SIULEQUT

Unammilleqatigiinnermut Ataatsimiititaliaq Unammilleqatigiinneq pillugu Inatsisartut inatsisaat nr. 28, 30. oktober 1992-imeersoq malillugu sulipput. Inatsimmi tassani nakkutilliinermut ammasumillu pissuseqarnissamut periaatsit pineqartumut qallunaat inatsisigisimasaasa assingi malinneqarput.

Danmarkip nunallu EU-mut ilaasortaasut amerlanerit kiisalu nunat avannarliit amerlanerit inerteqquteqarnermi periaaseq malillugu kingorna unammillermut inatsiseqalersitsipput. Periaaseq taanna malillugu suliffeqarfiit erseqqinnerusunik malittarisassaqalerput tamannalu peqatigalugu unammillernermut oqartussaasut suliassamik suliarinissaannut sakkussaginnerulerput. Taamaattumik Unammilleqatigiinnermut Ataatsimiititaliaq 2002-imiilli Naalakkkersuisunut saaffiginnipput nunatsinnilu unammillernermut inatsisip nutartertariaqarnera uparuarlugu.

Inuussutissarsiutit Kalaallit Nunaannisut ittut amerlanertigut namminersortunit angisuunit ikittuinnarnit ingerlanneqartut unammillerneq pillugu oqartussaasunik sunniisinnaassuseqarluartunik immikkut pisariaqartitsipput – suliffeqarfiit angisuut – pisortanit namminersortunillu pigineqartut anginerusutut inissisimanerminnik atornerluinnginnissaat nakkutigineqartariaqarmat, assersuutigalugu qaffasippallaanik akeqartitsinnginnissaat.

Taamaattumik nunatsinni unammilleqatigiinneq pillugu inatsimmik nutaamik Naalakkersuisut suliaqartitsilernerat nuannaajallannarpoq. Inatsisis-satut siunnersuutip suliarinerani siunertamut attuumassutillit peqataatinneqarput siunnersuullu Inatsisartut 2007-imi ukiakkut ataatsimiinnissaanni saqqummiunneqassaaq.

Inatsisissatut siunnersuut akuersissutigineqassappat allattoqarfik Ataatsimiititaliallu inatsisip piviusunngortinniarnissaanut pisariusumik suliassaqalissapput. Taamaattumik aalajangiinissamut atatillugu allattoqarfiup pisariaqartinneqartunik nukissaqartinnissaa pisariaqarpoq suliat aallartikkasuarneqarsinnaaqqullugit. Aaqqissuussinikkut tunngavissat tassa nalunaarutit, kaajallaasitat ilitsersuutillu inissinniarlugit suliassat saniatigut namminersortut peqqissaartumik paasititsiniaaffiginissaat aamma pisariaqarpoq.

Ullumikkut inatsisaasup atuunnerata nalaani Nuummi Qaqortumilu namminersortunut allanullu soqutiginnittunut matut ammarlugit aaqqissuussisoqarpoq aammalu aalajangiisartut 2007-imi ukiakkut Ilulissani ataatsimiinnissaannut atatillugu taamaaqataanik aaqqissuussisoqarnissaa pilersaarutaavoq. Taamatut aaqqissuussisarnerit unammillernermut inatsisip soqutiginarsarnissaanut sakkuusimapput pitsaasut – aammalu allattoqarfimmut Ataatsimiititaliamullu tunngatillugu namminersortut qanimut peqatiginissaannut periarfissiisimallutik. Taamatut ataatsimiisitsisarnerit nanginneqarnissaat pilersaarutaavoq, unammillernermut inatsisip ilisimaneqarnera annertuneruleqqullugu.

Unammilleqatigiinnermut Ataatsimiititaliap sulinerani tamarmiusumi suliassiissutaasartut suliarisarnissaannut Danmarkimi Konkurrencestyrelsimit immikkut ilisimasallit ikiortigineqartarsimapput. Ullumikkut suliassiissutit amerlanersaasa nammineq naammaginartumik suliarisinnaanissaanut ataatsimoorussamik allattoqarfiup Ataatsimiititaliallu pisinnaassusiat piorsarneqarsimalersutut isikkoqarpoq. Taamaattumik 2006-ip ingerlanerani suliassiissutinik Konkurrencestyrelsimut suliaqartitsinissaq pisariaqarsimanngilaq.

Nunani Avannarlerni unammillernermut oqartussaasut suleqatigiinnerannut nunarput peqataavoq. Aaqqissuussinermi tassani nunat paarlagaallutik ukiumoortumik ataatsimiiffiusarput taakkunanilu ilaatigut nunat avannarliit ataatsimut suleqatigiissitaasa nalunaarusiaat saqqummiunneqartarlutik. Nunat Avannarliit 2007-imi Ilulissani ataatsimiinnissarsuannut nunatta aaqqissuussisuunissaa nuannaarluta qilanaaraarput.

Ukiumoortumk nalunaarusiami matumani Unammilleqatigiinnermut Ataatsimiititaliap aalajangiiffigisimasaasa ilaat kiisalu suliniutit allat Ataatsimiititaliap allattoqarfiullu peqataaffigisarsimasaat nassuiaateqarfigineqarput.

Atuarluarisi.

Qaqortoq, ulloq 4. juni 2007

Carl-Aage Skovaa
Unamilleqatigiinnermut Ataatsimiititaliami siulittaasoq

 

AALLAQQAASIUT

Unammilleqatigiinnermut Ataatsimiititaliap sulinera

Unammilleqatigiinnermut Ataatsimiititalip sulinera Naalakkersuisut Inatsisartullu inuussutissarsiutitigut politikkikkut anguniagaannik tunngaveqarpoq. Taamaalilluni Unammilleqatigiinnermut Ataatsimiititaliap suliassaata pingaarnersaraat kalaallit unammilleqatigiinnermut inatsisaat 1993-imi januaarip aallaqqaataani atuutilersinneqartoq nakkutigissallugu. Inatsit nakkutilliinermut inatsisaavoq paasinartuliornermik aamma isumaqatiginninniarsinnaanermik tunngaveqartoq.

Paasinartuliorneq pingaartumik anguneqartarpoq nalunaarnissamut pisussaatitaaffik aqqutigalugu taannalu atuuppoq unammilleqatigiinnermut inatsimmi § 5 naapertorlugu. Unammilleqatigiinnermut Ataatsimiititaliaq 2000-imiilli ajoquserneqarani iliorsinnaatitaaneq paasititsiniutigimmatigulli Unammilleqatigiinnermut Ataatsimiititaliaq suliffeqarfinniit nalunaarutinik arlalippassuarnik tigusaqartalerput isumaqatigiissutinik nunatsinni atuuttunik unammilleqatigiinnermut killiliisunik isumaqatigiissuteqarsimasunit. Imaakkunarpoq nunatsinni suliffeqarfiit namminersortut nalunaarnissamut pisussaatitaaneq ilikkariartulersimagaat, suliffeqarfiimmi massakkut nalunaaruteqarnissamik namminneq sulissutigisalermassuk. Taamaakkaluartoq Unammilleqatigiinermut Ataatsimiititaliap nalunaarnissamut pisussaatitsisoqarnera naggaterpiaatigut aalajangertussaavaat. Isumaqatigiissutit nalunaarutigissallugit pisussaaffiusut nalinginnaasumik innuttaasunit tamanit pissarsiarineqarsinnaatitaapput, paasissutissat isertuussat niuernermilu isertuussassat pineqanngippata. Paasissutissat taamaattut pisarnertut isertuunneqartarput unammilleqatigiinnermut inatsimmi § 10. imm. 2-mi aalajangersakkat naapertorlugit.

Unammilleqatigiinnermut Ataatsimiititaliap aamma suliassaraa nakkutilliinissaq kiisalu salliutinneqartutut inissisimasut isumaqatigiissutaat unammilleqatigiinnermut ajoqutaasinnaasut atornerluinerillu akuliuffigisinnaallugit. Taamatut nalunaartarnissamut tunngasuni ileqquuvoq, isumaqatigiissutip nalunaarutiginerata misissuiffiginissaanut ataatsimiititaliap nalilersuisarnera, Unammilleqatigiinnermut inatsimmi § 11 naapertorlugu suliffeqarfinnik isumaqatigiinniarnissaq aallartinneqassanersoq eqqarsaatigalugu.

Unammilleqatigiinnermut inatsimmi §§-it 11 aamma 13 tunngavigalugit akuliussinnaanermut assersuutit kinguliani allaaserineqarput.

Unammilleqatigiinnermut Ataatsimiititaliaq aamma maalaarutinik tigusaqartarput. Tamatumani Unammilleqatigiinnermut Ataatsimiititaliap tunngaviatigut nammineerluni aalajangigassaraa, maalaarutit suut suliarineqassanersut. Taamaalilluni Unammilleqatigiinnermut Ataatsimiititaliap suut suliarissanerlugit tulleriiaarisinnaavoq, suliassat ataasiakkaat Kalaallit Nunaanni unammilleqatigiinnermut pissutsinut pingaaruteqassusiat tunngavigalugu.

Unammilleqatigiinnermut Ataatsimiititaliaq kiisalu Ataatsimoorussamik Allattoqarfik nunat avannarliit unammilleqatigiinneq pillugu ataatsimiittarnerini peqataasarput. 2006-imi Norgemi Islandimilu ataatsimiittoqartarpoq, takuuk ataani immikkoortoq 5. Unammilleqatigiinnermi taamatut suliaqarneq pingaartilluinnarneqarpoq, nunani avannarlerni inatsisit aamma taakkua atortinneqarnerat Kalaallit Nunaannit ilisimaneqarnissaat pingaaruteqarmat.

Unammilleqatigiinnermut inatsisip nutarterneqarnera

Assigiinngitsut tungaannit aammalumi naalakkersuinermik suliallit tungaanniit oqaatigineqartarpoq unammilleqatigiinnermut inatsisip ullumikkut atuuttup allanngortittariaqarnera nalilersortariaqalinnginnersoq. Unammilleqatigiinnermut Ataatsimiititaliap 2002-mi ukiakkut Naalakkersuisunut innersuussutigaat inatsisip nutarternissaanut ataatsimiititaliamik pilersitsisoqassasoq. Naalakkersuisut isummernissaannut tunngavissiami Unammilleqatigiinnermut Ataatsimiititaliap siusinnerusukkut erseqqissaatigisimavaat Island, Danmark, Norge Sverigelu unammilleqatigiinnermut malittarisassanik nutarterisimasut aammalu Savalimmiut inatsisip nutarternissaanik suliaqartut.

Inatsisip nutarterneqarnissaa 2006-imi ukiakkut Inuussutissarsiornermut Pisortaqarfimmit aallartinneqarpoq ulloq 31. oktober ataatsimiinnikkut (kick-off-møde) kattuffiit arlallit peqataaffigisaannik, aammalumi Unammilleqatigiinnermut Ataatsimiititaliap. Kingorna aqutsisussanik suleqatigiissitaliortoqarpoq suliniummik ingerlatsisussamik aammalu suleqatigiissitaliat pingasut pilersinneqarput pisortat oqallinnissaanni qulequttat pingasut misissuiffigissallugit: Inuiaqatigiit, namminersortut atuisartullu soqutigisaat. Suleqatigiissitaliat pingasuusut tunngavigisat paasinartuliorneq nakkutilliinerlu pillugit inerteqquteqarnermut inatsimmut ikaarsaariarnissaq pillugu innersuussutaat aqutsisoqatigiinnut decemberimi tunniunneqarput. Kingorna Inuussutissarsiornermut Pisortaqarfimmi Jytte Boesgaardip (Konkurrencestyrelsenimi siunnersortit pisortarisimasaata) annertuumik ikiuunneratigut unammilleqatigiinnermut inatsisissatut missiliuusiortoqarpoq.

Inatsisissatut siunnersuutip Inatsisartut 2007-imi ukiakkut ataatsimiinnissaanni oqaluuserineqarnissaa naatsorsuutigineqarpoq.

Unammilleqatigiinnermut Ataatsimiitaliami ilaasortat

Unammilleqatigiinnermut inatsimmi § 4, imm. 2 naapertorlugu Unammilleqatigiinnermut Ataatsimiititaliap ilaasortai arfinillit Naalakkersuisunit ukiuni sisamani atuuttussatut toqqarneqartarput. Aalajangiisartut inuussutissarsiutit tungaatigut tamatigoortumik ilisimasaqassapput, taamatullu inatsisilerinermut, aningaasarsiornermut, aningaasalersuinermut aamma pissutsinut atuisartunut tunngassuteqartunut. Siulittaasoq aammalu ataatsimiititaliamut ilaasortat pingasut namminersortut soqutigisaannut pituttorsimasuussanngillat.

2006-p naanerani Unammilleqatigiinnermut Ataatsimiititaliaq imatut katitigaavoq:

  • Siulittaasoq Carl-Aage Skovaa, namminersortut soqutigisaqarfiinut pituttorsimanngitsoq
  • Siulittaasup tullia Karsten Høy, namminersortut soqutigisaqarfiinut pituttorsimanngitsoq
  • Benny Reiding, ILIK
  • Ole Rud, Kalaallit Nunaanni Sulisitsisut Peqatigiiffiat
  • Lida Skifte Lennert, namminersortut soqutigisaqarfiinut pituttorsimanngitsoq
  • Leif Ellebæk Motzfeldt, namminersortut soqutigisaqarfiinut pituttorsimanngitsoq
  • Sofia Rossen, namminersortut soqutigisaqarfiinut pituttorsimanngitsoq

Januar 2007-imi Naalakkersuisut Ole Ravn toqqarpaat Benny Reidingimut taarsiullugu aammalu Peter Pedersen, Nuuk, toqqarlugu Leif Ellebæk Motzfeldtimut taarsiullugu.

SULIASSIISSUTIT AALAJANGIISARNERILLU

Unammilleqatigiinnermut Ataatsimiitaliaq 2006-imi marloriarluni ataatsimiippoq. Ulloq 20. juni oqarasuaatikkut ataatsimiittoqarpoq aammalu ulloq 14. september Nuummi ataatsimiittoqarluni.

2006-imi decemberip naalernerani unammilleqatigiinneq pillugu suliassiissutit 252-it Ataatsimoorussamik Allattoqarfiup nalunaarsorsimavai. Ukiup ingerlanerani suliassiissutit nutaat 33-it takkupput suliassiissutillu 40-it inaarneqarlutik. Tamanna 2005-imiit qaffariarneruvoq, kisianni suliassiissutit takkussortartut ukioq 2000-mut ikaarsaariarnermit suli ikinnerungaatsiarput, taamanikkut ajoquserneqarani iliorsinnaatitaaneq eqqartorneqartoq tapersersortissarsiorneqarmat.

Suliassiissutit amerlanersaat Unammilleqatigiinnermut Ataatsimiititaliap 2006-imi tigusai nalunaarutiginninnerupput. Suliffeqarfiit nalunaarutigisarpaat isumaqatigiissutit namminneq pilersissimasatik niuerfinni unammilleqatigiinnermut kinguneqarsinnaasut. Suliat taamaattut ataani naatsumik nassuiaatigineqarput, taakku unammilleqatigiinnermut tunngatillugu nalilerneqarsimammata ataaserlu eqqartuussivimmi aalajangigassanngortinneqarsimalluni.

Sul. nr. 103: Østre Landsretip suliaa Konkurrencenævnet ctr. Air Greenland

Suliaq 2001-imi aallartinneqarpoq timmisartuussinermi aqqutit unammillerfiusutut aammalu sullissinissamik isumaqatigiissuteqarfiusutut immikkoortinnerannut atatillugu Air Greenlandip billetsilereriaatsini akinillu annertussusileriaatsini allanngortimmagit. Unammilleqatigiinnermut Ataatsimiititaliap ulloq 5. december 2001-imi ataatsimiinnerminni isumaqarput Air Greenlandip niuerfimmi nuimanerusutut inissisimanini atornerlussimagaa. Unammilleqatigiinnermut Ataatsimiititaliap aalajangiinera ulloq 9. januar 2002-mi Kalaallit Nunaata Eqqartuussivianut suliassanngortinneqarpoq imatut oqartoqarmat Unammilleqatigiinnermut Ataatsimiititaliap akuersaaraa Air Greenlandip nuimanerusutut inissisimanini atornerlussimanngikkaa, aammalu tamanna pissutaalluni Unammilleqatigiinnermut Ataatsimiititaliap aalajangiinera atortussaanngitsutut sumiginnarneqartoq.

August 2005-imi Air Greenland nuimanerusutut inissisimanerminik atornerluisimanngitsutut oqarnermi Kalaallit Nunaata Eqqartuussivianit taperserneqarpoq. Kingorna Unammilleqatigiinnermut Ataatsimiititaliap Nunatta Eqqartuussiviata aalajangiinera Østre Landsretimut suliassanngortippaa suliassanngortitarlu september 2006-imi suliarineqarluni. Eqqartuussiviup december 2006-imi aalajangiinermini Kalaallit Nunaanni Eqqartuussiviup aalajangiinera Østre Landsretip atortussanngortippaa.

Sul. nr. 175: Naammagittaalliuut KNAPK ctr. Royal Greenland

Ulloq 29. april 2004 Uummannami neqitassanik pisinermut Royal Greenland A/S’ip piumasaqaatai aammalu qaleraleerutit annertussusiisa bonusisiaqaataalernissaat pillugu Ukkusissani KNAPP’p maalaarutaa Ataatsimoorussamik Allattoqarfiup tiguaa.

KNAPP’p Royal Greenlandimi neqitassat akiisa assigiinnginnerujussuat ilaatigut maalaarutigaa, tassani ingerlatseqatigiiffimmut tunisaqartarneq tunisaqartanginnerluunniit apeqqutaatinneqartarmat. Taamatuttaaq Royal Greenlandip bonusisiaqartitsinera KNAPP’p maalaarutigaa ingerlatseqatigiiffinnut allanut tunisisoqaraangat aalisartut ukiumoortumik bonusitigut katersatik annaasarmatigik.

Maalaarutaasut taakku marluk immikkoortillugit misissorneqarput ataatsimiititaliallu ulloq 14. september 2006 ataatsimiinneranni Unammilleqatigiinnermut Ataatsimiititaliaq imatut isummerpoq neqitassanik pisinermut Royal Greenlandip piumasaqaatai inatsimmi § 13-imi nuimanerusutut inissisimanermik atornerlueqqusinnginnermut akerliusut.

Qaleraleerutinut Royal Greenlandip bonusisiaqartitsineranut tunngatillugu Unammilleqatigiinnermut Ataatsimiititaliaq imatut isummerpoq tamanna mianersortumik aqutsivigineqarmat allaat nuimanerusutut inissisimanermik atornerluineruinngitsutut oqaatigisariaqarluni.

Ataatsimiititaliap ataatsimiinerani aalajangiiffigineqartut tunngavigalugit § 11 atorlugu isumaqatiginninniarnissamut Royal Greenland aggersarneqarpoq neqitassat pisiarinerannut Royal Greenlandip piumasaqaataasa niuerfimmut ajoqutaasumk sunniuteqarnerata unitsinnissaa siunertaralugu.

Isumaqatiginninniarneq pivoq ulloq 2. november 2006-imi Ataatsimoorussamik Allattoqarfiup Nuummi initaani Royal Greenlandimiit peqataasoralugit Niels Bjerregaard aamma Andor Thomsen aammalu allattoqarfimmiit Unammilleqatigiinnermut Ataatsimiititaliap siulittaasua Carl-Aage Skovaa, Niels Peter Gundelach kiisalu Nicolai Odgaard Jensen. Illuatungeriit isumaqatigiipput Royal Geenlandip neqitassat akiinik allanngortitsinera kingusinnerpaamik 1. januar 2007-imiit unitsinneqassasoq, aalisartut tamarmik neqitassat pisiarinerannut assigiimmik akiliisalersillugit.

Ulloq 13. november 2006 isumaqatiginninniarnerup inernera Unamilleqatigiinnermut Ataatsimiititaliap tusagassiuutinut nalunaarutikkut tamanut ammasumik tusarliuppaat.

Sul. nr. 204: Naammagittaalliuut Siniffik Inn ctr. Qaqortoq Handels-skole/Namminersornerullutik Oqartussat

Ulloq 6. maj 2005 Qaqortumi Niuernermik Ilinniarfimmi kollegiami ineeqqat pisortanit pigineqartuniit init ilinniartut aasaanerani atuanngiffeqarnerata nalaani takornarianut attartortittarneranni naammaginanngitsumik unammillerneqarneq Siniffik Inn’ip maalaarutaa Ataatsimoorussamik Allattoqarfiup tiguaa. Kollegiani ineeqqat Namminersornerullutik Oqartussanit pigineqarput taamaattumillu unammilleqatigiinnermut inatsimmi §§ 11-15-ini aalajangersakkat, takuuk unammilleqatigiinnermut inatsimmi § 2-mi iliuuseqarnissamut pisussaaffiit atornissaanut Unammilleqatigiinnermut Ataatsimiititaliaq inatsisitigut tunngavissaqanngilaq. Aammattaaq Ataatsimoorussamik Allattoqarfik isumaqarpoq ilinniartut aasaanerani atuanngiffeqarneranni ineeqqat inuttaqartinnginnerannit tamanna periarfissamik atorluaanerusoq tamannalu Qaqortumi takornariaqarnermik inuussutissarsiuteqarnerup ineriartortinneranut iluaqutaasoq.

Kollegiamili ineeqqat attartortinneqartarnerat pisortat aningaasaataasa atornerisigut attartortitsisartut allat akigitittagaanniit akikinnerunerat unammillernermut ajoqutaavoq. Taamaattumik Allattoqarfik Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut attaveqarpoq siunnersuutigalugu kollegiani ineeqqat attartortitakkat allanut isumagitinniarneqassasut. Kollegiani ineeqqat 2006-imi nutarterneqarput, kisiannili 2007-imiit ineeqqat attartortitsisussarsiuunneqarput. Siullermik Qaqortumi misiliutitut Nunatsinni sumiiffinni allani atuisinnaanermut misilittagaqarniutigalugu.

NUNAT AVANNARLIIT SULEQATIGIINNERAT

Kalaallit Nunaat 1997-imiilli unammilleqatigiittarnermi nunat avannarliit ataatsimoorussamik suleqatigiinnerannut ilaasarpoq. Suleqatigiit ukiumut ataasiarlutik eqikkaallutik ataatsimiittarput ataatsimoorussamik ajornartorsiutaasut oqaluuserineqartarlutik misilittakkallu paarlaateqatigiissutigineqartarlutik kiisalu pisortat (direktørit) ataatsimiittarlutik nunani taakkunani unammillernermut oqartussaasut atorfilittaat qullersaasut unammillernermi suliassiissutit, aaqqissuussaanerit, inatsisinik atortitsineq il.il. pillugit misilittakkat paarlaateqatigiissutiginissaannut periarfissaqartarlutik. Aammattaaq nunat avannarliit ataatsimoorussamik unammillernikkut suleqatigiinnermi ullumikkut unammilleqatigiinnermi ajornartorsiutit nalunaarusiuunneqartarput. Nunat avannarliit ataatsimiittarnissaasa pilersaarusiorneqartarnerat ingerlanneqartarnerallu nunat avannarliit unammillernermut oqartussaasuisa akornanni sinnersaraattumik isumagineqartarpoq. 2006-mi pisortat Islandimi ataatsimiipput aammalu Bergenimi, Norgemiittumi ataatsimut katersuulluni saqqummiuussiffiusumik ataatsimeersuartoqarluni nunanit tamanit 3-12 -nit peqataaffigineqartumik.

Nicolai Odgaard Jensen aammattaaq ulloq 10. november 2006 paasissutissat avitsivigineranni iluaqutit ajoqutillu pillugit ataatsimeersuarnermi Sverigemi Stockholmimi Konkurrensverket-imit aaqqissuunneqartumi peqataavoq.

Pisortat ataatsimiinnerat Islandimi, ulluni 6. - 7. april 2006

Ataatsimiinnermi tassani peqataapput nunanit avannarlernit allanit aammalu nunani avannarlernit killernit arfiniliusunit pisortat inuillu attaveqaataasartut. Kalaallit Nunaata sinniisuutitaraa Ataatsimoorussamik Allattoqarfimmi pisortaq Niels Peter Gundelach. Ataatsimiinnermi nunani ilaasortaasuni kingullermiilli pisimasut eqqartorneqarput soorluttaaq nunat angisuut nunani tamalaani unammilleqatigiittarnermi suleqatigiinnernut peqataasarnitik nassuiaateqarfigigaat.

Peqatigitillugu Bergenimi ataatsimiinnermi ataani pineqartut pilersaarusiornerat sammisassartaallu oqaluuserineqarput.

Ulloq 7. april 2007 inuiaqatigiinni mikisuni aningaasassaaleqineq (oligopoler) pillugu isumasioqatigiissitsinermi islandimi unammilleqatigiinnermut oqartussaasut, Samkeppniseftirlitid, aaqqissuisuupput.

Unammilleqatigiinneq pillugu ataatsimiinneq Bergenimi, ulluni 16. - 18. august 2006

Nunani avannarlerni unammilleqatigiinnermut oqartussaasut ukiumoortumik ataatsimiipput Bergenimi, Norgemiittumi ulluni 16.-18. august.

Nunatsinniit peqataapput Unammilleqatigiinnermut Ataatsimiititaliap siulittaasua Carl-Aage Skovaa, allattoqarfimmi pisortaq Niels Peter Gundelach aammalu fuldmægtig Nicolai Odgaard Jensen.

Ataatsimiinnermi – inatsisitigut allannguutit, nunani ataasiakkaani ileqquusumik suliaasartut suliassiissutillu anginerusut pisarnertut eqqartorneqarnerisa saniatigut – immikkut sammineqarput Leniency (akiliisitsinerit atorunnaarsittarnerat annikillisinneqartarneralluunniit) (Norge), Sanaartornermik suliaqaqatigiiffiit (Danmark) aammalu Suliaqaqatigiiffiit kattuffiini paasissutissiisarnerit paarlaateqatigiissutigisarnerat (Sverige). Carl-Aage Skovaa aamma Nicolai Odgaard Jensen tassani peqataapput. Taakkununnga ingerlaqatigitillugu pisortallu ataatsimiinneranni Niels Peter Gundelach peqataavoq.

Retail Banking pillugu nunat avannarliit ataatsimoorussamik nalunaarusiaat ataatsimiinnermi saqqummiunneqarpoq. Nalunaarusiap taassuma suliarinerani nunarput peqataanngilaq. Nalunaarusiaq Ataatsimoorussamik Allattoqarfimmut piniarneqarsinnaavoq.

NAATSORSUUTIT 2006

Unammilleqatigiinnermut Ataatsimiititaliaq, Atuisartunut Siunnersuisoqatigiit aammalu Atuisartut maalaaruteqartarfittut Ataatsimiititaliaanut aningaasanut inatsimmi aningaasaliissutaasut katillugit 4.100.000 kr.-iupput.

Unammilleqatigiinnermut Ataatsimiititaliaq 2006-imi immikkut ittunik aningaasartuuteqarput katillugit 262.708 kr.-inik. Naatsorsuutit immikkoortitikkat ataani agguataarnerat imatut isikkoqarput:

 

Missingersuutit 2006  

Allattukkat 2006

Unammilleqatigiinnermut Ataatsim.

 

kr 497.630

 

kr 262.708

Ataatsimiittarnerit

kr 200.000

 

kr 62.348

 

Nunat Avannarliit suleqatigiinnerat

kr 110.000

 

kr 122.729

 

Allanik ikiorteqarneq (KS i DK)

kr 100.000

 

kr 0

 

Ikiortit allat

kr 25.000

 

kr 35.000

 

Isumaqatiginninniarnerit

kr 20.000

 

kr 0

 

Siulittaasup akissarsiai

kr 42.630

 

kr 42.630

 

 

 

 

 

 

Ataatsimoorussamik Allattoqarfik

 

kr 2.567.732

 

kr 2.772.185

 

 

 

 

 

Atuisartunut Siunnersuisoqatigiit

 

kr 892.630

 

kr 811.266

 

 

 

 

 

Atuisartut maalaaruteqart. Ataats.

 

kr 92.630

 

kr 44.538

 

 

 

 

 

Avatangiisit innarlits. Maalaar.Ataats.

 

kr 50.000

 

kr 0

 

 

 

 

 

KATILLUGIT

 

kr 4.100.622

 

kr 3.890.696

Aningaasanut inatsit

 

kr 4.100.000

 

 

Sinneruttut

 

-kr 622

 

 

Unammilleqatigiinnermut Ataatsimiititaliaq, Kalaallit Nunaanni Atuisartunut Siunnersuisoqatigiit, Atuisartut Maalaaruteqartarfittut Ataatsimiititaliaat, Inatsisartut avatangiisit innarlitsaalinissaannut maalaaruteqartarfittut Ataatsimititaliaat aammalu allattoqarfiup ataatsimut angusaat missingersuutaasunit 209.304 kr.-inik (5,1 pct.) annikinnerupput. Tassunga pissutaanerpaapput Unammilleqatigiinnermut Ataatsimiititaliaq missingersuutini aningaasanik atuinikinnerat kiisalu Atuisartunut Siunnersuisoqatigiit marts 2006-imi atuisartunut sulialinnut isumasioqatigiissitsineranni isertitaqarnerat.

UNAMMILLEQATIGIINNERMUT ATAATSIMIITITALIAP ALLATTOQARFIA

1. januar 2002 aallarnerfigalugu Unammilleqatigiinnermut Ataatsimiititaliaq aamma Atuisartunut Siunnersuisoqatigiit ataatsimoorussamik allattoqarfeqalerput. Atuisartunut pisisartunullu siunnersuisoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit Inatsisartut inatsisaat nr. 10, 13. nov. 1986-imeersup 1. juni 2002-mi atuutilersumik atuisartunut pisisartunulllu maalaaruteqartarfittut ataatsimiititaliap allattoqarfiata Kalaallit Nunaanni Atuisartunut Siunnersuisoqatigiit allattoqarfeqarnera ingerlatilerpaa – taamaalilluni Ataatsimoorussamik Allattoqarfik pilersinneqarpoq. Kingorna Ataatsimoorussamik Allattoqarfik aamma Atuisartunut maalaaruteqartarfittut Ataatsimiititaliamut kiisalu Inatsisartut Avatangiisit innarlitsaalineranni maalaaruteqartarfittut Ataatsimiititaliaanut allattoqarfinngorpoq.

2006-imut ikaarsaariarnermi Ataatsimoorussamik Allattoqarfik makkuninnga sulisoqarpoq:

  • Niels Peter Gundelach, allattoqarfimmi pisortaq
  • Jannik Isidor, fuldmægtig
  • Steen Lynge, Atuisartunut siunnersorti
  • Lydia Fisker, Allatsi

Ulloq 15. februar 2006 cand. oecon. Nicolai Odgaard Jensen fuldmægtigitut Ataatsimoorussamik Allatoqarfimmi atorfinippoq.

Ulloq 30. juni 2006 Lydia Fisker allatsitut atorfimminit suliunnaarpoq.

Ulloq 21. juli 2006 cand. jur. Jannik Isidor fuldmægtigitut atorfimminit suliunnaarpoq.

Ulloq 1. juli 2006 Steffen J. Lynge atuisartunut siunnersortitut atorfinippoq. Steen Lynge kingorna sinerissami atuisartunut sulialinnut atuartitsisarnerni ikiuuttarpoq.

Ulloq 1. okt. 2006 Johansine Poulsen allaffimmi fuldmægtigitut atorfinippoq.

Ulloq 16. oktober 2006 bach. merc. jur. Henrik Malig Larsen Ataatsimoorussamik Allattoqarfimmi fuldmægtigitut atorfinippoq 30.4.2007 tikillugu isumaqatigiissuteqarnikkut.

Ukiup naanerani Ataatsimoorussamik Allattoqarfik makkuninnga sulisoqarpoq:

  • Niels Peter Gundelach, allattoqarfimmi pisortaq
  • Nicolai Odgaard Jensen, fuldmægtig
  • Henrik Malig Larsen, fuldmægtig
  • Steffen J. Lynge, atuisartunut siunnersorti
  • Johansine Poulsen, allatsi

Decemberimi cand. jur. Kim Pagels inatsisilerinikkut siunnersortitut atorfinippoq ulloq 1. marts 2007-imi sulilerluni.

Suleqatigiissitani allani il.il. allattoqarfiup peqataanera

Unammilleqatigiinnermut inatsisip nutarternera

2006-imi ukiakkut unammilleqatigiinnermut inatsisip nutarterneqalerneranut tunngatillugu suleqatigiissitaliat sisamat Inuussutissarsiornermut Pisortaqarfimmit pilersinneqarput. Nutarterinerup pisortat tungaanniit akisussaaffigeqqullugu suleqatigiissitaliat inissinneqarput katiterneqarlutillu Ataatsimoorussamik Allattoqarfimmiit (Niels Peter Gundelach, Allattoqarfimmi pisortaq), siunnersorti avataaneersoq (Jytte Boesgaard, siornatigut Konkurrencestyrelsimi siunnersortit pisortarisimasaat), Unammilleqatigiinnermut Ataatsimiititaliami (Carl-Aage Skovaa, Unamilleqatigiinnermut Ataatsimiititaliap siulittaasua) kiisalu Inuussutissarsiornermut Pisortaqarfik. Aqutsisoqatigiit ataani suleqatigiissitaliat pingasut pisortat oqaluuserisartagaannik misissuisussat pilersinneqarput. Qulequttat sammineqartussat tassaapput Inuiaqatigiit soqutigisaat, Namminersortut soqutigisaat aammalu Atuisartut soqutigisaat. Ataatsimoorussamik Allattoqarfik suleqatigiissitaliani pingasuusuni tamani sinniisuutitaqarpoq aammalu Atuisartut soqutigisaasa suliarineranni suleqatigiissitat ataqatigiissaariffiginissaannut nalunaarusiornissaannullu akisussaasuulluni. Suleqatigiissitaliat pingasuusut ukiup naanerani angusatik aqutsisoqatigiinnut tunniuppaat. Aqutsisoqatigit suliaat 2007-imi ikaarsaariarnermi nanginneqassapput. Unammillernermut inatsisissatut nutaatut siunnersuut Inatsisartut 2007-imi ukiakkut ataatsimiinnissaanni oqaluuserineqartussatut naatsorsuutigineqarpoq.

NNI-policy

Ineqarnermut Attaveqaqatigiinnermullu Pisortaqarfik ukiakkut suleqatigiissitaliorpoq Nunavumi, Canadami NNI-policy-mik kalaallinut naleqqussarlugu suliaasumik pisariaqartitsisoqarnersoq paasiniaasussamik, tassani najukkani suliffeqarfiit pisortat sanaartugassaasa suliarinnittussarsiuunneqatarneranni unammillernikkut pitsaaqutsissanik periarfissinneqartarmata. Sulinermi tassani Ataatsimoorussamik Allattoqarfik peqataavoq suliassani tassunga tunngasuni suliniutaasinnaasut nutaat unammillernermut ajoqusiinnginnissaat qulakkeerniarlugu. Tassunga tunngatillugu nalunaarusiaq 2007-imi ukiakkut suleqatigiissitaliap Naalakkersuisunut ilaasortamut tunniutissagaa naatsorsuutigineqarpoq.

Unammilleqatigiinnermut Ataatsimiititaliap nittartagaa

Kalaallit Nunaanni aammalumi nunarsuup sinnerani ullumikkut pisortatut oqartussaasut nittartagaqarnissartik pingaartittarpaat oqartussaasut paasissutissiissutigisinnaasarlugu sunik suliaqarnerlutik, qanoq ililluni attavigineqarsinnaanerlutik kiisalu sammisassat innuttaasunut piukkunnaatilittut naatsorsuussat sukumiisut ullumikkullu pisut paasissutissiissutiginiartarlugit.

Unammilleqatigiinnermut Ataatsimiititaliap nittartagaani aalajangikkat, eqqartuussivinni aalajangiinerit tamanut ammasumik tusarliunnissaannut kiisalu unammilleqatigiinnermi inatsisitigut maleruaqqusat pillugit suliffeqarfinnut inuiaqatigiinnullu paasissutissiissutiginissaannut atorneqartarpoq.

2006-ip ingerlanerani Unammillernermut Aalajangiisartut nittartagaanut: www.unammineq.gl takuniaasimasut inuit ataasiakkaat katillugit 1500 missaanniissimapput. Ukiup qaammataani siullerni nittartakkamut isertartut qaammammut 75-100 missaanniittarsimapput, ukiup qaammataani kingullerni sisamani qaammammut 150-200-nut amerleriarsimallutik.

Ukiup naalernerani kisitsisit amerleriangaatsiarnerannut pissutaassagunarpoq Qallunaat Nunaanni suliffissat qarasaasiakkut innersuussutigineqarnerat allattoqarfimmi inatsisilerinikkut siunnersortimik atorfinitsitsinermut atatillugu.

Danmarkimi Konkurrencestyrelsimik suleqateqarneq

1. juli 2000 aallarnerfigalugu Unammilleqatigiinnermut Ataatsimiititaliap aamma Danmarkimi Konkurrencestyrelsen-ip akornanni suleqatigiinneq aallartippoq. Siullermik isumaqatigiissut 31. december 2001 tikillugu atuuppoq, tamatumali kingorna ukiukkaarlugu sivitsorneqartarluni sulilu atuulluni taamaalillunilu Konkurrencestyrelsen – siusinnerusumut sanilliullugu annikinnerusumik – aamma ataatsimiititaliamut allatsip suliassaanik Ataatsimoorussamik Allattoqarfik peqatigalugu – suliaqartarsimalluni.

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut