Aalajangiineq

Ineqarnermut Naammagittaalliuuteqartarfik isumaqarpoq inigisavit nalinginnaasumik iluarsarnissaanut aningaasartuutit ilaat inatsisit tunngavigalugit akileeqataassutissatit akilertariaqaritit.

Nassuiaat:

Oqaatigineqarpoq inissiamk Najugaq B-XX-imik, Najugaqarfimmiittumik attartorneq aallartikkit 15. Januar 2009-miit.

Inissiaq tallimanik initaqarpoq, angissuseqarluni 88,10 m2 . Nuuffiginerani sallunaveeqqutitut akilerpatit 11.952,00 koruunit.

Attartornermut isumaqatigiissut atorunnaarsippat qimattussanngorlugu 1. Juni 2012, inissiarli qimallugu ulloq 29. Juni 2012. Ulloq taanna inissiaq takusarneqarpoq misissorneqarluni, tassani inissiaatileqatigiiffimmeersoq illillu peqataallusi.

Misissuinermit nalunaarusiaq malillugu qilaaq, iikkat majuartarfiillu iggavimmiittut ataasiarlugit qalipatassaasimapput, majuartarfeqarfimmi iikkat qilaallu, ini sinittarfillu marloriarlugit qalipatassaasimallutik kiisalu ineeqqat pingasoriarlugit qalipatassaasimallutik.

Tamakkua saniatigut ineeqqani naqqit ataasiarlugit lakkerneqartussaasimallutik, inimilu nateq ataasiarlugu qapiarlugulu lakkerneqartussaasimalluni. Uffarfik imileriffittut qalipanneqartussaasimavoq.

Nutsernermut atatillugu akiligassat allagartaat malillugu illit akiligassarisimavatit 3.655,54 koruunit. Akiligassat isumannaarneqarneranni takuneqarsinnaavoq inigisap nalinginnaasumik iluarsaanneranut atatillugu ZZ A/S-imit pisassarisat allagartaat malillugu 25.325,00 koruunit suliffeqarfiup pisassarai.

Qaammatit 41 inissiami najugaqarsimanerpit kingurneranik akiligassat ikilisarneqarput 41 %-imik, taakkulu naleqarput 10.383,25 koruuninik. Sallunaveeqqutitut akilikkatit ilanngaatigalugit kiassarnermullu akiligassat ilannguteriarmata akiligassat katillutik oqaatigineqareersutut amerlassuseqalerput 3.655,54 koruuninik.

Naammagittaalliuutinni ilaatigut allapputit inissiaatileqatigiiffimmi teknikeritut atorfillip oqaatigigaa illit taamaallaat naqqit lakkerneri iikkallu qalipanneri akiligassarissagitit. Taamaattumik naatsorsuutigisimavat sallunaveeqqutitut akiliutigisatit utertillugit tigussallugit. Naammaginartutut isiginngilat ZZ A/S-ip  piumasai ilanngullugit akilissagukkit. Arlaleriarlutit XX A/S attavigisarsimavat pakatsisimallutillu pineqarnerit pillugu, tassa naatsorsuutigigaluarakku aningaasanik utertitsissallutit.

Inatsisitigut tunngavigisat: Inissianik attartortitsisarneq pillugu Inatsisartut peqqussutaanni nr. 2-mi, 12. Maj 2005-imeersumi § 47 malillugu attartortisisup attartorneqartoq piffissamit attartornissap aallartiffissaaniit pitsaasumik isumannaatsumillu pitsaassuseqartillugu attartortumut atugassanngortissavaa. Iikkat, qilaat naqqillu nalinginnaasumik iluarsarneqarsimassapput, tak. § 77, imm. 1. Attartugassaq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu parnaarsaateqassallutik. Kiisalu matut silarliit tamarmik immikkut marlunnik matuersaateqassapput, teknikkikkullu atortulersuutit ajoquteqassanatik.

Imm. 2. Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq, taamaattorli tak. imm. 5. Takuniaanermi amigaatit malugineqartut inissiamut iserternermut nalunaarusiamut ilanngunneqassapput.

Imm. 3. Amigaatit allat attartortup inissiamut iserternermi kingorna tigusinermut atatillugu tikkuarusutai inissiamut iserternermiit sapaatit akunneri marluk qaangiutsinnagit allakkatigut attartortitsisumut nalunaarutigineqassapput. Amigaatilli nalinginnaasumk misissuinermi takuneqarsinnaasimanngippata imaluunniit attartortitsisoq peqquserlussimappat tamanna atuutissanngilaq.

Inissianik attartortitsisarneq pillugu Inatsisartut peqqussutaanni nr. 2-mi, 12. Maj 2005-imeersumi § 77 malillugu inissiamit anisoqarnerani inissiaq nalinginnaasumik iluarsarneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalutsersuineq kiisalu eqqiaaneq. Inissiap naqqi nutaamik lakkersimasutut isikkoqassapput, taamaattorli takuuk imm. 3.

Imm. 3. Malillugu attartortup inissiamut iserternerani inissiaq nalinginnaasumik iluarsaanneqarsimanngippat attartortup inissiaq iserternermini pissuserisaatut itsillugu tunniutissavaa.

Peqqussummi pineqartumi § 78 malillugu attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.

Peqqussummi § 79 malillugu attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat.

Imm. 2. Malillugu misissuinermi attartortitsisoq missuisimanermut nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluunniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaannik missingersuummik allakkatigut nalunaarfigineqassaaq.

§ 84 malillugu ineqarneq pillugu naammagittaalliuuteqartarfiup attartortut naammagittaalliuutaat makkununnga tunngasut suliarisarpai:

3) Inissiap nutserfigineqarnermini pissusia, tak. § 47. 7) Inissiap qimanneqarnerani inissiap pissusia (nalinginnaasumik iluarsaassineq), tak. § 77.

Naliliineq: Ineqarneq pillugu Naammagittaalliuuteqartarfik isumaqarpoq aningaasat inigisavit nalinginnaasumik iluarsaanneranut akiligassat ilaat illit akileeqataassutissatit 3.655,54 koruunit akilernissaannut pisussaasutit.

Aalajangiinermut tunngaviuvoq attartorneq pillugu peqqussummi § 77, imm. 1 malillugu piumasaammat inigisaq qimannerani nalinginnaasumik iluarsarneqassasoq.

Tamanna isumaqarpoq inigisap qimanneranut atatillugu inigisap nalinginnaasumik iluarsarnissaanut, qilaat tamarmik qaqorsarlugit qalipannissaannut, iikkat qalipannissaannut aamma imaluunniit ungalutsersornissaannut kiisalu eqqiarnissaannut aningaasartuutit akilernissaannut attartortoq akisussaasuusoq. Naqqit nutaamik lakkersimassapput.

Inissiap qimmanerani nalinginnaasumik iluarsarneqannginnissaa pillugu allassimasoqanngilaq.

Taamaattumik iikkat qalipaannerinut, qilaat qaqorsarlugit qalipannerinut naqqillu lakkernerinut aningaasartuutit akilissavatit.

Aalajangiineq:

Taamaattumik Ineqarnermut Naammagittaalliuuteqartarfik isumaqarpoq inigisap inatsisit malillugit nalinginnaasumik iluarsarneranut aningaasartuutit ilaat akileeqataassutissatit akilissagitit.

Naammagittaalliorsinnaanermut ilitsersuut:

Ineqarnermut Naammagittaalliuuteqartarfiup aalajangiinera oqartussaasunut allanut naammagittaalliuutigineqarsinnaanngilaq, takuuk § 86, imm. 7 inissianik attartortitsisarneq pillugu Inatsisartut peqqussutaanni nr. 2-mi, 12. Maj 2005imeersumi kingusinnerusukkut allannguuteqartinneqartumi. Attartortitsisup attartortullu akornanni saqitsaannerup eqqartuussisunit suliarineqarnissaa kissaatigineqarpat attartortitsisumik eqqartuussivimmut aggeqqusissut eqqartuussivimmut tunniunneqassaaq. Tamanna aamma atuuppoq attartortitsisup allaffissornikkut aqutsisoqarfianit allakkatigut atassuteqarneq ingerlanneqarsimagaluarpalluunniit.

Ineqarnermut Naammagittaalliuuteqartarfiup aalajangiineri Namminersorlutik Oqartussanit kommuninillu inissianik attartortitsisartutut pinngitsooratik malinneqartussaapput, tak. § 86, imm. 6.

Ineqarnermut Naammagittaalliuuteqartarfik sinnerlugu

Innuttaasoq B

Ineqarnermut Naammagittaalliuuteqartarfimmi siulittaasoq

Assinga uunga: Inissiaatileqatigiiffik XX A/S

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut