Siulequt

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11-mi, 12. november 2001-imeersumi § 10, imm. 5 naapertorlugu Isumaginninnermi Naammagittaalliuuteqartarfik suliaqarfini pillugit Inatsisartunut ukiumoortumik nalunaarusiortartussaavoq.

Nalunaarusiaq ukiumut ilivitsumoortuuvoq naammagittaalliuutillu tiguneqartut aalajangiinerillu pillugit kisitsisitigut paasissutissat saniatigut aamma aalajangiinernik siunissami tunngaviusussanik kikkunnut tunnganerinik takusinnaajunnaarsitanik imaqarluni.

Nalunaarusiaq kommuninut, Kanukokamut, Inatsisartut Ombudsmandiannut, Rigsombudsmandimut Isumaginninnermilu Siunnersortinngorniat Ilinniarfiannut nassiunneqartarpoq.

Nalunaarusiaq naammagittaalliuuteqartarfiup internetikkut nittartagaani pisssarsiarineqarsinnaavoq www.nanoq.gl/DSA kiisalu Isumaginninnermi Naammagittaalliuuteqartarfimmut saaffiginninnikkut aamma pissarsiarineqarsinnaalluni.

XXXXX 2009

Naja Joelsen
Siulittaasoq

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11-mi, 12. november 2001-imeersumi § 10, imm. 5 naapertorlugu Isumaginninnermi Naammagittaalliuuteqartarfik suliaqarfini pillugit ukiut tamaasa nalunaarusiortassaaq.

Naammagittaalliuuteqartarfiup inatsisitigut tunngavigisai.

Isumaginninnermi Naammagittaalliuuteqartarfiup sulinera 1. januar 1980-imi aallartippoq.

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11-mi, 12. november 2001-imeersumi § 8, imm. 1 aamma 2 naapertorlugit Isumaginninnermi Naammagittaalliuuteqartarfik tassaavoq isumaginninnermi malittarisassat naapertorlugit kommunip imaluunniit Naalakkersuisut aalajangigaat pillugit naammagittaalliuuteqartarfik.

Naammagittaalliuuteqartarfiup sulinera §§ 9 - 11-mi malittarisassaqartinneqarpoq

Naammagittaalliuuteqartarfimmiipput siulittaasoq ilaasortallu allat sisamat. Naalakkersuisut siulittaasumik taassumalu sinniisussaanik, kiisalu ilaasortanik sisamanik taakkulu sinniisussaannik ukiunut marlunnut atuuttussanik toqqaassapput. Siulittaasoq inatsisilerituutut soraarummeersimassaaq aamma/imaluunniit allatigut Kalaallit Nunaanni inatsisinik isumaginninnermut tunngasunik sukumiisumik paasisimasaqassalluni. Ilaasortat marluk isumaginninnermi inatsisinik ilisimasaqassapput, ilaasortallu marluk isumaginninnermi inuiaqatigiit ingerlaasiannik ilisimasaqassallutik. Naalakkersuisut Isumaginninnermi Naammagittaalliuuteqartarfimmut allattoqarfeqartitsissapput.

Naammagittaalliuuteqartarfiup katitigaanera

Isumaginninnermi Naammagittaalliuuteqartarfik ukiumi nalunaarusiorfiusumi ima katitigaavoq:

Naja Joelsen, Nuuk (siulittaasoq)
Bendt Frederiksen, Upernavik
Nukákuluk Kreutzmann, Nuuk
Tukkumeq Qaavigaq, Nuuk
Stine Egede Nørbæk, Qaqortoq

Sinniisut Naalakkersuisunit toqqakkat maanna ukuusut:

Kaali Olsen, Nuuk
Frederikke Zeeb, Nuuk
Bertha Kreutzmann, Nuuk

Naalakkersuisut Allattoqarfiat 1. februar 2008-p tungaanut Isumaginninnermi Naammagittaalliuuteqartarfimmut allattoqarfiuvoq. 1. februar 2008-mi Siunnersuisoqatigiinnut Aalajangiisartunullu Aqutsisoqarfik pilersinneqarpoq Isumaginninnermilu Naammagittaalliuuteqartarfik aqutsisoqarfimmut tassunga ilaalerpoq.

Naammagittaalliuuteqartarfik 2008-mi februaarimi, juunimi, aggustimi decembarimilu ataatsimiippoq, tassa katillugit arfinileriarluni ataatsimiilluni.

Allattoqarfiup tungaatigut immikkut taasassat

Qulaani taaneqartutut naammagittaalliuuteqartarfimmut allattoqarfeqarneq 1. februar 2008-p tungaanut Naalakkersuisut allattoqarfiannit isumagineqarpoq 1. februar 2008-milu Siunnersuisoqatigiinnut Aalajangiisartunullu Aqutsisoqarfimmi immikkut allattoqarfimmut nuulluni.

Allattoqarfeqarneq avinneqarsinnaavoq aappaani naammagittaalliuuteqartarfimmut allattoqarnikkut suliassaviit (naammagittaalliuutinik tigooqqaaneq, suiami paasissutissanik attuumassutilinnik pissarsiniarneq, sulianik aqutsineq aaqqissuussinerlu, naammagittaalliuuteqartarfiup ataatsimiittarneranik aaqqissuussineq il.il.) aappaanilu inatsisilerinikkut naammagittaalliuutinik suliarinninneq.

Naalakkersuisut 13. november 2003-mi aalajangiipput Isumaginninnermi Naammagittaalliuuteqartarfik nammineerluni aqutassaminik aningaasaliiffigineqassasoq. 1,0 mio. kr.-inik aningaasaliinissaq Naalakkersuisut siunnersuutigaat. Tamanna 2004-mut Aningaasanut Inatsisissap akuersissutigineqarneranut atatillugu Inatsisartunit akuerineqarpoq 11. december 2003-milu atuutsinneqalerluni. Aningaasaliissutit 2004-mi 2005-imilu attatiinnarneqarput. Naalakkersuisut 2006-imi aalajangerput aningaasaliissutit 1,35 mio. kr.-inut qaffanneqassasut, aningaasaliissutit ilanerisigut inatsisilerituumik suli ataatsimik atorfinitsitsinissamut aningaasassaqalernissaq anguniarlugu. Isumaginninnermi Naammagittaalliuuteqartarfiup ingerlanneqarneranut Naalakkersuisut ukiumut aningaasaliissuteqarfiusumut 2007-imut 1.834 mio. kr.-inik aningaasaliipput. Isumaginninnermi Naammagittaalliuuteqartarfiup ingerlanneqarneranut Naalakkersuisut ukiumut aningaasaliissuteqarfiusumut 2008-mut 1.886 mio. kr.-inik aningaasaliipput. Ukiup ingerlanerani

1.1 mio. kr.-inik ilassutitut aningaasaliissuteqartoqarpoq.

Inatsisit naapertorlugit isumaginninnermut tunngasuni aalajangiinerit tamarmik (ataasiakkaannguit eqqaassanngikkaanni) Isumaginninnermi Naammagittaalliuuteqartarfimmut naammagittaalliuutigineqarsinnaapput. Tamatuma nassataraa isumaginninnermi aalajangikkat tamarluinnangajammik, tassalu suliassanik annertuumik sunniutillit, soorlu pinngitsaaliissummik meeqqanik angerlarsimaffiup avataanut inissiisarnerit, pissutsit ilungersunannginnerusut soorlu ass. kommunip pensionisiat pillugit malittarisassat naapertorlugit inummut tapeqartitsinissamut, pilersornermut pisortanit ikiorsiinissamut, innarluutilinnut ikiuuteqarnissamut itigartitsineri pillugit innuttaasut naammagittaalliuuteqarsinnaanerat.

Naammagittaalliuuteqartarfimmi sullissisut Isumaginninnermi Naammagittaalliuuteqartarfiup allattoqarfiani AC fuldmægtigitut atorfinitsinneqartarput. Suliamut inatsisilerituunik atorfinitsitsisoqartarpoq. 1988-imiilli suliassat nammagassat, sulisussarsiornissamut sulisorinniinnarniarnissamullu periarfissat apeqqutaatillugit fuldmægtigit piffissaq tamakkerlugu sulisussat suliamik isumaginnittussat ataaseq marlulluunniit, immaqalu pingasut sulisorineqartarsimapput. 2008-mi naammagittaalliuuteqartarfimmi inatsisilerituut marluk pingasulluunniit allaffimmiorlu ataaseq sulisimapput. 2008-p ingerlanerani Danmarkimi Ankestyrelsimit inatsisilerituut pingasut tulleriiaallugit atukkiunneqartarsimapput, pitsaassutsimik qularnaarinissaq ilisimasaqalersitsinissarlu siunertaralugu ataasiakkaarlutik Isumaginninnermi Naammagittaalliuuteqartarfimmiitinneqartartut, kiisalu ataani taaneqartutut Isumaginninnermi Naammagittaalliuuteqartarfimmi sulisussarsiniarneq sulisorinniinnarniarnerlu ajornakusoorluinnarmat.

Naammagittaalliuuteqartarfiup allattoqarfianut inatsisilerituunik sulisussarsiortarneq sulisorinniinnarniarnerlu ukiuni tamani ajornakusoorsimavoq. Atorfeqartut nalinginnaasumik ukioq ataaseq missiliorlugu atorfimminni atasarsimapput maannali sivikinnerusumik sulisarlutik. Sulisut taarseraannerujussuat ataatsimiinnermilu ataatsimi naammagittaalliuuteqartarfiup suliassanik 40-t missaanniittunik suliarinnissinnaanera pissutigalugu Naammagittaalliuuteqartarfik maanna ukiut pingasut miss. nutaanngissusilinnik suliassarpassuaqalersimavoq. Tamanna naammagittaalliuuteqartarfiup naammaginngeqaa.

Suliassat amerliartornerat sulisullu taarseraannerat pissutigalugit naammagittaalliuuteqartarfik naliliivoq sulisorinniinnarnissaq pillugu sulisoqarnermut politikip sammineqarnissaa pisariaqassasoq. (Uani Naammagittaalliuuteqartarfiup maluginiarpaa allattoqarfimmi inatsisilerituut siunnersortitut atorfinni atorfinitsinneqarlutillu akissarsiaqartinneqarnissaat pillugu Namminersornerullutik Oqartussat isumaqatigiissuteqarfigineqarsimasut, tamatumunngali aningaasaqarnikkut periarfissaqanngitsoq).

Maannakkut naammagittaalliuuteqartarfiup suliassai inatsisilerituunit pingasunit allaffimmilu fuldmægtigimit ataatsimit suliarineqarsinnaasut naliliisoqarpoq, sulinerup qanoq aaqqissuunneqarnera apeqqutaatillugu. Tamatuma saniatigut naammagittaalliuuteqartarfik avataanit nutserititsisarpoq.

Naammagittaalliuuteqartarfiup 200-mi sulinera

Naammagittaalliuuteqartarfik ukiumi nalunaarusiorfiusumi sulianik katillugit 410-nik tigusaqarpoq. Oqaatigineqarsinnaavoq 2007-imut sanilliullugu naammagittaalliuutigineqartartut qaffakkiartorunnaarsimasut taamaattorli ukiup siulianut sanilliullugu amerlallutik. Ass. 2005-imi suliat 352-it tiguneqarsimapput 2006-imilu suliat 356-it tiguneqarsimallutik, kiisalu 2007-imi 430-t. Suliat qaammammut 30-t 40-llu akornanniittut naammagittaalliuuteqartarfimmut takkuttarput.

Kommunikkuutaartumik naammagittaalliuutit 2008-mi tiguneqartut

Aasiaat Kommunianni aalajangiiffigisat pillugit naammagittaalliuutit: 34 Ammassallip Kommuniani aalajangiiffigisat pillugit naammagittaalliuutit: 11 Ilulissat Kommunianni aalajangiiffigisat pillugit naammagittaalliuutit: 2 Ittoqqortoormiit Kommunianni aalajangiiffigisat pillugit naammagittaalliuutit: 0 Ivittuut Kommunianni aalajangiiffigisat pillugit naammagittaalliuutit: 0 Kangaatsiap Kommuniani aalajangiiffigisat pillugit naammagittaalliuutit: 22 Maniitsup Kommuniani aalajangiiffigisat pillugit naammagittaalliuutit: 20 Nanortallip Kommuniani aalajangiiffigisat pillugit naammagittaalliuutit: 26 Narsap Kommuniani aalajangiiffigisat pillugit naammagittaalliuutit: 30

Nuup Kommuniani aalajangiiffigisat pillugit naammagittaalliuutit: 60 Paamiut Kommunianni aalajangiiffigisat pillugit naammagittaalliuutit: 7 Qaanaap Kommuniani aalajangiiffigisat pillugit naammagittaalliuutit: 9 Qaqortup Kommuniani aalajangiiffigisat pillugit naammagittaalliuutit: 17 Qasigiannguit Kommuniani aalajangiiffigisat pillugit naammagittaalliuutit: 8 Qeqertarsuup Kommuniani aalajangiiffigisat pillugit naammagittaalliuutit: 7 Sisimiut Kommunianni aalajangiiffigisat pillugit naammagittaalliuutit: 20 Upernaviup Kommuniani aalajangiiffigisat pillugit naammagittaalliuutit: 31 Uummannap Kommuniani aalajangiiffigisat pillugit naammagittaalliuutit: 26

Ilaqutariinnermut Pisortaqarfimmit aalajangiiffigisat pillugit naammagittaalliuutit: 78

Aalajangiiffigisat

2008-mi Isumaginninnermi Naammagittaalliuuteqartarfimmi tallimariarluni ataatsimiittoqarpoq. Ataatsimiinnerni taakkunani Naammagittaalliuuteqartarfiup suliat 148-t suliarai. Tamatuma saniatigut suliat 39-t siulittaasumit aalajangiiffigineqarput, katillugit suliat 187-iullutik.

Tamatuma saniatigut suliat ilaat allattoqarfiup suliariumanngilai, ass. Naammagittaalliuuteqarnissamut piffissaliussap qaangerneqarsimanera pissutigalugu.

Oqaatigineqassaaq 2008-mi naammagittaalliuutit naammassillugit suliarineqartut amerlassusaat naammagittaalliuutinut 2008-mi tiguneqartut amerlassusaannut naapertuutinngimmata.

Tamatumunnga tunngaviuvoq suliat ukiup siuliani tiguneqartut tamarmiunngitsut naammassineqarsimammata taamaalillunilu suliat ukiup siulianut tunngasut 2008-mi suliarineqarsimallutik. Taamatuttaaq suliat 2008-mi tiguneqartut tamarmik suliarineqarsinnaasimanngillat.

Suliat ataatsimiinnerni suliarineqartut suliaqarfinnut makkununnga agguataarsimapput:

Isumaginninnermi pensionisiat pillugit Inatsisartut peqqussutaat, tassa utoqqalinermi pensionisiat siusinaartumillu pensionisiat

Suliat 45-t Naammagittaalliuuteqartarfiup suliarai

Erninermi il.il. sulinngiffeqartarneq pillugu Inatsisartut peqqussutaat

Suliat sisamat Naammagittaalliuuteqartarfiup suliarai Pisortanit ikiorsiissutit pillugit Inatsisartut peqqussutaat Suliat 44-t Naammagittaalliuuteqartarfiup suliarai

Annertussusileriikkamik ikiorsiissutit pillugit Inatsisartut peqqussutaat

Suliaq ataaseq Naammagittaalliuuteqartarfiup suliaraa

Meeqqanik inuusuttunillu ikiorsiisarneq pillugu Inatsisartut peqqussutaat

Suliat 14-it Naammagittaalliuuteqartarfiup suliarai

Annertuumik innarluutillit ikiorserneqartarnerat pillugu Inatsisartut peqqussutaat

Suliat 13-it Naammagittaalliuuteqartarfiup suliarai Meeqqanut tapiissutit pillugit Inatsisartut peqqussutaat Suliat 18-it Naammagittaalliuuteqartarfiup suliarai Ineqarnermut tapiissutit pillugit Inatsisartut peqqussutaat

Suliat tallimat Naammagittaalliuuteqartarfiup suliarai Meeqqanut akilersuutit pillugit Inatsisartut peqqussutaat Suliat sisamat Naammagittaalliuuteqartarfiup suliarai Immikkoortumi, paaqqinniffinni il.il.

Naammagittaalliuuteqartarfik tassani 2008-mi suliaqanngilaq.

Aalajangiinerit siunissami tunngaviusussat

Naammagittaalliuuteqartarfik siunissami tunngaviusussanik arlalinnik aalajangiisimavoq, taakkunannga pingaarnerit tallimat matumani issuarneqarlutik:

Aalajangiineq 1

Nuunnermut akiligassap akilerneqarnissaanut ikiorsiinissap itigartitsissutigineqarnissaa pillugu Y Kommuniata aalajangiinera (ulloq) pillugu naammagittaalliuutit Isumaginninnermi Naammagittaalliuuteqartarfiup (ulloq) suliaraa imalu aalajangiilluni

Aalajangiineq

Y Kommuniata aalajangiinera allanngortinneqarpoq.

NN nuunnermut akiligassap akilerneqarnissaanut ikiorserneqarnissannik Y Kommunianut (ulloq) qinnuteqaassuppaatit.

Y Kommunia (ulloq) qinnuteqaatit itigartillugu aalajangiivoq. Aalajangiineq Pisortanit ikiorsiissutit pillugit Inatsisartut peqqussutaanni nr. 10-mi, 1. november 1982-imeersumi § 16, imm. 3 tunngavigalugu pivoq.

Y Kommuniata aalajangiineq akiitsut immikkorluinnaq pissutissaqanngitsutut kommunip isumaqarfiginerinik tunngavilersuuserpaa.

Kommune nangippoq: ”Pinerluuteqarsimasunut inissiisarfimmiinnerit pissutigalugu suliffeqarsinnaasutit taamaattumillu sulileruit akiitsunik akilersuisinnaasutit ilisimaneqarpoq.”

Aalajangiineq allakkatigut (ulloq) Isumaginninnermi Naammagittaalliuuteqartarfimmut naammagittaalliuutigaat.

Suliami ilisimatitsissutigineqarpoq nuunnermut akiligassaq 11.887 kr.-iusoq. Pinerluuteqarsimasunut inissiisarfimmiittussanngortinneqarlutit eqqartuunneqaravit inissiavit qimattariaqalerneranut atatillugu akiligassaqalersimavutit. Akiligassat iluarsaanermut aningaasartuutaapput, aningaasalli 1.518 kr.-iusut nuunnermut atatillugu ineqarnermut akiligassaallutik.

Kalaallit Nunaanni Pinerluuteqarsimasunik isumaginnittoqarfiup allakkatigut 5. april 2006- imeersutigut ilisimatitsissutigaa A eqqartuussivimmit 2005-imi ”sivisussusilerneqanngitsumik inissiisarfimmiittussanngortinneqartutit”. Aneqqusaanngilatit sivisussusilerneqanngitsumillu inissiisarfimmiittussaanerit pissutigalugu aneqqusaanngikkallartussaallutit. Ilanngullugu nalunaarutigineqarpoq aneqqussaannginnavit aamma suliffittaarsinnaanngitsutit.

Naammagittaalliuutinni ilaatigut allapputit: ”Maannakkut killeqanngitsumik pillagaasimasut isertitsivianni inissinneqarsimavunga, nalullugulu qaqugu anisalernissara, oqarfigineqarsimavungalu suli ukiut marluk angullugit eqqartuussivik Grønlands Landsreti utaqqissagiga nalileeqqinnissaata tungaanut. Kiisalu aneertarfissinneqarsinnaananga killeqanngitsumik inissinneqarsimanera tunngavigalugu, aammalu

suliffissarsisinneqarsinnaananga Kriminalforsorgip maalaarutigisimasara itigartitsissutigisimammagu, suliffeqalerusukkaluarlunga qinnuteqarsimanera pillugu. Tassami manna tikillugu akiligassanik tuniorarneqartuarnera naammagiunnaarsimagakku, naak qitinnik anniartarnera annertusiartoraluaqisoq, allatut ajornartumik sulinngikkuma akiligassat akilersinnaannginnakkit.”

Pisortanit ikiorsiissutit pillugit Inatsisartut peqqussutaanni nr. 10-mi, 1. november 1982- imeersumi § 16 naapertorlugu kapitalit tallimaanni arfernannilu ikiorsiinissamut piumasarineqartut tunngavigalugit immikkut imaluunniit inuuniarnermut ikiorsiissutinut ilassutitut ataasiaannakkanik ikiorsiisoqarsinnaavoq: Taakku aningaasartuutit akuersaarneqarsinnaasumik uppernarsaaserneqarsimasussat tamakkiisumik ilaannakortumilluunniit akilerneqarnissaannut ikiorsiissutaasussaapput: Taamatut ikiorsiisoqartassaaq aningaasartuutissat taakku inuup pineqartup piffissami pineqartumi aningaasatigut ingerlaneranut annertuumik nanertuutaasussaalersimappata imaluunniit taamatut ikiorsiinikkut inuk pineqartoq siunissami imminut napatinniarnissaminut periarfissaqarluarnerulersinneqarsinnaappat.

§ 16, imm. 3 naapertorlugu aatsaat immikkut illuinnartumik pissutissaqartillugu akiligassanut kinguaattoorutinut immikkoortoq 1 malillugu ikiorsiisoqarsinnaavoq.

Isumaginninnermi Naammagittaalliuuteqartarfik isumaqarpoq nuunnermut akiligassat 11.887 kr.-iusut akilerneqarnissaannut ikioqqullutit qinnuteqaatinnik pisinnaatitaasutit.

Sivisussusilerneqanngitsumik pinerluuteqarsimasunut inissiisarfimmiittussanngortinneqarsimanerit taamaattumillu nuunnermut akiligassamik nammineq akiliisinnaanngorlutit aneqqusaannginnavit sulisinnaanallu akissarsiorsinnaannginnerit Naammagittaalliuuteqartarfiup pingaartippaa.

Taamaattumik nuunnermut akiligassap akilerneqarnissaanut pisortanit ikiorsiinissap Y Kommunianit itigartitsissutigineqarnera allanngortinneqarpoq.

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut