Soorlu imaassinnaavoq nioqqutissaq katassimagit imaluunniit kukkuneq pisisarnermut inatsimmi ilaatinneqanngitsoq.


Iluarsaannissaannut neqeroorummik piumavutit

Isumassarsialatsiaasinnaavoq iluarsaassisartunit arlalinnit neqeroorfigitikkuit. Inatsiseqanngilaq qanoq amerlatigisunut saaffiginnillutit neqeroorusiorfigineqarsinnaatitaanerlutit imaluunniit missingersuusiortitsisinnaanerlutit. Tamanna ingammik atuuppoq iluarsaassisussap piffissaajaatigalugu ilinnukartariaqassappat neqerooriartorluni. Apereqqaarniaruk neqeroorusiortitsineq akeqarnersoq. Akeqarpat taava iluarsaassissusap ilinnut nalunaarutigissavaa, suliaqalertinnani.

Nioqqutissamik tunniussereersimaguit iluarsartinniarlugu, taava iluarsaassisussaq nioqqutissaq suliarilersinnaanngilaa ilinnit akuersissummik pitinnani. Akuerineqaqqaarani suliaralugu aallartiinnarpagu, taava illit uppernarsartussaavat, siulliullutit saaffigisimagakku neqeroorummik piumaannarallarlutit. Taamaammat qulakkiissavat tunniussinermi allagartami allaqqassarpoq taamaallaat neqeroorummik piumagavit.

Tuniniaasup nioqqutissaq ilinnit akuersissummik pitinnani iluarsaatiinnarsimappagu, taava illit qinertariaqassavat, iluarsaassineq akueriinnarniarnerlugu imaluunniit naamik. Akuersiumanngikkuit taava assigiinngitsunik inerniliisoqarsinnaavoq apeqqutaalluni suna iluarsaanneqarsimanersoq qanorlu akeqarnersoq.

Ilaatigooriarluni iluarsaassisup nioqutissap tunniunneqarneratuut pitsaassusilerlugu uterteqqissinnaasarpaa. Taamaassimappat taava akiligassariinnassavat soorlu immaqa neqeroorummi isumaqatigiissutaasoq akiliinnarlugu. Iluarsaataq pitsaassusitoqqamut utertinneqarsinnaanngippat, taava imatut iluarsaavigineqarsinnaavoq, illit akuerineqarsinnaasumik akiliutigissagit naleqarnerulerneraluunniit. Soorlu imaassinnaavoq kingoraartissat nutaat nalingi atorneqartut.

Neqeroorut naliginnaasumik iluarsaassisumut pituttuivoq. Kisianni iluarsaassisoq nioqqutissap suliarinerata ingerlanerani aamma neqeroorummini qaffaasinnaavoq, takorloorneqarsinnaanngitsunik takkuttoqariartaartoqaraangat, tamakkualu eqqarsaatigalugit periarfissaqarsimanngikkuni malugissallugit naak sukumiisumik suliamillu tunngaveqarluartumik eqqortumillu misissoreeraluaraa.

Aamma imaassinnaavoq kukkunernik allanik nassaartoqartoq taakkualu allatut ajornartumik aamma iluarsaattariaqarlutik.

Illit aamma kukkuneq pillugu eqqunngitsunik imaluunniit amigartunik paasissutissiisimasinnaavutit, taamaalillunilu nioqqutissaq siullermeernerani misissorluarneqarsimanani. Iluarsaassiniartup takusinnaappagu akiusoq naapertuukkunaartoq, taava suliani unitseriarlugit attaveqarfigissavaatit. Taava illit aalajangissavat, akiusoq nutaaq akuerisinnaanerlugu imaluunniit iluarsaassineq unitsiinnassanerlugu.


Iluarsartuussinissaq pillugu missingersuummik piumavutit

Missingersuutip suliffeqarfimmut pituttuinera neqeroorummut naleqqiullugu assigiinngissuteqarpoq. Missingersuut nalilersuineruvoq – pineqartoq soorlu iluarsaatassaq misissoqqaarnagu takorluuinerulluni. Iluarsaassisup suliap ingerlanerani paasippagu akiusoq ilimagisamiit qaffasinnerungaatsiassasoq, taava illit attavigisariaqarpaatit akiusumullu nutaamut qaffasinnerusumut ilinnut akuersiteqqaartariaqarlugu, akiusormi nutaammat qaffasinnerullunilu. Taamaaliunngippat taava akiligassaq tamakkiisumik pissarsiarinngitsoorsinnaavaa.

Tamatigut ilinnut pitsaaqutaassaaq neqeroorutaasoq imaluunniit missingersuutaasoq allakkatigut tunniunneqarsinnaappat, taamaalilluni kingusinnerusukkut isumaqatigiinngissutaasariaqanngimmat suna isumaqatigiissutaasimanersoq. Iluarsartuussinerit annikinnerusut pineqartillugit taava amerlanertigut naammattarpoq soorlu assersuutigalugu aki isumaqatigiissutaasoq biilit tunniunneqarnerani allagartaasumut allattussallugu imaluunniit mail-ikkut nalunaarutigalugu. Iluarsartuussinissaq annertunerullunilu akisuneruppat, taava neqeroorummik sukumiisumik takutitsisumik qinusariaqassaatit, taannalu allakkatiguussaaq.

Akiusoq ilinnut nalunaarutigineqarpat, taava inerniutaasumik akiussaaq suulluunniit akitsuutaasussat ilaareertariaqarlutik. Illit aallaavittut isigalugu taamaallaat aki nalunaarutigineqartoq pisussaaffigivat akilissallugu.


Akiusussaq isumaqatigiissutaannginnami?

Sioqqutsisumik isumaqatigiissimanngikkussi qanoq akeqassanersoq, taava iluarsaassisup akigititaa akilertariaqassavat, imaassimanngippat akiusoq suliamut naleqqiullugu pissusissamisuunngitsutut isigineqarsinnaalluni. Akimik qaffasinnerpaaffissamik isumaqatigiissimagussi, taava taanna akiusoq naliginnaasumik qaangeqqusaanngilaq.

Iluarsaassisup naliginnaasumik isigalugu nioqqutissaq ima akisutigisumik iluarsaateqqusaanngilaa allaat iluarsaannerata nalaanni nalinga qaangeqqusaanani.

Fjernsynitoqaq annerpaamik 1.000 kr. nalilik, imaalitsiaannaq iluarsaateqqusaanngilaq soorlu assersuutigalugu 1-500 kr.-inik akeqartillugu. Soorunami illit nammineq kissaatigigukku iluarsaassineq suliaritissinnaavat qanorluunniit akeqassappat. Taamaallaat iluarsaassisup tamatuminnga ilisimatittussaavaatit aammalu ilinniit akuersissummik peqqaartariaqarluni suliap aallartinnginerani.


Nioqqutissap tunniussimallugu uppernarsaammik piumagit

Nioqqutissamik iluarsaatassamik tunniussigaangavit, taava uppernarsaammik pissarsigit takutissinnaallugu ilumut iluarsaassisumiittoq pigisat.

Tunniussinermi uppernarsaatip ilaatigut qulakkeertussaavaa, nioqqutissaq eqqortoq tigoqqittussaagakku iluarsarlugu naammassereerpat, aamma kingusinnerusukkut assortuussutaassaanngimmat tammarsimappat, tillinniartoqarsimappat assigisaannilluunniit pisoqarsimappat.

Nioqqutissap tunniussimallugu uppernarsaammik pereeruit, taava iluarsaassisup nioqqutissaq tunniunnaveersaarsinnaavaa, tunniussinermi uppernarsaat tammarsimappat, imaassimassanngippat illit allatut uppernarsarsinnaagit ilumut illit nioqqutissaatigigit.

Tamatigut isumassarsialatsiaassaaq atit, najukkat oqarasuaatillu nalunaarutigisarukku, nioqqutissamik iluarsaatassamik tunniussigaangavit. Taamaalilluni iluarsaasisussaq periarfissinneqassaaq attavigisinnaallutit ajornartorsiutinik takkuttoqassappat.

Tunniussinermi uppernarsaammi aamma allassimasinnaavoq sunarpiaq kukkunerunersoq aamma qanoq ilinerani naammassillugu iluarsineqareersimassanersoq. Eqqaamajuk akia, akimik tunniussisoqarsimappat imaluunniit qaffasinnerpaamik akiusussamik isumaqatigiittoqarsimappat.


Akiliineq, ernialersuineq aammalu akiitsut nukingisaarutit

Allatut isumaqatigiissuteqarsimanngikkussi, taava iluarsartuussineq akilissavat naammassiniariarpat. Tamanna piviusumik isigalugu imatut paasineqassaaq, nioqqutissaq iluarsaassisarfimmut aagukku, imaluunniit angerlarsimaffinni iluarsaasisartumik pulaarneqaleruit.

Kingusinnerpaamik akiliiffissamik isumaqatigiissuteqarussi, taava malittarisassaqanngilaq qanoq takitigissanersoq. Killigititaasoq taamaallaat akuersaaruminartuussaaq, aningaaserivimmut allakkerisarfimmulluunniit angumersiniassagavit.

Kingusinaarlutit akiliiguit, taava iluarsaassisup erniat pillugit inatsisit naapertorlugit tuavissaarutinik akitsuisinnaavoq.


Nioqqutissaq tammarpoq imaluunniit ajoquserpoq imaluunniit tillitsippoq

Nioqqutissaq aserorpat imaluunniit tammarpat iluarsaassisartumiitillugu taava aallaaviattut isigalugu suliffeqarfimmiit taarsiivigitissaatit.

Siullermik illit uppernarsassavat, nioqqutissaq ilinnut tunniunneqarsimanngimat, imaluunniit ajoqusersimammat, iluarsaassisarfimmiitillugu.

Tamanna uppernarsarsinnaavat soorlu assersuutigalugu tunniussinermut allagartaq takutillugu.

Iluarsaassisoq suli isumaqarsimappat nammineq taarsiivigitinnissannut akisussaanani, taava uppernarsartussaavaa nioqqutissap tammarnerani ajoquserneraniluunniit pisuusinnaanani taamatuttaarlu sulisui pisuunngitsut uppernarsassavaa.

Uppernarsaasinnaanngippat taava illit taarsiivigitissaatit. Tamanna soorlu assersuutigalugu pisinnaavoq cykelinik iluarsaassisartup cykelit paarnaarsimanngipagit imaluunniit gultinik saffiortoq assammioq diamantitalik aallakkanut naliginnaasunut nassiuppagu allakkanut nalillimmut nassiuttussaagaluarlugit. Illuatungaani uppernarsarsinnaappagu toqqorsivimmini tillinniartoqarsimasoq naak suna tamaat parnaaqqatissimallugu taava taarsiivigitissanngilatit.

Nioqqutissat tillitsissappat iluarsaassisumiitillugu, taava naliginnaasumik illit ilaqutariittut sillimaserninniit akilerneqassaaq.

Nioqqutissaq annertuumik ajoquserpat imaluunniit tammarpat iluarsaanneqarnerata nalaanni, taava iluarsaanneqarnerata nalaanni nalinga atorneqassaaq imaanngitsoq – soorlu sillimmasiisarfiit ileqqorisaraat – nutaatut nalilerlugu.


Nioqqutissaq aanngikkukku

Nioqqutissaq aanngikkukku taava iluarsaassisup pisussaaffigaa toqqissimanartumik paarissallugu sivisunerusumik, aamma pisussaaffigaa attaveqarfigissallutit, periarfissaqarpat, nioqqutissaatit ilinniit aatinniarlugu.

Nioqqutissaatit naatsorsuutigisamiit aanngikkukku soorlu piffisaq akuerineqarsinnaasup iluani iluarsaassinerlu naammassereersoq, taava iluarsaassisup akuerineqarsinnaasumik akilertariaqassavat paarineqarneranut tunngatillugu. Tamanna ingammik atuuppoq iluarsaatat angissutsimikkut annertuppata soorlu assersuutigalugu cykelit imaluunniit nioqqutissat immikkut paarisariallit eqqarsaatigalugit.

Piffissaq sivisulaartoq ingerlareerpat, tamannalu naliginnaasumik minnerpaamillu ukiup ataatsip iluani pisimappat, taava iluarsaassisartup nioqqutissaq annertunerpaamik nalilerlugu akiginiarsinnaavaa. Taamaalilluni nammineq aningaasartuutini matussusersinnaavai. Oorit sinneqartoorpata taava pisisartup pigissavai, takkuteqqissappat. Nioqqutissaq naleqanngivippat tunineqarsinnaananilu taava iluarsaassisartup aserortersinnaavaa.


Iluarsartuussinermi ajornartorsiortoqartillugu

Iluarsartuussineq naammaginngikkukku taava akiliutigisimasatit uterteqqusinnaavatit iluarsaassisartumik allamik naassaarniarlutit, taannami immaqa ajunnginnerusumik iluarsaassisinnaammat.

Ajoqutaasoq takkuttaqattaalissappat, aammalu iluarsaassisartup aaqqiffissaqartinngippagu, taava naligiinnaasumik isigalugu aningaasaatitit utertissinnaavatit. Taamaattoq maluginiassavat ilaannikkooriarluni taamaallaat ajoqutaasoq takkuttarpat taava suliffeqarfimmut ajornakusoorsinnaavoq ajornartorsiut nassaarissallugu, taamaammat pisariaqarsinnaasarpoq arlaleriarluni iluarseriartariaqartoq.

Naammaginngikkukku taava iluarsaassisartumut naammagittaalliutigisinnaavat. Iluarsaassisartoq piffissamik tunineqartariaqarpoq iluarsaatassap aaqqinnissaannut. Iluarsaassisartup piffissamik naammalluartup iluani iluarsagassaq naammassisimanngippagu taava aallaavittut isigalugu isumaqatigiissut taamaatiinarsinnaavat akiliinnak, iluarsaassineq ilinnut naleqanngippat. Iluarsaassineq ilaatigoortumik ilinnut naleqarpat taava ilaatigooriarlutit akilertariaqartarpat.


Iluarsaassineq akisunerulerpoq

Iluarsaassisartup takussinnaappagu aki isumaqatigiissutaasimasoq naapertuutinngitsoq, taava suliaminnik unititseriarluni attavigisariaqassavaatit. Illit taava aalajangersinnaavat iluarsaannera ingerlatiinnarniarnerit.


Iluarsaassineq sivitsorpoq

Nioqqutissaq iluarsaataq ullormik aalajangersimasumik aatinnissaannut isumaqatigiittareeraluarlusi, taava naliginnaasumik isigalugu akuerisariaqarpat, iluarsartuussineq
ilaatigut kinguarsinnaammat. Tamanna ingammik atuuppoq, kingoraartissanik pissarsiniarneq pisariuallaarpat, imaluunniit nalliuteqqittartumik ajoquteqarpat.


Iluarsartuussineq unitsippat

Utaqqeqqikkusunngikkuit taava nioqqutissaatit tigoqqikkumasinnaavat, una pissutiginerullugu iluarsaassisartup arlaleriarluni misiliisaraluarluni iluatsissimanngippagu, imaluunniit iluarsaassineq akuerineqarsinnaanngitsumik sivisuallaarpat, tamatumallu inernerisaannik ajornartorsiutaalerluni akiliisoqassanersoq imaluunniit qanoq annertugisumik akiliisoqassanersoq.

Kinguartooqqasimaneq sivitsortoorsimappat aammalu nioqqutissap inernissaa arlaleriarluni neriorsuutaasimagaluarpat naammassissasoq, taava allakkanik nukingisaarutinik nassitsisinnaavutit piffissalereerlugu – iluarsaassisartoq piumasaqaammik tunillugu. Piffissamik killigititaasoq qaangiutereerpat taava nioqqutissaatit tigujumassavat.

Tamanna pissusissamisoorpat aammalu naleqquttumik pissuteqarpat, suliaq unitsissagit, taava iluarsaassisartup taamaallaat akileqqusinnaavaa suliareriikkani, tamannalu naleqarpat, soorlu assersuutigalugu kingoraartissaappata nutaat.

Suliaq naleqanngippat taava akileeqqusisinnaanngilaq. Pisinnaatitaaffiginagu suliamik unitsitsiguit taava aallaavittut isigalugu iluarsartuussinermi isumaqatigiissutaasoq akilissavat.

Taammaatoq iluarsartuussisup sipaakkani ilanngaatigissavai suliap suliarineqanngitsoornera pissutigalugu. Soorlu assersuutigalugu kingoraartissanut aningaasartuutaasinnaapput, pisiarineqanngitsut imaluunniit ikkussorneqarsimanngitsut.


Iluarsartuussinerup kingorna atortumi nassaarineqarput kukkunerit nutaat

Atortumi ilaatigooriarluni kukkunernik nutaanik nassaartoqartarsinnaasarpoq, naak suliariteqqammeraluartoq. Taava suliarinerani aningaasartuutit ima qaffatsigilerput, allaat illit kissaatigiunnaarlugu iluarsaanneqassasoq. Iluarsaassineq siulleq taamaalilluni ilinnut naleeruttussaavoq. Taamatut pisoqartillugu iluarsakkap akilernissaa akueriumanagu nalunaarsinnaavutit, kukkunerit siulliit iluarsaartuussinermit siullermeersuuppata, imaluunniit iluarsaassisartup alapernaannerulluni malugisinnaasariaqarsimappagu iluarsartuussinissaq siullermeerutaasumiit annertunerussasoq. Taava aallaqqaammut neqeroorusiorsimassagaluarpoq, katillugit iluarsartuussinissamut aningaasartuutinut naapertuuttumik, imaluunniit iluarsartuussinissaq tamakkiisumik nangaasaarutigisimassallugu. Iluarsaassisartoq suliamik tunngaveqartumik eqqortumik suliaqarsimappat aammalu ajunngitsumik isigalugu takorlooruminaassimappat immikkut ittumik saniatigut aningaasartuuteqarumaartoq, taava annaasaqaatit illit nammineq nammattariaqassavat.


Iluarsaassinerit pillugit naammagittaalliorsinnaatitaaneq

Iluarsaassinerit pineqartillugit, taava aalajangersimasumik inatsiseqanngilaq soorlu nutaamik nioqqutissamik pisigaangavit, tamatumanilu atuisup naammagittaalliortitaasinnaanera inatsisikkut tunngavissaqanngilaq. Inatsimmi aamma piffissamik aalajangersimasumik taasisoqanngilaq, iluarsagaq qanoq sivisutigisumik ataannassanersoq. Iluarsartuussisartut ilai qularnaveeqqusiissummik tunisisarput imaluunniit naammagittaalliorsinnaatitaaneq piffissami aalajangersimasumi soorlu assersuutigalugu ukioq ataaseq.

Iluarsaassinerit inatsimmut pisoqalisoornermut tunngasutigut ilaatitaapput, tunngaviatigut periarfissinneqarlutit ukiut tallimat tungaannut naammagittaalliorsinnaatitaallutit. Taamaattoq piffissaq akuerineqarsinnaasup iluani naammagittaalliortariaqarputit, kukkuneq nassaarisareerlugu, taamaanngippat uninngaannarnani piumasaqaatit annaassavat. Taammattoq illit uppernarsassavat iluarsartuussineq iluamik suliarineqarsimanngippat, imaluunniit kukkuneq nutaaq pilersimasoq iluarsartuussineq pissutigalugu.

Piffissaq ingerlaartillugu aammalu nioqqutissaq pisoqaliartortillugu taava ajornakusoornerulissaaq tamassumap ataqatigiinnera uppernarsassallugu.


Iluarsaassisartoq iluarsaassinermut qularnaveeqqusiiva

Qularnaveeqqusiinermik tunniussisoqareeraangat, taava qularnaveeqqusisup, uppernarsartussaavaa, isumaqarpat kukkuneq uparuakkat qularnveeqqusiinermi ilaanngippat.

Saqqummersitanut assigusut

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit