Malittarisassatut pingaarnerpaattut sunaluunniit nioqqutissaq sullissinerluunniit akilertassagakku, tiguinnariarlugulu. Soorlu assersuutigalugu nioqqutissaq tigujumassanngilat akiligassarlu kingusinnersukkut akilerumallugu. Allatut isumaqatigiissuteqarsimanngikkuit taava nujalerisoq, biilileriffik il.il. ingerlaannartumik akilerneqartassapput.


Akiligassap allagartaani akilernissaanut piffissarititaasoq allaqqasarpoq

Akiligassaq akilissavat kingusinnerpaamik ullormi kingusinnerpaamik allassimasumi taannami piffissaq eqqorlugu allassimasoq atuutsitaammat. Piffissaq eqqorlugu akiliisimassaatit, aningaasat allakkerisarfimmi imaluunniit aningaaserivimmi akilersimagukkit ulloq taanna piffissarititaasoq kingullerpaaq eqqorlugu. Aningaasat tigusisussamut apuuttariaqarsimanngillat. Malittarisassaqanngilaq akiligassap killissaa qanoq sivisutigissanersoq, kisianni periarfissaqartariaqarputit minnerpaamik ullualuit atorlugit allakkerisarfimmut imaluunniit aningaaserivimmut akiligassaq isumaginiarlugu.

Kingusinaarlutit akiliisimassaatit, ulloq akiliiffissat qaangerlugu akiliisimaguit. Qaqugukkut akiliinissat isumaqatigiissutaasimanngippat, taava akiligassap tiguneraniit ullut 30-it atorlugit kingusinnerpaamik akiliissaatit. Tamanna aamma atuuppoq akiligassaq nassiunneranniit ingerlaannartumik tigunngikkukku.


Akiligassamik girokort-imillu tigusaqanngikkuit

Akiligassaqartillutit akilertariaqarpatit, tamannalu isumagissavat akiligassat imaluunniit girokorti kingusinnerpaamik akiliffissartalik tigunngikkukkuluunniit. Suliffeqarfik tusagaqarfiginngikkukku akiligassat nammineq noqqaassutigisariaqarpat.

Allakkat akiligassartalik tammarsimappat aammalu allakkat akileeqqusissutit allakkerisarnermi tammarsimappata, taava akileeqqusissutit akiitsuutaat (gebyr) akilertariaqarsinnaavatit. Najugarisat allanngussappat aamma suliffeqarfinnut isumaqatigiissuteqarfigisannut nalunaarutigissavat.


Akiliisitsiniartarfiit takussutissartai nakkutigikkit

Akiliisitsiniartarfikkut (BS, Betalingsservice) akiligassatit akilertarukkit, taava qaammammoortumik nakkutigisariaqarpatit ilumut akilersimanersut, aammalu aningaasat eqqortut akilersimanersut nakkutigalugu. Aningaaservimmiit kukkusoqarsimappat tamanna naammagittaalliutigisinnaavat aningaaserivimmut. Kisianni tassa illit akisussaajuaannarputit, akiligassaatitit tigusisussamut eqqortumut aammalu piffissaq eqqorlugu akilerneqartarnissaat.


Akiligassap angissussaa isumaqatiginngiliuk?

Soorlu assersuutigalugu nioqqutissaq iluarsartissimagukku, taava iluarsaassisup nioqqutissaq tunniunnaveersaarsinnaava, akiliisinnaanngikkuit. Tamanna aamma atuuppoq akiliiumanngikkuilluunniit, akiligassap angissusaa isumaqatiginagu imaluunniit suliarineqarsimasoq iluarisimanagu akiliiumanngikkuit.

Akiliisariaqassaatit ”akerliullutit”. Imatut paasineqassaaq, iluarsaasisup akileeqqusinera naapertorlugu akiliisutit. Akiliinerit ilutigalugu mail-ikkut imaluunniit allakkat tammatsaalisatut nassiussat atorlugit nalunaassaatit, akiligassaq isumaqatiginagu, aammalu pisinnaatitaaffiit naapertorlugu Atuisartoqarnermut Naammagittaalliuteqarfimmut eqqartuussisunulluunniit ingerlateqqinniarit ooriutitit tigoqqinniarlugit.


Kingusinaarluni akiliinermi ernialersuineq

Kingusinaarlutit akiliiguit, taava suliffeqarfik pisinnaatitaavoq akiligassatit ernialersussallugit. Erniat pillugit inatsimmi allaqqavoq, illit atuisutut kingusinaarlutit akiliisimaguit saniatigut akiliisitaasinnaasutit.

Erniat ukimoortut, annertunerpaamik akilersinnaasatit, kingusinaarlutit akiliiguit, tassaapput Nationalbankip pisortatigoortumik aningaasanik atorniarnermi erniarititaa 1. januar aamma 1. juli ukioq taanna atuuttoq malillugu + tapiissut 7%-imik annertutigisoq. Erniat taamaattut taasarpaat morarente imaluunniit procesrente.

Nationalbankip pisortatigoortumik aningaasanik atorniarnermi erniarititaa nittartakkamini hjemmeside-ani takuneqarsinnaavoq. Julip aallaqqaataani 2019 Nationalbankip pisortatigoortumik aningaasanik atorniarnermi erniarititaa 0,005%-iuvoq. Taamaakkami kingusinaarluni akileeqqusinermi qummut killigititassaa tassaavoq 7,05% ukiumut.

Malittarisassaq taanna aamma atuutsinneqarpoq, suliffeqarfik peqatigalugu siusinnerusukkulluunniit isumaqatigiissuisiorsimagussi, qaffasinnerusumik ernialerlutik akiliisitaassasutit kingusinaarlutit akiliiniaruit. Isumaqatigiissut taamaattoq atuisoqarnermut pissutsinut naapertuutinngilaq. Soorlu assersuutigalugu imaassinnaavoq, suliffeqarfik faktura-mi allassimagaa, erniai qaammammut 2%-iusut.

Taamaattoq assigiinngitsunik pingasunik pisoqartillugu qaffasinnerusumik ernialersugaasinnaavutit:

  •  Ernianik qaffasinnerusunik akiliisareersimasuuguit, akiligassarsisimallutit, taava erniat qaffasinnerit akilissavatit
  •  Aningaaserivinnut kingusinaarlutit akiliiguit, atuuttussamik erniaqarsinnaavoq ernianut inatsimmi allaqqaneranut naleqqiullugit qaffasinnerusunik

Inatsisit aalajangersimaqqissaartut aalajangerpassuk, erniat qaffasinnerusut akilissagitit, taava inatsit aalajangersimaqqissaartut atuutsinneqassapput.

Saqqummersitanut assigusut

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit