2010-043122

K

Suliffeqanngikkallarnermi ikiorsiissutit pillugit Kommune-p 1. november 2010 aalajangiinera naammagittaalliuutigisarsi Isumaginninnermi Naammagittaalliuuteqartarfiup 2. december 2011 suliaraa imatullu aalajangiilluni

Aalajangiineq

Kommune-p aalajangiinera allanngortinneqarpoq, imaalillugu illit suliffeqanngikkallarnermi ikiorsiissutinik tunineqartussaanngitsutit suliffeqannginnerit nammineq pisuussutigigakku. Taamaalillutit aamma sapaatip akunnerisa sisamat qaangiunneranni suliffeqanngikkallarnermi ikiorsiissutisinissamut pisinnaatitaanak.

Kommune-p pisortanit ikiorsiissutinik qinnuteqarnissannut periarfissatit pillugit ilitsersorsimasariaqaraluarpaatit. Tamanna tunngavigalugu kommunip isummerfigisariaqarpaa suliffeerunninniit pisortanit ikiorsiissutinik pisartagaqarnissannut periafissaqarnersutit.

Suliaq aalajangiiffigineqassaaq suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. juni 2006-imeersoq kingusinnerusukkut allannguuteqartinneqartoq naapertorlugu.

Nassuiaat:

Oqaatigineqarpoq illit 1. november 2010 suliffissarsiortutut nalunaarsorneqarsimasutit, tamannalu tunngavigalugu suliffeqanngikkallarnermi ikiorsiissutinik qinnteqarsimasutit.

Ullormi tassani Kommune-p aalajangiivoq, aalajangiinerlu malillugu sapaatip akunnerini sisamani suliffeqanngikkallarnermi ikiorsiissutisinissamut tunngatillugu immikkoortitaagallarlutit, pissutigalugu suliffinnit imminut soraarsissimagavit. Taamaalillutit piffissami 1. november 2010-miit 29. november 2010-mut suliffeqanngikkallarnermi ikiorsiissutinik tunineqarsinnaasimanak.

Tassunga tunngatillugu kommunip innersuussutigaa suliffeqanngikkallarnermi ikiorsiissutit pillugit Inatsisartut peqqussutaanni nr. 5-imi, 1. juni 2006-imeersumi § 11, imm. 1. Kommunip naammagittaalliorsinnaanermut ilitsersuut tunniussimavaa.

Ulloq 15. november 2010 aalajangiineq pineqartoq naammagittaalliuutigaat. Oqaatigaat nammineerlutit suliffinnit soraarsimanak. Oqaatigaat suliffinnut suliartoravit sulisutut aqutsisussi oqarfigisimagaatit soraarsinneqartutit. Suliap ingerlarnganut tunngatillugu oqaatigaat aningaasanik tigusisinnaasimanak aningaasanik tigusisarfik ajoquteqarmat, taamaalilluni Akiliut atorsinnaanani. Taamaattumik nerisassanik akiligassarsivutit kammalaatitillu taamaaliornissarsi isumaqatigiissutigigassiuk, illit aningaasanik tigusisarfik ajorunnaarpat nerisassat akilerumaarakkit. Sulisillusi aqutsisussi tamanna paasigamiuk oqarfigaatit nerisassanik tillissimasutit, taamaammat illit kanngutseriaravit oqarfigineqarnerpit kingorna angerlarsimallutit. Ataasinngornermi suliartoravit oqarfigineqarputit soraarsitaareersutit.

Inatsisitigut tunngavigisat:

Suliffeqanngikkallarnermi ikiorsiissutit pillugit Inatsisartut peqqussutaanni nr. 5-imi, 1. juni 2006-imeersumi § 3 malillugu suliffeqanngikkallarnermi ikiorsiissutit sulinermik inuussutissarsiutilinnut tunniunneqassapput nammineq pisuussutiginagu suliffeqannginnermik, angerlartitaanermik napparsimanermilluunniit pissuteqartumik isertitassaagaluanut annaasanut taartisiassatut.

Peqqussummi pineqartumi § 2, imm. 1 malillugu nammineq pisuussutigalugu suliffissaaleqineq imatut paasineqassaaq, inuup naammaginartumik pissutissaqarani soraarniuteqarneratut qimatsineratulluunniit imaluunniit nammineq pissutsini pissutigalugit soraarsitaaneranut. Kommunalbestyrelsip aalajangissavaa qinnuteqartoq nammineq pisuussutigalugu suliffissaaleqilersimanersoq.

Naliliineq:

Isumaginninnermi Naammagittaalliuuteqartarfik naliliivoq suliffeqanngikkallarnermi ikiorsiissutinik pissarsinissamut pisinnaatitaanngitsutit.

Isumaginninnermi Naammagittaalliuuteqartarfiup pingaartippaa nammineq pisuussutigisannik suliffeerussimanerit, pissutigalugu pissutsit ilinnorpiaq tnngasut pissutaallutik soraarsinneqarsimagavit. Tamatumunnga tunngatillugu Isumaginninnermi Naammagittaalliuuteqartarfiup pingaartutut isigaa illit sulisutsisut apereqqaarnagu nioqqutissanik pisisimagavit sulisitsisup akiligassaanik. Tamatuma kingorna suliffiit qimassimavat, pissutigalugu tillissimasutut pasilligaanerit peqqusiileqissutigagakku.

Suliffeqqanngikkallarnermi ikiorsiissutit pillugit malittarisassat malillugit nammineq pisuussutigalugu suliffeerunninni ikiorsiissutinik pissarsinissamut pisinnaatitaanngilatit.

Tamatumunnga tunngatillugu Isumaginninnermi Naammagittaalliuuteqartarfiup oqaatigissavaa innuttasoq suliffeqanngikkallarnermi ikiorsiissutinik tunineqarnissamut pisinnaatitanngippat, aammalu ikiorsiissutinik pisartagaqarnerup nalaani suliffeqanngikkarllarnermi ikiorsiissutit pillugit peqqussummi § 11, imm.1 nr. 1-miit nr. 5-imut allassimasut arlaannik iliuuseqarsimappat suliffeqqanngikkallarnermi ikiorsiissutit pillugit peqqussut malillugu kommuni pisartagaqartitsinermit immikkoortitsigallarsinnaanngimmat.

Kommune-p pisortanit ikiorsiissutinik pisinnaatitaanerit pillugu periarfissanik ilitsersorsimasariaqaraluarpaatit.

Taamaattumik Isumaginninnermi Naammagittaalliuuteqartarfiup Kommune-p qinnuigissavaa pisortanit ikiorsiissutinik pissarsinissamut piumasaqaataasunik naammassinnissimanerit pillugu isummeqqullugu.

Aalajangiineq:

Kommune-p ulloq 1. november 2010 aalajangiinera allanngortinneqarpoq. Tamanna isumaqarpoq illit suliffeqqanngikkallarnermi ikiorsiissutinik tunineqarnissamut pisinnaatitaanngitsutit.

Tamatuma kingorna Kommune-p pisortanit ikiorsiissutinik pissarsinissamut pisinnaatitaanerit isummerfigissavaa.

Inussiarnersumik inuulluaqqusillunga

Naja Joelsen

Siulittaasoq