Sags nr.2012-061782

Isumaginninnermi Naammagittaalliuteqartarfiup siulittaasuata februaarip 15-iani 2013, januaarip 25-ani 2012 pisortanit ikiorsiissutisisarnerpit unitsinneqarnissaanik Kommunip januaarip aqqaneq aappaani 2012 aalajangigaa pillugu maalaarutit suliaraa, imalu aalajangiivigalugu

Aalajangiineq

Kommunip aalajangigaa atortussaatinneqanngimmat, kommunip suliaq nangeqqillugu nutaamik aalajangiivigissavaa.

Pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq kingorna allannguuteqartoq aalajangiinermi tunngaviuvoq.

Nassuiaat:

Suliffeqanngitsutit pisortanillu ikiorserneqartartutit ilisimatitsissutigineqarpoq.

Suliffissaqannginnerpit nalaani pisortanit ikiorserneqarsimanerit ilisimatitsissutaavortaaq.

Kommunip allattugaatai naapertorlugit januaarip aqqaneq aapaani 2012, pisortanit ikiorsiissutisisarnerpit ingerlaannaq unitsinneqarnera pillugu ilisimatinneqarputit. Pisortat ikiorsiissutaannik unititsinermut suna tunngavilersuutaanersoq allattugaatini ersarissumik takussutissaqanngilaq, inatsimmillu tunngavigisamik allassimasoqarani.

Allattugaatini januaarip 18-iani 2012 nalunaarsukkat naapertorlugit, aalajangiineq pillugu allakkatigut nalunaarfigineqarsimavutit. Allakkalli allagaatit akornaniinngillat.

Suliffeqanngitsutit allanillu ikiornissaqanngitsutit, inunnik isumaginnittoqarfimmiit pisortanit ikiorsiissutinik pisartagaqarnerit unitsinneqartoq, maalaarutinni oqaatigaat. Ikiorsiissutit tassanngaannaq unitsinneqarnerat sullissisup inooqateqarneraaneranik tunngaveqartoq innersuussutigaat. Meerarsi eqqarsaatigalugu ataataalu naapeqatigiinnersi piinnarlugu ikiorsiissutit unitsinneqarnerat tulluartuusorinngilat.

Kommunip februaarip 20-ani 2012 Isumaginninnermi Naammagittaalliuteqartarfimmut mailikkut allakkamini, allattugaatit kommunimit pigineqartut nassiunneqarnissaat ilisimatitsissutigaa. Illit aappallu ukiuni arlertuni inooqatigiissimasusi meeraqartusilu ilisimatitsissutigineqarpoq. Meeqqamut ataataasup najugaqatigiikkaluartusi najukkani allanngortittuarpaa. Najugarisatut taaneqartoq kingulleq kommunimit alakkarneqartoq, illu aserfallalluinnarsimasoq inunnillu inigineqarsinnaanngitsoq paasineqarpoq. Inooqativit pigisai nalillit ass. snescooteria illit angerlarsimaffivit silataaniittoq kommunip ilisimatitsissutigaattaaq.

Inatsit tunngaviusoq:

Pisortanit ikiorsiisarneq pillugu Inatsisartut peqqussutaat nr. 15 novembarip 20-ani 2006-imeersoq § 7 naapertorlugu kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq
1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

Peqqussummi § 13 naapertorlugu pilersuinermut akiligassanullu aalajangersimasunut pisortanit ikiorsiissutisiat annertussusaat missiliuussinikkut aalajangerneqartarpoq qinnuteqartup maannamut inuuniarnikkut atugarisimasai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit.

Imm. 2. Taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik.

Naliliineq:

Kommunip suliaq qaqeqqillugu nutaamik aalajangiivigissagaa, Isumaginninnermi Naammagittaalliuteqartarfimmi aalajangiisartut siulittaasuata naliliivigaa.

Suliffissaqannginneq patsisigalugu inuttut atukkatigut nalaataqarneq tamatumunnga tunngavilersuutaavoq.

Taamaammat pisortanit ikiorsiissutisiassatit naatsorsorneqassapput.

Peqqussummi § 13 -imi maleruagassat naapertorlugit- tassalu tunngaviusumik pilersuinermut akiligassanullu aalajangersimasunut atugassanik ikiorsiisoqarnissaa tunngavigalugu- naatsorsuisoqassaaq. 

Naatsorsuinermi aappaqaraanni taassuma isertitai akiligassaalu aalajangersimasut ilanngullugit naatsorsuisoqartarpoq.

Inooqatigiittut isigineqarnissamut aappavit illit najukkanni najugaqartutut nalunaarsimannginnera, aappariittut isigineqarnissamut aalajangiisuunngilaq. Inigisami ataatsimiikkajunnersi, nereqatigiittarnersi, sineqatigiittarnersi, pisattassi atisassi il.il. inigisami ataatsimoortinneqarneri ilaatigut aalajangiisuussapput.

Pisinnaatitaaffiginagu ikiorsiissutisinissaq siunertaralugu, pisortanit ikiorsiissutit, meeqqanut tapiissutit assigisaallu pillugit maleruagassanik atornerluineq, inatsisinik unioqqutitsineruvoq, peqquserlunnertullu pineqaatissiissutaasinnaasoq oqaatigineqassaaq.

Isumaginninnermi Naammagittaalliuteqartarfiup siulittaasuata aalajangiinermini inooqatigiittut isigineqarsinnaanersi isummerfiginngilaa.

Suliap ingerlanneqarneranut atatillugu, pisariaqarpat eqqartuussivik aqqutigalugu politiilluunniit ikiorsiullugit, aappavit sumi najugaqarnerarnera apeqqutaatinnagu, ilumut inooqatigiinnersusi kommunip misissussavaa.

Misissuinerup tamatuma inernera apeqqutaalluni, peqqussummi § 13-imut tunngatillugu maleruagassat naapertorlugit, pisortanit ikiorsiissutisinissamut pisariaqartitannik kommuni nutaamik naatsorsuissaaq. Inooqatigiittut naliliivigineqassagussi aapparpit isertitai akiligassaalu illit pisortanit ikiorserneqarnissamut pisariaqartitannik naatsorsuinermi ilanngunneqassapput. Inooqatigiinngitsutut nalilerneqarussi illit kisivit isertitarisinnaasimasatit akiligassatillu naatsorsuinermi toqqammavigineqassapput.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, juunip 13-iani 1994-imeersumi aalajangersakkat naapertorlugit, allaganngorlugu aalajangiisoqarnissaa oqaatigineqassaaq.

Aalajangiineq tunngavilersorneqassaaq, inatsit tunngaviusoq allassimassaaq maalaaruteqarsinnaanerlu pillugu ilitsersuisoqassalluni. Aalajangersakkat inatsimmi tunngaviusumi ilanngunneqarput.

Aalajangiineq:

Kommunip aalajangiinera atuuttussaatinneqanngimmat, maleruagassat taaneqartut naapertorlugit nutaamik aalajangiisoqassaaq.

Inussiarnersumik inuulluaqqusillunga

Naja Joelsen

Siulittaasoq

 

Inatsisit tunngaviusut):

 

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

 § 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

 

§ 13. aalajangerneqartarpoq qinnuteqartup maannamut inuuniarnikkut atugarisimasai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit.

Imm. 2. Taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik.
Imm. 3. Aningaasartuutiviusut tunngavigalugit kiisalu najugaqatigiissinnaanermi iluaqutissat aallaavigalugit aningaasat aalajangersarneqassapput. Pilersuinermut aningaasartuutinullu aalajangersimasunut pisortanit ikiorsiissutit annerpaamik SIK-p Naalakkersuisullu akornanni isumaqatigiissutit naapertorlugit ilinniarsimanngitsumut aningaasarsiarititat ikinnerpaaffiisa 65%-erisinnaavaat, taamaattorli imm. 4 takuuk.
Imm. 4. Pisuni immikkut ittuni SIK-p Naalakkersuisullu isumaqatigiissutaat naapertorlugu suliamik ilinniagaqarsimanngitsut aningaasarsiaasa minnerpaat 65%-iat sinnerlugu ikiorsiissutinik tunniussisoqarsinnaavoq, tamanna pisariaqavissappat qinnuteqartup ilaqutaasalu pilersorneqarnissaannut akiligassanullu aalajangersimasunut, naleqquttumillu ineqarniarnermikkut atugaqaannarnissaannut.
Imm. 5. Nammineq pisuussutigisamik pissaaleqisoqarpat aallaavittut taamaallaat tunniunneqarsinnaapput pilersuinermut akiligassanullu aalajangersimasunut pisortanit ikiorsiissutissat affaannai. Pilersuinermut ikiorsiissutit aningaasanngornagit tunniunneqassapput. Kommunalbestyrelsip naliliinermini immikkut isiginiartussaavai meerartaasinnaasut pisariaqartitaat isiginiarneqarsimanersut.
Imm. 6. Naligalugu inooqatigisaq peqqussummi matumani paasineqassaaq katissimanagu inooqatigisatut, pisortanit ikiorsiissutinik qinnuteqarnermi pisartagaqartup inooqatigisaa, tamannalu sioqqullugu sivikinnerpaamik ukiumi ataatsimi inuit nalunaarsorneqartarfianni najugaqatitut nalunaarsorneqarsimasussaq.
Imm. 7. Pilersuinermut akiligassanullu aalajangersimasunut kiisalu immikkut ittumik pisortanit ikiorserneqarsinnaanermut Naalakkersuisut malittarisassanik aalajangersaasinnaapput.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juuni 1994-imeersoq.

§ 22. Aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

§ 23. Aalajangiinermik oqaasiinnakkut nalunaarfigineqartup aalajangiineq imminik tapersiisuulluinnanngippat piumasarisinnaavaa aalajangiinermut tunngaviusoq allaganngorlugu piumallugu. Tamatuminnga qinnuteqaat oqartussaasunut saqqummiunneqassaaq aalajangiinermik nalunaarutip suliami peqataasumit tiguneqarnerata kingornagut ullut 14-it qaangiutsinnagit. 

- Imm. 2. Tunngaviusup allaganngorlugu nalunaarutigineqarnissaanik imm. 1 malillugu qinnuteqaat sapinngisamik piaartumik akineqassaaq. Qinnuteqaat oqartussaasumit akissuteqartussamit tiguneqarnermi kingorna ullut 14-it qaangiutinnginneranni akineqanngippat oqartussaasup taassuma suliami peqataasoq tamatumunnga pissutaasumik kiisalu qinnuteqaatip qaqugu akineqassangatinneranik nalunaarfigissavaa.

§ 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

-Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

Imm. 3. Tunngaviusumik nalunaarutip imarisai killiliiffigineqarsinnaapput suliami peqataasup tamakkununnga ilisimasaqarnini nammineq iluaqutigiumallugu atuiumasinnaanerminik soqutiginninnera inuk taanna nammineq eqqarsaatigalugu imaluunniit inuinnaat allat pisortalluunniit soqutigissat pissutiginerullugit minnerutittariaqartutut isumaqarfiginarpat, tak. § 15.

§ 25. Aalajangiinerit ingerlatsinermut oqartussaasunut allanut naammagittaalliuutigineqarsinnaasut allakkatigut nalunaarutigineqarunik naammagittaalliorsinnaanermut ilitsersuummik ilaqartinneqassapput tassuuna nalunaarlugit naammagittaalliortarfik naammagittaalliussagaannilu qanoq iliortariaqartoq immaqalu aamma ullut qassit qaangiutsinnagit naammagittaalliortariaqartoq. Tamakkuninngali ilaqartinneqassanngillat aalaajangiineq aalajangiiffigineqartumut tapersiisuulluinnarsimappat.
Imm. 2. Naalakkersuisut maleruagassaliorsinnaapput ingerlatsinermi suliat ilaat erseqqinnerusumik taaneqartut, pissuteqartumik immikkut isigisariaqartut, pillugit naammagittaalliornissamut ilitsersuummik ilanngussaqannginnissaq imaluunniit imm. 1-imi ilitsersuutigineqartumit allaasumik naammagittaalliortoqarsinnaanera pillugit.

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut