2011-053403

Isumaginninnermik naammagittaalliuteqartarfiup ulloq 13. april 2012 naammagittaalliutit suliarisimavaa kommune-p aalajangigaa 1. juli 2012-imeersoq suliffeqanngikkallarnermi ikiorsiissutsinut tunngasoq,  tamannalu tunngavigalugu ima aalajangiilluni

AALAJANGIINEQ

Kommune-p aalajangiussaa eqqortuunngilaq. Isumaqarporlu ima, pisussaatitaasutit Suliffeqanngikkallarnermi ikiorsiissutinik pisussaatitaasutit ullormiit 3. juli 2011, tassannga kommunip unitsimmagu akiliisarnini tamannalu pissaaq 1. august 2011 tikillugu, tassannga siusinaartumik suliunnaarnersiutinik pisartagaqalernissamut akuerisaanerit tikillugu. 

Tamannalu pissutigalugu naammagittaalliutinnik taperserneqarlutit.

Suliaq naliliiffigineqarluni aalajangiiffigineqarpoq Suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. juni 2006-imeersoq kingusinnerusukkullu allannguuteqartoq naapertorlugu.

Qulaajaaneq:

Ilisimatitsissutigineqarpoq, martsimi 2011-imi misissortissimasutit aammalu majimi nappaatit suussusersineqarmat tassaasoq (nappat).

Kommunilu ulloq 3. juni 2011-imi aalajangiivoq pisortanik ikiorserneqarnissat itigartitsissutigalugu, pissutigitinneqarluni nalilimmik pigisaqartuugavit tassaasumik angallammik, inuussutissarsiutigalugu atugarinngisannik.

Kommunilu tassannga tunngatillugu tikkuussivoq Pisortanit ikiorsiissutit pillugit Inatsisartut peqqussutaannut nr. 15, 20. november 2006-imeersumut  § 19-iannut. Kommunillu peqqussut issuaaffigalugu tunniussaqarpoq naammagittaalliornissamut ilitsersuummik.

Ulloq 1. juli 2011-imi kommuni aalajangiivoq unitsitilluni suliffeqanngikkallarnermut ikiorsiissutinik ullorlu kingullermi akiliuteqassalluni 8. juli 2011-imi. Kommunillu aalajangiussani ima pissuteqartillugu, suliffeqanngikkallarnermi ikiorsiissutit napparsimanermi tunniunneqartarsinnaasut katillugit sapaatit akunnerini 13-ini. Kommunip inatsisitut tunngavilersuutigalugu innersuuppaa suliffeqanngikkallarnermi ikiorsiissutit pillugit Inatsisartut peqqussutaat nr. 1,  1. juni 2006-imeersumut § 7, stk. 2-mut. Kommunillu ilisimatitsissutigaa periarfissarititaasut siunnersorneqarnissamut ilitsersorneqarnissamullu, aammalu naammagittaalliornissamut ilitersuilluni.

Naammagittaalliummi ullulerneqartoq 7. juli 2011-imi saqqummiuppat, pisortanik ikiorserneqarnerit (suliffeqanngikkallarnermi ikiorsiissutit) unitsinneqartut ulloq 8. juli 2011-imi ikiorsiissutinillu qinnuteqarsimallutit sulisinnaannginnavit nappaateqarnerit tunngavigalugu. Ilisimatinneqarsimavutit, angallatit illulluunniit tuneqqullugu. Ilisimatinneqarputit, pisortatigut ikiorsiissut (suliffeqanngikkallarnermi ikiorsiissutit) unitsinneqartoq, aqqusinikkut angallatinik attartornissannut akilissinnaassuseqarnikkut takussutissiigavit. Ilanngulluguttaaq ilisimatitsissutigaat, bankimut akiitsoqarlutit, aningaasartuuteqaravillu solaroliemut, innaallagissamut sillimmasiisimanermullu.

Ulloq 8. juli 2011 P qinnuteqaateqarpoq, illit sinnerlutit, kommunemut siusinaartumik sulisinnaarnersiuteqarnissamik.

Erserpoq nakorsap allagarsiutaanit, ullulerneqartoq 22. juli 2011-imi, (Atorfik), nappaammillu nappaateqarnerit nakorsaatinillu katsorsartinnerit tunngavigalugu annertuumik timikkut qasoqqasutit tamannalu tunngavigalugu suliannut ullorlu unnuarlu suliffiusumut artorsarlutit. (Atorfik) suliffiit attallugu iluarisimaarpat periarfissaqassapallumi pisinnaannerit naapertorlugu sulisinnaallutit, qularutiginagu, iluaqutigissagakku suliffimmut tassunga attassuteqaannarnissaq.

Kommunimi suliffiup iluanni allattorneqartoq 22. august 2011-ernissaq naapertorlugu suliffeqanngikkallarnermi ikiorsiissutinik tigusaqarsimavutit piffissamiit 14. marts 2011-mit 3. juli 2011 ilanngullugu. Piffissami 19. marts 2011 aamma 26. marts 2011 ilanngullugu pikkorissarsimavutit piffissamiillu 7. marts 2011-imi aallartittumiit periafissaqartitaalerlutit I-mik. Ulloq 8. marts 2011-imi nalunaaruteqarputit, napparsimallutit.

Ilanngulluguttaaq kommunimit allatami erserpoq, marts-april 2011-imi sivikinnerusumik sulisinnaasimasutit. Napparsimavimmut unitsinneqarputit 3. maj 2011-imi. Ulloq 14. juni 2011-imi napparsimasutit nalunaarutigineqarpoq qaammammi ataatsimi, tassannga katsorsarneqaravit nakorsaammik.

Kommunimittaaq ilanngunneqarpoq maanna, suliffeqanngikkallarnermi ikiorsiissutit tunniunneqartartut unitsinneqartut, tamannalu tunngaviulluni killiliussaasoq naammatsimmat.

Ulloq 29. august 2011-imi siusinaartumik suliunnaarnersiutinik pisartagaqalerputit ulloq aallarnerfigalugu 1. august 2011.

Allakkiami erserpoq ullulerneqartumi 9. september 2011, piffissami 31. marts aammalu 12. maj 2011 aammalu piffissamiit 26. maj aammalu 7. juli 2011 pisimasutit suliffeqanngikkallarnermi ikiorsiissutinik. Piffissami 26. juli aammalu 30. august 2011 tikillugu pisortanit ikiorsiissutinik pisartagaqarsimavutit. Ilanngulluguttaaq taakku saniatigut ulluni 2. aammalu 16. august 2011-imi ikorsiissutinik illumut (oliemut) aammalu kallerup inneranut tunineqarsimavutit.

Allakkiami ullulerneqartoq 9. november 2011-imi Isumaginninnermik naammagittaalliuteqartarfimmut A qulaajaavoq suliap ingerlanneqarneranut, kommunip napparsimanivit nalaani napparsimanersiutinik akiliisarnini unitsissimagaa tassannga tunngavilersuutigineqarluni sapaatit akunneri 13-ini inatsit atuuttussaatinneqartoq. A innersuussivoq, taassuma kingorna pisortat ikiorsiissutaannik pisartagassinneqarsimasutit, annertussusilinnik 744 kr.-inik ulluni 14-ikkaartuni. A naliliivoq, taanna annertussuseq tunniunneqarsimasoq appasippallaartoq inatsisit pisortat ikiorsiisarnerannut atuuttut naapertorlugit innersuusseqqillunilu Inatsisartut peqqussutaannut pisortat ikiorsiissutaannut tunngasumut § 13 imm. 5-imut.

Intsisit tunngaviusut:

Inatsimmit § 3-imi Suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. juni 2006-imeersumiit suliffeqanngikkallarnermi ikiorsiissutit sulinermik inuussutissarsiutilinnut tunniunneqassapput nammineq pisuussutiginagu suliffeqannginnermik, angerlartitaanermik napparsimanermilluunniit pissuteqartumik isertitassaagaluanut annaasanut taartisiassatut.

Inatsillu § 4 peqqussummi tassannga naapertorlugu  suliffeqanngikkallarnermi ikiorsiissutit kommunalbestyrelsimit tunniunneqartarput suliffissaaleqisoq, angerlartinneqaannartoq napparsimasorluunniit sapaatit akunnerini 13-ini kingullerni sulinermik inuussutissarsiutilittut suliffeqareersimasuuppat piffissamilu tassani nalunaaquttap akunnerini ikinnerpaamik 182-ini sulereersimappat. Piffissat suliffeqanngikkallarnermi tapiissutisiffiusut sulisimanermik katersatut naatsorsuutaanngillat.

Inatsit § 7 peqqussummi tassannga suliffissaaleqilernermi angerlartinneqaannarnermiluunniit ulloq saaffiginniffiusoq siulleq aallarnerfigalugu suliffeqanngikkallarnermi ikiorsiissutissiisoqarsinnaavoq katillugillu sapaatit akunnerini 13-ini suliffeqanngikkallarnermi ikiorsiissutisiaqartitsisoqarsinnaalluni.

Inatsit § 8 naapertorlugu inuk sulisinnaannginnermik kinguneqartumik napparsimanermini suliffeqanngikkallarnermi ikiorsiissutisiaqarsinnaavoq. Inuup kommunalbestyrelsimut nalunaarutigissavaa suliffeqarnermi sulisussarsiarineqarsinnaanngikkallarluni.

Napparsimanerli sapaatit akunneri marluk sinnerlugilluunniit sivisussuseqarpat, imaluunniit sulinermi ajoqusersimanermik pissuteqarpat, ikiorsiissutit ulloq napparsimalerfiusoq siulleq aallarnerfigalugu tunniunneqassapput.

Inatsit § 9 naapertorlugu sapaatit akunneri pingasut sinnerlugit napparsimasimasoqartillugu imaluunniit piffissani sivikitsuni napparsimakulasoqartillugu kommunalbestyrelsi naliliissaaq inuk allatigut ikiorsiisarnermut nuutsinneqassanersoq.

Naliliineq:

Isumaginninnermik naammagittaalliuteqartarfiup pissusissamisoortutut isigaa, pisussaatitaaffeqartutit suliffeqanngikkallarnermi ikiorsiissutinik tunineqarsimanissamik piffisaq aallartittumiit 3. juli 2011-imiit, tassannga kommunip unitsimmagilli akiliisarnini peqquteqartumik, pisartakkavit killissarititaat sapaatit akunneri 13-iusut naammatsimmagit. 

Tunngavilersuutigineqartoq tassannga tassaatinneqarpoq, sulinngiffeqarnerit suliffinniit pissutaammat napparsimanermik tunngaveqartoq suliffissaaleqinermillu imaluunniit, angerlatitaasimanermik assigisaanilluunniit tunngaveqanngitsoq.

Isumaginninnermik naammagittaalliuteqartarfiup aalajangiinermini pingaarnertut isiginiarpaa, peqqussutip § 7-iata taamaallaat taakkartormagit suliffissaaleqisut aammalu angerlartitaasimasut. Imatullu paasisiariaqarmat, peqqussutip killiliinera piffissamut aningaasanik tunisinissamut suliffeqanngikkallarnermi ikiorsiissutinut sapaatit akunnerit 13-iusunut, taamaallaat tunngassuteqarmata taakkununnga taaneqartunut.

Isumaginninnermik naammagittaalliuteqartarfiup ilanngullugu innersuussutigissavaa peqqussutip inatsisaa § 8, suliffeqanngikkallarnermi ikiorsiissutinut napparsimalernermut tunngassuteqartoq. Taanna aalajangersagaq imaqanngilaq assingusumik killiliisumik soorlu peqqussutip inatsisaani § 7-imi taama pisoq.

Taamaattumik Isumaginninnermik naammagittaalliuteqartarfiup ima nalilerpaa, sapaatit akunneranut 13-inut atuutsinneqartumik killiliineq isumaqanngitsoq piffssamut napparsimanikkut sulisinaajunnaarsimasunut atuutsinneqartoq, kisiannili tunngatinneqarluni taamaallaat sulinngiffeqartunut peqqutigalugu suliffissaaleqineq, angerlartitaasimanerluunniit il.il.

Taamaattumik Kommune-p ilinnut akiliissaaq suliffeqanngikkallarnermi ikiorsiissutinik piffissamiit 3. juli 2011-imiit 1. august 2011 tikillugu, siusinaartumik sulisinnaajunnaarnersiutinik pisartagaqalernerit tikillugu.

Isumaginninnermik naammagittaalliuteqartarfiup eqqumaffigaa, piffissami aalajangersimasumi sulinerit ingerlateqqeriarsimagaluarit, tamannalu taamaallaat killilimmik iluatsissinnaasimalluni anniaatitit peqqutigalugit. Takussutissaqanngilaq piffissami qaqugukkulluunniit ajorunnaartutut nalunaarsimanermit.

Uumma inerniliussap kingunerititaanik Isumaginninnermik naammagittaalliuteqartarfik naliliisimanngilaq, kommunip aalajangiussaanut ulloq 3. juni 2011-imeersumut pisortat ikiorsiissutaat naapertuuttuusimanersoq peqqussut malillugu. Isumaginninnermik naammagittaalliuteqartarfiup aamma nalilersimanngilaa, tunngavissaqartoqarnersoq pisortat ikiorsiissutaat tunniunneqarsimasut kingumut uterteqqissallugit, ilinnut tunniunneqarsimasut piffissami, Suliffeqanngikkallarnermi ikiorsiissutit kukkuluttornikkut tunniunneqarnissaat unitsinneqarmata.

Kommune-p kingorna akiliutigissavai suliffeqanngikkallarnermi ikiorsiissutaasussat ilinnut, una naliliineq naapertorlugu ilinnut pissaritinneqartunut.

 

Inerniliineq:

Kommune-p inerniliussaa 12. april 2010-immersoq allanngortinneqarpoq. Isumaqarporlu ima, pisussaaffeqartutit suliffeqanngikkallarnermi ikiorsiissutinik pisartagaqartinneqartussaasutit napparsimanivit nalaani piffisaq 1. august tikillugu, tassannga siusinaartumik sulisinnaajunnaarnersiutinik pisartagaqalernerit tikillugu.

Inussiarnersumik inuulluaqqusillunga

Naja Joelsen

Siulittaasoq

Inatsisit tunngaviusut:

Suliffeqanngikkallarnermi ikiorsiissutit pillugit Inatsisartut peqqussutaat nr.

5, 1. juni 2006-imeersoq

- 3. Suliffeqanngikkallarnermi ikiorsiissutit sulinermik inuussutissarsiutilinnut tunniunneqassapput nammineq pisuussutiginagu suliffeqannginnermik, angerlartitaanermik napparsimanermilluunniit pissuteqartumik isertitassaagaluanut annaasanut taartisiassatut.

 - 4. Suliffeqanngikkallarnermi ikiorsiissutit kommunalbestyrelsimit tunniunneqartarput suliffissaaleqisoq, angerlartinneqaannartoq napparsimasorluunniit kommunalbestyrelsimut saaffiginnittoq kapitali 3-mi aamma kapitali 4-mi piumasaqaatinik naammassinnissimappat, taamatullu pineqartoq piumasaqaatinik makkuninnga naammassinnissimappat:

1) Pineqartoq 18-inik ukioqalereersimappat imaluunniit pilersuisuuppat,
2) Kalaallit Nunaanni inuit allattorsimaffianni nalunaarsorsimappat, aamma
3) sapaatit akunnerini 13-ini kingullerni sulinermik inuussutissarsiutilittut suliffeqareersimasuuppat piffissamilu tassani nalunaaquttap akunnerini ikinnerpaamik 182-ini sulereersimappat. Piffissat suliffeqanngikkallarnermi tapiissutisiffiusut sulisimanermik katersatut naatsorsuutaanngillat.
Imm. 2. Inuit tunisassiornermik unitsitsinermik pissuteqartumik tamatumaluunniit kingunerisaanik angerlartinneqartut, taamatullu sulisussarsiarineqarsinnaasut imaluunniit piginnaasaqarnerulersinniarneqarsinnaasut inatsisartut peqqussutaanni matumani maleruagassat malillugit suliffeqanngikkallarnermi tapiissutinik pisartagaqarsinnaatitaapput. Angerlartinneqarsimaneq sulisitsisumit allakkatigut uppernarsarneqarsimassaaq. Qarasaasiakkut allakkatigut uppernarsaasiisoqarsinnaavoq.
Imm. 3. Sulisitsisoq piaaraluni suliffeqanngikkallarnermi ikiorsiissutinik pisassarinngisanik akiliinermik kinguneqartumik angerlartitsinissamut kukkusumik uppernarsaateqarluni imaluunniit mianersuaalliorujussuarluni angerlartitsippat, suliffeqanngikkallarnermi ikiorsiissutit akilerneqartut amerlaqataanik kommunalbestyrelsi akiliisitsisinnaavoq.
Imm. 4. Aaqqissuussineq angerlartitaasunut tunisassiornermik unitsitsineq pissutigalugu angerlartitsinermut atatillugu akissarsiaqartitaasunut allanilluunniit isertitalinnut atuutinngilaq.
Imm. 5. Qinnuteqaateqartup aalajangersakkami matumani piumasaqaatit naammassisimanerai kommunalbestyrelsip aalajangissavaa.

- 5. Suliffissaaleqisut, angerlartinneqaannartut napparsimasulluunniit isertitanut taarsiullugit pisortanit allatigut ikiuutisisartut imaluunniit pinerluuteqarsimasunik isumaginnittoqarfiup imaluunniit isumaginnittoqarfiup ataani inissiisarfimmut inissinneqarsimasut suliffeqanngikkallarnermi ikiorsiissutinik pissarsisinnaatitaanngillat.

 - 7. Suliffissaaleqilernermi angerlartinneqaannarnermiluunniit ulloq saaffiginniffiusoq siulleq aallarnerfigalugu suliffeqanngikkallarnermi ikiorsiissutisisoqarsinnaavoq.

Imm. 2. Katillugit sapaatit akunnerini 13-ini suliffeqanngikkallarnermi ikiorsiissutisiaqartitsisoqarsinnaavoq.
Imm. 3. Suliffeqanngikkarlarnermi ikiorsiissutisiaqassagaanni makku piumasaqaataapput:
1) Kommunalbestyrelsi suliffissamik innersuussisinnaassanngilaq suliffissaaleqisup angerlartiinnarneqartulluunniit peqqiissuseq pissutigalugu suliamik naammassisinnaanngippat.
2) Suliffissaaleqisoq angerlartinneqaannarsimasorluunniit sulisinnaassuseqassaaq suliffeqarnermilu sulisussarsiarineqarsinnaassalluni, aamma
3) suliffissaaleqineq nammineq pisuussutigineqassanngilaq, takuuk § 2, imm. 1.
Imm. 4. Naalakkersuisut suliffeqanngikkallarnermi ikiorsiissutinik qinnuteqaateqartut sulisussarsiarineqarnissamut pisussaaffii pillugit sukumiinerusunik maleruagassanik aalajangersaassapput.

- 8. Inuk sulisinnaannginnermik kinguneqartumik napparsimanermini suliffeqanngikkallarnermi ikiorsiissutisiaqarsinnaavoq. Inuup kommunalbestyrelsimut nalunaarutigissavaa suliffeqarnermi sulisussarsiarineqarsinnaanngikkallarluni.

Imm. 2. Napparsimanerup nalaani suliffeqanngikkallarnermi ikiorsiissutisiaqartoqarsinnaavoq napparsimalernerup kingorna ullut pingajuanniit. Suliffissaaleqisut angerlartinneqaannarsimasullu suliffeqanngikkallarnermi ikiorsiissutisiaqareersut suliffeqanngikkallarnermi ikiorsiissutisiaqarnerat unitsinnagu ingerlatiinnarneqassaaq.
Imm. 3. Napparsimanerli sapaatit akunneri marluk sinnerlugilluunniit sivisussuseqarpat, imaluunniit sulinermi ajoqusersimanermik pissuteqarpat, ikiorsiissutit ulloq napparsimalerfiusoq siulleq aallarnerfigalugu tunniunneqassapput. Sulinermi ajoqusernermut atatillugu sulinermi ajoqusernerup uigguani piffissami napparsimaffiusumi suliffeqanngikkallarnermi ikiorsiissutisiaqartoqarsinnaavoq.
Imm. 4. Suliffeqanngikkallarnermi ikiorsiissutisisartoq napparsimanini qaangiuteriaannartoq kommunalbestyrelsimut nalunaartussaatitaavoq.

- 9. Sapaatit akunneri pingasut sinnerlugit napparsimasimasoqartillugu imaluunniit piffissani sivikitsuni napparsimakulasoqartillugu kommunalbestyrelsi naliliissaaq inuk allatigut ikiorsiisarnermut nuutsinneqassanersoq.