Sags nr. 2012-069467

Suliffeqanngikkallarnermi ikiorsiissutit pillugit Kommunia-p aalajangiinera naammagittaalliuutigisat Isumaginninnermi Naammagittaalliuuteqartarfiup 19. April 2013 suliaraa imatullu aalajangiilluni

Aalajangiineq

Kommunia-p aalajangiinera atortussaatinneqarpoq, kisianni allamik tunngavilerlugu. Imaappoq kommunip aalajangiinera eqqortuuvoq, illillu naammagittaalliuutinni taperserneqanngilatit.

Suliaq aalajangiiffigineqassaaq suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. Juni 2006-imeersoq kingusinnerusukkut allannguuteqartinneqartoq naapertorlugu.

Nassuiaat:

Oqaatigineqarpoq atuarfimmi eqqiaasutut suliffeqartutit, atuarfik aasaanerani matoqqasarluni, taamaattumik atuarfiup matoqqanerani sulinngikkallartarlutit.

Suliffeqanngitsutut nalunaarsorneqarputit 13. Juni 2012 atuarfiup aasaanerani matoqqanera pissutigalugu, taamaammallu ulloq 27. Juni 2012 suliffeqanngikkallarnermi ikiorsiissutinik qinnteqarlutit, tassani oqaatigalugu illit sapaatit akunnerini kingullerni 13-ini agguaqatigiissillugu sapaatip akunneranut nal. akunneri 23,40 sulisarsimallutit.

Ulloq 3. Juli 2012 suliffeqanngikkallarnermi ikiorsiissutinik qinnuteqaatit itigartitsissutigineqarpoq. Kommunip itigartitsinerminut tunngaviliuppaa Inatsisartut peqqussutaanni nr. 5-imi, 1. Juni 2006-imeersumi § 2, imm. 4, tassa kommunip naliliinera malillugu nioqqutissiornerup uninnneranik suliffeerunnerit peqquteqanngimmat. Taamaammat kommuni tunngavilersuummini allappoq,  “ suliassaarunneq pissutigalugu sulisunik angerlartitsisarneq suliffissuarni nioqqutissiorfiusuni sulisunut taamaallaat tunngatitaasoq. Angerlartitsiinnartarneq  aamma atuuppoq pissutsini siumut naatsorsuutigineqareersinnaanngitsuni”, taamaammat illit eqqiaanermi ikiortitut sulisutut angerlartitaanerit siumut naatsorsuutigineqareersinnaasumik pissuteqarluni pisutut isigisariaqarpoq, taamaattumik suliffeqanngikkallarnermi ikiorsiissunik pissarsinissamut pisinnaatitaanak.

XXXX sinnerlutit Isumaginninnermi Naammagittaalliuuteqartarfimmut ulloq 11. Juli 2012 naammagittaalliiuuteqarpoq. Naammagittaalliuummi XXXX-p siulittaasuata erseqqissarpaa suliffissuit tunisassiorfiusut peqqussummi immikkut isigisarialittut taaneqarnerat kommunimit immikkut isigisarialittut tunngaviliunneqartoq, imatut isumaqanngitsoq suliffeqarfiit allat tunisassiornermik unittoorfiusartut  peqqussummi pineqanngitsut.

Kiisalu XXXX kommunimut “atuarfiup aasaanerani sulinngiffeqarneranut atatillugu sulisumik suliunnaarsitsinera” pillugu apeqquteqaammik nassitsisimavoq. Kommunimi Suliffissarsiuussisarfimmi pisortap XXXX-p saaffiginnissutaa ulloq 12. Juli 2012 akissuteqarfigaa. Akissummi  pisortaq nassuiaavoq Suliffeqarnermut Naalakkersuisoqarfiup pikkorissaanerani erseqqissumik nassuiaasoqarsimasoq suliffissuup suliassaarunnera pissutigalugu sulisunik angerlartitsiinartarneq aammalu pisussat siumut naatsorsuutigineqarsinnaanngitsut qanoq paasineqassasut. Pisortaq ilaatigut allappoq, inuit “aalajangersimasumik atorfeqartitaasut suliffiup aasaanerani sulinngiffeqarnerata nalaani suliunnaarsitaagallartut suliffeqanngikkallarnermi ikiorsiissutinik pissarsinissamut pisinnaatitaanngitsut.” Pisortap nassuiaammini ilanngullugu erseqqissarpaa tamanit naluneqanngimmat “sulisut ilaat suliffiup aasaanerani sulinngiffeqarnerata nalaani angerlartitaagallartarput, taamaaliortoqartarporlu sulisitsisup sulinngiffeqarnissamik pilersaarusiaa siumoortumik suliaareersimasoq malillugu”. Taamaattumik sulisut suliffiup aasaanerani sulinngiffeqarneranut atatillugu allatut ajornartumik sulinngiffeqartariaqartarput sulinngiffeqarfissatut ullut katersatik atorlugit.

 

Inatsisitigut tunngavigisat:

Suliffeqanngikkallarnermi ikiorsiissutit pillugit Inatsisartut peqqussutaanni nr. 5-imi, 1. Juni 2006-imeersumi § 1-imi imatut allassimasoqarpoq, suliffeqanngikkallarnermi ikiorsiissuteqartarnikkut siunertarineqarpoq angerlartinneqaannartutut aamma suliffissaaleqisutut nalunaarsorneqarsimasut suliffeqarnermut attuumassuteqartut kiisalu napparsimasut namminneq pisuussutiginagu suliffissaaleqilernerminni, angerlartinneqarsimanerminni napparsimalersimanerminniluunniit sulinermikkut isertitassaraluamikkut annaasaqaataannik aningaasatigut taartisiassaqartissinnaanissaat qulakkiissallugu.

Peqqussummi pineqartumi § 2, imm. 4 malillugu tunisassiassanik amigaateqarnermi, maskiinanik aserortoornermi, silamik peqquteqartumik assigisaannilluunniit siumut naatsorsuutigereerneqarsinnaanngitsunik pisoqartillugu, tamakkulu kingunerisaannik sulisunik angerlartitsineq, tunisassiornerup uninnera tunisassiornerup unitsinneqarneratut paasineqassaaq. Angerlartitsisarneq pillugu malittarisassat taamaallaat nunami tunisassiornermi atorneqassapput.

Naliliineq:

Isumaginninnermi Naammagittaalliuuteqartarfik isumaqarpoq atuarfiup aasaanerani matoqqanerata nalaani suliffeqanngikkallarnermi ikiorsiissutinik pissarsinissamut pisinnaatitaanngitsutit.

Taamatut aalajangiinermut tunngaviuvoq piffisami pineqartumi suliffeqanngikkallarnermi ikiorsiissutinik pissarsinissamut piumasaqaataasut illit tunginnit nammassineqannginneri.

Isumaginninnermi Naammagittaalliuuteqartarfiup aalajangiinermi pingaartippaa illit tunisassiornerup unitsinneqarneranik taamaaqataanilluunniit pissuteqartumik angerlartitaasutut isigineqarsinnaannginnerit. Atuarfiup aasaanerani atuanngiffimmi matoqqanissaanik ilisimatitaareersimavutit pisarneq malillugu. Tassa pisarneq ingerlajuartoq  malillugu aasaanerani atuanngiffeqarnissaq siumut piareersagaavoq. Taamaattumik illit nammineq nalunngereerpat aasaanerani atuanngiffeqarnermi atuarfiup matoqqanissaa, tamannalu illit atuarfimmi atorfeqarninnut ilaaginnartutut naammagittaalliuuteqartarfimmit isigineqarmat, illit sulinngiffeqarnissannut aningaasat katersavit piffissami tassani atussagitit naammagittaalliuuteqartarfik naliliivoq, taamaattumik illit suliffeqanngikkallarnermi ikiorsiissutinik pissarsinissamut pisinnaatitaanngitsutit.

Taamaalillutit sulinikkut isertitavit tamakkiisut ukioq naallugu naammattusaarnissaat pisussaafigalugu, taamaalillutit atuarfiup aasaanerani matoqqanissaani aamma aningaasassaqarnissat ilanngullugu eqqarsaatigalugu.

Isumaginninnermi Naammagittaalliuuteqartarfiup isornartutut isigaa arlaleriartumik qinnuigineqaraluarluni paasissutissat suliamut tunngasuteqartut piumasarineqartut tamaasa Kommuni-p nassiussimanngimmagit.

Aalajangiineq:

Taamaalilluni Kommuni-p suliffeqanngikkallarnermi ikiorsiissutit pillugit aalajangiinera Isumaginninnermi Naammagittaalliuuteqartarfiup atortussaatippaa.

Inussiarnersumik inuulluaqqusillunga

Naja Joelsen

Siulittaasoq

 

Inatsisit toqqammaviit:

 

Suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. juni 2006-imeersoq

 - 1. Suliffeqanngikkallarnermi ikiorsiissuteqartarnikkut siunertarineqarpoq angerlartinneqaannartutut aamma suliffissaaleqisutut nalunaarsorneqarsimasut suliffeqarnermut attuumassuteqartut kiisalu napparsimasut namminneq pisuussutiginagu suliffissaaleqilernerminni, angerlartinneqarsimanerminni napparsimalersimanerminniluunniit sulinermikkut isertitarisassaraluaminnik annaasaqaataannik aningaasatigut taartisiassaqartissinnaanissaat qulakkiissallugu.

- 2 imm. 4. Tunisassiornermik unitsitsineq tunisassiornermik unitsitsinertut paasineqassaaq, pissutigalugu tunisassiassanik amigaateqarnermi, maskiinanik aserortoornermi, silamik pissuteqartumik assigisaannilluunniit siumut naatsorsuutigeriinngisanik pisoqartillugu taakkulu kingunerisaannik sulisunik angerlartitsinermi. Angerlartitsisarneq pillugu malittarisassat taamaallaat nunami tunisassiornermi atorneqassapput.