Malittarisassat aamma akiupput uagutsinnut paasisinnaaqqullugu aalajangersinnaassallugu, pisiaq qanoq ilinerani naammanngittutut isigineqarsinnaanersoq, tamassumallu kingunerisaannik sunik pisinnaatitaaffeqarnerlutit.


Atuisartutut pisineq

Atuisartutut pisinermi malittarisassat taamaallaat atuupput illit inuttut privatiusutut inuussutissarsiutigalugu ingerlatsisumiit nioqqutissamik pisiguit. Soorlu assersuutigalugu atuisartutut pisisarputit, niuertarfimmut iseruit nioqqutissamillu angerlaatassarnik pisiguit.


Ajornerusumik inissisimanissaq isumaqatigiissutaasinnaanngilaq

Atuisartutut pisinermi isumaqatigiissusiortoqarsinnaanngilaq ima ajornerutigisunik allaat inatsimmi allaqqasunik ajornerusunik. Imatut paasineqassaaq, ukiut marluk minnerpaamik periarfissariuaannassavat naammagittaalliorsinnaanissannut, aammalu nioqqutissaq pisiat ajoquteqariataarpat tuniniaasup aaqqinniassagaa ilinnut aningaasartuutaanngitsumik. Malittarisassat aamma atuutsinneqarput nioqqutissanut atornikunut aammalu nioqqutissanut saqqummersitatut atorneqarsimasunut.


Siunnersuineq maalaarsinnaanerlu

Atuisartutut pisininni Atuisumi pisinnaatitaaffitit pillugit akeqanngitsumik siunnersortissinnaavutit. Aamma akeqanngitsumik naammagittaalliorsinnaavutit Atuisartoqarnermi Maalaaruteqarfimmut, pisinnaatitaaffitit malinneqanngippata.


Privatiulluni inuinnartut pisiat aammalu niuernikkut tunngaveqartumik pisiat

Inuttut privatitut pisiniaraangavit inummik privatiusumik allamik niueqateqartarputit, tamannalu privatimik pisinermik taasarpaat, imaluunniit innuttaasunut pisineq. Soorlu assersuutigalugu privatimik pisineruvoq, sanilerisat biilinik atornikunik pisiffigigukku, imaluunniit Facebook-ikkut nillartaartitsivimmik atornikumik pisiguit.

Inuussutissarsiortutut inuussutissarsiortoq alla niuerniaqatigigukku, taava tammana taasarpaat niuernikkut pisineq. Soorlu assersuutigalugu niuernikkut pisinerussaaq suliffinnut inissitassamik nioqqutissamik pisiguit, imaluunniit angallatersiguit inuussutissarsiutigalugu piniarnermut atugassarnik.

Assersuusiani marluusuni pisisarnermi inatsisit atuutsinneqarput, taamaallaat atuisartutut immikkut illersugaaneq minillugu. Atuisoq imaluunniit Atuisartoqarnermi maalaartarfik suliaqarsinnaanngilaq privatitut pisiaappata imaluunniit niuernikkut pisiaappata.

Pisisartut inatsisaat pisisarnermut taaneqartunut tunngasortaa isumaqatigiissusiornikkut avaqqutaarneqarsinnaavoq. Imatut paasineqassaaq, pisisartut inatsisaanni allassimasumiit allaanerusumik isumaqatigiissusiorsinnaagavit.

Soorlu assersuutigalugu immaassinnaavoq ukioq ataaseq naammagittaalliorsinnaatitaasoq imaluunniit naammagittaalliorsinnaatitaanngitsoq. Soorlu assersuutigalugu naliginnaasuuvoq inummit privatiusumit angallammik atornikumik pisiguit, isumaqatigiissusersiorsinnaavusi angallat pisiarinerani isikkua qanorlu issussaa naapertorlugu pisiarineqartoq aammalu naammagittaaliutaassanngitsoq.


Pisiat atuisartutut pisiaava imaluunniit inuinnartut privatitut pisiaava?

Nalornissutigisinnaavat, pisiat ilumut atuisartutut pisiaanersoq imaluunniit inuinnartut privatitut pisiaanersoq, soorlu assersuutigalugu nittartagakkut nioqqutissamik pisiguit naak suliffeqarfiuteqanngikkaluartoq. Soorlu assersuutigalugu biiliusinnaavoq pisiat allaanngilarlu biilileriffimmi privatiusumi pisiarigit.

Pisiat atuisartutut pisiaasinnaavoq taamaalillunilu pisisartut inatsisaat naapertorlugu illersugaallutit, tuniniaasoq nioqqutissiat aalajangersimaqqinnaartut arlaleriarluni tuniniarpagit. Soorlu assersuutigalugu biilinik iluarsaassisartuusinnaavoq, biilinik piseriarluni, iluarsaateriarlugit tuniniaqqillugit.

Tuniniaasoq inuussutissarsiuteqartutut isigineqarsinnaavoq, naak suliffeqarfia aliikkutaralugu sammisaasoq. Tuniniaasoq CVR-normoqartariaqanngilaq. Taamaattumik naggataatigut tigussaasumik naliliinerussaaq suna tamaat ilanngullugu nalilersuinermi aalajangiisooqataatillugit, takuniaraanni pisiat atuisartutut pisiaanersoq imaluunniit privatimik inuinnarmik pisiaanersoq.

Saqqummersitanut assigusut

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit