Ulloq 24. oktobari 2014 Atuisartoqarnermut Unammilleqatigiinnermullu Aqutsisoqafik Inu:IT A/Simit saaffiginnissummik tigusaqarpoq (ilanngussaq 1), tassanilu suliffeqarfiup maalaarutigaa Tele Greenland A/Sip tunniussiumannginnera, tassani pineqarluni Inu:IT A/S piffimmi oqarasuaateqarfigisamik (PBX) akuerisaalluni attaveqarfimmut SIP aqqutigalugu ikkussinissaminut akuerineqanngimmat.

Imaqarniliaq

Inu:IT A/Sip ullumikkut PBXimik kiffartuussinitik ISDN aqqutigalugu ingerlappaat, taannalu teknologiiuvoq nutaanngitsoq allaat ilaatigut nutaanngippallaalersimasoq kiffartuussissummit nutaaliaasumit SIP-mit annertuumik akisunerusoq. Kisianni Tele Greenland A/Sip kiffartuussissut SIP-mut assingusoq inuussutissarsiornikkut pisisartuminnut nioqqutiminnut Iserfik-mut atorpaa, taamaalillunilu unammilleqatigiinnikkut iluaqutaasumik inissisimalluni ilaatigut teknologiip nutaaliaasup atornerata kingunerisaanik aningaasartuutit annikinnerusut ilaatigullu teknologiimut nutaannginnerusumut ISDN-imut taarsiullugu SIP-p atorneratigut teknologiikkut iluaquteqarsinnaaneq tunngavigalugit. 

SIP tassaavoq Voice over Internet Protocol (VoIP), kingulliullutik atuisut PBX-iminnit oqarasuaatikkut sianernerisa oqarasuaatinut attaveqaammut tamanut ammasumut ingerlateqqinneqarnissaannut atortussatut naatsorsuussaq. Ullumikkut PBX  naatsumik oqaatigalugu tassaavoq oqarasuarnermi nuutsitsivik digitalinngorsagaq suliffeqarfiup imaluunniit siunertaqaqatigiissut kattuffiata iluminni oqarasuarnerinik katersuivik oqarasuaatinut attaveqaammut tamanut ammasumut ingerlateqqinneqannginnerini. Ilaatigut SIP tassaasinnaavoq oqarasuaatinut attaveqaammut tamanut ammasumut ikkunnermut attaveqaat

Inu:IT A/S Nalunaarasuartaateqarnermi Aqutsisunut siullermik januari 2014-imi saaffiginnippoq SIP aqqutigalugu oqarasuaatinut attaveqarfik tamanut ammasumut isersinnaanissaminut Tele Greenland A/S maaji 2013-imili kinguneqanngitsumik qinnuteqarfigisimagaluarlugu. Tamatuma kingornali Nalunaarasuartaateqarnermi Aqutsisut misilittarsimagaluarpaat illuatungeriit isersinnaanissamut niuernerpalaartumik isumaqatigiissuteqartinniarlugit, mannali tikillugu isumaqatigiinniarnerit kinguneqanngillat.  

Nalunaarasuartaateqarnermi Aqutsisut suliamik ingerlatsinerata nalaani Tele Greenland A/S isummaminik nalunaaruteqarpoq SIP aqqutigalugu ikkunnissaq akueriumanagu, ernummatigineqarmat teknologip taassuma ungasissoq isigalugu kingunerisinnaammagu Kalaallit Nunaannut Kalaallillu Nunaannit oqarsuarnermut Tele Greenland A/Sip akuersissummik tigumiaqarnera kipitinneqassasoq. Atuisartoqarnermut Unammilleqatigiinnermullu Aqutsisoqarfiup ilisimasaa malillugu Tele Greenland A/Sip nassuiarsimanngilaa taamatut ernummateqarneq qanoq tunngaveqassanersoq, nioqqutinillu pineqartunik niuffaffiup nalilernerani tunngavilimmik ernumassutissaanngitsoq nalilerneqarpoq.

Atuisartoqarnermut Unammilleqatigiinnermullu Aqutsisoqarfiup niuffaffik aalajangiinermut matumunnga tunngassuteqartoq suussusersivaa tassaasoq oqarasuarnermi piffinni nuutsitsivinnut (PBX-inut) niuffaffik. Kalaallit Nunaanni nalunaarasuartaateqarnermi attaveqarnernik nalunaarasuartaateqanermilu kiffartuussinernik niuffaffiit inatsisitigut malittarisassaqartut akuersissummillu tigumminniffiusut niuffaffimmut  apeqqutaapput.  

SIP tassaavoq piffinni PBXit oqarasuaatinut attaveqaammut tamanut ammasumut ikkunnerinut atorneqarsinnaasoq. Tele Greenland A/S nalunaarasuartaateqarnermi attaveqarnernut, tamanullu ammasumik nalunaarasuartaateqarnikkut kiffartuussinermut akuersissummik tigumiaqartuugami kisimiilluni attaveqarnermut ikkuffik taanna nioqqutigaa.

Tele Greenland A/Sip inuussutissarsiornikkut pisisartuminut nioqqutini Iserfik oqarasuaatitigut attaveqarfimmut tamanut ammasumut ikkuffikkut SIP-mut eqqaanartukkut ikkunneqartoq ilaatigut Inu:IT A/S unammillertigalugu tuniniarpaa, kisianni SIP atorneqarsinnaatinngilaa, taamalu PBX-imik niuffaffimmi unammillernermi imminut pitsaanerusumik inissilluni.

Taanna nukittunerulluni inissisimanermik atornerluinertut nalilerneqarpoq, tak. unammilleqatigiinneq pillugu inatsimmi § 11, Inu:IT A/Simut allanullu PBXinik kiffartuussinernik nioqquteqartunut teknologimik pisariaqartumik nioqquteqarumannginneq tassaammat PBXinik niuffaffimmi teknikkikkut ineriartornermik killiliineq atuisumut ajoqutaasoq. 

Aalajangiineq

Unammilleqatigiinnermut Aalajangiisartut ima aalajangiipput:

Tele Greenland A/Sip ulloq 24. oktobari 2014-imiit ulloq 27. maaji 2016-imut unammilleqatigiinneq pillugu inatsimmi § 11 tunngavigalugu nukittunerusumik inissisimanermik atornerluinissamut inerteqqut unioqqutissimavaa nalunaarasuartaatitigut neqerooruteqartut unammillertut akueriumannginnamigit SIP aqqutigalugu oqarasuaatitigut attaveqarfimmut tamanut ammasumut PBX atorlugu ikkussinissamut, taamalu teknikkikkut ineriartorneq killilerlugu atuisartunut ajoqutaalluni, tak. § 11, imm. 2, nr.2. 

Suliamik saqqummiineq

Suliamik saqqummiinerup imarai niuffaffiit tunngassuteqartut allaaserineri aamma niuffaffiit pineqartut pillugit pisortatigoortumik malittarisassiuunnerinik paasissutissat. Tamatuma saniatigut nioqqut pineqartoq allaaserineqarpoq kiisalu suliffeqarfiit akuusut oqartussaasullu suliap ingerlanneqarnerani qanoq iliorsimanersut allaaserineqarluni.

Aallaqqaasiut

Suliap matuma imaraa Tele Greenland A/S-ip unammilleqatigiinneq pillugu inatsimmi § 11-mik nukittunerusumik inissisimanerup atornerlunneqarnissaanut inerteqqummik unioqqutitsisimaneranik misissuineq,  Inu:IT A/Simik nalunaarasuartaatitigut attaveqarfimmut tamanut ammasumut SIP aqqutigalugu piffinni PBX-imik ikkussinissamut isersinnaanissamik itigartitsinermigut.

Suliaq aallaaveqarpoq Inu:IT A/S-imiit saaffiginnissutip ulloq 24. oktobari 2014 Atuisartoqarnermut Unammilleqatigiinnermullu Aqutsisoqarfiup tiguneranik, saaffiginnissummi suliap sivitsortumik ingerlanneqarneranik Nalunaarasuartaateqarnermilu Aqutsisut kinguneqanngitsumik suliamik aaqqiiniaraluarnerannik innersuussilluni kissaateqarmat maalaarutiginninniarnerminik suliffeqarfiup nukittunerusumik inissisimanermik atornerluinertut isigisaminik.  Suliffeqarfiup oqaatigisaminut tunngavilersuutigalugu Inu:IT A/S-ip suliap ingerlaneranik nassuiaat nassiuppaa.

Inu:IT A/S-imit saaffiginnissut tunngavigalugu Atuisartoqarnermut Unammilleqatigiinnermullu Aqutsisoqarfiup ulloq 16. decembari 2014 Nalunaarasuartaateqarnermi Aqutsisut attaveqarfigai (ilanngussaq 2), Nalunaarasuartaateqarnermi Aqutsisut suliaq pillugu tigummisai piniarlugit nukittunerusumik inissisimanermik atornerluisoqarsimaneranik naliliiniarnermut atugassani.

Kingornatigut Atuisartoqarnermut Unammilleqatigiinnermullu Aqutsisoqarfiup Tele Greenland A/S saaffigaa (ilanngussaq 3) suliffeqarfik ilisimatinniarlugu SIP-mut isersinnaaneq pillugu pissutsinik unammilleqatigiinnermut inatsisinut tunngassuteqartumik misissuinermik, aamma Tele Greenland A/S periarfissinniarlugu paasissutissanik ilassutaasunik tunniussinissaanut. Tele Greenland A/S-ip paasissutissat ilassutaasut ulloq 9. marsi 2015 (ilanngussaq 4)  nassiuppai.

Suliaq kingornatigut Atuisartoqarnermut Unammilleqatigiinnermullu Aqutsisoqarfimmit suliarineqarpoq Unammilleqatigiinnermut Aalajangiisartunut saqqummiunneqarnissaa anguniarlugu. Suliap ingerlanneqarnerani aqutsisoqarfiup suliamut akuusut isumaqatigiinniarnerannik paasissutissat nutaat Inu:IT A/S-imit akuttunngitsumik tigusarpai. Tamanna tunngavigalugu takuneqarsinnaavoq ulloq 12. apriili 2016 naatsorsuutigalugu Inu:IT A/S SIP-mik atuisuunngitsoq, kisianni ulloq 6. aggusti 2016 naatsorsuutigalugu Inu:IT A/S-ip uppernarsaraa Tele Greenland A/S-ip SIP-mik tunniussinera suliffeqarfiup PBX-imik serveriinut atorneqartinneqartunut.

Suliffeqarfik

Tele Greenland A/S

Tele Greenland A/S tassaavoq Kalaallit Nunaanni nalunaarasuartaatitigut suliffeqarfiit annersaat inuinnarnut suliffeqarfinnullu oqarasuarnermut internetternermullu nioqqutinik assigiinngitsunik arlaqaqisunik neqerooruteqartoq. Suliffeqarfik 460 missaannik sulisoqarpoq Kalaallit Nunaannullu tamarmut oqarasuarnermik internetternermillu pilersuisuulluni. Suliffeqarfik tamakkiisumik Namminersorlutik Oqartussanit pigineqarpoq Kalaallillu Nunaani oqarasuarnermut aamma ilaatigut nalunaarasuartaatitigut ikkuffilitsigut nassartakkatigullu oqarasuarnermik kiffartuussinernut attaveqarfinnik ingerlatsinissamut akuerisaalluni.

Naak suliffeqarfik inuinnarnut suliffeqarfinnullu oqarsuarnikkut nioqqutinik assigiinngitsunik nioqquteqaraluartoq aalajangiinermut matumunnga atugassamut tunngatillugu inuussutissarsiornikkut pisisartut kisimik sammineqassapput. Tele Greenland A/Sip inuussutissarsiornikkut pisisartuni neqeroorfigai nioqqummik Iserfik-mik, tassaasumik ”nuutsitsisarfik” nutaaliaasoq oqarasuarnikkut IP-mik tunngavilik. Nioqqutip atorpaa Voice over Internet Protocol (VoIP).

Inu:IT A/S

Inu:IT A/S tassaavoq suliffeqarfik namminersortoq 1996-imi tunngavilerneqartoq 50 sinnerlugit sulisoqartoq. Suliffeqarfiup pingaarnertut suliarai IT-mik oqarasuarnermillu ataqatigiissitsinikkut nioqquteqarneq aserfallattaalitsinerlu, kopeerinernik qarasaasiamiillu pappiaranngorlugit anisitsinernik aaqqissuussissartoq, tusarnaarluni isiginnaarlunilu saqqummiinernut atortussanik aaqqissuussisartoq, internettimut isersinnaanissamik suliaqartoq il.il. Inu:IT A/S Kalaallit Nunaanni illoqarfinni annerni arlalinni sulissivoq.

Niuffaffiup allaaserinera

Immikkoortumi matumani niuffaffiit suliffeqarfinnit niuerfigineqartut naatsumik allaaserineqarput, kiisalu nioqqutit aalajangiinnermut matumunnga attuumassuteqartut nioqqutigineqartut pisisartunillu piumaneqartut. Niuffaffiit assigiinngitsut imminnut atanerisa takutinniarnera, TELE GREENLAND A/Sillu oqarasuarnikkut tassungalu atasunut attaveqaatinut suliffeqarfiup akuersissummik tigummiaqarnini tunngavigalugu immikkut inissisimanerata allaaserinera anguniarneqarpoq.

Nuutsitsivik PBX

Private Branch Exchange (PBX) tassaavoq oqasuarnikkut katersuivik/nuutsitsisarfik nammineq pigisaq, tassanilu suliffeqarfimmi kattuffimmiluunniit oqarasuarnerit tamarmik katersorneqartarput oqarsuarnikkullu attaveqaatinut tamanut ammasunut attavilerneqartarlutik.

PBXimik atuilernissamut aallaqqaataani peqqutaasoq pingaarneq tassaavoq suliffeqarfiit aningaasanik sipaaruteqarsinnaammata suliffeqarfimmut oqarasuarnerit PBXikkut agguaanneqarnerisigut suliffeqarfiullu iluani oqarasuarfimmut apuunneqarlutik. Kingusinnerusukkut teknologikkut ineriartornerup immikkut kiffartuussinerit arlaqaqisut nassatarai oqarasuarnikkut attaveqarfinni tamanut ammasuni pineqarsinnaanngitsut. Assersuutigalugu imaassinnavoq oqarasuarnerup suliffeqarfimmi oqarasuaammut allamut nuunneqarsinnaanissaanut periarfissaq, imaluunniit eqimattanut suliffeqarfimmi oqarasuaatinut tulleriiaartunut nuunneqarsinnaanissaanut periarfissaq taamalu oqarasuarfigisaq oqaluussaqarpat akinngippalluunniit allamut ingerlateqqinneqarsinnaanngorlugu.

Suliami matumani pineqarpoq taaneqartartoq ”hosted PBX”, t.i. PBX suliffeqarfinni ataasiakkaanii inissinneqarnani kiffartuussisumiittoq. ”Hosted PBX”ip atuunnerata katersuiviit nalinginnaasut tigussaasut atuunnerat assigaa.

PBXimik pilersitsineq ingerlatsinerlu Namminersorlutik Oqartussat kisermaassisuunerannut immikkut ittumik ilaatitaanngilaq, taamalu TELE GREENLAND A/Sip Kalaallit Nunaanni oqarasuarnermut akuerisaaneranut atanani. PBX oqarasuarnikkut attaveqarfimmut tamanut ammasumut attavilerneqanngikkuni kisimiilluni suliffeqarfimmut naleqarpallaanngilaq PBXip avataanut oqarasuarneq periarfissaqartinnginnamiuk .

Oqarasuarneq IP

Oqarasuarnerup IP-p teknologi Voice over Internet Protocol (VoIP)imik taaneqartartoq atorpaa, tassa imaappoq pisarnertut oqarasuarnikkut attaveqarfinnut ikkuffigineqartartunut nalinginnaasunut taarsiullugit oqarasuarnerit attaveqaatini IP-ni ataatsimoortuni katersorneqartartut ingerlanneqarlutillu.   

Suliffeqarfiit kattuffiillu piffissami sivisuumi piffimmi oqarasuarnermut katersuiveqarput nuutsitsiviusumik suleqataasunut ataasiakkaanut agguataarlugit attavilinnik, taakkulu oqarasuarnikkut attaveqarfimmut tamanut ammasumut ikkuffeqarlutik suliffeqarfiup qitiusumik katersuiviatigut/nuutsitsisarfiatigut.

IP-mi oqarasuarnikkut piffimmi oqarasuarnermi katersuivik nuutsitsiviusoq digitalimik aaqqiinermik ISDN imaluunniit SIP aqqutigalugu Tele Greenland A/Simi oqarasuarnermi attaveqarfimmut ikkunneqartumik taarserneqarpoq.

IP-mi oqarasuarnerup kingulliulluni atuisoq pisarnertut ISDNimit amerlanernik periarfissaqalersippaa. Assersuutigalugu piffimmi ataatsimi atuisartut amerlanerit ajornannginnerusumik attavilerneqarsinnaapput atuisartoq ataaseq internettimut attaveqaammi ataatsimi immikkut ittumik IP-mi sumiiffilerlugu. Tamanna nalinginnaasumik oqarasuarnermit allaaneruvoq, kabelip angissusaa kabelillu amerlassusaat atuisut qanoq amerlatiginissaannik aalajangiisuummata.  Taamaattumik piffinni IP aqqutigalugu oqarasuarnermik pilersitsineq oqarasuarnikkut attaveqarfinnit nalinginnaasunit annertoqaisumik aningaasartuutaannginneruvoq.  

Oqarasuaatinut attaveqarfiit                                             

Public Switched Telephone Network, imaluunniit ulluinnarni taaguutaa atorlugu: oqarasuarnikkut attaveqarfik tamanut ammasoq, oqarasuaatinik nunarsuarmi tamarmiittunik attaviliivoq nunani ataasiakkaani nunallu tamat akornini sullissisut aqqutigalugit. Oqarasuarnikkut attaveqarfinnut tamanut ammasunut attaveqaatit atugassat allanngorarput tassaasinnaallutik oqarasuarnikkut kabelit, kabelit fiberoptiskit, qaammataasatigut attaveqarfiit il.il.

Kalaallit Nunnaanni NamminersorlutikOqartussat Kalaallit Nunaannii oqarsuarnermik kisimiillutik oqarsuarnikkut attaveqarfinnik ikkussisinnaapput, aamma ikkuffilitsigut angallattakkatigullu oqarasuarneq nioqqutigisinnaallugu. Tele Greenland A/S Kalaallit Nunaanni oqarasuarnikkut attaveqarfimmut tamanut ammasumut attaviliinissamut akuersissummik tigumiaqartuuvoq. Akuersissut taanna Kalaallit Nunaannut tamangajalluinnarmut atuuppoq oqarasuarnikkullu attaveqarfiup tamanut ammasup ingerlannissaanut atorneqarnissaanullu tunngalluni. Ullumikkut  Tele Greenland A/Sip Inu:IT A/S neqeroorfigaa ISDN aqqutigalugu oqarasuarnikkut attaveqaammut tamanut ammasumut isersinnaanissaannik.

Attaveqaat ISDN

ISDN isumaqarpoq ”Integrated Services for Digital Network”, pisariitsunngorlugu oqaatigalugu tassaasoq teknologi minnerpaamik attaveqarfinnik marlunnik, Integrated Services-inik, atuisinnaatitsisoq kabeli attaveqaataasoq ataaseq atorlugu.

Assersuutitut taaneqarsinnaavoq modemi pisarnertut ittoq oqarasuaammut ikkuffilik analogimik oqarasuaatikkut attaveqaammik ataasiinnarmik attaveqartitsissalluni periarfissaqartitsivoq. Modem aqqutigalugu internettimut isersimagaanni oqarasuaammut attaveqaat atorunnaassaaq illuatungaanilu attaveqaat oqarsuarnermut atorneqarpat inernettimut isertoqarsinnaanani. Attaveqaatip ISDNip maskiinat, oqarasuaatit, qarasaasiat assigisaallugu arlallit kabelimut ataatsimutt attavilersneqarinnaanerat periarfissippaa.  

Oqarasuarnermi attaveqarfikkut tamanut ammasukkut oqaluussilluni, video atorlugu allatutigulluunniit attaveqaat ISDN atorlugu attaveqartoqaraangat inummit attaveqarniartumit attaveqarfiginiakkamut aalajangersimasumik attaviliisoqartarpoq. Taamaalilluni attaveqarneq taanna atorneqaannassaaq oqaluussineq tamakkerlugu attaveqaat ataaseq atorlugu.

Inuit suliffeqarfiilluunniit ataatsikkut inunnik arlalinnik attaveqarfimmut isertitsissinnaanermik kissaateqartut attaveqaatinik ISDNinik arlalinnik pisisinnaapput, attaveqaatillu taakku tamarmik immikkut attaveqarniarnerit assigiinngitsut ataatsikkut ingerlanneqarsinnaneri periarfissillugit.

Attaveqaat SIP

Internettimut attaveqarnerit taakku assingi SIP-mi neqeroorutigineqarput, attaviliinerilli attaveqarnerillu attatiinnarnissaanik periaatsit allat atorneqarput.   Kiisalu SIP ISDN-imit eqaanneruvoq, tassami ataavartumik internettimut attaveqaatit amerlanerit ikkunneqarsinnaammata ikkuffiit tigussaasut atunngikkaluarlugit. SIP, ISDNip akerlianik, attaveqaatit/ikkuffiit tigussaasut attaveqarfimmit tamanut ammasumit suliffeqarfimmut atasut amerlassusannit killilerneqanngilaq, killilerneqarlunili atuisup internettimut attaveqaataata piginnaasaqarneranit.    

Attaveqaatip ISDNip attaveqaat oqaluussineq tamakkerlugu tigummiinnaraa taannalu allanut mattullugu, taava attaveqaatip IP-p datanik ”poortat” attaveqaatit assigiinngitsut atorlugit aallakaatinneqartut atorpai. Tamatuma internettimut attaveqarnerit eqaannerulersippai, attaveqaatillu pisisartup kissatigisai amerlillugit. Taamalilluni SIP atorlugu nammineq PBXimit oqarasuaatikkut attaveqaatit amerlineqarsinnaapput nammineq kissaatigisat naammatsillugit.   

Niuffaffiit attorneqartut inatsisitigut aaqqiivigineqarneri

Piffimmi attaveqarfiup avataanut PBX attaveqassaguni attaveqarfimmut tamanut ammasumut isersinnaasariaqarpoq. Taamatut ikkunneqarneq pisinnaavoq assersuutigalugu attaveqaat ISDN atorlugu, imaluunniit attaveqaat piumaneqarluartoq SIP atorlugu. Nalunaarasuartaateqarnermi Aqutsisut VoIP-imik ingerlatitseqqiffimmik atuinermut akigititaasunik atugassarititaasunillu 26. juuni 2015 (ilanngussaq 5) aalajangiipput. ISDN tassaavoq Tele Greenland A/Sip akuersissummik tigumiaqarnerata ataani ukiut 10 sinnerlugit nalunaarsuartaatitigut akuerisaalluni kiffartuussissut. 

Kalaallit Nunaanni Namminersorlutik Oqartussat Kalaallit Nunaanni nalunaarasuartaatitigut attaveqarnermi atortussat ikkunnissaannut atornissaannullu kisermaassisuupput. Nammisornerullutik Oqartussat nalunaarutaanni nr. 18 22. novembari 1999-imeersumi § 1-imi Tele Greenland A/S  akuerineqarpoq nalunaarasuartaatinik oqarasuaatinillu, taakku ataanni aamma allannernik datanillu attaveqaqatigiinnernik kiffartuussinernik, ikkussillunilu ingerlatsinissaminut. Tamaattumik suliffeqarfiit PBX atorlugu aaqqiinernik neqerooruteqarusuttut pisariaqartippaat attaveqarfinnut nalunaarsuartaatitigullu kiffartuussinernut Tele Greenland A/Sip akuersissuteqarfiinut akiliilluni isersinnaanissartik.

Akuersissut pillugu nalunaarummi § 1, imm. 3 nr. 2 naapertorlugu piffinni namminersorlutik oqarasuaatitigut attaveqaatit (PBX) Tele Greenland A/Sip nalunaarasuartaatitigut kiffartuussinernik akuersissummik tigumiaqarneranut ilaatinneqanngillat. Ullumikkut inuussutissarsiornikkut pisisartunut atugassianngorlugit PBXimik aaqqiinernik nioqqutillit arlaliupput. Kiisalu akuersissut pillugu nalunaarummi § 3 naapertorlugu akuersissummik tigumiaqartup “kikkut tamaasa akuersissummik tigumiaqartup attaveqaatinut pigisaanut naammaginartumik assigiimmillu atugassaqartitsilluni isersinnaatissavai”.

Inu:IT A/Sip Atuisartoqarnermut Unammilleqatigiinnermullu Aqutsisoqarfimmut saaffiginninnginnerani pisut allaaserinerat

Inu:IT A/S siullermeerluni ulloq 3. januaari 2014 Nalunaarasuartaateqarnermi Aqutsisunut allalluni saaffiginnippoq. Saaffiginnissummi Inu:IT A/S Nalunaarasuartaateqarnermi Aqutsisunut erseqqissaavoq apriili 2013-imili suliffeqarfik SIP-mut isersinnaanissaminut Tele Greenland A/S qinnuigalugu.

  1. marsi 2014 allakkatigut Nalunaarasuartaateqarnermi Aqutsisut Tele Greenland A/Simut nalunaarutigaa Inu:IT A/Sip attaveqaammut isersinnaanginneq ajuusaarutigigaa. Nalunaarasuartaateqarnermi Aqutsisut allagaanni ilaatigut Tele Greenland A/S qinnuigineqarpoq Inu:IT A/Sip allagaata 30. januaari 2014-imeersup kingornagut qanoq pisoqarsimaneranik nassuiaaqqullugu, aamma Tele Greenland A/Sip inuussutissarsiornikkut pisisartuminut nioqqumminut Iserfik-mut nammineq SIP atortarneraa, aamma tamanna akuerisinnaaguniuk SIP PBXimik nioqqutilinnut allanut neqeroorutigineraa.

Ulloq 12. marts 2014 allakkatigut Tele Greenland A/S Nalunaarasuartaateqarnermi Aqutsisunut akissuteqarpoq Tele Greenland A/Sip inuussutissarsiornikkut pisisartuminut nioqqumminut Iserfik-mut nammineq SIP atortaraa, aamma SIP Inu:IT A/Simut neqeroorutiginngikkaa ”… ilisimaneqarmat SIP atorlugu arlalinnut attaviliineq (trunking) aaqqiinerup atornerlunneqarsinnaaneranik kinguneqarsinnaammat.”

  1. marsi 2014 Nalunaarasuartaateqarnermi Aqutsisut allakkatigut Tele Greenland A/S aamma Inu:IT A/S ataatsimeeqatiseraat qulaajarniarlugu Tele Greenland A/Sip SIP-mik Inu:IT A/Simut neqerooruteqannginnerminut ernumassutaasa suunerinik, kiisalu Tele Greenland A/Sip SIP-mik Inu:IT A/Simut neqerooruteqarniannginnermini ernummateqarnerminut suut tunngaviginerai. Ulloq 21. marsi 2014 suliamut akuusut akornini ataatsimiinneq Nalunaarasuartaateqarnermi Aqutsisuni ingerlanneqarpoq. Ataatsimiinnerup taassuma nassatarisaanik Tele Greenland A/S ulloq 4. apriili 2014-imi allakkatigut Nalunaarasuartaateqarnermi Aqutsisut SIP pillugu ernummatigissamut taassumalu sunniuteqarnisaanut apeqqutaannut akissuteqarnissaminut piffissamik sivitsuiffigineqarpoq.
  2. apriili 2014 Tele Greenland A/S akissuteqarpoq ernummassuteqarneq tunngaveqartoq suliffeqarfiup ilisimalersimammagu inuussutissarsiornikkut pisisartut kiffartuussissutinik neqerooruteqartunit allanit nunanut allanut oqarasuarsinnaanermik neqeroorfigineqarsimasut aammalu ernummatigineqarluni: ”… teknologip SIP-p taamatut ingerlaneq sakkortusisinnaagaa, TELE-POST isumaqartoq Kalaallit Nunaannut Kalaallillu Nunaannit oqarasuarnermik TELE-POSTip akuersissummik tigumiaqarneranut akerliusoq…”. Tamatuma saniatigut Tele Greenland A/Sip Eqqartuussisoqarnermi Sulineq pillugu inatsimmi nalunaarasuartaatitigut attaveqaqatigiiffinnik kiffartuussissutinik neqerooruteqartut pisussaatitaasut nalunaarasuartaatitigut ingerlaarnernik misissuinermi atugassanik nalunaarsuinissaq toqqorsinissarlu pillugit maleruagassat innersuuppai.

Tele Greenland A/S nassuiaavoq pissutsit taaneqartut taakku marluk kingunerigaat Tele Greenland A/Sip kissaatiginngikkaa SIP Business-Line-p Inu:IT A/Simut neqeroorutiginissaa. Taassuma saniatigut Tele Greenland A/S allappoq suliffeqarfiup IMSimik tunngavia allanngortiterneqartoq aamma SIP atorlugu avataani akuusunut aaqqiinerit ineriartornerat aatsaat 1. maaji 2014-imiit periarfissaqalissammat.

  1. juuni 2014 Tele Greenland A/S Nalunaarasuartaateqarnermi Aqutsisunut allappoq inuussutissarsiornikkut pisisartunut oqarasuartaatitigut nioqqutip nutaap Business-Line-mik taaneqartup teknoligi SIP-mik killilimmik tunngaveqartup ineriartortinneqarnera aallarnerneqartoq, ilimagineqartorlu nioqqut taanna aasap ingerlanerani naammassineqassasoq, taavalu Nalunaarasuartaateqarnermi Aqutsisut qinnuteqarfigineqassasut nioqqutiip neqeroorutiginissaanut akuerineqarnissamik.

Ulloq 14. februaari 2015 Tele Greenland A/S nioqqummi Business-Linep akuerineqarnissaanut qinnuteqaammik nassitsivoq.

Tusarniaanermut akissut

Ulloq 11. juuni 2016 TELE Greenland A/S aalajangiinermut missiliuussaq pillugu tusarniaanermut akissummik Atuisartoqarnermut Unammilleqatigiinnermullu Aqutsisoqarfimmut nassitsivoq (ilanngussaq 6). Tusarniaanermut akissummi erserpoq Inu:IT A/S oqarasuaatitigut attaveqarfimmut tamanut ammasumut SIP aqqutigalugu hosted PBXip ikkunnissaanut ulloq 27. maaji 2016 isersinnaanngortoq. Tamannalu aamma Inu:IT A/Simit ulloq 6. aggusti 2016 uppernarsarneqarpoq (ilanngussaq 7).

Aammalu erserpoq Nalunaarasuartaateqarnermi Aqutsisut akigititaasussanik atugassarititaasussanillu 26. Juuni 2015 aalajangigaat naapertorlugit  TELE Greenland A/Sip ullumikkut PBXimik kiffartuussisut SIP atorlugu arlalinnut attaviliinermik neqeroorfigigai.

Naliliineq

Niuffaffiit attuumassuteqartut

Suliami matumani Inu:IT A/Sip oqarasuaatikkut attaveqarfimmut tamanut ammasumut SIP aqqutigalugu isersinnaanissaq kissaatigaa pisisartuni PBX-imik aaqqiinernik neqeroorfigisinnajumallugit. Nuutsitsiviit PBX-it Tele Greenland A/S-imut akuersissummut atanngillat, kisianni Tele Greenland A/S oqarasuarnermi attaveqarfimmut tamanut ammasumut atugassamut akuersissummik tigumiaqarpoq. 

Taamaattumik maani niuffaffiit marluk immikkoortut pineqarput, aappaa tassaasoq PBX-imik kiffartuussinermik niuffaffik, niuffaffiup aappaanut, tassaasumut oqarasuarnermi attaveqarfimmut tamanut ammasumut isersinnanermik niuffaffik, taannalu attaveqaatinut akuersissuteqarfiuvoq pituttorsimavoq.   

Tele Greenland A/Sip SIP aqqutigalugu oqarasuarnermi attaveqarfimmut tamanut ammasumut ikkussisinnaanissamik neqerooruteqarumannginnera atornerluisinnaanermik periarfissaqarneranut suliaq manna attuumassuteqarpoq, aamma Tele Greenland A/S akuersissummik tigumiaqarnermigut oqarasuarnermi attaveqarfimmut tamanut ammasumut ikkussisinnaanissamik kisermaassisuuvoq. Taamaattumik nioqqummut pineqartumut niuffaffik oqarasuarnermi attaveqarfimmut tamanut ammasumut PBX-imik ikkussisinnaanissamik aallaaveqassaaq.

Piumaneqartunut taartaasinnaasunik atuinermik ikkussineq

Piumaneqartunut taartaasinnaasunik atuinermik ikkussineq tassaavoq pisisartoq niuffaffimmi nioqqutinik atukkaminut taartaasinnaasunik nioqqutip akia, atuussinnaanera il.il aamma taakku atuisartunut soqutiginarsinnaaneri eqqarsaatigalugit nassaarsinnaanersoq. 

Suliaq Tele Greenland A/Sip akuersissummik tigumiaqarnermigut oqarasuarnermi attaveqarfimmut tamanut ammasumut SIP aqqutigalugu attaveqarfimmut isersinnaanermik neqerooruteqannginnermigut kisermaassisuunerminik atornerluineranut  tunngasuummat, piumaneqartunut taartaasinnaasunik misissuinerup oqarasuarnermi attaveqarfimmut tamanut ammasumut ikkussinermut teknologikkut periarfissat suunersut ersersissavai. Taamaattumik teknologikkut aaqqiinerit assigiinngitsut qinnuteqarfiup nalaani oqarasuarnermi attaveqarfimmut tamanut ammasumut ikkunnissamut atorneqarnissaat misissornissaat naliliinermut attuumassuteqarpoq. Tassaasinnaapput ISDN aamma SIP. 

ISDN

ISDN tassaavoq attaveqaqatigiinnermi atortoq nalinginnaasoq digitaliusumik ataatsikkut oqaluunnermut, videomik atuinermut, datanut il.il. oqarasuaatikkut attaveqarfikkut nalinginnaasukkut atorneqartartoq. Teknologi ISDN 1980-ikkut affaanni kingullermi aallarnerneqarpoq oqarasuarnermi attaveqarfiup tamanut ammasup oqaluussinerinnarmut atorunnaarlugu aamma taamanikkut pissutsit malillugit nalunaarasuartaatitigut attaveqarfinni pioreersuni datanut attaveqarfiit sukkaqisut atorsinnaalernissaat periarfissillugu.

Nalunaarasuartaatitigut attaveqarfimmut sanaartukkatigut ikkusimanissaq teknologip taassuma pisariaqartippaa, assigiinngitsunillu marlunnikk isikkoqarluni, ISDN2-junngikkuni ISDN30-iulluni. ISDN2 tassaavoq nalunaarsuartaatitigut attaveqarfimmi oqaluussinermut attaviit marluk datanullu attavik ataaseq, aappaatigullu ISDN30 tassaalluni oqaluussinermut 30-nik attavilik datanullu ataatsimik. Oqaluussinermut attaviit taakkunannga marlunnit imaluunniit 30-nit amerlanerit kissaatigineqarpata taava nalunaarasuartaatitigut attveqarfimmut attavimmik sanaartukkamik immikkut ikkussisoqartariaqassaaq.

ISDN-imik periaatsini taakkunani marlunni oqaluusinermut attaviit amerlassusaasa assigiinnginnerujussuisa kinguneraat atorfissaqartitamit annertunerusumik pisinnaasaqarneq akilerneqassammat imaluunniit nalunaarsuartaatitigut attaveqarfimmut attavinnik amerlanernik sanaartornikkut ikkussisoqartariaqassammat, tamannalu annertuumik aningaasartuutaassaaq.

Nalunaarasuartaatitigut attaveqarfik atorneqartutoqaq analogiusoq assigalugu, taaneqartartoq attaveqarfik ”circuit switched”, ISDN tassaavoq attaveqarfik oqaloqatigiinerup sivisussusaa tamakkerlugu “isui marluk” kipisuitsumik attaveqarfikkut imminnut atassusikkanik attaveqarfik. Tassa oqaloqatigiinnerup sivisussusaa tamakkerlugu attaveqaat ataaseq atorneqarpoq. Taamaalilluni attaveqarneq kipisuitsoq, taannalu tunngavigalugu pisinnaasaq tunniunneqartoq aalajangersimasoq, attaveqarnermik pitsaasumik oqaloqatigiinnerup sivisussusaa tamakkerlugu qularnaarivoq. 

Teknologi ISDN kingunerisaminik sanngiiffeqarpoq piffinni PBXinut teknikkikkut periarfissat eqqarsaatigalugit. Tamanna ilaatigut ISDNip teknologimik tunngavianik peqquteqarpoq, ullutsinnut naleqqukkunnaarsimagami taamalu oqarasuarnikkut teknologiikkut ineriartornermut inorsarluni, ilaatigut taaneqareersutut pisinnasaq pineqarsinnaasoq sanaartornermut annertoorujussuarmik aningaasartuutigineqarsinnaammat.  

Teknologi ISDN amma annertuumik aningaasartuutaavoq tassagami teknologi qanganisaq ilaatigut ullutsinnut naleqqukkunnaarnikoq taakkulu kingunerisaannik atortunut pisariaqartunut aningaasartuutinik annertoqisunik kinguneqartoq. Tamatuma akiata qaavanut ilanngunneqassapput kanngussammik attaveqaatinut atorfissaqartunut arlalinnut aningaasartuutit.     

SIP

SIP tassaavoq attaveqaqatigiinnermi aqqut attaveqaqatigeeriaatsit assigiinngitsut arlallit, assersuutigalugu videokkut attaveqarneq tassanilu oqalunneq isiginnaarnerlu ataatsikkut periarfissaqartut imaluunniit ingerlaannartumik apuuttartunik allanneq, atornerini aqutsisoq.

ISDN  attaveqarfiusoq ”circuit switched” netværk, taava SIP tunngaveqarpoq ”datanik poortanik”. Teknologi atuuppoq “poortanik” mikisunik nassiussisup tigooraasullu akornanni  paasissutissanik imalinnik attaveqarfik qanoq ilisukkulluunniit atorneqarsinnaasoq aqqutigalugu nassiussuinikkut. Tamatuma kinguneraa SIP tunngavigalu attaveqaqatigiinnerup attaveqaat ataaseq kisiat aqqutiginngimmagu, taarsiulluguli qanoq ilisukkulluunniit attaveqaat ingerlalluarnerpaaq oqaloqatigiinnermi nassitsisup tigooraasullu akornini atussammagu, tamannalu kinguneqassaaq eqaannerusumik ingerlasoqarneranik aamma suliffeqarfiup attaveqaqatigiinnermut pisariaqartitaanut naleqqussarneqarsinnaalluni. Taamalilluni attavinnik amerlanernik pisariaqartitsineq suliffeqarfiup pisinnaasaanik annertusisinikkut anguneqarsinnaavoq. 

Paasissutissanik poortanngorlugit passussinerup kinguneraa suliffeqarfiit ataasiakkaat kiffartuussissutinik nioqquteqartumit attaveqaatit pisariaqartitamik qanoq amerlatiginissaannik pisisariaqarnerminnut naleqqiullugu SIP annertuumik kiffaanngissuseqalersitsillunilu eqaannerulersitsimmat.  Taamaalilluni suliffeqarfiit pisinnaanernik annertuallaartunik atunngisaminnik akiliisariaqannginnerat periarfissippaa aamma suliffeqarfiup nalunaarasuartaatitigut attaveqarfimmut akuersissuteqartumit ingerlanneqartumut attaveqaatinik immikkut ikkussisariaqarnissani eqqarsaatigisariaqanngilaa. Aaqqiinerup taassuma sanngeequtigaa attaveqaqatigiit marluk amerlanerilluunniit akornini attaveqaat kipisuitsoq atorneqanngimmat, taamalu attaveqaammi kinguartoorneq attaveerunnerluunniit misigineqarsinnaallutik. 

Kiisalu SIP sanaartukkatigut datatigut attaveqaateqartariaqannginnermigut teknologiuvoq nalitsinnut naleqqquttoq suliffeqarfimmik eqaannerusumik ininik toqqaanissamut suliffeqarfiullu allineqarnissaanut eqaannerusumik periarfissiisoq, taassumalu kingunerisaanik attaveqarnernik pisariaqartitanik aamma teknologimut nalitsinnut naleqquttumut atortunik akikinnerusumik pissarsisitsisinnaasoq.  

Piumaneqartunut taartaasinnaasunik atuineq pillugu eqikkaaneq.

SIP atorlugu PBXimiit sianernissamut isersinnaaneq ISDNimik atuinermiit annertuumik aningaasartuutaannginnerussaaq. Aningaasartuutit annikillinerisigut teknologimullu nalitsinnut naleqquttumut nuunnikkut ISDNimut naleqqiullugu malunnaateqarluartumik sipaaruteqartoqassaaq. 

Naak ISDN aamma SIP tamarmik immikkut tasaagaluartut nioqqutit nalunaarasuartaatitigut attaveqarfimmut PBXimik ikkussinissamut atorneqarsinnaasut Atuisartoqarnermut Unammilleqatigiinnermullu Aqutsisoqarfiup nalilerpaa nioqqutit ima assigiinngitsigisut nioqqut ISDN nioqqummut SIP-mut piviusumik taartaasinnaanngitsoq, taamaattumillu SIP-mut piumaneqartutut taartaasinnaanngitsoq.

Tuniniakkanut taartaasinnaasut unammilleqatigiissinnaanissarlu

Niuffaffimmik pineqartumik naliliinermi aamma misissorneqassaaq kiffartuussinermut piumaneqartumut taartaasoq SIP atorlugu oqarasuaatitigut attaveqarfimmut tamanut ammasumut ikkussinnaassanersoq. Tassa imaappoq kiffartuussisut massakkut kiffartuussissummik piumaneqartumik neqerooruteqanngitsut oqarasuaatitigut attaveqarfimmut tamanut ammasumut ikkunnissaq neqeroorutigissallugu aallartissinnaalissasut.

Suliami matumani tamatuma piviusumik nassataraa kiffartuussisut allat nalunaarasuartaatitigut attaveqarfimmut Tele Greenland A/Sip akuersissummik tigumiaqarnermigut pigisaanut assinganik isersinnaassasut aamma nalunaarsuartaatitigut kiffartuussissummut tassunga assinganik isersinnaanissaminnut periarfissaqassasut. 

Unammilleqatigiittoqalersinnaanera eqqaagaanni apeqqutaalissaaq kiffartuussisut massakkorpiaq niuffaffimmut akuunngitsut piffissap sivikitsup iluani niuffaffimmut iserlutik sullissilersinnaanersut.  Tamatumunnga piumasaqaataavoq Naalakkersuisut attaveqaammut unammillertumut akuersissuteqarnissaat aamma suliffeqarfinnik attaveqaammut taamaattumut imminut akilersinnaasutut naliliillutik  ingerlatserusuttoqartoq. 

Immikkoortup qulaaniittup ingerlaannartumik takutippaa taartaasumik tuniniagaqarnissaq aamma unammilleqatigiittoqarsinnaaneq suliami matumani imminnut qanittumik ataqatigiissut, tamarmik immikkut ilaatigut Kalaallit Nunaanni nalunaarasuartaatitigut attaveqaqatigiinnerup inatsisitigut qanoq ittumik malittarisassaqarnera ilaatigullu aningaasaqarnikkut kiffartuussisup allap nalunaarasuartaatitigut unammillerluni kiffartuussineq imminut akilersinnaasutut sinneqartoorfiusinnaasutullu isigalugu kiffartuusserususinnaanera apeqqutaatimmassuk.

Qulaani taaneqartut tunngavigalugit Atuisartoqarnermut Unammilleqatigiinnermullu Aqutsisoqarfiup nalilerpaa taartaasumik tuniniagaqarnissaq aamma unammilleqatigiittoqarsinnaaneq suliami maani pineqartumi imminnut ima ungasitsigimmata suliamut matumunnga sunniuteqarsinnaanatik.

Nunami niuffaffiit attuumassuteqartut

Suliami sammineqarpoq Kalaallit Nunaanni oqarasuarnikkut attaveqarfimmut tamanut ammasumut ikkussinnaaneq. Tele Greenland A/S Kalaallit Nunaanni nalunaarasuartaatitigut attaveqarfimmik ingerlatsinissamut akuerisaammat unammillerluni ikkussisinnaasunik attaveqarfeqanngilaq. Taamaattumik oqarsuarnikkut attaveqarfimmut Tele Greenland A/Sikkoorlugu ikkunnissaq kisimi periarfissaavoq.

Nalunaarasuartaatitigut attaveqaqatigiiffinni ileqquuvoq, nunat tamat akornini, nuna niuffaffinnut killilikkanut immikkoortiterlugu niuffaffiliortoqartartoq piumasaqaatit marluk tunngavigalugit: nunap ilaa attaveqarfimmit piumasarineqartumit anguneqarsinnaassasoq aamma inatsisitigut allatigulluunniit malittarisassaqassasoq.

Nalunaarasuartaatitigut attaveqarfiup tamanut ammasup pingaarnerusumik Kalaallit Nunaanni inoqarfiit tamakkerlugit angusinnaammagit aamma Kalaallit Nunaanni Tele Greenland A/S nalunaarasuartaatitigut attaveqarfimmut akuersissummik tigumiaqarmat, taava nunami niuffaffik Kalaallit Nunaannut killeqarpoq.

Unammilleqatigiinneq pillugu inatsisimmi § 11 - Pissaaneqarnerusumik inissisimanermik atornerluisarneq

Suliffeqarfimmut ataatsimut arlalinnulluunniit pissaaneqarnerusumik inissisimanermik atornerluisarneq ineqqutaavoq, tak. unammilleqatigiinneq pillugu inatsimmi § 11. Atornerluinermik assersuut § 11, imm. 2 nr. 2-mi allassimavoq: “tunisassiornermi, tuniniaanermi imaluunniit teknikkikkut inerisaanermi atuisartunut pisisartunullu ajoqutaasumik killilersuinermi”, ataatsimut oqaatigalugu tunniussiumannginneq.

Tunniussiumannginneq tassaasinnaavoq suliffeqarfik pisiumasumut nioqqutiminik tunniussiumanngitsoq, imaassinnaallunili paasissutissanik attaveqarfimmulluunniit isernissamut tunniussimannginneq aammalu isikkoqarsinnaalluni “kinguneqartussamik tunniussiumannginneq”-mik, tassanilu pineqarpoq suliffeqarfik pissaaneqarnerusumik inissisimasoq assersuutigalugu tunniussinissanik kinguarsaasoq. 

Unammilleqatigiinneq pillugu inatsimmi § 11 unioqqutinneqarneranut ersiutit marluupput, aappaa tassaalluni suliffeqarfik ataaseq arlallilluunniit niuffaffimmi pineqartumi pissaaneqarnerusumik inissisimasuussaaq / inissisimasuussapput, soorlu suliami matumani taamaattoq, aappaaluu tassaalluni pissaaneqarnerusumik inissisimanermik taassuminnga atornerluineq.

Suliami matumani misissorneqassaq Kalaallit Nunaanni oqarsuarnermut niuffaffimmi Tele Greenland A/S pissaaneqarnerusumik inissisimanerminik atornerluinersoq SIP atorlugu nalunaarasuartaatitigut attaveqaqatigiinnermi attaveqarfimmut isersinnaanissamik Inu:IT A/S neqeroorfiginngimmagu, taamaalillunilu teknikkikkut inerisaanermi atuisartunut pisisartunullu ajoqutaasumik killilersuilluni.

Atornerluineq taama ittoq, teknologimut isersinnaanissamik tunniussiumannginneq, Kalaallit Nunaanni unammilleqatigiinnermi eqqartuussisarnermi nalinginnaasuunngilaq, kisianni nunani allani eqqartuussisoqarfinni suliarineqartareerluni. EU-mi eqqaartuussivik suliani arlalinni atornerluinermut tunngasuni, taakku nioqqutip atornissaanut isersinnaanissamik tunniussiumannginnermut tunngasuusut, eqqartuussinikkut aalajangiipput, taakkunani pingaartumik suliaq T-201/04 (Kommissioni Microsoftimut) soqutiginaateqarpoq pissutigalugu piumasaqaatit erseqqissut pingasut eqqortinneqarnissaat nalunaarsormagit tunniussiumannginnermi pissaaneqarnerusumik inissisimanermik atornerluisoqarnersoq aalajangersinnaaneqassappat.  

Piumasaqaatit taakku pingasut tassaapput:

”–        Siullermik tunniussimannginneq nioqqummut imaluunniit kiffartuussissummut niuffaffimmi assingusumi aalajangersimasumik suliaqarnissamut pisariaqartumut tunngasuuvoq.

–        Aappassaanik tunniussimannginnerup niuffaffimmi assingusumi kinguneqartumik unammillernermik mattussineq kingunerisinnaavaa.

–        Pingajussaanik tunniussiumanngineq nioqqutit nutaat, atusartunit pisisartunillu piumaneqarsinnaasut, saqqummernissaannut akornutaavoq.”

Eqqartuussinermi tassani aalajangiinermut tunngavilersuummi 334-mi erserpoq piumasaqaatit pingajuat, nioqqutit nutaat saqqummernissaannut tunngasoq, taamaallaat anersaakkut suliassanut piginnittussaanerup atortinneranut tunngasuusoq, taamaattumik illuanut saatillugu inerniliisoqarsinnaasoq tunngavilersuutit sinneri tassaasut tunniussiumannginnermi pissaaneqarnerusumik inissisimanermik atornerluisarsinnaanermik naliliinermut ataatsimut isiginninnerit.  

Taamaalilluni pineqartumi Tele Greenland A/Sip iliuuseqarnera unammilleqatigiinneq pillugu inatsimmi § 11-mi aalajangersakkamik unioqqutitsinerusinnaavoq, imaappat:

- Tele Greenland A/S Kalaallit Nunaanni oqarasuarnikkut niuffaffimmi pissaaneqarnerusumik inissisimavoq

Tele Greenland A/S taamatut inissisimanermik atornerluivoq niuffaffimmi assingusumi (PBXimi) malunnaateqartumik unammillernissaq mattussimagamiuk nioqqummik pisariaqartumik tunniussiumannginnermigut, t.i. nioqqut pisariaqarpat niuffaffimmi assingusumi aalajangersimasumik suliaqarsinnaanissamut, tunniussimannginnerlu kinguneqarsinnaasoq malunnaateqartumik unammilleqatigiinnerup mattunneqarneranik.

Kalaallit Nunaanni oqarasuarnikkut pissanerusumik inissisimaneq

Siornatigut taaneqareersutut Tele Greenland A/S akuersissummik tigumiaqarnermigut Kalaallit Nunaanni nalunaarasuartaatitigut attaveqaqatigiinnermut attaveqaatinik atuuttunik nutaanillu kisermaassilluni sanaartorsinnaavoq, kiisalu nalunaarasuartaatitigut kiffartuussinernik ikkuffilitsigut angallattakkatigullu oqarasuaatitigut oqaluussinernik neqerooruteqartuulluni. Suliffeqarfiup kisermaassisuunera tunngavigalugu inernilerneqarsinnaavoq suliffeqarfik Kalaallit Nunaanni oqarasuarnermut niuffaffimmi pissaaneqarnerusumik inissisimasoq.  

Kalaallit Nunaanni PBXimut niuffaffimmi pissutsinik misissuinissaq aalajangiinermut matumunnga tunngassuteqanngilaq, niuffaffimmi tassani atornerluinermik pissusilersornermik maalaaruteqartoqanngimmat, kisianni Kalaallit Nunaanni nalunaarasuartaatitigut attaveqarfimmut tamanut ammasumut isersinnanissamik, PBXimut pisariaqartumik, aqutsinermik atornerluineq maalaarutigineqarmat. 

Pissaaneqarnerusumik inissisimanermik atornerluisarneq

Siusinnerusukkut taaneqareersutut Tele Greenland A/S Kalaallit Nunaanni oqarasuarnermut akuersissummik tunineqarpoq. Kisianni akuersissummi § 1, imm. 3 nr.2-mi aalajangersagaqarpoq PBX akuersissummut ilaanngitsoq.

Siusinnerusukkut aalajangersumik oqaatigineqareersutut nioqqut (ammanerulersinneqartoq) PBX   kingulliulluni atuisumut pingaaruteqassappat pisariaqassaaq PBXip nalunaarasuartaatitigut attaveqarfimmut tamanut ammasumut akuersissuteqarfiusumut ikkunneqarsinnaanissaa, tassami PBXip avataanut sianertariaqarneq pisariaqarsinnaammat.

Nioqqut pisariaqartoq

Unammilleqatigiinnermi eqqartuussisutigut suliaqartarnerit aalajangerpaat suliffeqarfimmit pissaaneqarnerusumik inissisimasumit nioqqummut kissaatigineqartumut taartaasinnaasoqarnersoq nalilerneqassasoq. Siusinnerusukkut aalajangersumik oqaatigineqareersutut Namminersorlutik Oqartussat Kalaallit Nunaanni nalunaarasuartaatitigut attaveqaqatigiinnermi attaveqarfinnik sanaartornissamut atuinissamullu kisermaassisuupput, aammalu Tele Greenland A/S tamatumunnga akuersissummik tigumiaqartuuvoq. Taamaattumik nioqqut pineqartoq attaveqarfimmut akuersissuteqarfiusumut Tele Greenland A/Sip pissutsit malillugit kisimiilluni neqeroorutigisinnaasaanut ikkussinerummat tassunga attuumassuteqarpoq takussallugu SIP-mik atuineq nioqqutaanersoq Inu:IT A/Simut pisariaqartoq.  

Qulaani allaaserineqareerpoq atorneqarsinnaanermut akigititaasumullu tunngasutigut ISDN aamma SIP ima assigiinngitsigisut taartaasinnaasutut nalilerneqarsinnaanatik, aammalu SIP-mut taartaasinnaasumik nassaartoqarsimanngimmat.

Tassunga ilanngunneqassaaq nalunaarasuartaatitigut attaveqarfimmut PBXimik ikkunnissamut isersinnaaneq PBXimut akigititaasunut unammillersinnaasunuinnaanngitsoq kisianni aamma PBXimik niuffaffimmi teknikkikkut inerisaanermut tunngaviusumik pingaaruteqartoq, teknikkikkut periarfissat ISDNimut taarsiullugu SIP aqqutigalugu ikkunnissamiittut peqqutigalugit. 

Taamaattumik inernilerneqarpoq Tele Greenland A/Sip SIP aqqutigalugu ikkunnissamik tunniussisinnaaneranut taartaasinnaasoqanngitsoq, taamaattumillu taanna naatsorsuutigisariaqartoq Inu:IT A/Sip Kalaallit Nunaanni PBXimik niuffaffimmiiginnarnissaanut nioqqutaammat pisariaqartoq.

Malunnaatilimmik unammillernermik mattussineq

Misissuinerup affaata kingulliup qulaajassavaa nioqqummut isersinnaannginneq niuffaffimmi atasumi, uani pineqartumi PBXimik niuffaffimmi, malunnaatilimmik unammillersinnaanermik mattussinermut atorneqarnersoq.  

Allaaserineqartutut nalunaarasuartaatitigut attaveqarfimmut tamanut ammasumut ikkussinnanermut periaatsit taakku marluk teknikkikkut annertuumik assigiinngissuteqaannarnatik aamma aningaasaqarnikkut teknologit taakku marluk malunnateqarluartumik assigiinngissuteqarput.

Kiffartuussinerit assingi, normunik atorneqanngitsunik takunnissinnaaneq, nuutsitsinernik suliaqarnerit, naatsorsueqqissaarsinnanermik periarfissat il.il. neqeroorutigisinnaanngikkaanni ilutigalugulu teknologimut akisunerusumut, aamma kingulliulluni atuisumut, pituttorsimagaanni taava inernilertariaqarpoq Tele Greenland A/Sip unammillertai malunnaatilimmik Tele Greenland A/Sip nammineq nioqqutaanut Iserfik-mut unammillersinnaanngitsut.

Tele Greenland A/Sip pissusilersornera

Tele Greenland A/S sivisuumik inuussutissarsiornikkut pisisartuminut hosted PBXimik oqarasuarnikkut attaveqarfimmut tamanut ammasumut SIP aqqutigalugu ikkunnermik neqerooruteqarpoq taamaalillunilu nammineerluni teknologi piumaneqartoq sivisungaatsiartumik atorlugu, taamaattumillu hosted PBXimik neqerooruteqartunut allanut unammillernermi imminut ilippanaquserluni.

Inu:IT A/S siullermik maaji 2013-imi nalunaarasuartaatitigut attaveqarfimmi hosted PBXiminut SIP aqqutigalugu ikkussinissamut isersinnaanermik qinnuteqarpoq, kissaatinilu arlaleriarluni saqqummiuttarlugu. Kisianni Tele Greenland A/Sip Inu:IT A/Sip kissaatigisaa tamatigut igartitsissutigisarpaa.

Tele Greenland A/Sip ilaatigut Kalaallit Nunaannut Kalaallillu Nunaannit oqarasuarnermik kisermaassisuunermi illersortariaqarnera suliffeqarfiit unammillertut PBXiisa SIP aqqutigalugu oqarasuarnikkut attaveqarfimmut tamanut ammasumut ikkunnissaannut itigartitsissutimini tunngavilersuutigisarpaa, ernummassutigigamiuk teknologi SIP iternga tikillugu malitsigisamigut nassatarisinnaammagu Tele Greenland A/Sip nammineq akuersissummik tigumiaqarnerata innarlerneqarnissaa.

Suliffeqarfiit iluini nammineq pigalugit oqarasuarnernik nuutsitsisarfiit Kalaallit Nunaanni nalunaarasuartaatitigut attaveqarfimmut Tele Greenland A/Sip akuerissummik peqarnerata avataaniipput, atuunnertilli tunngavigalugu oqarasuarnikkut attaveqarfimmut akuersissummik tigumiaqarfiusumut ikkunneqarsinnaasariaqarlutik atuisumut naleqassagunik.

Tele Greenland A/Sip SIP-mik atornerluinissamik ernummataanut, nunanit allanit nunanullu allanut oqarsuarnermut tunngasumut, Atuisartoqarnermut Unammilleqatigiinnermullu Aqutsisoqarfiup taamaallaat oqaatigissavaa akuersissummik tigumiaqarnerup innarlerneqarsinnaanissaanik ernummateqarneq suliffeqarfiup pissaaneqarnerusumik inissisimanerminik atornerluineranut aqutsisoqarfiup naliliineranut sunniuteqanngimmat.   

Tele Greenland A/S isumaqaruni akuersissummik tigumiaqarneq innarlerneqartoq taava nakkutilliisuulluni oqartussaasumut attuumassuteqartumut maalaarutigineqarsinnaasunik taamaattunik sullissisussaasorisamut nalunaarutiginnissaaq. Atuisartoqarnermulli Unammilleqatigiinnermullu Aqutsisoqarfiup nalilerpaa attaveqarfimmut Tele Greenland A/Sip nammineq atugaanut isersinnaanissamut itigartitsineq ernummateqarnermik pisortatigoortumik oqartussaasunut suliassaasumut tunngavilersorneqarpat taava Tele Greenland A/S nakkutilliisinnaanermik inatsisitigut tunngavilersorneqarsinnanngitsumik imminut tunisimavoq. Ilutigalugulu suliffeqarfik nammineq SIP-p iluaqutigisinnaasai iluaqutigalugit atuiguni unammilleqatigiinnikkut pisortatigoortumik maleruagassani tunngavilerneqarsinnaanngitsumik imminut ilippanaquserpoq.

Taamaattumik Tele Greenland A/Sip Kalaallit Nunaanni oqarasuarnermut atugassanngorlugu attaveqarfiup pilersinneranik atorneranillu akuersissummik tigumiaqarnerminik inatsisitigoortumik illersuiniarnera nioqqummik Tele Greenland A/Sip nammineq atugaanik niuffaffimmi pituttugaanngitsumi unammilleqatigiinnermi tunniussimannginnermut tunngavilersuutaasinnaangilaq.

Eqikkaaneq

Tele Greenland A/S teknologi piumaneqartoq tunniussinnaajumallugu teknikkikkut atortunik inisseereermat, kisianni unammillertini tassunga isersinnaanermik tunniussiumanani, suliffeqarfik tunniussiumannginnermik pisuutinneqarpoq teknologi piumaneqartoq PBXimut niuffaffimmi atasumi malunnaatilimmik unammillersinnaanermut pingaaruteqarmat.

SIP-mut isersinnaanermik itigartitsinikkut tassuuna Tele Greenland A/S imminutt ilippanaquserpoq PBXimut niuffaffimmi, ilaatigut atortussanik pisariaqartunik akikinnerusumik pisisinnaanermigut, ilaatigullu pisisartut ataasiakkaat kissaatigisaat atorfissaqartitaallu tunngavigalugit nioqqummik naleqqussakkamik neqerooruteqarnissamut annertunerusumik periarfissaqarnikkut.

Tele Greenland A/S pissusilersornermigut sivisoqisumillu SIP aqqutigalugu oqarasuarnikkut attaveqarfimmut tamanut ammasumut isersinnaanissamik itigartitsisarnermigut pissusilersornermik ilumoortumik taaneqarsinnaasumik kinguneqartussamik tunniussiumannginnermik takutitsivoq taamaalillunilu unammilleqatigiinneq pillugu inatsimmi § 11, imm. 2 nr. 2-mi aalajangiinermut tunngavimmut kinaassusersiunngitsumut piumasaqaatit naammassillugit. 

Inerniliineq

Tele Greenland A/S nammineq nioqqummini Iserfik-mi teknologi atorsimammagu SIP aqqutigalugu nalunaarasuartaatitigut attaveqarfimmut ikkussinnanermut teknologi pisariaqartoq piorersimavoq, minnerpaamik Tele Greenland A/Sip Iserfik-mik neqeerooruteqarata nalaani. Akuersissummik tigumiaqartutut teknologimik taassuminnga unammillertiminut Tele Greenland A/S PBXimik niuffaffimmi unammillertiminut unammilleqatigiinnikkut imminut ilippanaaserpoq.

Tele Greenland A/Sip pissaaneqarnerusumik inissisimanerminik, nalunaarasuartaatitigut attaveqaqatigiinnermi sanaartukkanik kiffartuussinernut atugassanik akuersissummik tigumiaqarnermi nassatarisaanik, atornerluivoq piffinni oqarasuaatikkut aaqqiinernik (PBXinik) niuffaffimmi pituttorsimanngitsumi unammilleqatigiinnermi unammillertiminik ajornerusumik inissiigami, inuussutissarsiornikkut pisisartuminut teknologimut nammineq atortakkaminut isersinnaanissamik neqerooruteqannginnermigut.  

Ilanngussat allattorsimaffiat

- Ilanngussaq 1 –Inu:IT A/Sip TELE Greenland A/Simik maalaarutiginninnera 24. oktobari 2014-imeersoq

- Ilanngussaq 2 – Pappialaatinik takunnissinnaanissamut qinnuteqaat Nalunaarasuartaateqarnermi Aqutsisunut nassiunneqartoq 16. decembari 2014-imeersoq

- Ilanngussaq 3 - TELE Greenland A/Simut ammaaqqusilluni allakkat af 10. februaari 2015-imeersut

- Ilanngussaq 4 - TELE Greenland A/Simit allakkatigut akissuteqaat 9. marsi 2015-imeersoq

- Ilanngussaq 5 – Nalunaarasuartaatitigut attaveqarfimmut tamanut ammasumut  VOIP-imik attaveqarnermut ingerlatitseqqiffimmut ikkussinermut akigititaasut atugassarititaasullu aalajangerneqarnerat  26. juuni 2015-imeersoq

- Ilanngussaq 6 - TELE Greenland A/Sip tusarniaanermut akissutaa 11. juuli 2016-imeersoq

- Ilanngussaq 7 - Inu:IT A/Sip tunniussinermik ilumoorneraanera 6. aggusti 2016-imeersoq