Sulisartoq asassorluni suliamik ilinniagalik, igalaanik qillersaasartoq, mersortartorluunniit ilinnik sullissippat kiffartuussinermik taaneqassaaq. Taanna pisiassat arlaannik tigussaasumik pisinertut inngilaq, tassaallunili suliaq/ kiffartuussineq ilinnit pisiarineqartoq. Naammagittaalliorsinnaaneq kiffartuussinernut aamma atuuppoq.

Angallammik iluarsaaneq akisuallaaq
Angutip angallanni angallatinik iluarsaasarfimmut upernaamut angalanissamut piareersaataasumik suliaritippaa tamatumalu peqatigisaanik aaqqitassat annikitsut pingasut suliarineqarput. Akiligassaq takkummat angallataatillip annertuallaarsoraa taamaammallu ingerlaannaq iluarsaasarfimmut maalaarutigalugu.

Ajunnginneraariarluni akikillisaavigineqarpoq 
Iluarsaasarfiup akiligassaq naapertuussoraa taamaattorli nal. ak. atukkat quliniit arfineq pingasunut appartinneqarput. Angutilli annerpaamik nal.ak. tallimat akilerniarmagit akiligassaq isumaqatigiin-ngissutaalerpoq.

Atuisartunut Pisisartunullu Maalaaruteqartarfittut Ataatsimiititaliamut maalaaruteqarneq
Angut Atuisartunut Pisisartunullu Maalaaruteqartarfittut Ataatsimiititaliamut (ullumikkut Atuisartut Pisisartullu Maalaarutaannik Aalajangiisartunut, red.)maalaaruteqarpoq. Suliassap suunera nalornissutaasinnaanngilaq, illuatungeriinniillu nal. ak. suliamut atugassat akiliutaasussallu annertunerpaaffissaa isumaqatigiissutigisimanngimmassuk, Atuisartunut Pisisartunullu Maalaaruteqartarfittut Ataatsimiititaliami ilaasortat tamarmik angutip akiligassamik akiliinissaa isumaqataaffigaat. Naammagittaalliorsinnaanermut pisinnaatitaaffiit kiffartuussinernuttaaq atuupput.

Ukiuni tallimani naammagittaalliorsinnaatitaaneq
Illit kiffartuunneqarnerit amigaateqarlunilu kukkuneqartoq paasiniariarukku inuussutissarsiummik ingerlatalimmut maalaaruteqassaatit. Kingusinaarnermut tunngatillugu maleruagassat nalinginnaasumik matumani atuummata, kiffartuussinerit pillugit naammagittaalliorsinnaanermut ukiut tallimat periarfissaraatit. Kiffartuussinerit pisiassanik inniminnikkatut suliarineqartut, pisineq pillugu inatsimmi maleruagassiugaammata, nalinginnaasumik pisinertut naammagittaalliorsinnaa-nermut ukiut marluk periarfissaraatit.

Pisiassamik inniminniineq
Sanasumit assip sinissaanik sanaanneqarnissamut inniminniineq kiffartuussinerunani inniminniilluni pisineruvoq. Matumani tuniniaasoq ilinnut nutaamik suliaqarmat pisineq pillugu inatsimmi maleruagassanit- ilaatigut naammagittaalliorsinnaanermut ukiunik marlunnik periarfissaqarnermit illersugaavutit.

 

Ataavartumik kiffartuussinerit
Suliffeqarfimmit TV-kkut kanalinik nioqquteqartumit atuinissamik isumaqatigiissuteqarneq ataavartumik kiffartuussineruvoq. Ataavartumik kiffartuussineq Atuisartunut pisisartunullu isumaqatigiissuteqarneq pillugu inatsimmi § 25-mi maleruagassiugaavoq. Taanna naapertorlugu isumaqatigiissuteqareernerup kingorna qaammatit tallimat qaangiunneranni, qaammat ataaseq sioqqullugu isumaqatigiissut atorunnaarsissinnaavat. Ataavartumik kiffartuunneqarneq tassaasinnaavortaaq suliffeqarfimmut pigaartoqartitsivimmut angerlarsimaffinni tillinniartoqarnerani kalerrisaarusiisumut- imal. pigaartoqartitsinermut isumaqatigiissuteqarneq. Matumanissaaq qulaani nassuiaatigineqartutut isumaqatigiissummik atorunnaarsitsisinnaavutit.

Aki aalajangersimasoq isumaqatigiissutaanngippat
Kiffartuunneqarnissamik inniminniinerni aalajangersimasumik akeqartitsinissamut isumaqatigiissusiortartut ikittuinnaapput. Aalajangersimasumik akeqartitsinissamik isumaqatigiissuteqarsimanngikkuit atuisartutut- akigititaq naapertuuppat- tuniniaasup piumasaa naapertorlugu akiliinissat pisussaaffigaat.

Aki naapertuutinngitsoq
Aki naapertuutsinngitsoq tassaasinnaavoq aalajangersimasumik akeqartitsinissamik isumaqatigiis-suteqaqqaarani inussutissarsiummik ingerlataqartumit aqerluusanik nalinginnarnik 100-nik inniminniineq. Aqerluusat takkummata tuniniaasup ataaseq 500 koruuninik akeqartinniarpaa. Aqerluusap nalinginnaasup akia pissusissamisuunngitsumik qaffasippallaarmat akiligassap akilernissaanut pisussaatinneqassanngilatit.

Kiffartuussinerit ajoqutillit amigaatillillu
Inuussutissarsiummik ingerlatalik illit suliakkiussannik isumaginnittoq suliakkiussamik tigummissaqarnermini tamatumunnga akisussaasuuvoq. Inuussutissarsiummik ingerlatallip pigisatit illersorneqarsinnaanngitsumik iliuuseqarfigisimappagit- piaarinaatsoornikkut ajutoornerunngippat- taarsiissuteqarnissamut akisussaasuussaaq.



Kiffartuussinernut assersuutit

·         Mersortartup qarlitit qulluppai

·         Qaatigoorsiavit millilernissaa                      (pisiassamik inniminniineq)                         tuniniaasumut qinnutigaat

·         Sanasup ilisivissat suliaraa.

·         Igalaatit qillersartippatit

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut