit isertitatigut soqannginneq ajutoornermik imal allanik peqquteqarnersoq.

Kiisalu kommunip misissussavaa illit periarfissatit, sulinermik misiliineq imal. piginnaanngorsaqqinneq aqqutigalugit, inuussutissarsiummik minnerusumik qitinnut akornutaasussaanngitsumik sulilersinneqarsinnaanersutit.

Aalajangiineq allakkiaassaaq ukiullu affaata iluani aalajangerneqassalluni. Siusinaartumik soraarnerussutisiaqalernissat akuersissutigineqassappat, piffissaq akuersissutaaffigineqartoq aalajangiinermi ersarissumik tunngavilersorluagaassaaq.

Isumaginninnermi Naammagittaalliuuteqartarfiup siulittaasuata aalajangiinerup nutaap assilinera nassiunneqarnissaa kissaatigaa.

Isumaginninnermi Naammagittaalliuuteqartarfiup siulittaasuata immikkut ittumik naammaginartinngilaa, Kommunip aalajangiineq aatsaat ukiut sisamat qaangiutereersut aalajangersimammassuk, qinnuteqaat tunniunneraniit, suliamullu siuariaateqarsimanani, tamatumunnga tunngavilersuutaasinnaangitsunik.

Isumaginninnermi Naammagittaalliuuteqartarfiup siulittaasuata ajuusaarutigaa suliap taama sivisutigisumik ingerlanneqarsimammat, tamannalu allaffissornikkut peqquteqarpoq.

Aalajangiineq:

Kommunip aalajangiinera utertinneqassaaq nutaamik suliareqqitassanngorlugu. Kommuni nalilersueqqaassaaq, maleruagassat sorliit atorlugit, aalajangigassaq pitsaanerpaaq aalajangissallugu.

Inussiarnersumik inuulluaqqusillunga

Naja Joelsen

Siulittaasoq

Assilinera Kommunimut aamma allaffimmut XX.