2011-047081

Isumaginninnermik naammagittaalliuteqartarfiup siulittaasuata ulloq 13. april 2012 naammagittaalliuutit suliarisimavaa Kommune-p aalajangigaa, pisinnaatitaaffiginngikkit suliffeqanngikkallarnermik ikiorsiissutsinik pasartagaqarnissaq,  tamannalu tunngavigalugu ima aalajangiilluni

AALAJANGIINEQ

Kommunep aalajangiussaa tunuartinneqarpoq. Isumaqarporlu ima, kommunip suliassaq suliareqqissavaa aalajangiussamillu nutaamik nassillutit.

Suliaq aalajangerneqarpoq Suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. juni 2006-imeersoq najoqqutaralugu.

Qulaajaaneq:

Suliami erserpoq, paasissutissat tunniunneqarsimasut D-imiit naapertorlugit suliunnaarsimasutit 7. januar 2011-imi, tassannga kingullermik aningaasarsitinneqarlutit 14. januar 2011-imi.

Taassumallu kingorna Suliffissarsiuussisarfiup allaffeqarfianut Ilulissaniittumut saaffiginnissuteqarsimallutit qinnuteqaateqarsimallutillu suliffeqanngikkallarnermut ikiorsiissutinik.

Sulisitsisorisimasat paasissutissiisimavoq, suliassaqartitaasimasutit piffissami majimiit december 2010 tikillugu taamatullu akunnermut aningaasarsiarisimagitit 72,64, naapertuutsinneqartut SD-ip kaajallaatitaani.

Paasissutissat tunniunneqartut Kommune naapertorlugit oqaasiinnartigut itigartitsissummik apuussiffigineqarimavutit qinnuteqaatigisimasannut, tassannga tunngavilersuutigalugu umiartortutut suliffeqarnerit.

Erserpoq kommunip mail-ikkut allagarsiissutaasigut ullulerneqartoq 10. marts 2011-immersukkut, kommunip paasissutissiissutigisara tamanut, suliffeqanngikkallarnermi ikiorsiissutinik pisinnaanngitsut tassannga tunuliaqutaritinneqarluni, suliassaat tungaasigut pikkorissarsimanermi suliffissaqanngikkallarnermut ikiorsiissutinik tunngasunut, paasitinneqarsimagamik, peqqussut taamaallaat atuutsinneqarsinnaammat nunami suliffeqarfiusunut. Pikkorissarsimaneq ingerlanneqarpoq Inuussutissarsiornermut Sulisoqarnermullu Naalakkersuisoqarfimmiit - soorlu assersuutitut innersuussisoqarsimavoq, fabrikimi sulisartut umiarsuup fabrikianni pisinnaatitaangitsut suliffeqanngikkallarnermi ikiorsiissutinik, naak umiarsuaq illoqarfimmi nunaqarfimmiluunniit tulassimagaluarpat.

Naammagittaalliummi ersersissimavat, pisortat oqaasiinnakkut itigartitsinerat naammaginagu aammattaaq iluamik ilitsersorneqarsimannginnerit naammagisimanagu.

Ilannguppattaaq sulisartoq tassaammat inuk aningaasarsianik tunniussiffigineqartartoq tiimimut, sapaatip akunneranut, qaammammut imaluunniit akkordimut aammalu sulisitsisoq naatsorsuutimigut akileraarusiisarmat aningaasarsiat naapertorlugit taamalu kingorna tamakku nalunaarutigineqartarmata qullersanut.

Inatsimmi tunngavilersuut: 

Inatsisartut peqqussutaanni nr. 5, 1. juni 2006-imeersumi suliffeqanngikkallarnermi ikiorsiissutit pillugit § 3 tunngavigalgu suliffeqanngikkallarnermi ikiorsiissutit sulinermik inuussutissarsiutilinnut tunniunneqassapput nammineq pisuussutiginagu suliffeqannginnermik, angerlartitaanermik napparsimanermilluunniit pissuteqartumik isertitassaagaluanut annaasanut taartisiassatut.

Suliffeqanngikkallarnermut ikiorsiissutit ilitsersuutaanni sulinermik inuussutissarsiutilik ima isumaqartinneqarpoq, inuk aningaasarsianik tunniussiffigineqartartoq tiimimut, sapaatip akunneranut, qaammammut imaluunniit akkordimut. Apeqqutaanngilaq suliaq suliffissaqartitsiviup suliassaqartitsiniarfianeersuunersoq, piffissami aalajangersimasumik atorfeqartuunersoq imaluunniit suliffiunersoq tapisiaqaataasoq suliassaqartitsiniarnermut attuumassuteqartoq.

Naliliineq:

Isumaginninnermik naammagittaalliuteqartarfiup siulittaasuata nalilerpaa, sulinermik inuussutissarsiortuusutit taamaattumik inatsisinut suliffeqanngikkallarnermi ikiorsiissutinut attuumassuteqartumik aalajangiiffigenqarsinnaasutit.

Tunngavilersuutaavoq uani, atorfeqartitaagavit sulisitsisumiit, taassuma isumagisassaasa ilagimmagu, suliassavit nakkutiginissaa suliassannullu agguataarisuummat. Sulilersissinnaammatit suliunnaarsissinnaammatillu sulininnullu akunnermut aningaasarsianik tigusaqartarlutit.

Suliaq taamaattumik Kommunemut utertinneqassaaq, taakku nalilissavaat, suli piumasaqaataasut iluanni nalimmassimanersutit suliffeqarnermik ikiorsiissutinik pinissamut. Kommuni nutaamik naliliinerminni ilaatigut pisussaaffeqassaaq, sulinissamut piareersimanersutit aammalu piumasaqaataasut naammassisinnaaneritit. 

 

Aalajangiineq:

Kommunemut aalajangiinera taamaattumik utertinneqassaaq.

Inussiarnersumik Inuulluaqqusillunga

Naja Joelsen

Siulittaasoq

Inatsisit tunngaviusut:

Suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. juni 2006-imeersoq

- 3. Suliffeqanngikkallarnermi ikiorsiissutit sulinermik inuussutissarsiutilinnut tunniunneqassapput nammineq pisuussutiginagu suliffeqannginnermik, angerlartitaanermik napparsimanermilluunniit pissuteqartumik isertitassaagaluanut annaasanut taartisiassatut.

- 4. Suliffeqanngikkallarnermi ikiorsiissutit kommunalbestyrelsimit tunniunneqartarput suliffissaaleqisoq, angerlartinneqaannartoq napparsimasorluunniit kommunalbestyrelsimut saaffiginnittoq kapitali 3-mi aamma kapitali 4-mi piumasaqaatinik naammassinnissimappat, taamatullu pineqartoq piumasaqaatinik makkuninnga naammassinnissimappat:

- 1) Pineqartoq 18-inik ukioqalereersimappat imaluunniit pilersuisuuppat,

- 2) Kalaallit Nunaanni inuit allattorsimaffianni nalunaarsorsimappat, aamma

- 3) sapaatit akunnerini 13-ini kingullerni sulinermik inuussutissarsiutilittut suliffeqareersimasuuppat piffissamilu tassani nalunaaquttap akunnerini ikinnerpaamik 182-ini sulereersimappat. Piffissat suliffeqanngikkallarnermi tapiissutisiffiusut sulisimanermik katersatut naatsorsuutaanngillat.

- Imm. 2. Inuit tunisassiornermik unitsitsinermik pissuteqartumik tamatumaluunniit kingunerisaanik angerlartinneqartut, taamatullu sulisussarsiarineqarsinnaasut imaluunniit piginnaasaqarnerulersinniarneqarsinnaasut inatsisartut peqqussutaanni matumani maleruagassat malillugit suliffeqanngikkallarnermi tapiissutinik pisartagaqarsinnaatitaapput. Angerlartinneqarsimaneq sulisitsisumit allakkatigut uppernarsarneqarsimassaaq. Qarasaasiakkut allakkatigut uppernarsaasiisoqarsinnaavoq.

- Imm. 3. Sulisitsisoq piaaraluni suliffeqanngikkallarnermi ikiorsiissutinik pisassarinngisanik akiliinermik kinguneqartumik angerlartitsinissamut kukkusumik uppernarsaateqarluni imaluunniit mianersuaalliorujussuarluni angerlartitsippat, suliffeqanngikkallarnermi ikiorsiissutit akilerneqartut amerlaqataanik kommunalbestyrelsi akiliisitsisinnaavoq.

- Imm. 4. Aaqqissuussineq angerlartitaasunut tunisassiornermik unitsitsineq pissutigalugu angerlartitsinermut atatillugu akissarsiaqartitaasunut allanilluunniit isertitalinnut atuutinngilaq.

- Imm. 5. Qinnuteqaateqartup aalajangersakkami matumani piumasaqaatit naammassisimanerai kommunalbestyrelsip aalajangissavaa.

§ 7. Suliffissaaleqilernermi angerlartinneqaannarnermiluunniit ulloq saaffiginniffiusoq siulleq aallarnerfigalugu suliffeqanngikkallarnermi ikiorsiissutisisoqarsinnaavoq.
Imm. 2. Katillugit sapaatit akunnerini 13-ini suliffeqanngikkallarnermi ikiorsiissutisiaqartitsisoqarsinnaavoq.
Imm. 3. Suliffeqanngikkarlarnermi ikiorsiissutisiaqassagaanni makku piumasaqaataapput:
1) Kommunalbestyrelsi suliffissamik innersuussisinnaassanngilaq suliffissaaleqisup angerlartiinnarneqartulluunniit peqqiissuseq pissutigalugu suliamik naammassisinnaanngippat.
2) Suliffissaaleqisoq angerlartinneqaannarsimasorluunniit sulisinnaassuseqassaaq suliffeqarnermilu sulisussarsiarineqarsinnaassalluni, aamma
3) suliffissaaleqineq nammineq pisuussutigineqassanngilaq, takuuk § 2, imm. 1.
Imm. 4. Naalakkersuisut suliffeqanngikkallarnermi ikiorsiissutinik qinnuteqaateqartut sulisussarsiarineqarnissamut pisussaaffii pillugit sukumiinerusunik maleruagassanik aalajangersaassapput.