Siulequtsiussaq

Isumaginninnermi Naammagittaalliuuteqartarfik, Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 10 imm. 5 naapertorlugu ukiumoortumik nalunaarusiorpoq.

Nalunaarut qaammatisiutit malillugit ukioq malinneqartarpoq, naatsumillu Isumaginninnermi Naammagittaalliuuteqartarfiup atuunnera, naammagittaalliuutit tiguneqartut aamma suliat naammassineqartut, suliallu kisitsisitigut takussutissiarineqarneri pillugit nassuiaammik imaqarluni.

Nalunaarut Isumaginninnermi Naammagittaalliuuteqartarfiup nittartagaani uani takuneqarsinnaavoq: www.aua.gl

Isumaginninnermi Naammagittaalliuuteqartarfiup, nalunaarutip nittartakkamut ikkunneqarnera pillugu taamaallaat kommunit, Kanukoka, Inatsisartut Ombudsmandiat, Rigsombudsmandi aamma Isumaginninnermut Ilinniarfik ilisimatitsissuteqarfigissavai.

Isumaginninnermi Naammagittaalliuuteqartarfiup Allattoqarfiata isumaqatigiissuteqarnikkut ukiumoortumik nalunaarut tunniussinnaavaa pappiaranngorlugu nassiussinnaavaa, assingaluunniit nassiussinnaallugu.

Isumaginninnermi Naammagittaalliuuteqartarfik ima attaveqarfigineqarsinnaavoq:

Najugaq:
Imaneq 29, 1
Postboks 689
3900 Nuuk

Mail: maalaarut@nanoq.gl
Oqarasuaat: 32 80 33
Fax: 32 78 50

Naja Joelsen

Siulittaasoq

 

Naammagittaalliuuteqartarfimmut inatsisitigut tunngaviusoq

1980-imi Isumaginninnermi Naammagittaalliuuteqartarfiup atuuttuunera aallartippoq.

Isumaginninnermi Naammagittaalliuuteqartarfip suliassaqarfia isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 8, imm. 1-imi aamma 2-imi allassimavoq.

Isumaginninnermi Naammagittaalliuuteqartarfik, isumaginninnermi malittarisassat malillugit kommunemit imaluunniit Ilaqutariinnermut, Avatangiisinut, Ilageeqarnermut Naligiisitaanermullu naalakkersuisoqarfimmit (siornatigut Isumaginninnermi Naalakkersuisoqarfik) aalajangiiffigineqarsimasunut naammagittaalliuuteqartarfiuvoq.

Naammagittaalliuuteqartarfiup sulinera peqqussutip §§ 9-ani aamma 11-ani erseqqinnerusumik inatsisitigut maleruagassaqartinneqarpoq.

Isumaginninnermi Naammagittaalliuuteqartarfik pillugu

Isumaginninnermi Naammagittaalliuuteqartarfik isumaginninnerup iluani allaffissornikkut aalajangiiffigineqarsimasut pillugit naammagittaalliortarfittut nuna tamakkerlugu qullersaavoq.

Naammagittaalliuuteqartarfik oqartussaqarfiuvoq allaffissornikkut eqqartuussiviit aalajangiisarnerinut assigusumik inissisimasoq, pisortaqarfinnut allanulluunniit qanoq suleriuseqarluni periuseqarnissamik, qanorlu ingerlariaaseqarnissamik aalajangersimasumik isummanut qilersorsimanngitsoq suliat ataasiakkaat qanoq suliarineqartarnissaannut aalajangiivigineqartarnissaannullu.

Isumaginninnermi Naammagittaalliuuteqartarfiup suliassaraa ilaatigut makku aalajangiiffigissallugit:

  • siusinaartumik pensionisiat aammalu utoqqalinersiat, aammattaaq matumani ilaavoq Nunani avannarlerni utoqqalinersiat pillugit isumaqatigiissut tunngavigalugu aalajangiiffigineqarsimasut
  • pisortanit ikiorsiissutit akuerineqarlutik ikiorsiissutigineqarsimasut
  • meeqqanut inuusuttuaqqanullu ikiorsiisarneq, matumanissaaq ilaalluni angerlarsimaffiup avataanut akuersinertaqanngitsumik inissiisarnerit
  • Ineqarnermut tapiissutit
  • isumaginninnermi suliassaqarfinni suliassat allat
  • Suliffeerunnermi ikiorsiissutit
  • Suliat angerlarsimaffiit pisortanit ingerlanneqartunut attuumassutillit
  • Suliat isumaginninnerup iluani pissaanermik atuineq pillugu

Isumaginninnermi Naammagittaalliuuteqartarfiup aalajangiiffigisimasai inaarutaasuupput aammalu allaffissornikkut oqartussaasunut allanut naammagittaalliuutigineqarsinnaanatik.

Tassa ima isumaappoq, innuttaasut isumaginninnerup iluani kommunenit aalajangiffigineqarsimasunut tamangajannut Isumaginninnermi Naammagittaalliuteqartarfimmut naammagittaalliutigineqarsinnaapput.

Isumaginninnermi Naammagittaalliuuteqartarfiup aamma siunertaraa kommuunini assigiimmik suleriaaseqarnissaq, tassuunakkut suliat assigiimmik nalilersorneqartarniassammata, kommunimi sorlermi aalajangiisoqarsimanera apeqqutaanani.

Taamaattumik Isumaginninnermi Naammagittaalliuteqartarfiup aalajangiiffigisimasat immikkullarissut, sapinngisamik ataatsimeereernerit tamaasa, tamanut saqqummiuttarpai, taamaalilluni kommunenit aammalu suliap iluani soqutigisalinnut allanut sulianut ataasiakkaanut tunngatillugu qanoq suliarinnittoqarsinnaaneranik ilitsersuutitut atorluarneqarsinnaaqqullugit.

Isumaginninnermi Naammagittaalliuuteqartarfik taamaaliornermigut qulakkeerinneqataarusuppoq kommune najugaqarfik sorliunersoq apeqqutaanani suliat sukumiisumik eqqortumillu suliarineqarlutik aalajangiiffigineqartarnissaannut.

Isumaginninnermi Naammagittaalliuteqarfiup ukiumi siuliatuulli saqqummiuppai aalajangiussat sammisap iluani pineqartuni taamaattuukkajuttumik aalajangiiffigineqarsimasut. Tamakkuninnga tamanut saqqummiussisarnerup siunertaraa kommuneni sullissisut iluaqutigisinnaammatigit.

Katitigaanera

Isumaginninnermi Naammagittaalliuuteqartarfik ukioq naallugu siulittaasoqarpoq inatsisilerituujusumik, sisamanillu ilaasortaqarluni isumaginninnerup iluani inatsisinik ilisimasalinnik, aammalu isumaginninnermi naalakkersuinikkut pissutsinik paasisimasaqartunik.

Siulittaasoq:
Naja Joelsen, Nuuk

Ilaasortat:
Nukákuluk Kreutzmann, Nuuk
Tukummeq Qaavigaq, Nuuk
Lorette Henriksen, Nuuk
Ruth Heilmann, Maniitsoq

Qulaani taaneqartunut uku sinniisussaapput:

Karsten Klausen, Naja Joelsen-imut sinniisuusoq
Mette Sonniks, Nukàkuluk Kreutzmann-imut sinniisuusoq
Dorthie Kanuthsen,Tukummeq Qaavigaq-imut sinniisuusoq
Evelyn Frederiksen, Lorette Henriksen-imut sinniisuusoq
Ânise Svane Johansen, Ruth Heilmann-imut sinniisuusoq

Ukioq 2015-mi Isumaginninnermi Naammagittaalliuuteqartarfik pingasoriarluni ataatsimiissimavoq, tassalu apriilimi, aggustimi, decemberimilu.

Ataatsimiinnerni tamaginni suliassat 33-48-llu akornanniittut suliarineqartarsimapput.

Suliat amerlanerussuteqarnikkut aalajangiiffigineqartarput. Tassa imaappoq Isumaginninnermi Naammagittaalliuuteqartarfiup aalajangiineri siulittaasumit aammalu ilaasortatut toqqagaasunit aalajangiiffigineqartarput. Suliat ataasiakkaat tamarmik immikkut ataatsimiinnermi sammineqarlutik suliarineqartarput aalajangiiffigineqartarlutillu.

2015-mi naammagittaalliuteqartarfiup sulinera

Isumaginninnermi Nammagittaalliuteqarfiup ukioq 2015-missaaq innuttaasut inatsisitigut isumannaatsumik inissisimatinneqarnissaasa qulakkeersimaneqarnissaa ukkatarisimavaa, naammagittaalliuutit suliarisarnerisa sapinngisamik sivikillisarniarsarineratigut, aammalu pitsaasumik suliarilluakkamillu suliat aalajangiiffigisarnerisigut. Isumaginninnermi Naammagittaalliuteqartarfiup ukiumi siuliasuulli suliat kukkunillit 10-it utertittariaqarsimavai Kommunini suliarineqarnerisa amigaateqarnerujussuat peqqutigalugu. 2015-mi naammagittaalliortarfiup naammagittaalliutit 492-it tigusimavai, 360-illu inaarlugit suliarisimallugit. Agguaqatigiisillugu suliat suliarineqartarnerisa sivisussusaa ukioq ataatsip missigaa. Nallersuusseriaraanni Isumaginninnermi Naammagittaalliuteqartarfiup 2014-imi suliassat tigusimasai 425-iusimapput, 365-illu inaarlugit suliarisimallugit.

Suliat qanoq sivisutigisumik suliarineqartarnerat immikkut sammillugu

Qulaani takuneqarsinnaasutuut suliat suliarineqartarnerisa sivisussusaat appariaateqarsimanngilaq. Suliat taama sivisutigisumik suliarineqartarnerannut peqqutaavoq kommunit paasissutissanik allattoqarfiup noqqaassutigisimasaanik piaartumik nassiussisannginneri. Aammattaaq nutserisitsisarneq piffissamik atuiffiungaatsiartarsimavoq. Aammattaaq naammagittaalliuteqartarfimmi ataatsimiititap aalajangiussimavaa kommune suliamut tunngasunik atugassanik noqqaaffigisimasaq tunniussaqanngippat Nakkutilliisoqarfimmut nalunaarutigisassallugu.

Innarluutilinnut suliat immikkut sammillugit

Isumaginninnermi Naammagittaalliuuteqartarfiup innarluutillit akornanniit naammagittaalliuutit suli eqqummariffigai. Ukioq 2015-imi naammagittaalliuutit 10-it aalajangiiffigisimavai, taakkunannga naammagittaalliuutit 3-it naammagittaalliortumit ataatsimiit naammagittaalliutigineqarsimallutik. Naammagittaalliuuteqartarfiup siulittaasuata suliaq ataaseq aalajangiiffigisimavaa. Imaappoq, innarluutilinnit naammagittaalliuutit suli ikittuinnaapput, suliassaqarfiup kommuninut nuunneqanngikkallarneranut sanilliullugu.

Malitseqartitsisarneq immikkut sammillugu

Naammagittaalliuuteqartarfik ukioq 2015-imi innuttaasunit ikittuinnarnit saaffigineqartarsimavoq kommunit naammagittaalliuuteqartarfiup aalajangiiffigisimasaanik malitseqartitsisimannginnerat pillugu nalunaaruteqartunik.

Isumaginninnermi Naammagittaalliuteqartarfiuttaaq ilisimaaraa kommunit ilaatigooriarlutik naammagittaalliuteqartarfiup aalajangiussaanut isumaqataasimanngeriarlutik malitseqartitsisannginnerat. Taama ittunilli pisoqartarnera Isumaginninnermi Naammagittaalliuuteqartarfimmit tamatigut ilisimalerneqarsinnaasanngilaq.

Isumaginninnerup iluani pissaanermik atuineq pillugu

Soorlu 2013-imi aammalu 2014-m ukiumoortumik nalunaarusiani taaneqarsimasoq, Isumaginninnermi Naammagittaalliuuteqartafik Isumaginninnermik suliassaqarfimmi pissaanermik atuineq pillugu Inatsisartut inatsisaat nr. 1, 21. november 2013-mi atuutilersoq naapertorlugu sulianik aalajangiiffigineqarsimasunik naammagittaalliuuteqartarfittut inissisimalersimavoq. Sulili Isumaginninnermi Naammagittaalliuuteqartarfik naammagittaalliutinik tigusaqarsimanngilaq, tamannalu Ilaqutariinnermut, Naligiissitaanermut, Isumaginninnermullu Naalakkersuisoqarfimmut ilisimatitsissutigineqarsimavoq.

Isumaginninnermi Naammagittaalliuuteqartarfimmi ataatsimiititaliap 2014-imi aalajangiiffigisaasa agguataarneri

Ataatsimiititaliap ataatsimiinnermini ataani taaneqartut makku aalajangiiffigisimavai:

Utoqqalinersiat aammalu siunaartumik pensionit suliat 37-it
Naartunermi, erninermi meeravissiartaarnermilu sulinngiffeqartarneq ullormusiaqartarnerlu suliat 1-it
Pisortanit ikiorsiissutit suliat 53-it
Suliffeerunnermi ikiorsiissutit suliat 9-it
Meeqqanik inuusuttunillu ikiorsiisarneq suliat 5-it
Annertuumik innarluutillit ikiorserneqartarnerat suliat 10-it
Meeqqanut tapiissutit suliat 1-it
Inissiani attartortakkani ineqarnermut tapiissutit suliat 3-it
Meeqqanut akilersuutit suliat 5-it
Inissiisarfiit kommunillu akornerminni akilersueqatigiittussaanerat suliat 0-it
Suliat suliat 1

Suliat tamakkerlugit katinnerat: suliat 124-it

Taakku saniatigut Ataatsimiititaliap Siulittaasuata suliat aalajangiiffigisimasai: suliat 59-it
Allattoqarfiup itigartitsissutigisimavai suliat: suliat 148-it
Suliat kommunit kukkullugit suliarisimasai allattoqarfiup kommuninut utertissimasai: suliat 10-it
Suliat allat: suliat 19-it

Katillugit: suliat 360-it

Qulaani taaneqartunit suliat 10-it kommuninit kukkullugit suliarineqarsimasut utertinneqartariaqarsimapput. Taakku tassaasimapput sullissinermi kukkunerit ima annertutigisimasut, innuttaasut inatsisitigut isumannaatsumik inissisimanissaasa akerlianik suliat suliarineqartarsimallutik. Tamakku ilaatigut tassaasimapput suliat kommuninit kukkunikkut inatsisit atugarissarinngisatik atorlugit aalajangiiffigineqarsimasut, imaluunniit aalajangiiffigineqartumut inatsisinik tunngavigineqartunik innersuussaqarnani aalajangiiffigisimasat, kiisalu innuttaasup pineqartup paasissutissanik ilisimasaqarfiginngisaanik tunngavilersuuteqarluni aalajangiiffigisaqarsimaneq. Taamaattumik pisariaqarsimavoq suliat kommuninut utertinnissaat kommunillu peqqullugit suliat suliareqqinneqassasut aammalu nutaamik aalajangiiffigineqassasut, taamaalilluni sullissineq aalajangiinerlu suliassat suliarineqartarnerat pillugu inatsimmut naapertuuttumik naammassineqarniassammata.
Ukioq 2015-imi Isumaginninnermi Naammagittaalliuuteqartarfiup suliarpassuit aamma itigartitsissutigisimavai. Itigartitsissutit amerlanerpaat itigartitsissutigineqarsimasut tassaasimapput naammagittaalliornissamut piffissarititaasoq qimmorneqareersoq naammagittaalliutit anngunneqarsimasut, imaluunniit naammagittaalliutigineqartoq pillugu naammagittaalliuteqartarfik naammagittaalliutigineqartup suliarinissaanut pisinnaatitaaffeqanngimmat, kiisalu naammagittaalliorfissaq allaammat tassunga ingerlatitseqqittarsimalluni. Ukioq 2014-imi Isumaginninnermi Naammagittaalliuuteqartarfiup suliat immikkuullarissumik aalajangiiffigineqarsimasut 3-it tamanut saqqummiuppai, naammagittaalliuteqartarfimmut naammagittaalliutigineqarsinnaasut agguataarlugit inississorneqarfigisimasaannut ilillugit. Aalajangiussat taamakku tamarmik naammagittaalliuuteqartarfiup nittartagaani www.aua.gl –mi atuarneqarsinnaapput.
Taamatuttaaq 2014-suulli saqqummiunneqarput aalajangiussat sammisap iluani pineqartuni taamaattuukkajuttumik aalajangiiffigineqarsimasut, taamaalilluni aalajangiussat pineqartup iluani taamatut inerneqarajuttut innuttaasunit kommunenilu sullissisunit iluaqutigalugit atorneqarsinnaasunngorlugit. Taakkunannga saqqummiunneqartut 6-iupput. Taakkuttaaq nittartakkami www.aua.gl –mi atuarneqarsinnaapput.

Isumaginninnermi Naammagittaalliuuteqartarfiup Allattoqarfia

Allattoqarfik Isumaginninnermi Naammagittaalliuuteqartarfimmut allattoqarfiuvoq. Allattoqarfik Atuisartoqarnermut Unammilleqatigiinnermullu Aqutsisoqarfik-up ataaniippoq. Allattoqarfiup Isumaginninnermi Naammagittaalliuteqartarfiani ukioq 2015-imi sulisut tassaapput inatsisilerituut pingasut, isumaginninnermi siunnersorti ataaseq, allaffimmiorlu ataaseq.
Allattoqarfiup suliai tassaapput:

  • Naammagittaalliutip tigusimaneranik uppernarsaaneq
  • naammagittaalliornissamut piffissaliussaq qimmuussimanera peqqutigalugu itigartitsineq
  • piginnaatitaaffeqannginneq pissutigalugu itigartitsineq
  • sulianmut paasissutissanik pissarsiniartarneq/noqqaasarneq
  • naammagittaalliuuteqartarfimmi ataatsimiititaliap ataatsimiinnissaanut sulianik ataatsimiissutissanik piareersaaneq
  • naammagiataalliuuteqarfimmi ataatsimiititap ataatsimiinneranik imaqarniliorneq
  • sulianik inaarlugit aalajangiiffigineqarsimasunik nassiussuineq
  • sulianik immikkuullarissumik aalajangiiffigineqarsimasunik aammalu taamaattuukkajuttumik aalajangiiffigineqarsimasunik tamanut nittartakkakkut saqqummiussineq

Allattoqarfik aamma ataatsimiititaliap ataatsimiinnissaannut piareersaalluni aaqqissuisuusarpoq. Allattoqarfimmiit sulisut marluk 2015 apriili qaammataagaa meeqqanut tapiissutit pillugit Kommuneqarfik Sermersuumi sulisunut pikkorissaasimapput. Pikkorissaaneq Nuummi ingerlanneqarpoq, sulisullu Paamiuneersut Tasiilameersullu videokonference atorlugu toqqaannartumik peqataasimallutik. Allattoqarfimmi sulisoq ataaseq 2015 septemberi qaammataagaa Kommune Kujalliup immikkoortoqarfia Qaqortumiittoq pulaarsimavaa, allattoqarfimmiillu pikkorissaasoqarsinnaaneranik ilitsimatitsissuteqarfigisimallugu. Tamatuma saniatigut sulisunik ataasiakkaanik ilinniartitsisineq ingerlanneqarsimavoq, apeqquteqaataannillu akissuteqarfiginnittarsimalluni. Allattoqarfiuttaaq sapinngisamik toqqaannartumik Ilaqutariinnermut, Naligiissitaanermut Isumaginninnermullu Naalakkersuisoqarfik, MIO, Qallunaat nunaanniittoq Ankestyrelsen, allallu pisortaqarfiit nunani avannarlerniittut suleqatiginiartarsimavai ataatsimeeqatigisarsimallugillu, aammalu pikkorissarnerit allattoqarfimmi sulisunut piukkunnartut tulluartullu peqataaffiginiartarsimallugit. Taamatut peqataaffeqartarnerit misilittakkanik avitseqatigiiffiusarsimapput sulisunut pissarsiaqarfiulluartartut. Assersuutitut taaneqarsinnaavoq Nunat Avannaamioqatigiit ataatsimeersuarnerini peqataatitaqarsimaneq, Savalimmiuni Torshavn-imi ingerlanneqarsimasoq Nordisk Försikringsdommermøde-mik taaguuteqartinneqartoq, maji qaammataagaa 2015 ingerlanneqartoq. Ataatsimeersuarnermi peqataasut tassaasimapput nunani avannarlerni maanisuulli assigusunik atorfillit suliaqarfillillu. Tamanna misilittakkanik avitseqatigiiffiulluarsimavoq ilisimatitseqatigiiffiusimallunilu, soorlu assersuutigalugu inatsisit allannguuteqarsimasut pillugit ilisimatitsissutigineqarsimallutik.

Aalajangiiffigineqarsimasut tamanut saqqummiussat pillugit eqikkaaneq

Immikkuullarissumik aalajangiiffigisimasat taamaattuukkajuttumillu aalajangiiffigisimasat eqikkarneqarneri Isumaginninnermi Naammagittaalliuuteqarfiup nittartagaani atuarneqarsinnaapput, taamaattumik uani ilanngunneqanngillat.

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut