Inigisavit qimanneranut atatillugu akiligassat pillugu Inissiaatileqatigiiffiup X-ip aalajangiineranut tunngasumik maalaaruteqarnerit Ineqarneq pillugu Maalaaruteqarfiup ulloq 9. juuni 2021-mi suliaraa imalu aalajangiivoq:
AALAJANGIINEQ
Ineqarneq pillugu Maalaaruteqarfik isumaqarpoq, Ilooqarfimmi Z najugakunni, YY-mi nalinginnaasumik iluarsartuussineq akilissagit.
Aammattaaq Ineqarneq pillugu Maalaaruteqarfik isumaqarpoq, inimi qilaap nalinginnaasumik iluarsartinneqarnera akilissanngikkit.
Taamaattumik Ineqarneq pillugu Maalaaruteqarfik nalinginnaasumik iluarsartuussineq pillugu akimik nutaamik naatsorsuissaaq, nutaamillu najukkamit nutsernermi akiligassamik ilinnut nassiusseqqilluni.
Ineqarneq pillugu Maalaaruteqarfik ineqarnermut akiligassat, tuaviusaarutit qularnaveeqqummullu akiligassat sinneruttut pillugit apeqqutinik suliaqarnissaminut piginnaatitaaffeqanngilaq.
Tassa imaappoq maalaarutit ilaannakuusumik isumaqataaffigineqarpoq.
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingusinnerusukkut allannguuteqartoq naapertorlugu aalajangiisoqarpoq.
Suliami allagaatit:
- Ineqarneq pillugu Maalaaruteqarfimmut maalarutit 13. maaji 2019-imeersoq.
- Attartornermut isumaqatigiissut 28. oktobari 2016-imeersoq.
- Amingaatit allattorsimaffiat 9. novembari 2016-imeersoq.
- Inissiaatileqatigiiffiup amingaatit allattorsimaffiat pillugu akissutaat 14. novembari 2016-imeersoq.
- Misissuinermi nalunaarusiaq 31. maaji 2017-imeersoq.
- Najukkamit nutsernermi akiligassaq 28. juuni 2017-imeersoq.
- juuni 2017-imeersoq akiligassaq.
- Maalaarutinnut ilanngussat 14. maaji 2019-imeersoq.
- Inissiaatileqatigiiffimmiit suliaq pillugu oqaaseqaatit 15. aggusti 2019-imeersoq.
- Tusarniaanermi akissutit 7. oktobari 2019-imeersoq.
- Tusarniaanermut ilassutit 8. oktobari 2019-imeersoq.
- Atuisartoqarnermut Unammilleqatigiinnermullu Aqutsisoqarfimmut saaffiginnissutit 14. apriili 2020-meersoq.
- Oqarasuaatikkut saaffiginninnerit pillugu nalunaarusiaq 6. maaji 2021-meersoq.
- Inissiaatileqatigiiffimmiit suliaq pillugu oqaaseqaatit 7. maaji 2021-meersoq.
Nassuiaat:
Ineqarneq pillugu Maalaaruteqarfimmut ulloq 13. maaji 2019 inissiaatileqatigiiffik X-imi najugarisakut, illoqarfimmi Z-mi YYY-miittoq pillugu maalaaruteqarputit.
Attartornermut isumaqatigiissummi takuneqarsinnaavoq, najugaq ulloq 28. oktobari 2016-imi tigusimagit.
Inissiaq 101,50 m²-iuvoq pingasunillu ineerartaqarluni.
Amingaatit allattorsimaffia 9. november 2016-imeersoq malillugu, ataani allaqqasut najukkami ajoqutaasutut allassimavatit:
- Igaffimmi “ikkuffiit” “assiaquteqanngitsut”
- Toqqorsivimmut matu qupinikoq
- Inimut matup qalipannera qalippernikoq
- Inimi qilaaq qalipanneqanngitsoq
- Inimi iigaq ataaseq qalipalluarneqanngitsoq
- Sinittarfinni saagulerfinnik qimataqaannartoqarsimasoq
- Najugaq oqussunnittoq
- Qaliani qilaaq iluamik suliarineqarnikuunngitsoq
- Matu silarlermi matserfik aserornikoq
- Igaffimmi aalap milluaasuata sinaakkutaa amingaataasoq
- Qullermut assiaqut amingaataasoq
Inissiaatileqatigiiffiup ulloq 14. novembari 2016-imi oqaatigaa, amingaatit allattorsimaffia tigusimallugu.
Najugaq ulloq 1. juuni 2017-imi nooreertussanngorlutit qimappat, ullorlu 31. maaji 2017-imi najukkat misissortinneqarpoq.
Nakkutilliinermi nalunaarusiaq ilinnit atsiorneqarsimanngilaq.
Nakkutilliinermi nalunaarusiaq 31. maaji 2017-imeersoq malillugu, najukkap iigai qilaavilu nalinginnaasumik qalipanneqarlutik aamma ataasia masammik tigusisinnaanngitsumik qalipanneqarlutik iluarsartuunneqartussaapput.
Taassuma saniatigut kissarsuutip tunua eqqiarneqarsimanngitsoq oqaatigineqarpoq.
Najukkamit nutsernermi akiligassami 28. juuni 2017-imeersumi takuneqarsinnaavoq, nalinginnaasumik iluarsartuussinermut 12612 koruunit, najukkami qaammatit amerlassusaat naapeertorlugu 8 procentit ilanngaatit ilanngunnagit, akiliissasutit.
Aammattaaq 4418,43 koruunit ineqarnermut, 150 koruunit tuavisaarummut aamma 5558 koruunit qularnaveeqummut akiligassat sinneruttut akilissagitit takuneqarsinnaavoq.
Naggataatigut 16773 koruunit qularnaveeqqummut akilersimavatit.
Taamaattumik inissiaatileqatigiiffimmut katillugit 4986,47 koruunit akilertussaavatit.
Qalipaasoq XXZ-imit ulloq 17. juuni 2017-imi akiligassiissutigineqartoq malillugu, najugaq 12612 koruunit nalinganut nalinginnaasumik iluarsartuunneqarpoq.
Maalaarutinni takuneqarsinnaavoq, najukkannit nuunnerni qularnaveeqqutip tigusimannginnera paasisinnaanagu.
Nammineq najukkat nutsilernermi qalipassimallugu, amigaatit allattorsimaffiani allatatit minillugit, oqaatigaat.
Naggataatigut oqaatigaat, najugaq amerlasuunik assilisimallugu, taakkuali iPad-ikunniittut ammarnaveeritit.
Aammattaaq inissiaatileqatigiiffimmut assit nassiutereernikuullugit oqaatigaat.
Maalaarutinnut ilanngussanni 14. maaji 2019-imeersumi takuneqarsinnaavoq, isertinnginninni viceværterlu najugaq misissoqqaarsimagissi.
Tassunga atatillugu najukkap qilaava qalipanneqarsimanngitsoq paasisimagit, tamannalu viceværtip aqutsisunut ingerlateqqissimavaa, aqutsisullu akisimapput qalipanneqanngitsortaa akuerineqarsimasoq.
Aammattaaq oqaatigaat, iserterninni amingaatit allattorsimallugit, qalipannissaanulli eqqiarneqarnissaanullu amingaataasut ilanngullugit allassimanagit, isumaqaraluaravit tamakkua ilinnut tutsinneqassanngitsut.
Inissiaatileqatigiiffik X ulloq 15. aggusti 2019-imi Ineqarneq pillugu Maalaaruteqarfimmut oqaatigaa, attartornermut peqqussut naapertorlugu najukkamit nutsernermut nalunaarusiaq suliarineqarsimasoq.
Ulloq 7. oktobari 2019 Ineqarneq pillugu Maalaaruteqarfimmut oqaatigaat, inissiaatileqatigiiffiup najugakunnut iserterninni assilinikuusatit nassiussimanngikkai.
Najukkamit nuunnginnerni najugaq qalipassimallugu oqaatigaat, inissiaatileqatigiiffiulli qularnaveeqqut utertikkusunngilaa, aammattaaq akiligassamik nassissimallutit.
Allapputit eqqunngitsumik pineqarsimasutut misigisimallutit.
Ulloq 8. oktobari 2019 Ineqarneq pillugu Maalaaruteqarfimmut oqaatigaat, paasissutissat amigartut, inissiaatileqatigiiffimmut assit allakkallu nassiunnikuusatit ilaanngimmata.
Aammattaaq qularnaveequtip utertinneqarnissaa qalipaatitsisimasuusaarnerullu akiligassartaata atorunnaarsinneqarnissaa qularinagu aliangiusimavutit.
Ulloq 14. apriili 2020 Ineqarneq pillugu Maalaaruteqarfimmut oqaatigaat, najukkamut nutsernermi najugaq pitsaanngitsoq, najukkamiillu nutsernermi najugaq qalipassimallugu eqqiarlugulu, tamannalu pillugu inissiaatileqatigiiffimmut assit pillugit saaffiginnginnikuullutit, maannamulli akineqarnikuunak.
Ulloq 6. maaji 2021 oqarasuaatikkut Ineqarneq pillugu Maalaaruteqarfimmut ilisimatitsivutit, najukkamit nutsernermi nakkutilliinermi ilaasimanak, meeqqatilli sinnerlutit ilaasinnaatitaasimasut.
Aammattaaq inissiaatileqatigiiffik isumaqitiginnginnakku atsioqataasimanak ilisimatitsissutigaat.
Inissiaatileqatigiiffiup ulloq 7. maaji 2021-mi Ineqarneq pillugu Maalaaruteqarfimmut oqaatigaa, najugaq pillugu assiuteqaratik.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi § 45 imm. 3. allassimavoq piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigigaa taakkununngalu aningaasartuutit akilissallugit.
Peqqussummi tassani § 77-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Naqqit nutaamik lakkersimasutut isikkoqassapput, taamaattorli tak. imm. 3.
Imm. 2 Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.
Imm. 3 Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.Imm.
- 78 malillugu attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
Aammattaaq peqqussummi tassani § 84, imm. 1-imi allassimavoq Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, § 45 takuuk.
3) Inissiap iserterfigineqarnerani qanoq issusia, § 47 takuuk.
4) Attartukkami atortut ikkussukkat pitsanngorsaanerillu (atuisinnaatitaaneq), §§ 51 aamma 55 takukkit.
5) Attartortup atukkaminik atuinera (torersaanissamik malittarisassanik unioqqutitsinerit), § 50 takuuk.
6) Atuisinnaatitaanerup allanut tunniunneqarnera (inissianik paarlaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq) §-it 58-62 takukkit.
7) Inissiamit aninermi inissiap qanoq issusia (iluarsaassineq nalinginnaasoq) § 77 takuuk.
Aalajangersagaq tamakkiisuuvoq.
Naliliineq:
Ineqarneq pillugu Maalaaruteqarfik isumaqarpoq, illoqarfimmi Z najugakunni, YY-mi nalinginnaasumik iluarsartuussineq akilissagit.
Peqqussummi tassani § 77, imm. 1-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Taassuma saniatigut naqqit lakkeqqammersutut isikkoqassapput.
Ineqarneq pillugu Maalaaruteqarfiup najukkamit nutsernermi qalipaasimanernut uppernarsaammik ilanngussisimannginnerit pingaartippaa.
Aammattaaq Ineqarneq pillugu Maalaaruteqarfiup najukkamut nutsernermi nalinginnaasumik iluarsartuunneqarsimanersoq pillugu uppernarsaateqannginnera pingaartippaa, soorluttaaq attartornermi isumaqatigiissummi takuneqarsinnaanngitsoq, najukkamit nutsernermi nalinginnaasumik iluarsartuussinissamut piumasaqaammik allannguisoqarsinnaasoq isumaqatigiissutigineqarsimanersoq.
Amingaatit allattorsimaffiani takuneqarsinnaavoq, inimi iigaq ataaseq qalipanneqarluarsimanngitsoq pillugu Ineqarneq pillugu Maalaaruteqarfiup najukkamut nutsernermi nalinginnaasumik iluarsartuussisoqarsimasoq pillugu naliliinera allannguuteqanngilaq.
Ineqarneq pillugu Maalaaruteqarfik isumaqarpoq, inimi qilaaq nalinginnaasumik iluarsartuunneqarnera akilissanngikkit.
Matumunnga tunngavigineqarpoq, § 77, imm. 3-mi ersermat, Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.
Ineqarneq pillugu Maalaaruteqarfiup najukkamut iserterninni amingaatit allattorsimaffianut inimi qilaaq qalipanneqarsimanngitsoq allassimagit pingaartippaa.
Taassuma saniatigut Ineqarneq pillugu Maalaaruteqarfiup pingaartippaa, inissiaatileqatigiiffiup amingaatit allattorsimaffia oqaaseqaateqarfiginagu tigusimagaa, taamaasillutillu qilaap qalipanneqannginnera uppernarsarsimallugu.
Taamaattumik Ineqarneq pillugu Maalaaruteqarfik nalinginnaasumik iluarsartuussineq pillugu akimik nutaamik naatsorsuissaaq, nutaamillu najukkamit nutsernermi akiligassamik ilinnut nassiusseqqilluni.
Ineqarneq pillugu Maalaaruteqarfik ineqarnermut akiligassat, tuaviusaarutit qularnaveeqqummullu akiligassat sinneruttut pillugit apeqqutinik suliaqarnissaminut piginnaatitaaffeqanngilaq.
Aalajangiineq:
Ineqarneq pillugu Maalaaruteqarfik isumaqarpoq, inimi qilaap nalinginnaasumik iluarsartuunneqarneqarnera akilissanngikkit.
Taamaattumik Ineqarneq pillugu Maalaaruteqarfik nalinginnaasumik iluarsartuussineq pillugu akimik nutaamik naatsorsuissaaq, nutaamillu najukkamit nutsernermi akiligassamik ilinnut nassiusseqqilluni.
Tassa imaappoq maalaarutit ilaannakuusumik isumaqataaffigineqarpoq. Akiliutigisimasavit utertinneqarnissaannut pisinnaatitaaffeqarputit. Taamaattumik Ineqarneq pillugu Maalaaruteqarfimmut saaffiginneqquneqarputit konto normut tunniunnissaa siunertaralugu.
Ineqarneq pillugu Maalaaruteqartarfiup aalajangiineri Namminersornerullutik Oqartussanut (Namminersorlutik Oqartussanut) kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu.
Ineqarneq pillugu Maalaaruteqarfiup aalajangiinerata nassatarisaanik attartortitsisoq iliuuseqarnissamut pisussaaffilerneqarsimappat soorlu maani pisumi taava tamanna Ineqarneq pillugu Maalaaruteqarfiup sulinera pillugu Namminersornerullutik Oqartussat nalunaarutaat nr. 27, 26. novembari 2008-meersumi § 11 naapertorlugu, iluarsisassat Ineqarneq pillugu Maalaaruteqarfiup aalajangiinerata saqqummiunneqarnerata kingorna kingusinnerpaamik sapaatit akunnerisa marluk qaangiunnerini iluarsineqarsimassapput.
Naammagittaalliuuteqarnissamut ilitsersuut:
Ineqarneq pillugu Maalaaruteqarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.
Ineqarnermut Naammagittaalliuteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaata Eqqartuussivianut tunniunneqassapput.
Inussiarnersumik inuulluaqqusillunga
Naja Joelsen
Ineqarneq pillugu Maalaaruteqarfimmi siulittaasoq.
Ilanngussat: Inatsisitigut tunngavigisaq
Assilineqarnera uunga: Inissiaatileqatigiiffik Z. Attartorluni normu innersuutigineqarpoq: XX-XXX-XX-XX.
lnatsisit toqqammaviit:
lnissianik attartortitsisarneq pillugu lnatsisartut peqqussutaat nr. 2, 12. maj 2005-imeersoq
§ 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa. 1mm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
1mm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
77. lnissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3. 1mm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.
1mm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.
1mm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.
1mm. 5. Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput.
§ 78. Attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
§ 84. lneqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) lneqarnermut akiliutinik qaffaanissamik siumoortumik ilisimatitsisarnermi piumasarisat, tak.§ 28, imm. 2.
2) Aserfallatsaaliuineq iluarsaassinerlu, tak.§ 45.
3) lnissiap iserterfigineqarnerani qanoq issusia, tak.§ 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak.§ 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) lnissiamit aninermi inissiap qanoq issusia (iluarsaassineq nalinginnaasoq), tak. § 77.
1mm. 2. Maalaarutit ineqarneq pillugu maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarummut pissutsinut attartortup suliaritikkusutaanut uppernarsaatissat pisariaqartinneqartut ilaatinneqassapput.
1mm. 3. Maalaarutip ineqarneq pillugu maalaaruteqartarfimmi suliarineqarnissaanut attartortoq annerpaamik 500 kr.-inik sullissinermut akiliummik akiliuteqartinneqassaaq. Maalaaruteqartoq maalaarutigineqartoq pillugu taperserneqarpat imaluunniit suliaq ineqarnermut maalaaruteqartarfimmi suliarineqarnissaminut naleqqutinngitsutut itigartinneqarpat aningaasat sullissinermut akiliutigineqartut maalaaruteqartumut utertinneqassapput. lmm.4. Attartortup suliaq eqqartuussivinnut suliakkiissutigineqareersoq ineqarneq pillugu maalaaruteqartarfimmut suliakkiissutigineqarnissaa kissaatigippagu, maalaaruteqartarfik maalaarutip suliarinissaanut itigartitsissaaq.