Akili piviusorsiunngippat pisinnaatitaaffiit taanna atuutinngilaq. Najukkanni pisiniarfiup immuit yoghurtiluunniit akikillillugit neqeroorutaaneranni allagartaq piinngitsoorsimappagu, akigitinniakkatut allagarsiussaq naapertorlugu akiliinissat pisinnaatitaaffigaat. Akigitinniagarli piviusoriunngilluinnarpat, soorlu TV-kkut isiginnaarut nutaaq 65 tomminik angissusilik 10 koruuninik akeqartutut nalunaarsimappat kukkunerunissaalu ersarippat, taama akiliinissamut pisinnaatitaaffe-qanngilatit.

Akikitsumik støvsugerertaarneq

Arnaq støvsugerimik nutaamik pisiniarpoq. Støvsugerimik pitsammik 599,95 koruuninik akeqartutut allagarsikkamik nassaarpoq. Pisiniartitsisup kukkusoqarsimaneranik nassuiaappaa støvsugerilu 1.393,95 koruuninik akeqarmat taama akikitsigisumik tuniniarnagu oqarluni. Arnap tamanna maalaarutigaa støvsugerilu 599,95 koruunilerlugu pisiarinissaa piumasaqaatigalugu. Kukkusoqarsimanissaa tamanut ersarinngimmat arnap maalaarutaa akuerineqarpoq. Taamaammat arnap støvsugeri 599,95 koruunilerlugu pisiaraa.

Pisiniarfimmi akit ersarissut

Pisiniarfimmi nioqqutissat akii ersarissumik nalunaarsimassapput. Matumani pineqarpoq nioqqutissanut atasunik taamatullu nivinngakkanik ilisiviillu saanni akinik nalunaarsuineq. Pisiassataaq pisiniarfimmi saqqummersitat akii ersarissumik nalunaarsimassapput. Nalinginnaasumik akigitinneqartoq kukkuneqarsimasinnaagaluarpalluunniit pisiassamut akigititaasutut allagarsiussaq naapertorlugu pisiniarfimmit tunineqassaaq. Tamannali pisiassanut pisinianit allanit nikisinneqarsimasunut atuutinngilaq. Taamatuttaaq kukkusoqarsimanissaa ersarippat soorlu nioqqutigisamut akigititaq piviusorsiunngitsumik akikippat pisiarinissaa piumasaqaatigisinnaanngilat.

Internetsikkut niuernermi akit

Internetsikkut niuernermi akit naniuminartuussapput. Tamanna pisiap akiatalu quppernermi ataatsimiinnissaannik imal. quppernermut akip nalunaarsimaffianut pinissamut periarfissaqar-nissamik isumaqarpoq. Pisiassap akia tamakkiisoq nalunaarsimassaaq. Aningaasartuutit allanngorartut imal. pisariaqangippat akiligassaanngitsut immikkut ilisimatitsissutaassapput. Pisiniarnermut uppernarsaammi aki tamakkiisoq nalunaarutigineqarpat tuniniaasoq annertunerusumik akileeqqusisinnaanngilaq.

Allagarsiinikkut akigititanut pituttugaannginneq

Pisiniarfiit allagarsiissutini akinut paasissutissanullu pituttugaanngillat. Allagarsiissummi pisiassaq akikinnerusoq takusimagukku pisiniarfimmili akisunerusoq paasinarsippat, allagarsiissummi akigitinneqartoq naapertorlugu pisiarisinnaanissaa piumasarisinnaanngilat. Pisiniarfilli allagarsiissutimini akulikitsunik kukkusunik akeqartitsisartoq Atuisartoqarnermut Unammilleqatigiinnermullu Aqutsisoqarfimmi Atuisumut nalunaarutigisinnaavat. Atuisup tuniniakkanik nittarsaassisarneq pillugu inatsimmik unioqqutitsisoqarsimasinnaanera misissorsinnaavaa.

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit


Saqqummersitanut assigusut