Ineqarnermi Maalaaruteqartarfik sunaana?

Ininik attartortut pisortallu attartortitsisut akunnerminni ingerlatsinikkut akerleriissutaannik aalajangiineq, Ineqarnermi Maalaaruteqartarfiup suliassaraa.

Maalaaruteqartarfiup taamaallaat makkununnga tunngasut suliarisinnaavai:

  •  Ineqarnermi akiliutip qaffanneqarnissaanut nalunaaruteqarnermi maleruagassat 
  • Aserfallatsaaliineq iluarsaanerlu 
  • Inip isertserfiginerani pitsaassusaa 
  • Attartukkami atortulersuineq iluarsaanerlu (atuisinnaatitaaneq) 
  • Attartortup atuinera (ileqqorissaarnermi maleruagassanik unioqqutitsineq) 
  • Attartukkamik allamut atukkiussineq (inigisanik paalaassineq, atukkiussineq attartornermullu isumaqatigiissutip ingerlatiinnarnissaa) 
  • Attartukkap qimannerani pitsaassusaa (nalinginnaasumik iluarsaasarneq)

Ineqarnermi Maalaarutinik Aalajangiisartoqatigiit siullittaasoqarput ilaasortallu pingasuusut katitigaanermikkut attartortut attartortitsisullu soqutigisaannut naapertuupput.

Attartortut maalaaruteqarnerminni 150 koruuninik akiliisinneqartarput. Maalaarut suliarinneqarsinnaanngitsoq paasineqarpat, imal. attartortup maalaarutaa tamakkiisumik ilaannakortumilluunniit akuerineqarpat, akiliut utertinneqartarpoq.

Ineqarnermi Maalaaruteqartarfik allatseqarfiup oqarasuaataa 32 80 33, imal. allakkasuarfissaq/ email: maalaarut@nanoq.gl. aqqutigalugit attavigineqarsinnaavoq. Ineqarnermi Maalaaruteqartarfiup nittartagaa www.maalaarut.gl aqqutigalugu aalajangiivigineqartut malinnaaffigisinnaavatit paasissutissanittaaq attartornermut inatsisit tunngavigalugit maleruagassanik aallersinnaavutit.

Ineqarnermi Maalaarutinik Aalajangiisartoqatigiit

Ineqarnermi Maalaarutinik Aalajangiisartoqatigiinni siulittaasup saniatigut pingasut ilaasortaapput. Aalajangiisartoqatigiinni ilaasortat tamarmik Naalakkersuisunit toqqagaapput, ilaasortat pingasuusut soqutigisaqaqatigiiffinnit assigiinngitsunit innersuussutaapput. Siulittaasoq (taassumalu sinniisussaa) ineqarnermut tunngasunik immikkut ilisimasaliussapput inatsisilerituujullutilluunniit.

Siulittaasoq

Morten Nornild, Kalaallit Nunaanni Ilagiit

(sinniisussaa Peter Sindal Lundsberg, Naalakkersuisut siulittaasoqarfiat)

Ilaasortat

Christian Borch Grell, A/S Inissiaatileqatigiiffik INI (sinniisussaa Susie Kristiansen, A/S Inissiaatileqatigiiffik INI)

Aggustimiit 2010 Kenneth Bøjler Andersen, A/S Inissiaatileqatigiiffik INI

(sinniisussaa Susie Kristensen, A/S Inissiaatileqatigiiffik INI)

Josef Therkildsen, SIK (sinniisussaa Sofie Fleischer, SIK)

Petúr Gudmundsson, KANUKOKA

(siniisussaanik innersuussisoqarani sinniisussaanermiit ilaasortaalersoq)

Aggustimiit 2010 Ken Nyborg

(sinniisussaa Petúr Gudmundsson)

Ineqarnermi Maalaarutinik Aalajangiisartoqatigiit allatseqarnikkut Naalakkersuisunit isumagineqarput. 2010- mi Siunnersuisoqatigiinnut Aalajangiisartoqatigiinnullu Aqutsisoqarfimmit juuni qaammat ilanngullugu allatseqarneq fuldmægtigimit isumagineqarpoq. Aggustimiit allatseqarneq Aqutsisoqarfimmi atorfilinnit assigiinngitsunit isumagineqalerpoq.

Ineqarnermi Maalaaruteqartarfik allakkasuaatikkut: maalaarut@nanoq.gl attavigineqarsinnaavoq.

Ineqarnermi Maalaarutinik Aalajangiisartoqatigiit 2010-mi suliaat

Siulittaasup nalunaarusiaa Ineqarnermi Maalaarutinut Aalajangiisartoqatigiit inatsisilerinikkut maalaarutinik aallajangiisartuupput. Inissianik attartortitsisarneq pillugu Inatsisartut peqqussutaanni § 84 naapertorlugu, Aalajangiisartoqatigiit pisinnaatitaaffimmik iluani, pisortat ininik attartortitsisutut attartortullu akunnerminni akerleriissutaannik aalajangiisuusarput. Tamatuma saniatigut aalajangiinermikkut attartortitsisup ingerlatseqatigiiffiinut pissutsinut nalinginnaasunut tunngavilersuutit annertusinerisigut najoqqutassiuisarput.

Aalajangiinerit aalajangiisartoqatigiinnit suliassatut tiguneqanngitsut tamannali sioqqullugu peqqussutit nalinginnaasut malillugit Aalajangiisartoqatigiit allatseqarfiannit itigartitsissutaasut, siulittaasumut tunniunneqartarput. Allatseqarfik 2010-mi septembarip qaammataaniit peqqussutit nalinginnaasut malillugit Aalajangiisartoqatigiinnut suliassanngortissallugu piukkunnanngitsutut nalilikkamik, ataasiarlutik itigartitsipput.

Taama suleqatigiinneq siulittaasup allatseqarfiullu akunnerminni immikkut ittumik attaveqatigiittuarnissaannik piumasaqaatitaqarpoq.

Suliat takkuttut naammassineqartullu pillugit immikkoortumi takuneqarsinnaasutut, Ineqarnermi Maalaarutinik Aalajangiisartoqatigiit 2010-mi maalaarutinik 22-inik tigusaqarput. Taakkunannga 15-it maalaaruteqarnermut akiliuteqartinneqarput. Arfineq marluk Aalajangiisartoqatigiinni suliarineqarput arfineq pingasullu Aalajangiisartoqatigiinni ataatsimiissutaannginnerminni isumaqatigiissuteqarnikkut aaqqiissuteqarfigineqarlutik.

Isumaga naapertorlugu maalaaruteqartut 22-it maalaarutissallit amerlassusaannut ersiutaasorinngilakka. Maalaarsinnaanermut periarfissap, periusissap sumullu maalaaruteqarnissap suli inuiaqatigiinnut nalinginnaasumik siammaassimannginnera, kisitsisip qaffasinnerunnginneranut patsisaasorinarpoq, taamaattoqarneralu 2011-imi unammilligassatut isigisariaqarpoq.

Ineqarnermi Maalaarutinik Aalajangiisartoqatigiit ersarinnerulerumallutik inatsisit tunngaviusut, nittartagaq www.maalaarut.gl toqqaannartumillu oqarasuaatikkut attavissaq: 32 80 33 tamanut saqqumiupaat. Ilisaritinneq- saniatigut innersuussinertalimmik nuna tamakkerlugu ussassaarutitut isikkulimmik- ilaqartinneqartariaqarpoq.

Ineqarnermi Maalaarutinik Aalajangiisartoqatigiit 2010-mi akerleriissutinik aalajangiiviusuni pingasoriarlutik ataatsimiipput. Ataatsimiinnerit taakku saniatigut Aalajangiisartoqatigiit ataasiarlutik paasissutissiinissaq siunertaralugu ataatsimiipput.

Ineqarnermi Maalaarutinik Aalajangiisartoqatigiit suliat inissianik attartortut anisitaanissaannut tunngasut ingerlaannaq suliarineqartalernissaat, apriili qaammat atuutilersippaat. Imaappoq attartortunit allatseqarfimmut saaffiginnissutit taamaattut suliassanit allanit salliunneqartalerlutik, uangalu maalaarummik taamaattumik takkuttoqarneranik ingerlaannaq ilisimatinneqartarlunga. 2010-mi taamaasiornermut sunniuteqarsinnaasimasumik kalaallisut-qallunaatullu nutserinikkut kinguaattoorsimaqaagut. 2011-imi suleriaaseq pitsaanerulersinniarsaraarput.

Nutsigassat kinguaattoorutaanerat ajoraluartumik Aalajangiisartoqatigiit aalajangigaasa tamanut tusarliunneqarnissaannut kinguarsaataasimavoq. Taamaammat taannattaaq 2011-mi unammilligassanut allanut ilanngunneqassaaq.

Nipiliorneq inissiamik attatornermi isumaqatigiissummik unioqqutitsinerusoq, nalinginnaasumilli unioqqutitsinertut annertuutut isigineqarsinnaanngitsoq, Aalajangiisartoqatigiit apriili qaammat 2010 tunngaviusumik aalajangiuppaat. Inissiamik attartortoq anisitaassanersoq imal. isumaqatigiissut atorunnaarsinneqassanersoq aalajangiinermi - inissianik attartorneq pillugu peqqussummi nalinginnaasumik inatsisitigut illersorneqarnermut assigiinngissutaa taamaasilluni pingaaruteqarpoq. Sanilerisat maalaaruteqarnerannut tunngasunik suliaqarnermi immikkut periuseqarnissap nakkutigineqarnissaanut, suliaq pineqartoq aqqutigalugu inissiaatileqatigiit ersarissumik oqariartuuteqarfigineqarput. Tamatuma kinguninngua inissiaatileqatigiiffiup pineqartup suleriaatsini periusissaq nutaaq naapertorlugu allanngortikkaa, Ineqarnermi Maalaarutinik Aalajangiisartoqatigiit ataqqinnillutik maluginiarpaat. Taamaasilluni Ineqarnermi Maalaarutinik Aalajangiisartoqatigiit tunngaviusumik aalajangigaat maleruagassartaallu, tunngavilersuutaasinnaasut annertusinerisigut, maalaarutaasinnaasut ikilinerannik kinguneqartitsisussaassapput.

2010-mi immikkut tunngaviusumik aalajangiivigisaasa aappaanni suliap normua: 2010-035098 (”inissiamik paarlaasseqatigiinnermut tunngasoq”), - immikkuullarissorlu- inissiaatileqatigiit suliap ingerlanneqarnera apeqqutaatillugu, inissianik paarlaasseqatigiinneq attartortut marluk akunnerminni namminneq isumagisassaattut isigisinnaanngikkaat, inissiaatileqatigiilli taamaasiornikkut arlalinnik akisussaaffeqalersinnaasut, Aalajangiisartoqatigiit aalajangiipput. Aalajangiineq inissiaatileqatigiit suliamik ingerlatsinerminni isumaqatigiissutaasunillu atuutsitsinermi mianersoqqissaarnissaannut oqariartuutaavoq.

Ineqarnermi Maalaarutinik Aalajangiisartoqatigiit atuutsinneqarsinnaanngitsumik aalajangiisimasutut unnerluussaatsiarneq misigaat. Akissutsissattali tunniutinnginnerani, suliaq atorunnaarsinneqarpoq aalajangiinerlu tusaatissatut tiguneqarluni.

Ukiaanerani Aalajangiisartoqatigiit aalajangiinerminni allakkat ilusaat oqaatsillu atorneqartut misiligutitut allanngortinnissaannut, allatseqarfiup kissaataa naapertorlugu, Ineqarnermi Maalaarutinik Aalajangiisartoqatigiit isumaqatigiissuteqarput. Misiligummi aalajangiineq oqaatsillu atorneqartut 2010-mi inissianik paarlaaseqatigiinnermut qulaani pineqartumut tunngatillugu suliamisut eqqartuussinerpalaarunnaarsillugit nalinginnaanerulersinniarneqarput. Tamatumunnga- pingaartumik inissianik attartortut oqitsumik paasiuminartumillu allakkatigut aalajangiivigisarnissaat siunertaavoq. Allatseqarfiup paasissutissat imminnut ataqatigiissut amerlangaatsiartaqisut inatsisilerinermullu tunngasut taamaasillugit oqaatigisinnaaneraat, atuutussanngortinneqarnissaanut misiliineq apeqqutaassaaq.

Ineqarnermut attaveqarnermut angallannermullu Naalakkersuisoqarfik isumasioreerlugu, inissiaatileqatigiinnik kiffartuussineq pitsaanerulersinniarlugu, ukioq naalersoq Ineqarnermi Maalaarutinik Aalajangiisartoqatigiit suleriaaseq nutaaq isumaqataaffigalugu akuersissutigaat. Isummammik ersersitsinertut akissuteqarfigineqartunik inissiaatileqatigiit siulittaasoqarfimmut tunngaviusunik apeqquteqarsinnaanerat, Aalajangiisartoqatigiit akuerseqataaffigaat. Apeqqutip tamatumunnga tunngasup ataatsip akissuteqarfiginissaa 2010-mi siulittaasuuninni angumeraara. Isummanik ersersitsineq immikkoortumi tamatumunnga tunngasumi naqinneqarpoq.

Ineqarnermi Maalaarutinik Aalajangiisartoqatigiit allatseqarfiani sulisut nikeraraluaqisut ukiup naalernerani ininik attartornermi inatsisinik paasisimasaqarneq annertusivoq. Allaffissornikkut sullissisut, ilaatigut inatsisilerituunik misilittagalinnik arlalinnik, nunamilu maani ilinniarsimasunik inatsisilerinikkut sullissisunik, ukiup naalernerani ilaqalernerat maluginiagassaavoq.

Aalajangiisartoqatigiit sulinerat isornartoqanngilaq 2010-milu ilaasortat akornanni annertuumik paasisimasaqassuseq eqaatsumillu suleriaaseqarneq sulinerup ilisarnaatigaa. 2010-mi sulianut immikkut ittunut aalajangiisartoqatigiinni ilaasortat saniatigut allanik qaaqqusisoqartariaqarsimangilaq.

Morten Nornild, mono@nanoq.gl

Suliakiissutit naammassisallu pillugit naatsorsueqqissaarnermi kisitsisit

Ineqarnermi Maalaaruteqartarfik 2010-mi nuna tamakkerlugu ininik attartortut maalaarutaannik 22-inik tigusaqarpoq. Taakkunannga 150 koruunit sullinneqarnermut akiliutigineqarput. Suliat Aalajangiisartoqatigiinni suliarineqarput tassungaluunniit anngutinnginnerini isumaqatigiissutigineqarlutik.

Sinneruttut arfineq marluk allatseqarfimmit itigartitsissutaanngikkunik, unitsinneqanngikkunik maalaaruteqartumit utertinneqarput.

Siulittaasoqarfimmit saqqummiussat

ISUMMANIK ERSERSITSINEQ  Nr. 001/2010

Inissiaatileqatigiiffiup Iserit A/S-ip pisinnaatitaaffimmi iluani apeqquteqaataa decembarip 15-ani 2010 tiguarput (Ilanngussaq A). Tamatumunnga akissummi apeqquteqaatit immikkoortiterlugit A-miit E –mut sinaagut nalunaaqutserpakka.

Isummanik ersersitsineq una Ineqarnermi Maalaarutinik Aalajangiisartunut inatsisilerituussutsikkut piumasaqaatitaqanngitsumik suliarineqarpoq. Oqaatsittaaq atorneqartut nunatsinni inissiaatileqatigi-iffinnit paasiuminarsaanissamut angusaqarusussuseq tunngavigalugu, isummanik ersersitsineq apeqquteqaammi tunngaviusoq naapertorlugu akissuteqarfigineqarpoq (Ilanngussaq A).

SAQQUMMIUSSAQ

Imm. A-mut tunngatillugu: Ineqarnermi Aalajangiisartoqatigiit aalajangigaat naapertorlugit, inissiaatileqatigiinni ataavartumik suleriaatsinik nalimmassaajuarneq soorunami isumaqatigaara. Uanga Ineqarnermi Maalaaruteqartarfik aalajangiisarfittut isigaara, Maalaaruteqartarfiullu pisinnaatitaaffiisa iluanni inissiaatileqatigiit ingerlatsineranni nalinginnaasumik siunnersuinissamik ilitsersuinissamillu tamanna pisussaaffiliivoq.

Inissianik attartortitsinermi inatsisartut peqqussutaat § 58 imm. 2, ilaatigut ilinniagaqarneq pissutigalugu inigisamik atukkiussisinnaanermut periarfissiivoq ( piffissaq killiliussaq apeqqutaatinnagu). Aalajangersakkap suliarinerani ilinniagaq suugaluartorluunniit pineqarpoq. Matumani soorunami pingaarnerutillugu inissiamik attartortoq eqqarsaataavoq. Taamaakkaluaq aalajangersakkap piumasaqaatit aalajangersimasut tunngavigalugit - ass. meeqqat angerlarsimaffimmi najortigisat allami ilinniagaqarnissaanni- inigisamik atukkiussisinnaanermik mattussigunanngilaq. Taamaammat meerarisap autistiusup Kalaallit Nunaata avataani atuarnissaa pissutigalugu( nammineq aalajangigaappat, innersuussutaappat allatulluunniit iliornikkut piviusunngorpat) inissiamik allanut atukkiussinissamut akuerineqarneq inatsimmut naapertuuppoq, inunnillu ikiuiniarneq eqqarsaatigalugu piviusorsiortumik aalajangiinerulluni.

Imm. B-mut tunngatillugu: Pisinnaatitaaffimmut maanna atuuttumut aalajangiinermi aallaaviusoq tassaavoq, inissianik attartortitsisarneq pillugu Inatsisartut peqqussutaat nr. 2 maajip 12-ani 2005-imeersoq 2006-imi 2008-imilu allannguuteqartinneqartoq. Peqqussutip maleruagassartai inatsisitigut illersorneqarsinnaaneq tunngavigalugu imarisamikkut peqqussummut naapertuuttuussapput.

Inissiamik attartortup allanut atukkiussinera attartortup atukkiussisullu akunnerminni namminneq isumaqatigiissutaattut inissiaatileqatigiiffiup tunngaviusumik isumaqarfiginninnera, immikkoortup matuma aallaqqaataani atuarpara. Tamatumunnga tunngatillugu inatsit ersarinngilaq.

Inissianik attartortitsisarneq pillugu Namminersornerullutik Oqartussat nalunaarutaat nr. 12 apriilip 23-ani 2008-meersoq immikkut isigalugu paatsuugassaanngilaq inissiaatileqtigiiffiullu isumaanut naapertuulluni. Nalunaarummi § 54 imm. 2 naapertorlugu inigisamik attartukkamik atukkiussineq atukkiussisup attartortullu akunnerminni isumaqatigiissusiornerisigut pissaaq.

Tamatumunnga akerliusumik maluginiagassamillu- Nalunaarummit qaffasinnerumik inissisimasumi Peqqussummi § 58 immikkoortoq 5 normu 3- mi aalajangersagaq naapertorlugu, inigisaminik atukkiussisoq inissiamik attartortitsisumut ingerlatseqatigiiffiusinnaasumut toqqaannartumik akiliuteqartartussaavoq. Aalajangersagaq inissiaatileqatigiiffiup (ingerlatseqatigiiffiup) akunnermiliuttutut suliassanik pisussaaffinnillu aalajangiiniarneranut immikkut sunniuteqarsinnaavoq.

Inissiaatileqatigiiffiup § 58 imm. 5 nr. 3 naapertorlugu ineqarnermut akiliut atukkinneqartumit toqqaannartumik piniartarpagu, piumasaqaatitut allakkiat tamarmik atukkiussisumut aamma nassiunneqartarpata ”ingerlatsinermi ileqqorissaarnermik” maleruaanerussaaq, taamaasillunilu inissiamik attartortup atukkiussivimmi akiitsoqalerneranut malinnaasinnaanermigut iliuuseqarsinnaassaaq attartornermullu isumaqatigiissunni taamaasilluni annaassinnaassallugu.

Atukkiussinermi ” nakkutilliinermik” pisussaaffittut isigisarialik § 58 imm. 5 naapertorlugu inissiaatileqatigiiffimmit isumagineqassaaq. Tassani atukkiussisumut akiliutaasussaq pillugu piumasaqaateqarpoq (akiliutaasartup qaafasinnerpaaffissaanik aalajangersagaq). § 58-ip immikkoortuani 5-imi piumasaqaat sinnerlugu akiliisitsisoqartarnera paasineqarpat, inatsimmik unioqqutitsinertut nalilerlugu iliuuseqarnissaq inissiaatileqatigiiffiup pisussaaffigaa.

Attartortup allamut attartortitsinermi piumasaqaatinik unioqqutitsilluni inigisamik qimatsinera, Inatsisartut peqqussutaanni § 73 imm. 2 nr. 2-mi maleruagassaq naapertorlugu, nalinginnaanerusumik tunngaveqarlusi aalajangiinersi tunngaviagut isumaqatigaara. Naak, Inissianik attartortitsisarneq pillugu Inatsisartut peqqussutaata 2006-imi allannguutaa § 73-ip immikkoortui pingatserlugit pingaaruteqarnissamut piumasaqaat ilanngunneqaraluaq, § 73, imm. 2, nr. 2, § 48, imm. 5 naapertorlugit, maanaannaq inigisamik qimatsineq unioqqutitsinernut ilaavoq. Inissiaq piffissaanngitsukkut qimanneqarpat (peqqussummi § 73 imm. 2, nr. 2-mi pineqartup) pingaaruteqartutut pingaaruteqanngitsutulluunniit nalilerneqarsinnaanera takorlooruminaatsippara. Peqqussummi maleruagassanit taannatuaavoq (§73, imm. 2) (nr. 2) unioqqutitsinernut allanut naleqqiullugu pinngitsoorani pingaaruteqartuusoq (attartortoq maanaannakkut nutsersimassaaq nutsersimassananiluunniit!).

Inissianik attartortitsisarneq pillugu Namminersornerullutik Oqartussat Nalunaarutaat nr. 12 apriilip 23ani 2008-meersoq § 54 imm. 2 nr. 2 naapertorlugu inissiamik attartortup allamut atukkiussiniarnermini Ineqarnermut, Attaveqarnermut Angallannermullu Naalakkersuisoqarfiup isumaqatigiissusiaata immikkut ittup atorneqarnissaata piumasaqaataanera maluginiagassaraa.

Imm. C-mut tunngatillugu: Siusinnerusukkut attartortumik kalerriisalernissaq ajornartorsiutinik taakkartukkanik aniguiniarnermi sakkussaavoq pitsaasoq.

Imm. D-mut tunngatillugu: Naamik ersarissumik isummernera naapertorlugu inigisamik atukkiussisinnaaneq attartortitsisup attartortullu akunnerminni inatsisitigut ataqatigiinnerannut piffissamik killilersuisinnaasutut isigineqarsinnaanngilluinnarpoq. Immikkoortoq C-mi inissiaatileqatigiiffimmit oqaatigineqartut ajornartorsiutit ilaasa- inigisamik atukkiussereernerup kingorna inimik attartortup inigisaminut uteqqikkumajunnaarneranut tunngasut- anigorneqarnissaannut iluaqutaasinnaassapput.

Imm. E-mut tunngatillugu: Immikkoortoq B-mi oqaatigineqartut innersuutiinnassavakka pingaartumik:

”Atukkiussinermi ” nakkutilliinermik” pisussaaffittut isigisarialik § 58 imm. 5 naapertorlugu inissiaatileqatigiiffimmit isumagineqassaaq. Tassani atukkiussisumut akiliutaasussaq pillugu piumasaqaateqarpoq (akiliutaasartup qaafasinnerpaaffissaanik aalajangersagaq). § 58-ip immikkoortuani 5-imi piumasaqaat sinnerlugu akiliisitsisoqartarnera paasineqarpat, inatsimmik unioqqutitsinertut nalilerlugu iliuuseqarnissaq inissiaatileqatigiiffiup pisussaaffigaa”.

Isumaga naapertorlugu tamatuma saniatigut inimik atukkinneqartup ini piffissaq tamakkerlugu najugarineraa allanilluunniit inigineqarnera inissiaatileqatigiiffiup akisussaaffiginngilaa.

ILANNGUSSAQ A:

Uunga: Ineqarnermi Maalaarutinik Aalajangiisartoqatigiit siulittaasuat Morten Nornild,

A. Iserit A/S –ip Ineqarnermi Maalaaruteqartarfiup najoqqutassiai naapertorlugit suleriaatsinik nalimmassaajuarpoq.

Ima inissisimasimavugut: Qallunaat Nunaanni ukiuni marlunni atuarneq pissutigalugu inimik attartukkamik allamut attartortitsinermut tunngatillugu- ernertillu autistiskiusoq Qallunaat Nunaanni atuarfimmi immikkut ittumi atuartinneqassammat, attartortitsineq sivitsorniarneqarpoq. Qinnuteqaammut tamatumunnga itigartitsivugut, immikkut atuarfik Kalaallit Nunaannit pinnani angajoqqaalli namminneq qinigaat, inigisap allanut attatortinnissaanut tunngavissatut atorneqarsinnaanngimmat. Attartortut tamanna akueraat, taamaattoq matumani sulianilu takkukkumaartussani suleriaatsit, Ineqarnermi Maalaaruteqartarfiup naliliinera naapertorlugu eqqortumik iliuuseqarfiginerisa uppernarsarneqarnissaat kissaatigaarput.

B. ”Isumaginninnikkut sullissinermi ileqqorissaarneq”

Inigisamik ass. ukiuni marlunni allamut attartortitsinissaq Iserit A/S-imit akuerineqarpat, pissutsit ullumikkut atuuttut naapertorlugit, attartortup allap ukiut marluk qaangiunneranni inissiamit aninera Iserit A/S-imit nakkutigineqanngilaq, isumarput naapertorlugu tamanna attartortup taassumalu inaanik attartortup akunnerminni isumagisassaraat. Attartortup piffissami aalajangersimasumi inigisaminik allamut atukkiussisinnaanera uagut akuersissutigiinnarparput, piffissalu iluani inimik attartortup kikkut inissiamit iserlutillu aninissaannut kissaataa, uagut akuliuffigissanngilarput. Attavigisarput tassaassaaq inissiamik attartoqqaartuusoq. Ingerlatsinikkut nalunaarsuivitsinni piffissaq allamut attartortitsiviusoq nalunaarneqartarpoq piffissarlu naagaangat attartortoq nalunaarsuivimmit peerneqartarmat, inissiamik attartoqqaartoq inissiami najugaqartutut nalunaarsimalersarpoq. Taamaaligaangat allagarsiassaraluit utertinneqartarnerisigut attartortoq inigisaminut UTERSIMANNGITSOQ paasisarparput. Inuit nalunaarsorsimaffiat naapertorlugu kina inissiami pineqartumi najugaqartuunersoq ingerlaannaq paasiniartarparput, attartortorlu tassani najugaqartutut nalunaarsimanngippat ”unioqqutitsinikkut inigisamit anisimaneq” allakkatigut nalunaarutigisarparput, aaqqiissuteqarnissamullu ullunik 14-inik periarfissiisarpugut, taamaanngippat inissiamik attartornermut isumaqatigiissut inissianik attartortitsisarneq pillugu Inatsiasartut peqqussutaat nr. 2 maajip 12-ani 2005 –imeersoq § 73, imm. 2, nr. 2 naapertorlugu atorunnaassammat.

C. ALLANNGUUT: Piffissap allamut atukkiussiviup naanissaanut qaammatit marluk sioqqullugit piffissap allamut atukkiussinerup naalerneranik inissiamullu uternissaanik-, inigisamilluunniit attartornermut isumaqatigiissutip atorunnaarsinnissaanik imal. piumasaqaatit eqquutsinneqarpata inigisamik allamut atukkiussinerup sivitsorneqarsinnaaneranik, attartortup siumut ilisimatitsissummik allaffiginera, isumarput naapertorlugu isumaginninnikkut sullissinermi ileqqorissaarnerussaaq. Taamaasilluni inissiamik attartortoq pissutsinik- peeriarfissanillu ilisimatinneqassaq. APEQQUT: Ineqarnermi Maalaruteqartarfik tamatumunnga isumaqataava?

D. Attartortup allamut attartortitsinerata sivisussusia – matuersaammik tunniussineq

Ineqartoq nunami allamiikkajuttarmat, allat inaannik attartortut piffissap attartornissamut isumaqatigiissutaasup naanerani inissiamit aninerminni, matuersaatit allaffitsinnut tunniukkiartorajuttarpaat. Uagut tamatumunnga akuliuttussaanngilagut inissiap qimanneqarnerani takuniaanermik assigisaannilluunniit isumagisassaqannginnatta. Matuersaatit tigumminerarlugit attartortut attavigigutsigik ilaatiut inissiamut uteqqikkusunnginnertik oqaatigisarpaat, nuunnissamullu atatillugu naatsorsuusioqqusisarlutik. Piffissami aalajangersimasumi attartornertut isigalugu, allanut atukkiussinermut piffissaq naappat- piffissarlu allamut atukkiussivik sivitsorneqanngippat allamulluunniit atukkiussisoq uternissaminik nalunaanngippat- Inissiamik allamut atukkiussinissamik akuersissut taamaatittussanngortinneqarsinnaava?

E. Inissiamik attartortitsisup allamut attartortitsinermi pissutsinut akisussaaffeqarnera

APEEQQUT: Inissiamik attartortup piffissami aalajangersimasumi attartornissamik isumaqatigiissuteqarfigisaata, piffissaq isumaqatigiissutaasoq tamakkerlugu inissiami najugaqarnera allanillu najugaqarfigineqannginnera Iserit A/S-ip akisussaaffigaa? Siuliani eqqaaneqareersutut Iserit A/S –ip inigisamik allanut atukkiussinissaq akuersissutigisarpaa, pifissallu allanut attartortitsiviusup iluani attartortut taarseraassinnaanerat akuliuffigineq ajorpaa. Piffissap pineqartup iluani anisoqarpat nutaamillu isertoqarpat, nalunaarsornissaat ineqarnermullu akiliutip maleruagassanut naapertuunneranik qulakkeerinissaq pillugit ilisimatinneqaannassaagut.

Inussiarnersumik inuulluaqqusillunga

Erik Ravn
Pisortaq


Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut