Siulequt

Kalaallit Nunaani unammilleqatigiinnermut inatsit ukiuni qulini atuussimalerpoq. Unammilleqatigiinnermut ataatsimiititaliap sulinermini unammilleqatigiinnermi inatsisip ilisimaneqarnerata siaruarnissaa pingaaruteqartippaa. 2004-mi nittartakkamik pilersitsisoqarpoq, tassuunakkut allattoqarfiup ataatsimiititaliamit aalajangikkat, eqqartuussisutit, misissueqqissaarnerit, tusagassiorfitsigut nalunaarutit allallu pilertornerusumik saqqummiussinnaavai, taamaalillunilu unammilleqatigiinnermi inatsip ilisimaneqarnera annertusaaffigeqatigisinnaallugu.

Ukiuni qulini unammilleqatigiinermut inatsit, nakkutilliinermik aallaaveqartoq, atuutereersorlu, inatsip nutarterneqarnissaa pisariaqartoq paasinarsiartuinnarpoq. Nunani avannarlerni allani aammattaaq EU-mi nunani unamilleqatigiinnermi inatsiseqarneq inerteqquteqartarnermik aallaaveqarpoq, kalaallilli inatsisaat nakkutilliinermik allaaveqarluni. Taamaatumik ataatsimiititaliaq ukiuni arlaqalersuni inatsip nutarterneqarnissaanut ataatsimiititaliamik pilersitsinissamik sulissuteqarnikuuvoq.

Isumaqatigiissutit pillugit nalunaaruteqartarnerit amerliartuinnartut aamma nalunaarnissamut pisussaanerup suliffeqarfiit unammilleqatigiinnermut inatsimmik ilimasimaneqaleraluttuinnarnerannik uppernarsaaneruvoq. Taamatut ilisimaqalerneq qularnanngitsumik aamma isumaqatigiissutinik unammilleqatigiinnermi inatsimmut akerliusunik isumaqatigiissuteqartannginnissamut iluaqutaavoq.

Inatsisartuni aamma Naalakkersuisuni politikerit akornanni inuiaqatigiinni annertunerujartortumik kiffaanngissuseqarnerulluni unammilleqatigiissinnaaneq soqutigineqaleraluttuinnarpoq. Naalagaaffimmit kisermaassilluni ingerlatsinerit aamma salliutitsinerit unammillernermut pakkersimanneqataasut atorunnaarsinneqarnerat, inuussutissarsiutinik peqqinnarnerusumik ingerlatsinermut aallaaviuvoq, taamaaliornikkullu kalaallit imminut nammattumik aningaasarsiulernissaannut anguniakkamut ilapittuutaalluni.

Danmarkimi Unammilleqatigiinnermut Aqutsisoqarfimmik (Konkurrencesturelsen) qanimut suleqateqarnikkut aamma ilanngunneqartariaqarluni nunani avannarlerni unammilleqatigiinnermi oqartussaasunik suleqateqarnikkut ataatsimiititaliap aamma allatseqarfiup sulinerat sakkortusarneqarpoq. Sulisuusut nunani avannarlerni suliniutinut peqataaneranni ilisimasanik pingaarutilinnik tunniussinermik kinguneqartarpoq, attaveqarfissallu iluaqutissat naapinneqartarlutik. Nunat avannarliit suliniutaanni “Inuussutissanik nioqquteqarfinni unammillernerit” -mi Kalaallit Nunaat peqataavoq. Nunat tamalaat annertunerusumik suleqatigiilernerisigut pingaaruteqarpoq, kalaallit unammilleqatigiinnermut oqartussaasuisa nuni allani unammilleqatigiinnermut oqartussaasunik suleqateqaannarnissaat tamatumalu annertusarneqartartuarnissaa. Sulissutigineqarpoq nunat avannarlliit unammilleqatigiinnermut tunngasunik ataatsimiinnissaat 2007-mi Kalaallit Nunaanni pinissaa.

Ukiumoortumik nalunaarusiami suliat assigiinngeqisut ukiup ingerlanerani sammineqarsimasut pulaffigineqarput, tamatumalu kingunerisaanik qularnanngitsumik amerlanerit – inuussutissarsiutinik ingerlatsisut aamma politikerit – unammilleqatigiinnermut maleruagassanik ilisimasaqalernerusunissaat naatsorsuutigineqarsinnaavoq.

Nuuk, juunip 17-iani 2005

Carl-Aage Skovaa
Unammilleqatigiinnermut ataatsimiititaliami siulittaasoq

 

AALLAQQAASIUT

Unammilleqatigiinnermi ataatsimiititaliap sulinera

Unammilleqatigiinnermi ataatsimiititaliap sulinera Naalakkersuisut aamma Inatsisartut inuussutissarsiutitigut politikkikkut anguniagaannik tunngaveqarpoq. Taamaalilluni Unammilleqatigiinnermi ataatsimiititaliap suliassaasa pingaarnersarivaat kalaallit unammilleqatigiinnermi inatsisaat 1993-imi jannuaarip aallaqqaataani atuutilersinneqartoq nakkutigissallugu. Inatsit nakkutilliinermut inatsisaavoq paasinartuutsitinermik aamma isumaqatigiiniarsinnaanermik tunngaveqartoq.

Paasinartuuneq unammilleqatigiinnermi inatsimmi § 5 naapertorlugu nalunaarnissamik pisussaaffeqarnernikkut pingaartumik anguneqarsinnaavoq. Unammilleqatigiinnermut ataatsimiititaliap 2000-imi pineqaatissinneqannginnissamik kinguneqartussamik nalunaarsinnaanermut aaqqissuussinerata kingornatigut, Unammilleqatigiinnermi ataatsimiititaliaq suliffeqarfinnit arlaqaqisunit Kalaallit Nunaanni atuuttumik unammilleqatigiissinnaanermut killiliinermik isumaqatigiissuteqarsimasunit nalunaarutinik tigusaqarnikuupput. Kalaallit inuussutissarsiornikkut suliffeqarfiisa nalunaartarnissamut pisussaaffeqarneq kiisami ilikkarsimagunarpaat, suliffeqarfiimmi nammineerlutik nalunaaruteqarnissamut iliuuseqartalernikuupput. Kisiannili Unammilleqatigiinnermut Ataatsimiitiliap kisimi aalajangigassara nalunaarummik tunniussaqarsimanermik pisussaaffeqarneq anguneqarsimanersoq naliussallugu. Isumaqatigiissutit nalunaarnissamik pissussaaffeqarnermik tunngaveqartut nalinginnaasumik kikkunnit tamanit takuneqarsinnaassuussapput, paasissutissat isertuussassat aamma niueqatigiinnermi isertuussassat pinqanngippata. Paasissutissat taamattut isertuunneqarsinnaapput maleruagassat unammilleqatigiinnermi inatsimmi § 10, imm. 2-mi pineqartut naapertoraanni.

Unammilleqatigiinnermi ataatsimiititaliap aamma suliassarivaa nakkutilliinissaq, kiisalu salliutinneqartutut inissisimasut isumaqatigiissutaat unammilleqatigiinnermut ajoqutaasinnaasut atornerluinerillu akuliuffigisinnaallugit. Taamatut nalunaartarnissamut tunngasuni ileqquuvoq, isumaqatigiissutip nalunaarutiginerup misissuiffigineqarnissaanut ataatsimiititaliap nalilersuisarnera, Unammilleqatigiinnermi inatsimmi § 11 naapertorlugu suliffeqarfinnik isumaqatigiinniarnissaq aallartinneqassanersoq. Unammilleqatigiinnermi inatsimmi §§-it 11 aamma 13 tunngavigalugit akuliussinnaanermut assersuutit kinguliani allaaserineqarput.

Unammilleqatigiinnermi ataatsimiitiitaliaq aamma maalaarutinik tigusaqartarpoq. Tamatumani Unammilleqatigiinnermi ataatsimiititaliap tunngaviatigut nammineerluni aalajangigassarivaa, maalaarutit suut suliarineqassanersut. Taamaalilluni Unammilleqatigiinnermi ataatsimiititaliaq suut suliarissanerlugit tulleriiaarisinnaavoq, suliassat ataasiakkaat Kalaallit Nunaanni unammilleqatigiinnermi pissutsinut pingaaruteqassusiat tunngavigalugu.

Unammilleqatigiinnermi ataatsimiititaliaq kiisalu Unammileqatigiinnermi ataatsimiititaliap aamma Kalaallit Nunaanni Atuisartunut Siunnersuisoqatigiit ataatsimoorussamik allatseqarfiat nunat avannarliit unammilleqatigiinnermut tunngasuni ataatsimiinnerinut peqataasarpoq. 2004-mi Finlandimi aamma Sverigemi ataatsimiittoqarpoq, takuuk kinguliani immikkoortoq 5. Unammilleqatigiinnermi taamatut suliaqarneq pingaartilluinnarneqarpoq, nunani avannarlerni inatsisit aamma taakkua atortinneqarnerat Kalaallit Nunaannit ilisimaneqarnissaat pingaaruteqarmat.

Unammilleqatigiinnermi inatsip nutarterniarneqarnera

Assigiinngitsunit taamatuttaaq politikkikkut suliaqartunit apeqquserneqartalerpoq unammilleqatigiinnermut inatsisip maanna atuuttup nutarterneqarnissaanut nalilersuinissaq piffissanngunnginnersoq. 2002-mi ukiakkut Unammilleqatigiinnermi ataatsimiititaliap Naalakkersuisunit inatsimmik nutarterisinissamut ataatimiititaliamik pilersitsinissaq inassutigivaa. Naalakkersuisunut saqqummiussinermi pineqartumut aallarniutitut oqaatigineqarpot Unammilleqatigiinnermi ataatsimiititaliaq siusinnerusukkut erseqqissaateqarnikuusoq Islandimi, Danmarkimi, Norgemi Sverigemilu unammilleqatigiinnermi malittarisassat nuterterneqarnikuusut, kiisalu Savalimmiuni inatsimmik nutarterinissaq suliniutigineqartoq.

Ataatsimoorussamik allatseqarfimmit ukiup ingerlanerani Inuussutissarsiornermut pisortaqarfik unammilleqatigiinnermi inatsisip nutarterneqarnissaa pillugu ilisimatitseqatigiilluni ataatsimeeqatigineqartarpoq. Inuussutissarsiornermut pisortaqarfik nutarterinissamut ataatsimiititaliamik pilersitsinissamut siunnersuut Unammilleqatigiinnermut ataatsimiititaliamit 2002-mi nassiunneqartoq pillugu suli suliaqarput.

Unammilleqatigiinnermi ataatsimiititaliaq aamma ilaasortat nutaat

Unammilleqatigiinnermi inatsimmi § 4, imm. 2 naapertorlugu Unammilleqatigiinnermi ataatsimiititaliap ilaasortai arfinillit Naalakkersuisunit ukiuni sisamani atuuttussatut toqqarneqartarput. Ataatsimiititaliaq inuussutissarsiutit tungaatigut tamatigoortumik ilisimasaqassapput, taamatullu inatsisilerinermut, aningaasarsiornermut, aningaasalersuinermut aamma pissutsinut atuisartunut tunngassuteqartunut.

2004-mi jannuaarip aallaqaataanit atortuulersumik Unammilleqatigiinnermut ataatsimiititaliamut ilaasortat ukuninnga katiterneqarsimapput:

  • Siulittaasoq Aviâja Helms, inuussutissarsiuteqartut soqutigisaqarfiinut pituttorsimanngitsoq
  • Siulittaasup tullia Mikael Skourup, inuussutissarsiuteqartut soqutigisaqarfiinut pituttorsimanngitsoq
  • Benny Reiding, ILIK
  • Ole Rud, Grønlands Arbejdsgiverforening
  • Lida Skifte Lennert, inuussutissarsiuteqartut soqutigisaqarfiinut pituttorsimanngitsoq
  • Leif Ellebæk Motzfeldt, inuussutissarsiuteqartut soqutigisaqarfiinut pituttorsimanngitsoq
  • Olga Poulsen, inuussutissarsiuteqartut soqutigisaqarfiinut pituttorsimanngitsoq

Aviâja Helmip Royal Greenland A/S-ip siulersuisuinut ilaasortanngornini pissutigalugu Unammilleqatigiinnermut ataatsimiititaliami siulittaasutut tunuaannarpoq. Taamatut aalajangiineq tunngaveqarpoq, suliffeqarfimmut tassunga attuumassuteqarnini pissutigalugu, siunissami Unammilleqatigiinnermut ataatsimiititaliap aalajangertagassaanut soqutigisanik uniffeqaratarsinnaaneq.

2004-mi apriilip 23-iani atortuulersinneqartumik Aviâja Helms niuernermut ilinniarfimmi pisortamit Carl-Aage Skovaa-mit taarserneqarpoq, ullorlu taanna naatsuuserinermi pisortap Karsten Høy-ip Mikael Skourup siulittaasup tulliatut taaserpaa, aamma taanna soqutigisanik uniffeqaratarsinnaaneq pissutigalugu Unammilleqatigiinnermut ataatsimiititaliamit tunuarnissamut kissaateqarsimasoq.

Olga Poulsen 2004-mi sitsimparip 30-iani Unammilleqatigiinnermut ataatsimiititaliamit tunuarniuteqarnerminik nalunaarpoq, suliassamut piffissaqannginnini pissutigalugu.

2004-p naanerani Unammilleqatigiinnermut ataatsimiititaliami ilaasortat allanngornerat pissutigalugu ukuuluerput:

  • Siulittaasoq Carl-Aage Skovaa, inuussutissarsiuteqartut soqutigisaqarfiinut pituttorsimanngitsoq
  • Siulittaasup tullia Karsten Høy, inuussutissarsiuteqartut soqutigisaqarfiinut pituttorsimanngitsoq
  • Benny Reiding, ILIK
  • Ole Rud, Grønlands Arbejdsgiverforening
  • Lida Skifte Lennert, inuussutissarsiuteqartut soqutigisaqarfiinut pituttorsimanngitsoq
  • Leif Ellebæk Motzfeldt, inuussutissarsiuteqartut soqutigisaqarfiinut pituttorsimanngitsoq
  • Sofia Rossen (2005-imi fipruaarip aalaqqaataanit), inuussutissarsiuteqartut soqutigisaqarfiinut pituttorsimanngitsoq

SULIASSIISSUTIT AAMMA AALAJANGIINERIT

2004-mi Unammilleqatigiinnermut ataatsimiititaliami marloriarluni ataatsimiittoqarpoq, juunip 17-iani aamma novembarip 23-iani. 2004-mi decembarip naggataani Ataatsimoorussamik allatseqarfimmit suliassiissutit 192-mut nalunaarsorneqarsimapput. Ukiup ingerlanerani ataatsimiititaliamut suliassiissutit nutaat 24-it takkupput.

Suliasassaq nr. 95: Kalaallit Nunaanni aningaaseriveqarneq

2004-mi juunip 17-iani Unammilleqatigiinnermut ataatsimiititaliaq ataatsimiinnermini aalajangerpaa, suliassiissut Kalaallit Nunaanni aningaaseriviit inuiaqatigiinni niuffaffittut kiffartuusiineranni unammilleqatigiinneq misissuiffigineqassasoq.

Unammilleqatigiinnermut ataatsimiititaliaq unammilleqatigiinnermi inatsimmi § 8 naapertorlugu misissuisinnaavoq, taakkuninngalu tamanut saqqummiussisinnaalluni, taakku unammilleqatigiinnermi pissutsit pillugit paasinarnerulersitsinissamut naleqquttuugaangata, taamaalillutillu inuussutissarsiornermi ingerlatsinerit pilertornerulersinneqarsinnaaput.

Siusinnerusukkut Unammilleqatigiinnermut ataatsimiititaliap 2003-mi oktuuparimi ataatsimiinnermini aalajangerpaa, Kalaallit Nunaanni aningaaseriviit inuiaqatigiinni niuffaffittut kiffartuusiineranni unammilleqatigiinnerisa misissuiffigineqarnissaannut suliniarneq aallartissasoq. Misissuineq 2001-mili Kalaallit Nunaanni aningaaseriviit, immikkullu itttumik GrønlandsBANKEN-ip, inuiaqatigiinni niuffaffittut kiffartuusiinerat Unammilleqatigiinnermut ataatsimiititaliamit sukannernerusumik nakkutigineqalersimapput.

Misissuineq tunngavigalugu Unammilleqatigiinnermut ataatsimiititaliaq isumaqarpoq, GrønlandsBANKEN suli Kalaallit Nunaanni aningaaserivitsigut kiffartuussisarnermi salliunerusutut ingerlatsisuusoq – naak Sparbank Vest Grønland-imit unammillerneqarneq annertuneruleraluartoq. Aammattaaq Unammilleqatigiinnermut ataatsimiititaliaq naliliivoq, GrønlandsBANKEN-ip paasissutissat pigineqartut tunngavigalugit taamatut salliulluni ingerlatsisuusutut inissisimananini atornerlunngikkaa

Tamannali ima isumaqanngilaq, Unammilleqatigiinnermut ataatsimiititaliap Kalaallit Nunaanni aningaaserivitsigut kiffartuussisarnerit sukannernerusumik nakkutigineqarnerat pisariaqartikkuunnaaraa. Ineriartorneq ajunngitsumik ingerlaannassappat, Unammilleqatigiinnermi ataatsimiititaliaq naliliivoq, ukiut allortarlugit aningaaseriviit inuiaqatigiinni niuffaffittut kiffartuusiineranni unammilleqatigiinnermi pissutsit misissuinikkut nalileqqinneqartarnissaat naleqqutissasoq.

Ataatsimiititaliap naliliinerani 2004-mi aggustusip 19-iani Unammilleqatigiinnermut ataatsimiititaliap aalajangiinera tusagassiorfitsigut nalunaarutigineqarpoq.

Suliassaq nr. 123: Pisiffik A/S-ip aamma Pilersuisoq A/S-ip niueqatigiinnermut isumaqatigissuutaat

Ukiorpaaluit sulissutigereerneratigut, Unammilleqatigiinnermut ataatsimiititaliaq naammaginartumik angusaqarpoq, 2001-imi Dagrofa A/S-ip Pisiffik A/S-ip aktiaataasa 51 %-iinik tigusineranut atatillugu Pisiffik A/S-ip aamma Pilersuisoq A/S-ip akornanni niueqatigiinnissamut isumaqatigiissutinut tunngasutigut.

2001-imi suleqatigiinnissamut isumaqatigiissutit katillugit 14-it Unammilleqatigiinnermut ataatsimiititaliamut nalunaarutigineqarput. Taakkunanit isumaqatigiissutit tallimat misissorneqarput, 2004-milu juunimi Unammilleqatigiinnermut ataatsimiititaliap ataatsimiinnermini naqissuserpaa, isumaqatigiissutit tallimanit marlut unammilleqatigiinnermut ajornartorsiutaasinnaasunik pilersitsinnaasut.

Unammilleqatigiinnermut ataatsimiititaliap aalajangiinera tunngavigalugu Dagrofa A/S-imik isumaqitigiinniarneq aallartinneqarpoq. Isumaqatigiinniarnerit taakku kingunerivaat, Pilersuisoq A/S-ip taamaallaat Pisiffik A/S-ikkoortillugu pisiniartarnissaanut Dagrofa A/S-ip pisussaaffeqartitsinini piumaqaatitaqanngitsumik iperarmagu. Maannakkut Pilersuisoq A/S Pisiffik A/S-imut imaluunniit allamut piumasaminik pisiniarsinnaavoq. Ilutigalugu Pisiffik A/S-ip Pilersuisoq A/S sinnerlugu pisiniartussaanini pisariaaruppaa.

Kiisalu Sisimiuni allaffinnik attartornissamut isumaqatigiissuteqarnermi attartortitsisumut (Pilersuisoq A/S-imut) ukiunik 25-inik sivisussusilimmik pituttuineq ukiunut 15-inut sivisussusilerneqarpoq. Unammilleqatigiinnermut ataatsimiititaliamit ukiut quliunissaat kissaatigineqarsimagaluarpoq. Isumaqatigiinniarnermi Dagrofa A/S ukiut 15-iunissaannik neqerooruteqarpoq. Unammilleqatigiinnermullu ataatsimiititaliaq Dagrofa A/S-imik isumaqatigiissuteqarnermut atatillugu taamatut sivisussuseqartitsinissamik naaperiaavoq. Tamanna ima paasineqassaaq, Pilersoq A/S-ip attartortitsisutut Pisiffik A/S attartortutut taamaatissinnaagaa 2016-imi decembarip 31-iat aallarnerfigalugu –siusinnerusukkut imaakkaluartoq 2026-imi decembarip 31-iat aallarnerfigalugu.

2004-mi ukiap ingerlanerani Dagrofa A/S-imik isumaqatigiinniarnerit naammassipput, tamatumalu kingunerisaanik 2004-mi novembarip 24-iani isumaqatiigiinniarnernit pineqartunit aalajangiineq Unammilleqatigiinnermut ataatsimiititaliamit tusagassiorfitsigut nalunaarutigineqarpoq.

Unammilleqatigiinnermut ataatsimiititaliap Dagrofa A/S-illu isumaqatigiinniarnerat illuatungeriinnut ajungitsutut pissarsiffiulluartutullu nalilerneqarput – neriuutigineqarporlu suliffeqarfiit allat ataatsimiititaliamit siunissami sammineqartussat, ataatsimiititaliamik isumaqatigiissuteqartarniartassasut, Kalaallit Nunaanni Eqqartuussivimmut ingerlaannaq suliassiinatik.

Suliassaq nr. 138: Kalaallit Nunaanni Namminersornerullutik Oqartussat aamma Nuuk Værft A/S-ip akornanni piginnaanngorsaanissamut kiffartuussinermut isumaqatigiissut

2003-mi oktobarip qulingiluaani Unammilleqatigiinnermut ataatsimiititaliap ataatsimiinnerani, ataatsimiititaliaq Kalaallit Nunaanni Namminersornerullutik Oqartussat aamma Nuuk Værft A/S-ip akornanni piginnaanngorsaanissamut kiffartuussinermut isumaqatigiissut pillugu aalajangiivoq.

Unammilleqatigiinnermut ataatsimiititaliaq isumaqarpoq, kiffartuussinermut isumaqatigiissutinik nalunaaruteqartussaaneq unammilleqatigiinnermut inatsimmi § 5, imm 1 naapertorlugu pisussaaffigineqartoq, taamatuttaaq Ataatsimoorussamik allatseqarfik itinerusumik misissuinissamut pisinnaatitaavoq, Nuummi suliffeqarfiit Nuuk Værft A/S-itulli suliamik/kiffartuussinernik unammilleqataasinnaasut, piginaanngorsaanissamut kiffarttuussinermut isumaqatigiissuteqarnerup malitsigisaanik ajornerusumik atugassaqalersimanersut paasiniarlugit.

Tamatuma kingorna Nuummi suliffeqarfiit arfineq marlut apeqqutit arlallit akineqarnissaannut qinnuigineqarput, Kalaallit Nunaanni Namminersornerullutik Oqartussat aamma Nuuk Værft A/S-ip akornanni piginnaanngorsarnissamut kiffartuussinermut isumaqatigiissuteqarnikkut suliffeqarfik aningaasarsiorneruttaaq tungaatigut ajornerusumik sunnerneqarsimanersoq, aamma suliffeqarfik nammineq Namminersornerullutik Oqartussanik kiffartuussinermut isumaqatigiissuteqarnissamut soqutiginninnersoq.

Suliffeqarfik ataaseq akivoq, kiffartuussinermut isumaqatigiissutikkut ajortumik sunnerneqarsimanani, kiisalu assingusumik isumaqatigiissuteqarnissamut namminneq soqutiginninnatik.

Akissut taanna ataaseq tiguneqartoq tunuliaqutaralugu, aammattaarli suliffeqarfiit sinneruttut arfinillit Ataatsimoorussamik allatseqarfimmit apeqqutinik akissuteqarnissamut pissutissaqarsimannginnerat isumagalugu, aamma uppernarsaatissanik naammattunik takkuttoqannginnera pissutigalugu, ataatsimiititaliaq isumaqanngilaq kiffartuusinermut isumaqatigiissut unammilleqatigiinnermut killiisoq, tamatumalu kingunerissanik ajoqutaasinnaalluni.

Suliassaq nr. 147: Superbyg Kalaallit Nunaat A/S-ip aamma KNI Pilersuisoq A/S-ip isumaqatigiissutaat

1993-imi jannuaarip aallaqqaataanit qaartiterutissanik eqqussuineq Superbyg-imit isumagisassanngorlugu tunniunneqarpoq, tuniniaaneq Superbyg-imit aamma Pilersuisumit ataatsimoorussanngorluni. Tamanna sioqqullugu Sanaartornermut Nakkutilliisoqarfiup suliassat tamakku isumagisimavai. Tunniussineq 1992-imi Naalakkersuisut Aningaasaqarnermut ataatsimiititaliamut inassuteqarneratigut pivoq.

Tunniussineq tamanna tunngavigalugu, Superbyg suliffeqarfinni kisiartaassaaq Kalaallit Nunaannut qaartiterutissanik eqqussuisussaq, tuniniaaneq illoqarfinni niuertarfiuteqarfigisani Superbyg-imit ingerlanneqartussaavoq, illoqarfinnilli sinneruttuni tuniniaaneq Pilersuisumit ingerlanneqartussaalluni.

1993-imi fipruaarip aallaqqaataani atuutilersumik suliffeqarfiit taakku marlut qaartiterutissanik tuniniaanissamut suleqatigiinnissamik isumaqatigiissuteqarput. 2003-milu jannuaarip aallaqqaataani atuutilersumik qaartiterutinik aamma atortuinik passusisarnermut suleqatigiinnissamut isumaqatigiissuteqarput.

Isumaqatigiissut kingulleq nalunaarutigineqartoq Unammilleqatigiinnermut ataatsimiititaliamut soqutiginnilersitsivoq. Suleqatigiinnissamik isumaqatigiissut namminermini unammilleqatiigiinermut ajoqutaasunik unammilleqatiigiinermut tunngasuni ajoqutissartaqanngilaq. Taamaakkaluartorli Unammilleqatiigiinermut Ataatsimiititaliap paasivaa isumaqatigiissut 1993-imeersoq nalunaarutigineqarsimanngitsoq.

Isumaqatigiissut taanna misissorneqarpoq, 2004-milu nuvimparip 23-iani ataatsimiititaliap ataatsimiinnermini Unammilleqatiigiinermut ataatsimiititaliaq aalajangiivoq, isumaqatigiissut Unammilleqatigiinnermut Inatsimmi § 5, imm. 1 naapertorlugu nalunaaruteqarnissamik pisussaaffeqarnermut ilaasoq. Inatsimmi § 5, imm. 3 naapertorlugu isumaqatigiissut atorsinnaanissaminut nalunaarutigineqartussaavoq, isumaqatigiissutigineqarneranit ullut 14-it qaangiutsinnagit, isumaqatigiissullu taanna nalunaarutigineqarsimanngisaannarmat, 1993-imi fipruaarip aallaqqaataanit atortuulersinneqarnera atortussaasimanngilaq.

Aammattaaq Unammilleqatiigiinermut ataatsimiititaliamit paasineqarpoq, suleqatigiinissamut isumaqatigiissut 1993-imeersoq unammilleqatigiinnermut killiliisunik arlalinnik imaqartoq, soorlu niuffaffiup agguataarneqarnerat, unammillersinnaanermut inerteqquteqarnerit aamma tuniniaaqqinnermi akinik pittuttuineq, tamakkumi Unammilleqatigiinnermut inatsimmi § 15 naapertorlugu inerteqqutaapput.

Novembarip 23-iani ataatsimiititaliap ataatsimiinnerani Unammilleqatiigiinermut ataatsimiititaliaq aalajangiivoq, unnerluussisartut qinnuigineqassasut Superbyg Kalaallit Nunaat Unammilleqatigiinnermut inatsimmi § 19, imm. 1, nr. 1 naapertorlugu unnerluunneqassasut, Unammilleqatigiinnermut inatsimmi § 5, imm. 1 nalunaaruteqarnissamut pisussaaffeqarneq unioqqutinneqarsimammat, kiisalu inatsimmi § 15 akinik pittuttuinermik inerteqquteqarnermut tunngasoq.

Suliassaq nr. 149: SIK-p maalaarutaa KNB-p aamma Pisiffik A/S-ip unammilleqatigiinnerannut tunngasoq

2003-mi februaarip 25-iani SIK Unammilleqatigiinnermut ataatsimiititaliamut naalaaruteqarpoq, KNB-p aamma Pisiffik A/S-ip akinik assigiinnik atugaqarunarnerat pillugu. Ataatsimiititaliap maalaarut suliarivaa, 2004-milu juunip 17-iani aallajangiilluni.

SIK-p ulluinnarsiutinik nioqquteqartarfeqatigiit taakku marlut pillugit apeqqusiivoq, assigiimmik iliuuseqartarnermik imaluunniit assigiimmik akeqartitsinissamik isumaqatigiittoqarsimanera unammilleqatigiittoqarsimannginnermut tunngavilersuutaallutik. Maalaarummik tunngavilersuinermut SIK-p atuisartunut tusaammi “Atuisoq”-mi akinik misissuinermit 2002-mi nuvimparimi saqqummiussat innersuussutigivai. Misissuinermi niuertarfinni assigiinngitsuni, Brugsenimi, Pisiffimmi, Sparimilu nioqqutissat ulluinnarsiutit assigiinngitsut 30-it pillugit nalinginnaasumik akigitinneqartut paasiniarneqarput. Malaaruteqartup tikkuarpaa nalinginnaasumik akigititat taakku Brugsenimi aamma Pisiffimmi assigiittorujussuusut, malaaruteqartumillu tamanna ima paasineqarpoq, assigiimmik iliuuseqartoqartarsimassasoq imaluunniit assigiimmik akeqartitsinissamik isumaqatigiittoqartarsimassasoq.

Unammilleqatigiinnermut ataatsimiititaliaq KNB-mut aamma Pisiffimmut maalaarummut oqaaseqaateqartitsipput, kiisalu suliffeqarfiit taakkua marlut pillugit unammilleqatigiinnerinut naliliinissamut aningaasarsiornerat misissueqissaarfigineqarluni. Ataatsimiititaliaq naliliivoq, KNB-p aamma Pisiffiup unammilleqatigiinneranni aningaasarsiornerisigut misissueqqissaarneq tunngavigalugu ataatsimut isigalugu unammilleqatigiittoqarsimasoq, tamannalu tunngavigalugu pissutissaqanngitsoq tikkuassallugu ulluinnarsiutinik nioqquteqartarfiit – tamatumani aamma KNB Pisiffillu pineqarlutik – ataatsimut isigalugu Unammilleqatigiinnermi inatsimmi § 11 unioqqutissimagaat, assigiimmik iliuuseqartarnikkut imaluunniit unammilleqatigiinnermut killiliisumik isumaqatigiissuteqarnikkut. Unammilleqatigiinnermi ataatsimiititaliap tamanna tunngavigalugu SIK-p maalaaruteqarnera tunuartippaa.

Malitsigisaanik Unammilleqatigiinnermut ataatsimiititaliap misisueqqissaarneq saqqummiunniarlugu aalajangerpoq, 2004-milu juunip 23-iani ataatsimiititaliap aalajangernera pillugu tusagassiorfitsigut nalunaaruteqartoqarpoq.

Suliassaq nr. 181: Maniitsumi qerititsiveqarfik pillugu unammilleqatigiinnermut immikkut piumasarineqartoq

Unammilleqatigiinnermut ataatsimiititaliaq 2004-mi juunip 17-iani atatsimiinnermini aalajangerpaa, Royal Greenland A/S-ip Unammilleqatigiinnermi inatsit unioqqutissimaneraa misissorneqassasoq, Maniitsumi qerititsiveqarfiup Royal A/S-mit Pisiffik A/S-imut tunineqarnerani qerititsiveqarfimmi kiffartuussisutut unammilleqatigiinnermut tunngasumik immikkut piumasaqaasiorsimanermi. Unammilleqatigiinnermut tunngasumik immikkut piumasaqaat piffissamik killiliinertaqanngilaq.

Royal Greenland A/S-ip Unammilleqatigiinnermut inatsimmik unioqqutitseratarsinnaaneranut Ataatsimiititaliap nammineerluni misissuiniarneranut, Inuussutissarsiornermut, nunaateqarnermut aamma Sulliffeqarnermut pisortaqarfimmit saaffiginnissut tunuliaqutaavoq. Unammilleqatigiinnermut ataatsimiititaliaq unammilleqatigiinnermut tunngasumik immikkut piumasaqaat taanna pillugu suliamik Pisortaqarfimmit ilisimatinneqarpoq.

Unammilleqatigiinnermut ataatsimiititaliamit susassaqartut unammilleqatigiinnermut immikkut piumasaqaammik eqqorneqarsimasinnaasut attavigineqarput, taamatuuttaaq ataatsimiititaliaq Maniitsumi illuutigineqartoq pillugu misissuinissamut aalajangiilluni.

Unammilleqatigiinnermi ataatsimiititaliaq misissuivoq, unammilleqatigiinnermut tunngasumik immikkut piumasaqaat pineqartoq, unammilleqatigiinnermut inatsimmi taaneqartutut salliusutut inissisimanermi atornerluinermut inerteqqut unioqqutinneqarsimanersoq, aamma qerititsiveqarfimmik tuniniaanermut atatillugu isumaqatigiissuteqartoqarsimanersoq, imaluunniit unammilleqatigiinnermi inatsisip siunertaanut akerliusumik siunertaqarluni imaluunniit siunniussilluni unammilleqatigiinneq killilerneqarsimanersoq.

Unammilleqatigiinnermut ataatsimiititaliap novembarip 23-iani ataatsimiinnissaa sioqqullugu Ataatsimoorussamik allatseqarfimmit Inuussutissarsiornermut, nunaateqarnermut aamma Sulliffeqarnermut pisortaqarfik aamma Royal Greenland A/S pisortatiguunngitsumik ataatsimeeqatigineqarput, suliassaq isumaqatigiissuteqarnikkut inaarneqarsinnaaniassammat.

Ataatsimiinnerup inernerivaa, Naalakkersuisut ataatsimut isigalugu unammilleqatigiinnermi immikkut piumasaqaatit pillugit aalajangiisoqarnissaa kissaateqarmata, tamatumanilu suliamut tunngasumi immikkut ittumik piumasaqaatinut atatillugu

Royal Greenland A/S nalunaaruteqarpoq, piginneqatigiiffik Maniitsumi tunisassiorfimmik piginnilersussamik isummersoqateqarnissamut piareersimasoq, illuummi pineqartumi kiffartuusinissamut piumasaqaatip atorunnaarsinneqarnissaa siunertaralugu. Royal Greenland A/S-illi nalunaaruteqarnera tunngavigalugu, isumaqatigiissummik atorunnaarsitsineq qerititsiveqarfiup niuerutigalugu akiata assinganik akeqartussaavoq.

Tamanna tunngavigalugu paasinarsivoq, suliassap aaqqivigineqarnissaanut isumaqatigiissuteqartoqarsinnaangitsoq.

Suliffeqarfimmit imaluunnit inummit sunnerneqartumit maalaaruteqartoqarsimanngimmat, ajornartorsiullu tigussaasumik sunniuteqanngimmat imaluunnit tamatuma nalaani atorneqartussaanngimmat, ataatsimiititaliap aalajangerpaa, suliassap inerlanneqarnera naggaserneqarsinnaasoq Unammilleqatigiinnermut inatsimmi § 4, imm. 1 innersuussutigalugu.

Decembarilli arfineq pingajuani Maaniitsup kommunianit aalajangiineq pillugu maalaaruteqartoqarpoq.

Suliassaq nr. 186: Puisit amiinik tunisinermi tapiissuteqartarneq

2003-mi juulip qulingani Aalisarnermut Piniarnermullu pisortaqarfik allagaqarnermigut, Kalaallit Nunaanni Namminersornerullutik Oqartussat aamma Great Greenland A/S-ip akornanni 2003-mut puisit amiinik tunisinermi tunisinermut tapiissuteqartarnermi kiffartuussinermi isumaqatigiissut nalunaarutigivaa.

Unammilleqatigiinnermut ataatsimiititaliap 2004-mi juunip 17-iani aalajangerpaa, isumaqatigiissutit Unammilleqatigiinnermi inatsimmi § 5, imm. 1 naapertorlugu nalunaaruteqarnissamik pisussaaffeqarnermut ilaasut, aamma kiffartuussinermi isumaqatigiissutit suliffeqarfinnut allanut puisit amiinik Great Greenland A/S-iinngitsumut tunisisarusussinnaasunut unammillernermut killiliisuusinnaasut.

Ilutigalugu Ataatsimoorussamik allatseqarfik unammilleqatigiinnermi inatsimmi § 11 naapertorlugu piginnaatitaavoq, Namminersornerullutik Oqartussat piniartunut tunisinermi tapiissutinik aningaasaliinermigut kalaallit puisit amiinik niueruteqartarneranni unammilleqatigiinnermi killiliinernik akornutaasinnaasunilluunniit kinguneqartitsisimanersut. Unammilleqatigiinnermi ataatsimiititaliaq isumaqanngilaq, Great Greenland A/S-imut unammillertut imaluunnit unammillerniat Kalaalit Nunaani Namminersornerullutik Oqartussanit tunisinermi tapiissutinik tunineqarsinnaasut, Great Greenland A/S-imut kiffartuusinermi isumaqatigiissut atuutsillugu.

Ataatsimoorussamik allatseqarfiup pisortaqarfimmut 2004-mi juulip 14-iani allagaqarnermigut qinnutigivai, puisit amiinik tunisinermi tapiissutinik akiliuteqartoqartillugu inatsisikkut tunngavigisat aamma akiliuteqartarnermi iliuuserisartakkat pillugit nassuiaatit.

2004-mi aggustusip qulingani pisortaqarfik akissuteqarpoq, tamannalu tunngavigalugu Unammilleqatigiinnermut ataatsimiititaliaq isumaqarpoq, Naalakkersuisut Great Greenland A/S-imik kiffartuussinissamik isumaqatigiissutaatigut kiisalu piniartunut tunisinermi tapiissuteqarnermut akilersueriaasiatigut unammilleqatigiinnermi inatsimmi § 2, imm. 2, nr., 1) imm. 2 atortinneqartoq. Inatsit tunngavigineqartoq tassaavoq Aningaasanut inatsit, taamattumillu unammilleqatigiinnermi inatsimmi §§-it 11-miit 15-imut akulerunnissamut aalajangersakkat atorsinnaanngitsut.

Tunisinermi tapiissutinik akiliuteqartarnermut atatillugu pisortaqarfik ilisimatitsivoq, Great Greenland A/S-ip aamma KNAPK-p akornanni puisit amiinut akigititassanik aamma tunisinermi tapiissutinik akiuliuteqartarnermut isumaqatigiissuteqartoqarsimasoq. Tamatuma malitsigisaanik tunisinermi tapiissutit akiliutigineqarnissaannut piumasarineqarpoq, Great Greenland A/S-imut tunisisoqartassasoq, tapiissuteqartoqartassanngitsorli nioqquteqarfiusunut imaluunnit nioqquteqarfiusinnaasunut allanut tunisinermi.

Unammilleqatigiinnermut ataatsimiititaliaq aalajangerpoq, unammilleqatigiinnermut inatsimmi § 16 naapertorlugu Aalisarnermut Piniarnermullu pisortaqarfimmut saaffiginnissuteqarniarluni, piniartut Great Greenland A/S-iunngitsumut allanulli tunisineranni siunissami tunisinermi tapiissutinik pissarsisarnissaat Naalakkersuisunit qulakkeerneqarnissaa siunertaralugu.

Ilutigalugu Unammilleqatigiinnermi ataatsimiititaliap aalajangiinera pillugu tusagassiorfitsigut nalunaaruteqartoqarpoq.

Aalisarnermut Piniarnermullu Naalakkersuisoq 2005-imi fipruaarip 21-iani allagaqarnermigut Unammilleqatigiinnermut ataatsimiititaliamut nalunaaruteqarpoq, puisit aminik tunisinermi tunisinermut tapiissutit pillugit allaffissornikkut nutaamik periuseqalernissamut iliuusissanik pisortaqarfik sulissuteqassasoq, taamaalillunilu inassuteqaatit pisortaqarfimmut saqqummiunneqartut sulinermi isiginiarneqassasut, 2006-imi kiffartuussinissamut isumaqatigiissuteqaratartoqarsinnaanerani.

q: Grønlandsfly A/S (maanna Air Greenland AS) Unammilleqatigiinnermi ataatsimiititaliamut

Air Greenlandip taamani Kalaallit Nunaanni timmisartuussisarfinni akigititamigut aaqqissuusseqinnerani, 2001-imi Unammilleqatigiinnermi ataatsimiititaliaq piginneqatigiiffiup akigititai isertittagaalu pillugit misissueqqissaarpoq. Misissueqqisaarneq tunngavigalugu Unammilleqatigiinnermut ataatsimiititaliaq isumaqarsimavoq, Air Greenlandp akitigut allannguinermigut timmisartuussisarfinni unammillernartuni salliulluni inissisimanermigut atornerluisoq, tamannalu unammillernermi inatsimmi § 13 naapertorlugu inerteqqutaasoq, taamaattumillu Air Greenland qinnuigineqarpoq, timmisartuussiffiusuni taakkunani akit apparneqarnissaanut ataatsimiititaliamik isumaqatigiinniassasoq. Tamanna Air Greenlandimut nalunaarutigineqarpoq, tamatumalu kinguneranik tamanna pillugu piginneqatigiiffik Kalaallit Nunaanni Eqqartuussivimmut suliassanngortitsivoq, piumasarineqarluni Unammilleqatigiinnermi ataatsimiititaliap salliulluni inissisimanermi atornerluinermut aalajangigaata atortussaannginnissaa.

Suliassiissut Kalaallit Nunaanni eqqartuusivimmi 2004-mi januaarimi suliarineqarpoq, eqqartuussissutissatullu aalajangerneqarluni. Eqqartuussissut aggustusip 13-iani aalajangiiffigineqarpoq, taamaalillunilu Kalaallit Nunaanni Eqqartuusiviup Air Greenland ilalerpaa, piginneqatigiiffiup salliulluni inissisimani atornerlussimanngikkaa.

Tamatuma kingorna Unammilleqatigiinnermut ataatsimiititaliap immikkut ittumik ataatsimiinnermini aalajangerpaa, Kalaallit Nunaanni Eqqartuussiviup aalajangigaa Østre Landsret-imut ingerlateqqinneqassasoq, piumasarineqarluni Unammilleqatigiinnermut ataatsimiititaliap pinngitsuutinneqarnissaa.

Kalaallit Nunaanni Eqqartuussiviup aalajangigaa tamarmiusoq Unammilleqatigiinnermi ataatsimiititaliap nittartagaani takuneqarsinnaavoq: www.unammineq.gl.

Eqqartuussissut: Kalaallit Nunaanni KNI-p immiaaqqanik aamma imeruersaatinik siammaasarnermut kisermaassisussaatitaanera

Unammilleqatigiinnermi ataatsimiititaliaq 2000-imi decemparimi aalajangerpoq, unammilleqatigiinnermut inatsisimmi § 11-p malitsigisaanik KNI-p immiaaqqanik aamma imeruersaatinik siammaasarnermut kisermaassisussaatitaanera pillugu immikkut ittumik misissuisoqalissasoq. KNI Pilersuisup aamma Nuuk Imeq-p akornanni Kisermaassisussaatitaanermik isumaqatigiissut atortuulersinneqarpoq 1994-mi maajip aappaanni.

2001-imi decembarip tallimaani ataatsimiititaliap ataatsimiinnermini aalajangerpaa, Pilersuisup kisermassisussaatitaaneranik isumaqatigiissut unammilleqatigiinnermut inatsimmi § 5 naapertorlugu nalunaaruteqarnissamut pisussaaffeqarnermut ilaasoq, aammattaaq § 5-imi pineqartutut unammilleqatigiinnermut killiliisinnaalluni ajoqutaasinnaasumik.

KNI Pilersuisup ataatsimiititaliap aalajangiinera 2002-mi Kalaallit Nunaanni Eqqartuussivimmut suliassiissutiivaa. Eqqartuussineq suli ingerlavoq, kisiannili eqqartuussivimmi suliarineqarnera 2005-imi sitsimparip tallimaanut killilerneqarpoq.

Eqqartuussissut: KNI Pilersuisoq A/S – Uuliamik tuniniaasinnaanermut isumaqatigiissut

2000-imi Grønlands Arbejdsgiverforening (GA)-p KNI Pilersuisup aamma GA-p akornanni 2000-mi uuliamik tunisisinnaanermut isumaqatigiissut pillugu Unammilleqatigiinnermut ataatsimiititaliamut unnerluuteqarpoq.

Unnerluut Unammilleqatigiinnermut ataatsimiititaliap 2001-mi juunimi ataatsimiinermini eqqartorpaa, ataatsimiititaliarlu aalajangiivoq isumaqatigiissut nalunaarutigineqartussaasoq. Ilutigalugu ataatsimiititaliaq aalajangiivoq, isumaqatigiissummi unammilleqatigiinnermut killiliisunik aalajangersagartaqaratarsinnaanera misissorneqassasoq.

Unammileqatigiinnermi ataatsimiititaliap paasivaa, GA-mit nassiunneqartoq nioqquteqartarfinnut assigimmik piumasaqaatitalimmik niueqatigiinnermut isumaqatigiissutip, uuliamik tuniaanermut isumaqatigiissummut tapiliussaasoq, aamma unammilleqatigiinnermi inatsit naapertorlugu nalunaarutigineqarnissaa pisussaaffigineqartoq.

Ilutigalugu Unamilleqatigiinnermut ataatsimiititaliap paasivaa, tuniaanermut isumaqatigiissutaannaanngitsoq ammali assigimmik piumasaqaatitalimmik niueqatigiinnermut isumaqatigiissut unammilleqatigiinnermut killiisunik arlallinnik aalajangersagartaqartoq, kalaallit uuliamik niuernerannut akornusiisinnaasunik. Pilersuisoq aalajangersakkat pineqartut atorunnaarnissat pillugu ataatsimiititaliamik isumaqatigiinniaqateqarnissamut aggersarneqarpoq. KNI Pilersuisulli 2001-mi dissimparimi Unammilleqatigiinnermi ataatsimiititaliap aalajangiinera Kalaallit Nunaanni Eqqartuussivimmut suliassanngortippaa, piumasaralugu ataatsimiitaliap aalajangernera atortussaatinneqassanngitsoq.

Ukiup naanerani eqqartuussivimmi suliarineqarfissaa suli ullulerneqanngilaq.

Eqqartuussissut: Nuuk Imeq A/S Unammilleqatigiinnermi ataatsimiititaliamut, suliassiissutigeqinneqartoq

2003-mi novembarip 27-iani Kalaallit Nunaanni Eqqartuussivik aalajangiivoq Nuuk Imeq A/S-ip Unammilleqatigiinnermut ataatsimiititaliamut piumasaqaataanut, Nuuk Imeq A/S-ip kalaallit niuerfianni sodavandinik immiaaqqanillu maqitsinermut kisermaassinera pisortanit killilersorneqarnera pillugu, eqqartuussissutip ilagisassaanik aalajangiivoq.

Eqqartuussinermut tunuliaqutaavoq, Unammilleqatigiinnermut ataatsimiititaliaq 2000-imi decembarimi ataatsimiinnerup juunimi 2001-imi nanginneqarnerani aalajangermat, Nuuk Imeq A/S-ip kisermaassinera pisortanit killilersugaanngitsoq, kiisalu isumaqatigiinniarnerit aallartinneqassasut kisermaassineq allanngortinniarlugu, taamaasilluni unammillertuusinnaasut niuerfimmi periarfissaqalersillugit, imaluunniit kisermaassineq taamaatinneqavissasoq.

Eqqartuussiviup aalajangernermini naqissuserpaa, Nuuk Imeq A/S-ip kisermaassinera pisortanit killilersorneqanngitsoq, taamaattumillu Unammilleqatigiinnermut ataatsimiititaliaq unammilleqatigiinermik inatsimmi kapitel 4 naapertorlugu akuliussinnaanermut pisinnaatitaanini atorsinnaagaa.

Eqqartuussinerup atuutsitilersinnaaneranut atatillugu – ilaatigut kisermaassinerup ingerlaannarsinnaaneranut isumaqatigiinniarnerit aallartinneqassanersut – 2004-imi eqqartuussissutigineqanngillat. Kingunerisaanik eqqartuussinerup nanginneqarnissaa 2005-imi novembarip pingajuanut ullulerneqarpoq.

NUNANI AVANNARLERNI SULEQATIGIINNEQ

Nunat avannarliit unammilleqatigiinnermut oqartussaasui unammilleqatigiinnermi nunat avannarliit ataatsimoorussamik suleqatiginnerinut atatillugu ukiumoortumik ataatsimut ajornartorsiutigineqartut isummersorfigineqarnissaannut inerniliiffigineqartumik ataatsimiittarput. Aammattaaq ukiumoortumik pisortaanerit ataatsimiittarput, tassanilu nunat ataasiakkaat oqartussaasuisa allaffissortui qaffasissumik inissisimasut unammilleqatigiinnermi suliassiissutinut, aaqqissuussaanermut tunngasunut, inatsiseqarnermut tunngasunut il.il misilittakkanik paarlaasseqatigiissinnaanermut periarfissaqartarput. Nunani avannarlerni ataatsimiinnissat pilersaarusiornerat aamma ingerlanneqartarnerat nunani avannarlerni unammilleqatigiinneq pillugu oqartussaasunit paarlakaajaanneqartarpoq. Ataatsimoorussamik allatseqarfimmit paasiniaanikkut, Kalaallit Nunaat nunat avannarliit ataatsimoorussamik suleqatigiinnerannut 1997-imili ilaasarsimavoq, ataatsimiititaliamillu 2007-imi ukiariartornerani qaaqqusisuusinnaaneq isumaliutigineqarpoq.

Sverigemi pisortaanerit ataatsimiinnerat – 2004-mi apriilimi

Ataatsimiinermi pisortaanerit aamma attaveqaatit nunani avannarlerneersut aamma nunani avannarlerni killerneersut nunanit arfineq marluuneersut peqataapput. Kalaallit Nunaannit sinniisuuvoq Ataatsimoorussamik allatseqarfimmi pisortaq. Ataatsimiinnermi siuliani ataatsimeereernermit nunani ilaasortaaffiusuni pisut eqqartorneqarput, taamatuttaaq nunat anginerit nunani tamalaani unammilleqatigiinermut suleqatigiinneq pillugu nassuiaateqarlutik.

Ilutigalugu unammilleqatigiinnermut tunngasumik Kuopio-mi Finlandimiittumi ataatsimiinnissap ullui sammineqartussallu aalajangerneqarput 2004-mi septemberimi pisussanngorlugu.

Unammilleqatigiinneq pillugu Finland-imi ataatsimiinneq – 2004-mi septembarimi

Nunani avannarlerni unammilleqatigiinnermut oqartussaasut ukiumoortumik ataatsimiinnerat septembarip aallaqqaataanit pingajuanut Kuopio-mi Scandic Hotel-imi ingerlanneqarpoq.

Kalaallit Nunaat sinnerlugu Allatseqarfimmi pisortaq ilaatigut inatsisip nutarterneqarnissaanut ataatsimiititaliamut pilersinneqartussatut siunnersuutigineqartumut ajornartorsiutit pillugit saqqummiivoq, kiisalu Kalaallit Nunaanni suliassiissutigineqartut allat nunani avannarlernut allanit soqutigineqarsinnaasorisat, tamatumanilu Air Greenland pillugu suliaq.

Kingornatigut ataatsimiinnermi peqataasut suleqatigiissitaaqqanut/isumasioqatigiinnut marlunnut avinneqarmata qulequtsiunneqarput: “Inuussutissanik nioqquteqarfinni unammillernerit” kiisalu “Pisortat / namminersortut unammilleqatigiinnermi inatsiseqarnikkut inissimanerisa assigiinngissutaat”. Ataatsimoorussamik allatseqarfimmit isumasioqatigiinnernut taakkununnga marluusunut saqqummiussassat piareersarneqarsimapput.

Aalajangerneqarpoq pilersaarusiaq “Inuussutissanik nioqquteqarfinni unammillernerit” ingerlatiinnarneqassasoq, kiisalu nalunaarusiortoqassasoq, aamma nunani avannarlerni unammilleqatigiinnermut oqartussat ukiup tulliani ataatsimiinneranni Savalimmiuni 2005-imi aggustusip 24-ianit 26-ianut pisussami suliniut nalunaarusiatut saqqummiunneqassasoq. Nunani avannarlerni unammilleqatigiinnermut oqartussani pisortaanerit nunat avannarliit tamarmik peqataanissaannut kaammattuuteqarput.

Kalaallit Nunaata tungaanniit suliniummut peqataanissaq aalajangerneqarpoq.

2004-mi NAATSORSUUTIT

Unammilleqatigiinnermut ataatsimiititaliamut, Atuisartunut Siunnersuisoqatigiinnut kiisalu Atuisartunut Maalaaruteqarfittut ataatsimiititaliamut 2004-mut Aningaasatigut inatsimmi katillugit aningaasaliissutigineqarput 3,6 mio. kr., 2003-mut naleqqiullugu kr. 100.000-nik ikinnerut. Kisiannili 2004-p ingerlanerani Avatangiisit pillugut Maalaaruteqartarfittut ataatsimiititaliaq Unammilleqatiinnermut Ataatsimiititaliap aamma Atusartunut Siunnersuisoqatigiit Ataatsimoorussamik Allatseqarfianut nuunneqarpoq. Nuussinermi aningaasaliissutit kr. 100.000-it ilaapput, taamaallluni Ataatsimoorussamik allatseqarfimmut aningaasaliissutit katillutik kr. 3,7-mio.-niusut taamaaginnarlutik

Unamilleqatigiinnermut ataatsimiititaliap 2004-mi immikkoortitaakkanik aningaasartuutai katillutik kr. 564.247-iupput. Agguataarnerat kinguliani immikkoortiterilluni naatsorsuutini takuneqarsinnaapput:

  

 

2004

 

Budget

 

 

kr.

 

kr.

Nutserinerit

 

12.386

 

20.000

Pisartagaqarnerit

 

3.450

 

Nunani Avaannarlerni suleqatigiinneq

 

102.076

 

80.000

Nittartakkap nutarterneqarnera

 

27.093

 

25.000

Siunnersortit kiffartuussinerat (KS)

 

270.251

 

200.000

Angalanerit, ataatsimiinnersiutit akunnittarfiillu

 

136.489

 

127.000

Ataatsimiinnernut saniatigut aningaasartuutit

 

12.502

 

0

 

 

 

 

 

Ukiumi aningaasartuutit katinneri

 

564.247

 

442.000

UNAMMILLEQATIGIINNERMUT ATAATSIMIITITALIAP ALLATSEQARFIA

2002-mi jannuaarip aallaqqaataa aallarnerfigalugu Unammilleqatigiinnermut ataatsimiititaliaq aamma Atuisartunut Siunnersuisoqatigiit Ataatsimoorussamik allatseqarfeqalerput. Atuisartunut pisisartunullu siunnersuisoqatigiit, tuniniaasarneq, nalunaaqutsersuisarneq, akit aamma atuisartunut pisisartunulllu maalaaruteqartarfittut ataatsimiititaliat pillugit Inatsisartut inatsisaat nr. 10, 13. nov. 1986-imeersup 2002-mi juunip aallaqqaataani atuutilersumik atuisartunut pisisartunulllu maalaaruteqartarfittut ataatsimiititaliap allatseqarfiata Kalaallit Nunaanni Atusisartunut Siunnersuisoqatigiiit allatseqarfeqarnera ingerlatilerpaa – taamaasilluni pilerpoq Ataatsimoorussamik allatseqarfik.

2004-p allartinnerani Ataatsimoorussamik allatseqarfik ukunanit pingasunit inuttaqarpoq:

  • Niels Peter Gundelach, allatseqarfimmi pisortaq
  • Bo Vestergaard, fuldmægtig
  • Ane Sofie Hardenberg, atuisartunut siunnersorti

2004-mi februarip aallaqqaataanit Cand.merc.(jur.) Troels Linderoth Hansen Ataatsimoorussamik allatseqarfimmi fuldmægtig-itut atorfinippoq

2004-mi aggustusip 31-iani fuldmægtig Bo Vestergaard Ataatsimoorussamik allatseqarfimmi atorfeqarni taamaatippaa.

Atuisartunut Siunnersorti Ane Sofie Hardenberg 2004-mi oktoberip 31-iani atuutilersumik allatseqarfimmi atorfeqarni taamaatippaa.

2004-mi decembarip aallaqqaataanit atuutilersumik Atuisartunut siunnersortitut Ane-Marie Geråe Ataatsimoorussamik allatseqarfimmi atorfinitsinneqarpoq.

2004-mi decembarip 19-iani Cand.jur Jannik Isidor Ataatsimoorussamik allatseqarfimmi fuldmægtig-itut atorfinitsinneqarpoq, 2005-imi marsip 15-iani sulinini aallartittussanngorlugu.

Unammilleqatigiinnermut ataatsimiititaliap nittartagaa

Unammilleqatigiinnermut ataatsimiititaliaq 2004-mi nittartagartaarpoq.

Kalaallit Nunaanni nunarsuup sinneranituulli inuiaqatigiinni oqartussaasunit ullumikkut nittartagaqarnissaq anguniarneqarpoq, tassani oqartussaasut ilisimatitsissuteqarsinnaapput suliarisat suunerinut tunngasunik, qanoq attaveqarfigineqarsinnaanermut aamma sammisat aalajangersimasut maannakullu pisut pillugit innuttaasunit soqutineqarsinnaassunik.

Unammilleqatigiinnermut ataatsimiititaliap nittartagaata suliarineqarnera aallaqqaammut Ataatsimoorussamik allatseqarfimmut “artornakujussimagaluarpoq”, maangaanniit nittartakkap imarisai attaveqaatit aqqutigalugit nuunneqarsinnaanngimmata, tamatigummi web-imi avammut attaveqarnermut aqutsisuusoq sulisussatut qinnuigineqaraangami aqqutigineqartarluni.

Juunip 17-iani Unammilleqatigiinnermut ataatsimiititaliap ataatsimiinnermini aalajangerpaa nittartakkamik nutaamik pilersitsisoqassasoq, naleqqussagaanerusunik atortulik aamma ullutsinnut naleqqunnerusumik isikkulik.

Nioqquteqartunit arlalinnit neqeroortertereernermi, ArctiComm ApS aalajangiunneqarpoq.

Septembarip 27-iani nittargagaq nutaaq atulerpoq, uani nassaarineqarsinnaalluni: www.unammineq.gl

Danmarkimi Konkurrencestyrelsen-imik / Unammilleqatigiinnermi aqutsisoqarfimmik suleqateqarneq

2000-imi juulip aallaqqaataa atuutilerfigalugu Unammilleqatigiinnermut ataatsimiititaliaq aamma Danmarkimi Konkurrencestyrelsen-ip akornanni suleqatigiinneq aallartippoq. Siullermik isumaqatigiissut 2001-imi decembarip 31-annut atuuppoq, tamatumali kingorna ukiukkaarlugu sivitsorneqartarluni, sulilu atorluni, taamaalillunilu Konkurrencestyrelsen aamma ataatsimiititaliamut allatsip suliasaanik Ataatsimoorussamik allatseqarfik peqatigalugu isumaginnippoq.

Isumaqatigiissut tunngavigalugu Konkurrencestyrelsen nammineq sulianut ingerlatsisoqalernikuuvoq, maanna Kalaallit Nunaanni inuussutissarsiornermut tunngasunik ilisimasaqarlualersimasunik; suliassanik Ataatsimoorussamik allatseqarfimmit Konkurrencestyrelsen-imut nassiunneqarsimasunik isumaginnittartunikt, piginnaaneqarluarnerallu unammilleqatigiinnermi inatsiseqarnermut tunngasuni atorluarneqarsinnaavoq.

Ilaatigut suliassiissutinik suliaqarnerup pisariunermillu suliassat ataqatigiissumik ingerlanneqarsinnaanerannut, suleqatigiiginnarnissaq attattiinnarniarneqarpoq annikinnerusussaagunartumilli, tamatumanimi inatsitigut aamma/imaluunniit aningaasarsiornikkut misissueqqissaarnerit unammilleqatigiinnermi inatsisitigut misilittagaqarluartunit ingerlanneqartariaqartarmata, taamaattumillu ilinniagarisimasat tunngavigalugit Konkurrencestyrelsen-ip aamma Ataatsimoorussamik allatseqarfiup akornanni annertunerusumik tapertareeqatigiilluni suleqatigiittoqassalluni.

Konkurrencestyrelsen allaffissornikut avataanit ikiorsiisartutut qanorluunniit suleqataatigigaluaruni, Kalaallit Nunaani unammilleqatigiinnermi suliassanik Unammilleqatigiinnermi ataatsimiititaliaq tamakkiisumik aalajangiisussaatitaavoq.

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut