SIULEQUTSIUSSAT

Unammilleqatigiinnermut tunngasut unammilleqatigiinnermullu politikki Kalaallit Nunaanni ukkatarineqaleraluttuinnarput. Tamanna pivoq piffissami suliffeqarfiit inuiaqatigiinnit pigineqartut namminersortunngorsaavigineqarnerisa nalaani. Namminersortunngorsaaneq siunnerfini naapertorlugu iluatsissappat pisariaqarpoq unammilleqatigiinnermut sunniuteqarluarsinnaasumik inatsiseqarnissaq aammalu taassuminnga atortitsiniavinnissaq. Kalaallit Nunaata aningaasaqarnera pillugu Siunnersuisoqatigiinnit tamanna tikkuarneqarsimavoq, aammalu Namminersulernissaq pillugu ataatsimiititaliarsuup 2003-mi isumaliutissiissusiaani kiisalu Kalaallit Nunaanni inuussutissarsiutit ineriartortinneqarnissaannut Ataatsimoortumik Ataatsimiititaliap nalunaarusiaani tikkuaavigineqarsimallunissaaq. Siunertaasoq tassaavoq suliffeqarfiit akornanni unammilleqatigiittoqarnissaata qulakkeerneqarnissaa, taamaalilluni inuiaqatigiit aningaasartuutigisartagaasa appasinnerulernissaat taamaaliornerup malitsiginiassammagu. Tamatuma kingunerisaanik unammilleqatigiinnermut inatsisip maanna atuuttup nutarterneqartariaqarnera (sakkortusaavigineqartariaqarnera) pisariaqartinneqarnersoq nalilersorneqartariaqarpoq. Taamaattumik Unammilleqatigiinnermut Ataatsimiititaliap 2002-mi ukiakkut Naalakkersuisunut siunnersuutigisimavaa inatsimmik misissueqqittussamik ataatsimiititaliortoqarnissaa.

Ataatsimiititaliaq isumaqarpoq sulinerminut suliassani ataasiakkaani angusaasarsimasut kisimik nalilersuutigineqarsinnaanngitsut; kisiannili inuussutissarsiutinik ingerlatsinermut oqartussaasullu unammilleqatigiinnermut isummertarnerannut sunniisarnerit tamaasa isiginiarlugit taamatorluinnaq aamma nalilersuutiginiartariaqartut.

Qularutigineqassanngilaq unammilleqatigiinnermut inatsisit killissarititaasa iluanni qanoq iliuuseqartarsinnaanernut tunngatillugu isit ukiuni kingullerni sakkortusitinneqarsimammata. Taamaattumik Ataatsimiititaliap siunissami suliassaasa pingaarnersarissavaat annertunerusumik paasisitsiniaasarnissaq, ilaatigut nittartakkakkut uugguunakkut: www.unammineq.gl. Tassani aalajangikkat eqikkaavigineqartarnerisa kiisalu inatsisit angusinnaasaat pillugit nassuiaasarnerit pilersissinnaassavaat unammilleqatigiinneq eqqarsaatigalugu suut pissuserissaarnerusuunersut pillugit paasisimasaqarnerulersitsinissaq.

Unammilleqatigiinnermut ataatsimiititaliap nalunaarut manna aqqutigalugu innuttaasut sulianik Ataatsimiititaliap suliarisarsimasaanik paasissutissiivigerusuppaat, neriuutigalugulu nalunaarusiaq manna Kalaallit Nunaanni unammilleqatigiinnermut tunngasut pillugit inuiaqatigiit oqallinnerannut ilangaaqqusiissuteqarsinnaajumaartoq.

Nuummi ulloq 17. juni 2004

Carl-Aage Skovaa
Formand for Konkurrencenævnet

 

AALLAQQAASIUT

Unammilleqatigiinnermut ataatsimiititaliap sulinera
Unammilleqatigiinnermut ataatsimiititaliap sulinera Naalakkersuisut Inatsisartullu inuussutissarsiutitigut anguniakkatut pingaarnertut nalunaarutigisimasaannut pissusissamisuuginnartumik nangitsissutaavoq. Tassalu Unammilleqatigiinnermut ataatsimiititaliap suliassaa pingaarneq tassaavoq unammilleqatigiinnermut inatsisip 1. januar 1993-mi atulersimasup aqutsiviginiarnissaa. Inatsit taanna tassaavoq inatsit nakkutilliissut isiginnissinnaassuseqarnissamik isumaqatigiinniarsinnaassuseqarnissamillu tunngaveqartitaq.

Isiginnissinnaassuseqarnissaq pingaartumik anguneqarsinnaavoq nalunaarutiginnittussaatitaaneq aqqutigalugu, pisussaaffillu taanna unammilleqatigiinnermut inatsisip § 5-aniippoq. Ukioq 2000-miilli Unammilleqatigiinnermut ataatsimiititaliap ajoquserneqarani iliorsinnaatitanissaq pillugu paasisitsiniaanermik ingerlatsimmalli Allattoqarfik suliffeqarfinnit unammilleqatigiinnermik killiliisussanik isumaqatigiissuteqartarsimasunit Kalaallit Nunaannut sunniuttussanik arlalippassuarnik nalunaarfigineqartarsimavoq. Malunnarpoq kalaallit suliffeqarfiutaasa nalunaarutiginnittussaatitaaneq pigiliukkiartoraat, tassami suliffeqarfiit nammineerlutik massakkut nalunaarutiginninnissaminnik suliniuteqartalermata. Uanmmilleqatigiinnermulli ataatsimiititaliaq tassaavoq nalunaarutiginnittussaatitaanerup saqqummersimaneranik aalajangiivittussaq. Isumaqatigiissutit nalunaarutigineqartussaatitaasut nalinginnaasumik tamanit takuneqarsinnaasuutitaasussaapput, tassa isertugaataanngikkunik niuernermilu isertugaataanngikkunik. Paasissutissat taamaattut isertuunneqarajuttarput unammilleqatigiinnermut inatsisip § 10, imm. 2-ani maleruagassat naapertorlugit.

Aammattaaq Unammilleqatigiinnermut ataatsimiititaliap isumagisassaraa isumaqatigiissutinik unammilleqatigiinnermut killiliisunik ajortumik sunniuttussanik nakkutiginninniarnissaq akuliuffiginnittarnissarlu, taamatullu inissisimanernik pingaarutilinnik atuinerlunnernik nakkuginnillunilu akuliuffiginnittarnissaq. Nalunaarutiginnittarnernut atatillugu ileqquusarpoq Ataatsimiititaliap aammattaaq misissortarmagu isumaqatigiissutip nalunaarutigineqartup unammilleqatigiinnermut inatsisip § 11-ia naapertorlugu misissorneqarnissaanut tunngavissaqarnersoq, tassa suliffeqarfiit attorneqartut isumaqatigiinniarfigineqalernissaat eqqarsaatigalugu. Unammilleqatigiinnermut inatsisip § 11-a aamma § 13-a malillugit akuliuttarnissanut assersuutit immikkoortuni tulliuttuni eqqartorneqassapput.

Maalaarutinik aamma Unammilleqatigiinnermut ataatsimiititaliaq tigusaqartalerpoq. Uani aallaavittut Unammilleqatigiinnermut ataatsimiititaliap nammineerluni aalajangiivigisarpaa maalaarutit suut suliarineqartussanngortitaassanersut. Tassalu Unammilleqatigiinnermut ataatsimiititaliap suliassani tulleriinnilersorsinnaavai suliassat ataasiakkaat Kalaallit Nunaanni unammilleqatigiinnermut pingaaruteqassusiisa nalilersuiffigisarnerat aallaavigalugu.

Isumaqatigiinniarnissat akuliunnissallu pillugit tunngaviusumik aalajangiinerit arlallit Kalaallit Nunaanni Eqqartuussiiviit qullersaannut ingerlatitseqqivittut suliassanngortinneqartarsimapput. Soorlu ataani atuarneqarsinnaasoq unammilleqatigiinnermut inatsisip § 2-anik isumasiuiniarneq pillugu suliassaq pingaaruteqartorujussuaq 2003-mi eqqartuussivikkut aalajangiunneqarsimavoq (Nuuk Imeq), taassumalu saniatigut suliassat allat suli eqqartuussivimmi ingerlanneqarlutik. Periusaavoq suliassaatit nangiteqqitat eqqartuussisuserisut avataaneersut atorlugit ingerlanneqartarmata Ataatsimoorullugu allattoqarfik qanittumik suleqatigineqartillugu.

Unammilleqatigiinnermut ataatsimiititaliaq Ataatsimoorullugulu allattoqarfik nunat avannarliit unammilleqatigiinneq pillugu ataatsimeeqatigiittarnerinut peqataasarput. 2003-mi ataatsimiiffigineqarsimapput Finland aamma Sverige, tak. tamanna pillugu erseqqinnerusumik allanneqarsimasut imm. 4-miittut. Suliaq tamanna Unammilleqatigiinnermut ataatsimiititaliap pingaartitaraa, tassa Kalaallit Nunaannut pingaartuummat nunat avannarliit allat inatsisaannut periusaannullu ilisimanninnissaq, pingaartumik Unammilleqatigiinnermut ataatsimiititaliap 2002-mi kaammattuineratut Naalakkersuisut unammilleqatigiinneq pillugu inatsimmik misissuisussamik ataatsimiititaliussagaluarpata. Naalakkersuisunut saqqummiussissummi Unammilleqatigiinnermut ataatsimiititaliap allassimavaa Island, Danmark, Norge Sverigilu unammilleqatigiinnermut inatsisiminnik nutarterisimasut, kiisalu Savalimmiut inatsimmik nutarteriniarnermik massakkut suliaqartoq.

Unammilleqatigiinnermut ataatsimiititaliaq ilaasortallu nutaat
Unammilleqatigiinnermut ataatsimiititaliap katitigaanera 2003-mi allanngortinneqarsimavoq. Ilaatigut Lars Lennert-Sandgreen-ip nammineerluni siulittaasutut tunuarnissi aalajangiussimavaa, tassa KNR-mi pisortanngornermi kingornagut Unammilleqatigiinnermut ataatsimiititaliamut aamma siulittaasuunissaq periarfissaaruffigisutut misigisimasimagamiuk. Ilaasortat allat qinigaaffii 2002-ip naanerani naasimapput, tak. unammilleqatigiinnermut inatsisip § 4, imm. 2-a.

Naalakkersuisut 22. maj 2003-mi ataatsimiinnerminni eqqartuussisuserisoq Aviâja Helms Unammilleqatigiinnermut ataatsimiititaliamut siulittaasuugallartussatut toqqarsimavaat.

Tamatuma saniatigut Aatsitassanut pisortaqarfimmi immikkut ittumik siunnersorti Lida Skifte Lennert aamma Atuisut Siunnersuisoqatigiivinut siulittaasoq Olga Poulsen ataatsimiititaliamut ilaasortassatut toqqarneqarsimapput, tassa Attaveqaateqarnermut Ineqarnermullu pisortaqarfimmi seniorkonsulent aamma Atuisut Siunnersuisoqatigiiffiata siulittaasorisimasaa bankassistent Uthilie Heilmann taarserlugit.

Allannguutit taakkua tunngavigalugit Unammilleqatigiinnermut ataatsimiititaliaq 1. januar 2003-miit imatut katitigaalersimavoq:

Siulittaasoq Aviâja Helms, inuussutissarsiutinut attuumassuteqanngitsoq
Siulittaasup tullia Mikael Skourup, inuussutissarsiutinut attuumassuteqanngitsoq
Ole Rud, Kalaallit Nunaanni Sulisitsisut peqatigiiffiat
Lida Skifte Lennert, inuussutissarsiutinut attuumassuteqanngitsoq
Olga Poulsen, inuussutissarsiutinut attuumassuteqanngitsoq
Leif Ellebæk Motzfeldt, inuussutissarsiutinut attuumassuteqanngitsoq
Benny Reiding, Kalaallit Nunaanni Niuernermut, Sullissinermut, Assartuinermut Suliffissuaqarnermullu Sulisitsisut Kattuffiat – massakkut ILIK.

Aviâja Helms Royal Greenland A/S-imi siulersuisunut ilaasortanngornini pissutigalugu Unammilleqatigiinnermut ataatsimiititaliap siulittaasuatut tunuarnissi kissaatigisimavaa. Aalajangernermut pissutaavoq pineqartup suliffeqarfimmut pineqartumut attuumassuteqalernini pissutigalugu soqutigisanik marloqiusanngortitsisalersoorsinnaanera.

Ulloq 23. april 2004-miit Aviâja Helms kst. handelsskoleforstander Carl-Aage Skovaa-mit taarserneqarpoq aammalu ullormit tassanngaaniit regnskabschef Karsten Høy-ip Mikael Skourup taarserlugu, tassa taanna aammattaaq soqutigisaminik marloqiusanngortitsisoortar-sinnaanini pissutigalugu Unammilleqatigiinnermut ataatsimiititaliamit tunuarnissaminik kissaateqarsimammat.

SULIASSAATIT AALAJANGIISARNERILLU

Unammilleqatigiinnermut ataatsimiititaliaq 2003-mi 9. oktober 2003-mi ataasiarluni ataatsimiissimavoq. 2003-mi decembarip naanerani Ataatsimiititaliap allattoqarfiata suliassaatit 167-it nalunaarsorsimavai. 2003-ip ingerlanerani Ataatsimiititaliamut suliassaatit nutaat 21-it anngussimapput.

Suliassaat nr. 105 – Kalaallit Nunaanni Namminersornerullutik Oqartussat Aalisarnermut, Piniarnermut Nunaqarfinnullu pisortaqarfiup aamma NUKA A/S-ip akornanni aalisarnermut tunngassuteqartuni sullissinissamik isumaqatigiissutip nalunaarutigineqarnera.

Kalaallit Nunaanni Namminersornerullutik Oqartussat Aalisarnermut, Piniarnermut Nunaqarfinnullu pisortaqarfiup (massakkut Aalisarnermut Piniarnermullu pisortaqarfiup) aallakkatigut 11. januar 2002-meersutigut NUKA A/S-imut sullissinissamik isumaqatigiissutigineqarsimasoq Unammilleqatigiinnermut ataatsimiititaliamut nalunaarutigisimavaa, isumaqatigiissummi pineqarluni aalisarnermut tunngassuteqartuni nunaqarfinni suliffissuit ingerlanneqarnerinut 2002-mi 2003-milu sullissinissaq.

Isumaqatigiissuteqarneq pisimavoq 21. december 2001-mi, tassanilu pineqarsimallutik kalaallit aalisartuisa ukiuni 2002-mi aamma 2003-mi tunisisarnissaanni, assartuissunneqartarnissaanni nioqqutissiornermullu tunngassuteqartuni sullinneqarnissaat. Isumaqatigiissummi NUKA A/S Namminersornerullutik Oqartussat sinnerlugit 2002-mi aamma 2003-mi sullissisarnissamut pisussaatinneqarsimavoq, isumaqatigiissummilu isumaqatigiissummi sullissisarnissat pineqartut sinaakkusiivigineqarlutillu akissaat aalajangersaavigineqarsimallutik.

Ataatsimiititaliap aalajangiussimavaa Namminersornerullutik Oqartussat Aalisarnermut Piniarnermullu pisortaqarfik aamma NUKA A/S nalunaarfigineqassasut sullissinissamik isumaqatigiissut Unammilleqatigiinnermut ataatsimiititaliamut nassiunneqarsimasoq unammilleqatigiinnermut inatsisip § 5, imm. 1-iani nalunaarutiginninnissamut pisussaaffimmut ilaatinneqartoq. Tamatuma saniatigut Ataatsimiititaliap Allattoqarfik piginnaatissimavaa isumaqatigiissummik § 11 naapertorlugu misissueqqullugu.

Suliassaat nr. 138 – Piginnaasaqarnerup ineriartortinneqarnissaanik isumaqatigiissummik nalunaarutiginninneq (Namminersornerullutik Oqartussat >< Nuummi Amutsivik A/S)

Allakkatigut 8. juli 2002-meersutigut illua tungeriit, Namminersornerullutik Oqartussat Ineqarnermut Attaveqaateqarnermullu pisortaqarfiup aamma Nuummi Amutsivik A/S-ip piginnaasaqarnerup ineriartortinneqarnissaanut sullissinissamik isumaqatigiissut Unammilleqatigiinnermut ataatsimiititaliamut nalunaarutigaat.

Isumaqatigiissummi siunertarineqarpoq suliat ingerlanneqartut pitsaassusaasa qaffaavigineqarnissaat, kiisalu amutsiviup piffissamik eqquilluartarnissaa, umiarsuarnut sisaasunut Kalaallit Nunaanni amutsiveqaannarnissaa tunngavissiiviginiarlugu nukissaqarnissap piginnaasaqarnissallu tunngavissiiviginiarneqarnissaat, taamaalilluni Kalaallit Nunaanni umiarsuit sisaasut siunissami aamma sullinneqartarsinnaaqqullugit. Matuma ataani siunertarineqarpoq isumaqatigiissutip naanerani niuernerpalaartumik akilersinnaasumillu ingerlatsinissap tunngavissiigineqarsimanissaa.

Suliassamut tunngasoq pingaartumik tassaavoq amutsiviit allat piginnaasaqarnerup ineriartortinneqarnissaanik isumaqatigiissuteqarfigineqannginnerisa Kalaallit Nunaanni amutsivinnut allanut qanoq sunniuteqarsimanissaa.

Isumaqarnarpoq pitsaasuunngitsoq Kalaallit Nunaanni amutsiviit aningaasatigut – Namminersornerullutik Oqartussat tungaannit – assigiinngitsumik pineqarmata. Illuatungaatigulli aamaattaaq paasinarpoq Namminersornerullutik Oqartussat Nuummi Amutsiviup matunnginnissaa ilungersuutigeqimmassuk, tassami inuiaqatigiinnut aningaasatigut kingunissai annertussaqimmata.

Ataatsimiititaliap aalajangiuppaa isumaqatigiissut nalunaarutigineqartussaatitaassasoq, aammalu misissorneqartariaqartoq Nuummi suliffeqarfinnut allanut toqqaannartumik unammillertooqataasunut isumaqatigiissutip suut sunniutigissanerai.

Suliassaatit nr. 139, 140, 141 aamma 148 – akit annertussutilluunniit bonusiliivigineqartarnissaannik isumaqatigiissummik nalunaarutiginninneq (Royal Greenland A/S)

Allakkatigut 10. juni 2002-imeersutigut Royal Greenland A/S-ip Unammilleqatigiinnermut Ataatsimiititaliamut nalunaarutigaa Royal Greenland A/S-ip KNAPK-llu akornanni qaleralinnik tunisinermi annertussusissanut bonusiliisoqartarnissaa pillugu isumaqatigiissutaasimasoq.

Ataatsimiititaliap aalajangiussimavaa suliassat taakkua sisamaasut ataatsimut suliariniarlugit, tassa unammilleqatigiinnermut tunngasortaat nikingassuteqalaaginnartitermata.

Ataatsimiititaliap aalajangiussimavaa isumaqatigiissutitut nassiunneqarsimasut unamilleqatigiinnermut inatsisip § 5, imm. 1-ani nalunaarutiginnittussaatitaanermut atasut. Aammattaaq Ataatsimiititaliap Allattoqarfik piginnaatissimavaa unammilleqatigiinnermut i natsisip § 11-anut aamma / imaluunniit § 13-anut tunngatillugit isumaqatigiissutit erseqqinnerusumik misissuiffigineqarnissaannut.

Suliassaat nr. 143 – Suleqatigiinnissamik isumaqatigiissummik nalunaarutiginninneq (Royal Greenland A/S >< Polar Seafood A/S)

Allakkatigut 17. oktober 2002-meersutigut Royal Greenland A/S-ip Unammilleqatigiinnermut ataatsimiititaliamut saaffiginnissutigisimavaa Ataatsimiititaliamut nalilersoqqullugu Royal Greenland A/S-ip aamma Polar Seafood Greenland A/S-ip akornanni piffissamut tamatumunngarpiaq tunngatillugu suleqatigiinnissamik isumaqatigiissutaasimasoq.

Pineqartoq tassaavoq suleqatigiinnissamik isumaqatigiissut piumasaqaatitalersugaq suleqatigiinnissamik isumaqatigiissummi pineqarluni Nuummi tunisassiornissamut qerititsiveqarnissamullu atortussanik pilersitsinissap suleqatigiiffigineqarnissaa.

Suleqatigiinnissamik isumaqatigiissutip ilaatigut imaraa Royal Greenland A/S-ip Polar Seafood-illu raajartamik ilaannik aalajangersimasunik annertussusilinnik POLAR RAAJAT A/S-imut tunisisarnissamik pisussaaffeqarnissaat, tassa Royal Greenland A/S-ip Polar Seafood-illu maannamut Nuummut pisarnertut tulaattagarisimasaat pineqarlutik, tassalu imaappoq Polar Seafood-ip inatsisit naapertorlugit raajartarisartagai aammalu Royal Greenland-ip raajartarisartagai ukiumut 3.000 tons-it missaaniittartut.

Ataatsimiititaliaq isumaqarsimavoq Royal Greenland A/S-ip aamma Polar Seafood-ip akornanni suleqatigiinnissamik isumaqatigiissutaasimasoq unamilleqatigiinnermut inatsisip § 5, imm. 1-ani nalunaaruteqartussaatitaarnermut atasuusoq, kiisalu allattoqarfik piginnaatinneqassasoq suleqatigiinnissamik isumaqatigiissummik § 11 naapertorlugu nalilersuinissamik.

Unammilleqatigiinnermut ataatsimiititaliap aalajangernermini ilaatigut isiginiarsimavaa suleqatigiinnissamut isumaqatigiissutaasimasoq tassaasoq Kalaallit Nunaanni aalisarnermik suliffeqarfissuit annersaasa marluusut akornanni isumaqaatigiissutaasimasoq. Tamatumuuna isiginiarneqarpoq unammilleqatigiit marluusut ingerlatseqatigiinnissamik isumaqatigiissutaat taakkuninnga niuerutiginninnermi unammilleqatigiinnissamut ajoqutaasussanik sunniuteqarsinnaasoq, tassa unammilleqatigiinnerup sakkortussusissaanik pissusissamisuunngitsumik annikillisitsisinnaagami.

Kiisalu Unammilleqatigiinnermut ataatsimiititaliap aalajangernermini isiginiarsimavaa illuatungeriit suleqatigiinnissamik isumaqatigiissumminni § 12 naapertorlugu Nuup Kommuuniani unammilleqatigiinnginnissaminnik imminnut pisussaateqatigiiffigisimanerat.

Suliassaat nr. 150 – Sullissinissamik isumaqatigiissummik nalunaarutiginninneq (Kalaallit Nunaanni Namminersornerullutik Oqartussat >< Greenland Ressources A/S)

Allakkatigut 13. marts 2003-meersutigut Kalaallit Nunaanni Namminersornerullutik Oqartussat Aatsitassanut pisortaqarfiup Greenland Ressources A/S-imut sullissinissamik isumaqatigiissutigineqarsimasoq Unammilleqatigiinnermut ataatsimiititaliamut nalunaarutigisimavaa.

Isumaqatigiissut tassaavoq sullissinissamik isumaqatigiissut Greenland Ressources A/S-ip Namminersornerullutik Oqartussat sinnerlugit suliassanik isumaginninnissaanik imaqartoq.

Sullissinissamik isumaqatigiissutip imarisai annertussusissaalu pillugit paasissutissatut saqqummersimasut tunngavigalugit, kiisalu Unammilleqatigiinnermut ataatsimiititaliap allakkatigut 7. oktober 2002-meersutigut kaammattuuteqarsimanerigaluatut isumaqatigiissut tamanut ammasumik suliariumannittussarsiuunneqarsimanngimmat Ataatsimiititaliaq isumaqarsimavoq Kalaallit Nunaanni Namminersornerullutik Oqartussat Aatsitassanut pisortaqarfiup aamma Greenland Ressources A/S-ip akornanni sullissinissamik isumaqatigiissutaasimasoq unammilleqatigiinnermut inatsisip § 5, imm. 1-ani nalunaarutiginnittussaatitaanermut atatinneqartussaasoq, taamaattumillu nalunaarutiginninneq tusaatissatut tiguneqarsimalluni. Tamatuma saniatigut Allattoqarfik piginnaatinneqarsimavoq isumaqatigiissummik erseqqinnerusumik misissuinissamut, matuma ataani § 11 naapertorlugu nalilersuinissamut.

Suliassaat nr. 158 – inuussutissarsiummik ingerlatsinissamut il.il. piorsaaqataaneq aqqutigalugu inuussutissarsiutit ineriartortinneqarnissaannut kommuunit ilangaaqqusiissuteqarsinnaanerat pillugu Inatsisartut inatsisaat – Unammilleqatigiinner-mut ataatsimiititaliap oqartussaaffiinik annertusititsineq.

Kommuunit inuussutissarsiutinut akuunerat pillugu nassuiaatissamut missingersuusiamut oqaaseqaateqaqqullugu Inuussutissarsiutinut pisortaqarfiup maj 2003-mi Ataatsimoorullugu allattoqarfik qinnuvigisimavaa. Nassuiaasiassaq ilaatigut pisortaqarfiit akornanni, tassalu Nunap iluanut allaffeqarfiup Inuussutissarsiutinullu pisortaqarfiup akornanni suleqatigiiffigalugu suliarineqarsimavoq. Ataatsimiititaliap 9.10.2003-mi ataatsimiinnerani ataatsimiititaliamut ilaasortat Ataatsimoorullugu allattoqarfiup Inuussutissarsiutinut pisortaqarfimmut tusarniaanermut akissutigisimasaanik ilisimatitsivigineqarsimapput.

Nassuiaasiami eqqartorneqartumi inatsisissatut siunnersuutitaasup § 14-ani aalajangersagartaqarpoq kommuuni nalornisuussagaluaruni piorsaassutissatut eqqarsaatigisaq imaluunniit inuussutissarsiummik pilersaarusiassamut qularnaveeqqusiissutissatut eqqarsaatigisaqq unammilleqatigiinnernut atuutereersunut nikisitsissangatinnarsinnaanersoq, taava kommuuni Unammilleqatigiinnermut ataatsimiititaliamut saaffiginnissinnaasoq. Inatsisissatut siunnersuut naapertorlugu Unammilleqatigiinnermut ataatsimiititaliap aalajangersinnaanera pisinnaasassaaq ”inatsisip matuma aalajangersagartai malillugit niuerfiusoq pineqartoq isiginiarlugu”. – Tamanna tunngavigalugu Ataatsimiititaliap ilaatigut eqqartorsimavaa qanoq ilillugu qulakkeerneqarsinnaanersoq kommuunit piorsaasarnissaat pillugu inatsisissap unammilleqatigiinnermullu inatsisip inatsisilerinikkut imminnut assortuutinnginnissaat. Ataatsimiititaliamut ilaasortanit isumaqatigiissutigineqarsimavoq Inuussutissarsiornermut pisortaqarfimmut saaffiginnissutigineqassasoq aalajangiunneqartinniarlugu kommuunit piorsaasarnissaat pillugu inatsimmi § 14 unammilleqatigiinnermut inatsimmut naleqqiullugu qanoq isikkoqartinneqassanersoq.

Ataatsimoorullugu allattoqarfik 23.10.2003-mi Inuussutissarsiornermut pisortaqarfimmut saaffiginnissuteqarsimaavoq, taassumalu apeqqut ilaatigut Nunap iluanut allattoqarfimmut peqqissaarullugu oqaloqatiginnissutigineqassasoq ilisimatitsissutigisimavaa.

Kalaallit Nunaanni Eqqartuussiviit Qullersaanni aalajangigaq, 2003-mi aalajangerneqarsimasoq – Nuuk Imeq A/S Unammilleqatigiinnermut ataatsimiititaliamut

Nuuk Imeq A/S-ip Unammilleqatigiinnermut ataatsimiititaliaq pillugu suliassanngortissimasaa (suliassaat nr. A 31/01 aamma A 400/01), tassungalu atatillugu aalajangiussimallugu Nuuk Imeq A/S-ip imeruersaatinik immiaaqqanillu imeruersaasiortuunera immiaaqqiortuuneralu kiisalu taakkuninnga tuniniaasarnera taakkuninnga nioqqutiginninnermi kisermaassilluni ingerlataasoq unammilleqatigiinnermut inatsisip § 2, nr. 1, naggatip aappaani aalajangersagaasunut tutsinneqarsinnaanngitsut, tassani pineqarluni inuussutissarsiutinik pisortat aqutaannik ingerlatsinermi kisimik pinnginneqarsinnaasut pillugit aalajangersagaasut, taamaattumik Unammilleqatigiinnermut ataatsimiititaliaq ingerlatseqatigiiffiup tungaanut akuliussinnaatitaaffimminik unammilleqatigiinnermut inatsisip §§ 11-15-niini eqqartorneqartunik atuisinnaatitaasoq.

Suliassap oqaluttuassartaa tassaavoq Unammilleqatigiinnermut ataatsimiititaliap december 2000-mi aalajangiussimammagu inatsisitigut immikkut tunngavissaqanngippat imaluunniit tamatumunnga assingusumik tunngavissaqanngippat unammilleqatigiinnermut inatsisip § 2, nr. 1, naggatip aappaani aalajangersagaasunut tulluarsaassutaasinnaasunik unammilleqatigiinnermut inatsisip § 11-ia naapertorlugu Ataatsimiititaliaq Nuuk Imeq A/S-imut isumaqatigiinnialissasoq ataqatigiissaarutissatut isumaqatigiissummik 25. juni 1986-imeersumik, tassaasumik imeruersaatinik immiaaqqanillu eqqussuinermut, imeruersaasiornermut immiaaqqiornermullu taakkuninngalu tuniniaasarnissamut kisermaassilluni Nuuk Imeq A/S-ip nioqqutiginnissinnaaneranik qulakkeerisumik, atorunnaarsitsiniarnissaq.

Tamanna tunngavigalugu Unammilleqatigiinnermut ataatsimiititaliap aalajangiussimavaa malitsigitillugu Ataatsimiititaliap qulaarsiviginiarsarissagaa Nuuk Imeq A/S-ip kisermaassisussaatitaanera pillugu immikkut inatsisiliortoqarsimanersoq.

Nuuk Imeq A/S-ip 16. januar 2001-mi Unammilleqatigiinnermut ataatsimiititaliaq Kalaallit Nunaanni Eqqartuussiviit Qullersaannut suliassanngortissimavaa, taannami tassaavoq Unammilleqatigiinnermut ataatsimiititaliap aalajangigarisimasaannut unammilleqatigiinnermut inatsisip § 17, imm. 3-a naapertorlugu siullertut nangitsivissaatitaasoq.

Marts 2001-mi Kalaallit Nunaanni Eqqartuussiviit Qullersaata aalajangiuppaa eqqartuussisutigut suliassaq kinguartinniarlugu Unammilleqatigiinnermut ataatsmiititaliap pisortat malittarisassaqartitsinissaat pillugu apeqqummik qulaarsinissaata tungaanut.

Juni 2001-mi Unammilleqatigiinnermut ataatsimiititaliap aalajangiuppaa Nuuk Imeq A/S nalunaarfigineqassasoq Ataqatigiissaarinermut isumaqatigiissut 25. juni 1986-meersoq Nuuk Imeq A/S-ip imeruersaatinik immiaaqqanillu kisermaassilluni imeruersaasiortuunissaanut immiaaqqiortuunissaanillu kiisalu taakkuninnga tuniniaasinnaasuunissaanik Nuuk Imeq A/S-imut piginnaatitsissutaasimasoq unammilleqatigiinnermut inatsisip § 2, nr. 1, naggatip aappaani aalajangersagaasunut tutsinneqarsinnaanngitsoq, tassani pineqarluni inuussutissarsiutinik pisortat aqutaannik ingerlatsinermi kisimik pinnginneqarsinnaasut pillugit aalajangersagaasut, taamaattumillu (unammilleqatigiinnermut inatsisip kap. 4-aa naapertorlugu) Unammilleqatigiinnermut ataatsimiititaliap akuliussinnaatitaanera atorneqarsinnaasoq.

Tamatuma kingornagut suliassat Kalaallit Nunaanni Eqqartuussiviit Qullersaanni ingerlatinneqaqqilersimavoq.

Kalaallit Nunaanni Eqqartuussiviit Qullersaata 27. november 2003-mi Nuup Imeq A/S-ip Unammilleqatigiinnermut ataatsimiititaliaq pillugu suliassanngortissimasaata ilaa aalajangiivigisimavaa, ilaatigut tassani Nuuk Imeq A/S-ip suliassanngortissimallugu oqaatigalugu ingerlatseqatigiiffiup kisermaassilluni Kalaallit Nunaanni niuerutiginninnermi imeruersaasiorsinnaallunilu immiaaqqanik maqitsisinnaatitaanera pisortat malittarisassaqartitsinerisa ataaniitinneqartoq.

Kalaallit Nunaanni Eqqartuussiviit Qullersaata nangititsivissatut siullertut eqqrtuussummi aalajangiussimavaa Nuuk Imeq A/S-ip kisermaassisussaatitaanera pisortat malittarisassaqartitsinerannut atasussaatinneqanngitsoq, tamannalu peqatigitillugu ima paasisariaqarluni Unammilleqatigiinnermut ataatsimiititaliap akuliussinnaatitaanera Nuuk Imeq A/S-ip ingerlatsineranut toqqaannartumik atorneqarsinnaasoq, matuma ataani qulaani taaneqartutut kisermaassisussaatitaaneranut.

Eqqartuussiviit Qullersaata aalajangiussimammagu Nuuk Imeq A/S-ip kisermaassisussaatitaanera pisortat malittarisassaqartitsinerinut atasussaatitaanngitsoq, tamatuma kingunerissavaa Unammilleqatigiinnermut ataatsimiititaliap december 2000-mi Nuuk Imeq A/S-ip ki-sermaassisussaatitaanera pillugu aalajangigarisimasaata (aalajangeqqaagarisimasaata) – imarisaatalu – matuma kingornagut Kalaallit Nunaanni Eqqartuussiviit Qullersaannit nalilersuiffigineqartariaqalernissaa takuniarlugu tamanna naammassineqarsinnaasuunersoq aammalu Unammilleqatigiinnermut ataatsimiititaliap § 11 naapertorlugu isumaqatigiinnialernissaq pillugu december 2000-mi aalajangigarisimasaa atorsinnaasuunersoq.

Unammilleqatigiinnermut ataatsimiititaliap aalajangersimasaata tigussaanerusunut tunngasortaa, matuma ataani Nuuk Imerup kisermaassisussaatitaaneranut atatillugu unammilleqatigiinnissaq unammilleqatigiinnermut aseruisumik imaluunniit aseruisinnaasumik killiliiviigineqarsimanersoq suli Kalaallit Nunaanni Eqqartuussiviit Qullersaanni nangitsivissatut siullertut nalilersuiffigineqarsimanngilaq. Eqqartuussinerup ilaa nangiteqqinneqarsimanngitsoq ataatsimiititaliap nittartagaatigut tamanut saqqummiunneqarumaarpoq – www.unammineq.gl.

Nalilersuinissap taassuma kinguartinneqarsimaneranut pissutaavoq illuatungeriit Eqqartuussiviit Qullersaannut isumaqatigiissutigisimammassuk pissusissamisoornerpaajussasoq Kalaallit Nunaanni Eqqartuussiviit Qullersaata kisimiilluni siullermik pisortat malittarisassaqartitsinerannut tunngasortaa pillugu apeqqut isummerfigippagu Unammilleqatigiinnermut ataatsimiititaliap aalajangigarisimasaanik tigussaasunik nalilersuivinnissaq (Kalaallit Nunaanni Eqqartuussiviit Qullersaannit ingerlanneqartussaq) pitinnagu.

Apeqqutit tigussaasut pillugit eqqartuussutissaq 2004-ip naanerani imaluunniit 2005-ip ingerlanerani immaqa pisinnaajumaarpoq. Suliassap sinnera illuatungeriit eqqartuussisuserisuinit allaqattaassutigalugu piareersarneqarnera suli inaarneqarsimanngilaq, taamaattumillu eqqartuussisutigut qaqugu suliarineqarumaarnissaa suli aamma piffissaliivigineqarsimanani.

Suliassaatit 31.12.2003-mi Kalaallit Nunaanni Eqqartuussiviit Qullersaanni suliassanngortitaasimasutut tigummineqartut:

Air Greenland A/S (siusinnerusukkut Grønlandsfly A/S) – 01.05.2001-mi akinik allannguisimaneq

Unammilleqatigiinnermut ataatsimiititaliap 2001-mi Grønlandsfly-p akigititai isertittagaalu qaqileriffigisimavai, matuma ataani januar 2001-mi Grønlandsfly-p akinik allannguisimanera qaffasissumik inissisimanermik atornerluinertut oqaatigineqarsinnaanersoq, tassami qaffasissumik inissisimanermik atornerluinissaq unammilleqatigiinnerup § 13-ia naapertorlugu inerteqqutaavoq.

Ataatsimiinnermi december 2001-mi Unammilleqatigiinnermut ataatsimiititaliap aalajangiussimavaa ingerlatseqatigiiffiup januar 2001-mi akinik qaffaasimanera aammalu billetsinut tunngatillugu atugassarititaasut tamatumunnga attuumassuteqartut allanngortinneqarsimanerat unammilleqatigiinnermut inatsit malillugu qaffasissumik inissisimanermik atornerluinerusoq.

Suliassaq Grønlandsfly-p januar 2002-mi Kalaallit Nunaanni Eqqartuussiviit Qullersaannut suliassanngortissimavaa oqaatigalugu Unammilleqatigiinnermut ataatsimiititaliap aalajangi-inera atorsinnaanngitsutut illuartinneqartariaqartoq. Suliassaq Kalaallit Nunaanni Eqqartuussiviit Qullersaanni januar 2004-ip naanerani eqqartuussisutigut suliarineqarsimavoq, tamatumalu kingornagut eqqartuussissutissartaa suliarineqalersimalluni. Eqqartuussutissaq juni 2004-ip aallartinnerani suli aalajangiivigineqarsimanngilaq.

Immiaaqqanik imeruersaatinillu kulsyretalinnik Kalaallit Nunaanni siammarterisinnaanermut KNI-p kisermaassisussaatitaanera

Nuuk Imerup immiaaqqanik imeruersaatinillu kulsyretalinnik kisermaassilluni eqqussuisinnaatitaanera immiaaqqiorsinnaatiaaneralu kiisalu imeriaruersaasiorsinnaatitaanera pillugu Unammilleqatigiinnermut ataatsimiititaliap 15. december 2000-mi aalajangiineranut atatillugu aalajangiunneqarsimavoq unammilleqatigiinnermut inatsisip § 11-ia naapertorlugu immikkoortillugu misissuiffigineqalissasoq KNI Pilersuisup immiaaqqanik imeruersaatinillu kisermaassilluni siammarterisinnaatitaanera. Kisermaassisussaatitaaneq takuneqarsinnaavoq isumaqatigiissummi KNI Pilersuisup aamma Nuuk Imerup 2. maj 1994-mi isumaqatigiissutigisimasaanni.

Ataatsimiititaliap ataatsimiinnermini 5. december 2001-mi pisumi aalajangiussimavaa KNI Pilersuisup kisermaassisussaatitaanera pillugu isumaqatigiissut unammilleqatigiinnermut inatsisip § 5-ia naapertorlugu nalunaarutiginnittussaatitaanermut atatinneqartussaasoq, aammalu unammilleqaatigiinnermut inatsisip § 11-iani eqqartorneqartutut isumaqatigiissut taanna unammilleqatigiinnermut kingunerluuteqartussanik unammilleqatigiinnissamut killiliisuusoq.

Unammilleqatigiinnermut ataatsimiititaliap 5. december 2001-mi aalajangiinera Kalaallit Nunaanni Eqqartuussiviit Qullersaannut suliassanngortinneqarsimavoq, massakkullu suli suliassanngortitaasimasutut tigummineqarluni. Ilimagineqartariaqarpoq eqqussuisinnaanermut Nuuk Imerup kisermaassisussaatitaanera pillugu suliassamut nangiteqqitamut peqatigitillugu eqqartuussivikkut suliarineqarumaarnissaa, tak. tamatuma siorna tungaani eqqartorneqarnera.

Siusinnerusukkut nalunaarusiaasartuni soorlu oqaatigineqartareersimasoq aammattaaq KNI Pilersuisup aamma Nuuk Erngup pillarneqarnissaat suliassiissutigineqarsimavoq, tassa isumaqatigiissut 2. maj 1994-imeersoq pissutigalugu. Isumaqatigiissut taanna Unammilleqatigiinnermut ataatsimiititaliamut nalunaarutigineqarsimanngimmat (aammalu suli nalunaarutigneqanngimmat) ataatsimiititaliap 20. juni 2001-mi ataatsimiinnermini aalajangiussimavaa Nuummi Politimesteri qinnuviginiarlugu KNI Pilersuisoq aamma Nuuk Imeq unnerluutigineqaqqullugit, tassa unammilleqatigiinnermut inatsisip § 5-ia naapertorlugu nalunaarutiginnittussaatitaanermik eqqortitsisimanngitsutut. Politimesterip aalajangiussimavaa pillaatissinneqarnissap isummerfigineqannginnerani suliassiissutitut eqqartuussivimmi tigummineqartup inernissaata utaqqimaarneqaqqaarnissaa.

KNI Pilersuisoq A/S – Uuliamik nioqquteqarnissamik isumaqatigiissut

Kalaallit Nunaanni Sulisitsisut Peqatigiiffiata Unammilleqatigiinnermut ataatsimiititaliamut 2000-mi nalunaarutigisimavaa KNI Pilersuisup aamma Kalaallit Nunaanni Sulisitsisut Peqatigiiffiata akornanni uuliamik nioqqutiginninnissamik 2000-mi isumaqatigiissutaasimasoq.

Unammilleqatigiinnermut ataatsimiititaliap juni 2001-mi ataatsimiinnerani nalunaarutiginninneq taanna oqaluuserineqarsimavoq, taamanikkullu ataatsimiititaliap aalajangiussimallugu isumaqatigiissut nalunaarutigineqartussaatitaasoq. Peqatigitillugu ataatsimiititaliap aalajangiussimavaa isumaqatigiissutigineqarsimasoq unammilleqatigiinnermut killilersuutaasunik aalajangersagartaqarnersoq erseqqinnerusumik misissorneqalissasoq.

Unammilleqatigiinnermut ataatsimiititaliaq isumaqarsimavoq Sulisitsisut Peqatigiiffiannit inunnut nioqquteqarnissamik isumaqatigiissutitut tunngavissatut nassiunneqarsimasoq, uuliamik nioqquteqarnissamut isumaqatigiissummut allequttatut isumaqatigiissutitut isikkoqartoq aammattaaq unammilleqatigiinnermut inatsimmi nalunaarutiginnittussaatitaanermut atasuusoq.

Aammattaaq Unammilleqatigiinnermut ataatsimiititaliaq isumaqarsimavoq olieforhandleraftalimik taaneqartoq kiisalu detailforhandleraftalimik taaneqartoq tamaannarmik unammilleqatigiinnissamut killilersuutinik arlalinnik aalajangersagartaqartut, taakkulu uuliamik Kalaallit Nunaanni tuniniaaniarnermut ajoqusiisinnaasunik nassataqartussaasut imaluunniit nassataqarsinnaalluartut.

Ataatsimiititaliaq Sulisitsisut Peqatigiiffiannik aamma KNI Pilersuisoq A/S-mik aalajangersakkanik pineqartunik taakkuninnga unitsitsiniarnissaq pillugu isumaqatigiinniariartoqqusilluni aggersaarianngitsoq KNI Pilersuisup december 2001-mi aalajangiussimavaa Unammilleqatigiinnermut ataatsimiititaliap aalajanngiinera Kalaallit Nunaanni Eqqartuussiviit Qullersaannut suliassanngortinniarlugu oqaatigalugu Ataatsimiititaliap aalajangiinera atorsinnaangitsuusoq.

Unammilleqatigiinnermut ataatsimiititaliap oktober 2003-mi ataatsimiinnerani aalajangiunneqarpoq eqqartuussiviit avataatigut isumaqatigiissuteqarnissaq anguniarlugu isumaqatigiinnialersimanerigaluit isumaqatigiissutitaqanngitsumik inaarneqassasut, eqqartuussivitsigullu suliassaq nangeqqinneqassasoq. Suliassap Kalaallit Nunaanni Eqqartuussiviit Qullersaanni qaqugu suliarineqalernissaa suli ullussaliivigineqanngilaq.

Suliassaq Kalaallit Nunaanni Eqqartuussiviit Qullersaanni atorunnaarsitaq, kisiannili Østre Landsret-imut nangiteqqinniagaq suliassamut aningaasartuutitai eqqarsaatigalugit:

Kalaallit Nunaanni Sulisitsisut Peqatigiiffiata mesterinut nalunaaquttap akunneranut akigititai

December 2001-mi Unammilleqatigiinnermut ataatsimiititaliap aalajangiuppaa Kalaallit Nunaanni Sulisitsisut Peqatigiiffiata mesterinut nalunaaquttap akunneranut akigititatut aaqqissuussai unammilleqatigiinnissamut killiliisuusut unammilleqatigiinnermut ajoqusiisumik sunniuteqarlutik imaluunniit sunniuteqarsinnaallutik.

Tamatuma kingornagut Sulisitsisut Peqatigiiffiat isumaqatigiinniarnissamut ag-gersarneqarsimavoq, kisiannili SP-ip qinnuteqarneragut isumaqatigiinniarnissat kinguartinneqarsimapput, tassa SP’p Kalaallit Nunaanni Namminersornerullutik Oqartussat nutaamik isumaqatigiinniarniarsarisimammagit, tamannalu Unammilleqatigiinnermut ataatsimiititaliap aalajangigarisimasaanut sunniuteqarsinnaammat.

Peqatigiiffimmit Kalaallit Nunaanni Namminersornerullutik Oqartussanut isumaqatigiissutigissangasaagaluaq SP-mit anguneqanngitsoormat isumaqatigiinniarnerit nangeqqinneqarput, isumaqatigiinniarilli taakkua angusaqarfiunngitsoorput, taamaattumik Unammilleqatigiinnermut ataatsimiititaliap juni-mi peqqussutigaa mesterit nalunaaquttap akunnerinut akigititatut aaqqissugaata atorunnaarsinneqarnissaa.

Tamatuma kingornagu SP-ip Unammilleqatigiinnermut ataatsimiititaliap unammilleqatigiinnermut inatsisip § 12-a malillugu peqqussutigisaa Kalaallit Nunaanni Eqqartuussiviit Qullersaannut suliassanngortippaa, kisiannili kingusinnerusukkut suliassap unitsiinnarneqarnissaa aalajangersimallugu. Unammilleqatigiinnermut ataatsimiititaliap mesterit nalunaaquttap akunnerinut akigititaasa aaqqissugaanerata atorunnaarsinneqarnissaa pillugu peqqussutaa taamaalilluni suli atuuppoq.

Ulloq 21. maj 2003 Kalaallit Nunaanni Eqqartuussiviit Qullersaata aalajangerpaa suliassamut illuatungeriit tamarmik immikkut suliassamut aningaasartuutinik matussutissiissasut. Unammilleqatigiinnermut ataatsimiititaliap aalajangiuppaa aningaasartuutinik matussutissiinissamik aalajangernerup Østre Landsret-imut nangitassanngortinneqarnissaa, taassumalu 15. april 2004-mi aalajangiuppaa Kalaallit Nunaanni Sulisitsisut Peqatigiiffiata Unammilleqatigiinnermut ataatsimiititaliamut 15.000 kr.-nit aningaasartuutinut matussutissaasut akilissagai.

NUNAT AVANNARLIIT SULEQATIGIINNERAT

Unammilleqatigiinnermut tunngasunik ataatsimoortumik nunat avannarliit suleqatigiinnerannut atatillugu Nunani Avannarlerni unammilleqatigiinnermut oqartussaasut ukiumoortumik naapeqatigiittarput apeqqutit ataatsimoortumik isumaliutigisariaqartut oqallisigisarlugit. Peqatigitillugu ukiumut ataasiarluni pisortat naapeqatigiittarput, tassanilu nunani taakkunani unammilleqatigiinnermut oqartussaasut atorfilittaasa qullersaasut suliassat unammilleqatigiinnermut tunngassuteqartut, aaqqissugaanerit, inatsisit il.il. pillugit misilittagaasunik imminnut paasissutisseeqatigiittarput. Nunat Avannarliit ataatsimeeqatigiinnissaannut piareersarnerit ingerlatsinerillu nunani avannarlerni unammilleqatigiinnermut oqartussaasunit nikittaallugit aaqqissuunneqartarput. Ataatsimoorullugu allattoqarfimmi uppernarsineqarsinnaasut malillugit Nunat Avannarliit ataatsimoortumik suleqatigiinnerannut Kalaallit Nunaat 1997-imiit peqataasarsimavoq. April 2002-mi Kalaallit Nunaat siullermeerluni nunat avannarliit pisortaasa ataatsimeeqatigiinnerannut aaqqissuussisuusimavoq.

Pisortat Finland-imi ataatsimiinnerat – april 2003

Ataatsimiinnermut tassunga peqataasimapput pisortat kiisalu Nunat Avannarliit unammilleqatigiinneq pillugu ataatsimeeqatigiittarnerannut attaveqaataasartut. Kalaallit Nunaat Ataatsimoorullugu allattoqarfiup pisortaanit sinniisuuffigineqarpoq. Ataatsimiinnermi tassani Danmarkip, Islandip, Norgep Sverigillu atsioqatigiiffigaat paasissutissat isertuussassat taarsiissutigeqatigiiffigisarnissaat pillugu suleqatigiinnissamut ilanngussatut isumaqatigiissummut Sverigip ilanngunnissaa, taannalu 2001-mi Danmarkimit, Islandimit Norgemillu atsioqatigiiffigineqarsimavoq. Sverigemut isumaqatigiissutigineqartoq atulerpoq ulloq 15. februar 2004-mi.

Unammilleqatigiinneq pillugu ataatsimiinneq Sverige-mi – august 2003

Nunat Avannarliit unammilleqatigiinneq pillugu ataatsimeeqatigiinneranni Stockholm-ip avannaani Såstaholm-imi ingerlanneqartumi peqataapput Unammilleqatigiinnermut ataatsimiititaliap siulittaasua aamma Ataatsimoorullugu allattoqarfiup pisortaa.

Nunat sammineqarneranni Allattoqarfiup pisortaa Kalaallit Nunaanni killiffik pillugu aallarniuteqarpoq, matuma ataani ilisimatitsissutigalugu unammilleqatigiinnermut inatsit 1992-imeersoq suli atuuttoq, aammalu ilisimatitsissutigalugu unammilleqatigiinneq pillugu inatsisip nutarteriffigineqarnissaanut ataatsimiititaliamik pilersitseqqullugit Unammilleqatigiinnermut ataatsimiititaliap oktober 2002-mi ataatsimiinnermi siunnersuutigisimasaa Naalakkersuisunit qisuariarfigineqarsimanngitsoq. Kiisalu ilisimatitsissutigineqarput unammilleqatigiinneq pillugu Kalaallit Nunaanni suliassaatit killiffigisaat, matuma ataani Kalaallit Nunaanni Eqqartuussiviit Qullersaanni suliassatut tigummineqartoq, Air Greenland-imit suliassanngortitaasimasoq. Aammattaaq ilisimatitsissutigineqarpoq Pisiffik A/S-ip namminersortunngorsaavigineqarsimanera, aammalu namminersortunngorsagassatut tulliuttutut tusagassiuutini oqaluuserineqarsimasut.

Ataatsimiinnermi pingasunik suleqtigiissitaliortoqarsimavoq, taakkulu oqaluuserisimavaat:

  • Tusagassiuuteqarneq – atuakkanik nioqquteqarneq ilanngullugu
  • Tele-mut tunngassuteqartut – suleqatigiinneq, malittarisassaqartitsineq, namminersortunngorsaanerup siuariartornera
  • Niuernikkut isumaqatigiissuteqartarnerni suleriaatsit

Nunani Avannarlerni innaallagissamik nioqquteqarnermi unammilleqatigiinnermi pissutsit pillugit nalunaarusiassamut missingiut ataatsimiinnermut saqqummiunneqarpoq, taannalu Nunani Avannarlerni unammilleqatigiinnermut pisortaasunit akuersissutigineqarluni. Nalunaarusiamut Kalaallit Nunaat ilanngussaqarsimanngilaq.

Kiisalu ataatsimiinnermi aammattaaq Nunani Avannarlerni suleqatigiissitamik pilersitsineqarnissaa aalajangiunneqarpoq, taassuma aalajangersimasumik akeqartitseriaaseq misissussallugu, kiisalu aammattaaq aalajangiunneqarluni tele pillugu suleqatigiissitaliortoqarnissaa, taassuma sammissallugu nunani tele-mik ingerlatsisoqarfiusuni unammilleqatigiinnermut tunngassuteqartut qanoq innersut. Nukissat qulequttallu suuneri pissutigalugit suliamut tassunga Kalaallit Nunaat peqataanngilaq.

2003-MUT NAATSORSUUTIT

Unammilleqatigiinnermut ataatsimiititaliamut, Atuisut Siunnersuisoqatigiiffiannut aammalu Atuisut Maalaaruteqartarfiannut 2003-mut Aningaasanut inatsisikkut aningaasaliissutit katillutik 3,7 mio. kr.-niupput, taakkulu 2002-mut naleqqiullugit allannguuteqarsimanngillat.

Unammilleqatigiinnermut ataatsimiititaliaq 2003-mi immikkut ittunik aningaasartuuteqartarsimavoq katillugit 423.790 kr.-niusunik. Taakkua agguataarneqarnerat takuneqarsinnaavoq ataani immikkoortitaarlugit naatsorsuusiorfiusumi.

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut