•  Imatut pisarisarpaatit
  •  Pisartinnaveersaarit
  •  Facebook-imi unammisitsinerit immikkut sammillugit
  •  Pisartagaqarumanani pisaritittoornermi – suna pisinnaatitaaffigaajuk?
  •  Pisartagaqarneq aammalu e-mail-it kissaatiginagit takkuttuartut pillugit maalaarutit

Nittartakkatigut unammeqataatillutit, akeqanngitsumik poortukkamik misilitassannik imaluunniit spørgeskema immersorukku, qujassutitullu tunissutimik pinnakkuit, taava naqinnerit mikinerit tamatigut atuartakkit.

Mianersuutigilluinnassavat soorlu assersuutigalugu assartornertaa nammineq akilissagukku imaluunniit annikitsumik takussutissaannarmik akiuliteqassaguit, taava akiliuteqarnermut kortippit paasissutissartai tunniutissavatit.

Naqinnernik mikisunik allaqqasut atuarluanngikkukkit, pisartagaqartinneqalissaatit imaluunniit mailboks-it ussassaaruterpassuarnik ulikkaartoorlugu (spam). Nammineq sianiginagu pisartagaqalertoorsimasinnaavutit, taamaalilluni qaammatit tulleriiaarlugit koruunit hunnorujukkuutaat kontoniit peerneqaqattaalerlutik, aningaasallu tigoqqeriaannaanatik. Pisartagaqalernerit imaassinnaavoq pinngorsimasoq nittartakkamut atuinermut akiulitaasoq, naak nittartakkami qupperneq taanna takusarnagu nalullugulu pisartagarilersimagit.

Aamma ajutoorfigisinnaavat, akuersissummik tunisillutit, taamaalilluni suliffeqarfik namminerminiit ussassaarutinik nassitsiffigiinnarnak aamma suliffeqarfiit allat suleqatigisai aningaasalersuisuilu ilanngutsinneqarsinnaammata.


Imatut pisarisarpaatit

Pisartagaqaleriataarnermut spam-imullu uukapaatitaanissat annertunerpaamik inuit nittartakkatigut tusagassiuutitigut ingerlatani aamma ussassaarutikkut naapikulanerpaasinnaasarpatit. Takuinnarlugu uppernarpaserialuni, imaassinnaavoq akuersaartinniaannarlutit pisartagaqalersinniaraatit imaluunniit elektronikkikkut ussassaarutinut angertinniarlutit.

Inuit tunulequtaasut amerlanertigut makkua sakkugalugit pisariniartarpaatit:

  • Tuniniagaq akeqanngitsumik nittarsaallugu
  •  Tuniniagaq akikillerujussuarlugu ussassaarutigalugu
  •  Oqaluttuuttarpaatigut kammappassuagut aamma tuniniagaq pigisimagaat
  •  Allattarpaat neqeroorut ullumikkuinnaq atuuttoq, soorlu assersuutigalugu ”tuaviorlutit una pisiaripallaguk” imaluunniit ”ukuninnga taamaallaat 100-juuteqarpugut”
  •  Suliffeqarfiit ilisimaneqarluartut nittarsaassinermini atortarpaat uppernassusertik takutikkumallugu. Assersuutigiinnarlugu unamminermi eqqugassaq tassaasinnaammat suliffeqarfiit arlaat ilisimaneqarluartup nioqqutissaataa tusaamasaataalluartoq. Assersuutigalugu eqqugassaq tassaasinnaavoq smartphone nutaanerpaaq piumaneqarnerpaarlu.


Pisaritinnaveersaarit

Pisaritinnaveersaarlutit iliuuseqangaatsiarsinnaavutit:

  •  Imminut aperigit

    Ajunngippallaarpa ilumuussappat? Suliffeqarfik qanormi pissarsissava uannut taamatut akisutigisumik tunissuteqarniarunik?

  •  Naammassiniagassat piumasarineqartullu atuakkit

    Soorlu allaqqasinnaavoq imatut, nittartakkakkut unammeqataassaguit imaluunniit poortugaq tunissutiginiagaat akeqanngitsumik pissagukku taava akuereqqaartariaqarit suliffeqarfiup attavigissagaatit ussassaarutit mail-ikkoortut atorlugit imaluunniit oqarasuaatikkut sianerfigalutit. Imminut aperigit ilumut perusunnerlugu.

  •  Akileeqqusisunut immikkut sissuerit

    Suliffeqarfiit pisartagaqartinniarlutit ilinnut pisarinninniarsarisut soorlu assersuutigalugu allassinnaapput nioqqutigisaq akeqanngitsoq, taamaallaallu immersugassaq immersussagit nioqqutissiap ilinnut nassiunnissaa 39 koruuneqarmat, taamaalillutit imersuillutit allattussanngorpat sumi najugaqarnerlutit, akiliinissannut paasissutissat il.il. Soorlu assersuutigiinnarlugu angallanertaa nammineq akilissagukku, imaluunniit suunngitsunnguamik akiliissaguit, taava nittartakkami qupperneq misissorluaruk arlaatigut allassimasinnaannginnersoq ilumut pisartagaqalersutit. Akiliinermut paasissutissatit paarilluaannassavatit mianersuullugit, nalugukku ilumut susinerlutit. Tigusisussaq uteqattaartumik oorinik ilanngaavigilissavaatit naassaanngitsumik.

  •  Inuttut paasissutissat atornerqarsinnaapput aamma atornerlunneqarsinnaapput

    Mail-ikkut najukkat spam-inut ammaassisuuvoq, najukkat paasigunikku taava poortukkanik pajuttuilissapput, allakkanik akiligassanillu, soqutigisatillu atuisartutullu atueriaatsit toqqaannartumik ussassaarutigilissavaat.

  •  Immersugassami X-lerneqareersimasut misissukkit

    Imaassinnaavoq angertutit mail-ikkut ussassaarutinik piumallutik imaluunniit suliffeqarfiup paasissutissartatit suleqaterpassuarminut aningaasaliisuminullu tunniussinnaagai, taamaalillutik mail-ikkut ussassaarfigineqalissaatit.

  •  Misissoruk nittartakkami kikkut tunulequtaanersut

    Uani misissorsinnaavat https://www.whois.com/whois/. Nittartakkap atia hjemside-ata suliffiata atia immersorukku. Aamma ilumut suliffeqarfik ilumoornersoq uani takusinnaavat: CVR-registret.

  • Mail-imik allamik adresselimmik pilersitsisinnaavutit

    Mail nutaaq sillimmatigisinnaavat, spam-inik takkuttoqariataarnissaa siooranginngikkukku. Taamaalillutit mail ussassaarutit piumanngisatit mailboks-innut privatiusumut nakkartassanngillat.

  • Qarasaasiami saqqummisoq assiliuk (screenshot)

    Pasitsaassimassaguit neqeroorut ajunngippallaartoq ilumoorpasiganilu, taava ilumoorsimassaaq. Taamaakkaluartoq peqataaniarut, taava qupperneq assiliuk (screenshot). Aamma anillatsissinnaavat imaluunniit assilillugu, taamaallaaliuna uppernarsarsinnaasariaqarit, qanoq isikkoqarniarnersoq. Tamannami suliassanngortitsinermi ilinnut nukittoqqutaasinnaammat.

  •  Spamfilter-imik pitsaasumik pissarsigit

    Links-it toornaveersaakkit ussassaarutinik mail-ersigaangavit, imaluunniit suli ajunnginnerussaaq ammarnaveersaarukkit – ingerlaannartumik piaakkit – akinagit.

  •  Aningaaserivimmi konto akuttunngitsumik misissoruk

    Akulikitsumik– tamatiguunngikkaluartumik - pisaartagarisatit qaammatikkaartumik takkuteriataartassapput 299 kr. peerneqarsimalluni, 399 kr. imaluunniit 499 kr.


Facebook-imi unammisitsinerit immikkut sammilaarlugit

Atuisoq siunnersuutinik katersuisimavoq, takutinniarlugu ilinnut facebookimi qupperneq ilumoornersoq imaluunniit ilumuunnginnersoq.

  • Facebooki-imi profil-itaani una alakkaruk ”om”. Taanna imaqanngippat, taava takussutissaasinnaavoq, profil ilumuungitsuusoq
  •  Takujuk profil-ip ”allaffissartaani” akerliusunik allattoqarsimanersoq
  •  Profilip ”allattorfiani” allassimasut pisoqaappata, imaluunniit ullumernisaaginnarpata, taava profil-ip piginnittua akerliullutik allassimasut piiarsimasinnaavai, allassimasut tupigusullutik ajugaasimasumik amigaateqarsimasinnaammata
  •  Ilisarnaammik tungujortumik (blåt flueben) quppernermi profil-imiluunniit takuguit, imatut isumaqarpoq, facebook-ip uppernarsaraa qupperneq ilumoortuusoq imaluunniit profil-imiittoq pisortatigoortumik ilumut taannaasoq, tusagassiornermik suliffeqarfiusoq imaluunniit nioqqutissap ilisarnaatigigaa.
  •  Ilisarnaammik qasertumik (gråt flueben) quppernermi profil-imiluunniit takuguit, imatut isumaqarpoq, facebook-ip uppernarsaraa, qupperneq ilumoortuusoq suliffeqarfillu tassani pineqartoq imalunniit suliniaqatigiiffik taannaasoq

    Ilisarnaammik qasertumik (gråt flueben) takussutissaqanngippat imaanngilaq qupperneq ilumuunngitsoq


Pisartagaqarniarluni pisartikkaanni – suna pisinnaatitaaffigaajuk?

Isumaqatigiissut malillugu ersariffaarissumik paasinartumillu, isumaqatigiissummut pituttugaalaartutit, taannalu aningaasanik naleqarpat, taava isumaqatigiissumut pituttugaanngilatit.

Pisartagaqarluni nalusamik pituttuisut tamanna pissutigalugu inerteqqutaapput. Taammaattoq pisariuvoq piffissaajarnarlunilu.

Pisartagaqarumanani pituttuisoorsimagaanni anillaffigisariaqarpoq

  •  Suliffeqarfik pineqartoq attavigiuk siullermik, illit nalusarnik konto-niik aningaasanik peersitsisoqartarpat, isumaqatigiissutaasumiit annerulluni. Nalunaarutigiuk isumaqannginnavit isumaqatigiissuteqarsimallusi, isumaqatigiissut atoqqussaanngitsoq, aammalu aningaasaatitit utertikkumagakkit. Neqeroorut akuerisimasat takujumajuk. Suliffeqarfiup uppernarsartussaavaa illit isumaqatigiissusiorfigisimagitit, taannaammat akiligassatut regningiliarisaat.

  •  Uppernarsaatit eqqaamakkit: Suliffeqarfik attaviginialerukku tamatigut allakkatigut attavigiuk. Mail allagarlunniit suliffeqarfimmut nassiussat muminga toqqoruk. Uppernarsaaniarninni atorumaarpat, isumaqatigiissummiit anillanneq ajuleruit. Suliffeqarfik mails-iutitit aammalu allakkatit qisuariarfiginngippagit, taava allakkat tammatsaalisatut nassiussat atukkit.

  •  Isumaqatigiissut peqqissimissutigisinnaavat: Suliffeqarfik atuuttumik isumaqatigiissuteqarfigisimagukku, tamannalu kisianni peqqissimissutigalugu, taava ullut 14-it periarfissarivatit peqqissimissutiginissaannut, pisartagaqarnerit nittartakkakkut isumaqatigiissusiorfigisimagukku.

    Suliffeqarfimmut nalunaarit, peqqissimissuteqarsinnaanerit atorumagullu kissaateqartutit.

  • Aningaaserivinnut nalunaaruteqarit: Suliffeqarfillu isumaqatigiissinnaanngikkussi isumaqatigiissuteqarsimanerlusi, taava aningaaserivinnut saaffiginnissinnaavutit. Akuerisinnaasatit sipporlugit aningaasanik tigusisoqarsimappat nioqqutissaq ilinnut nassiunniarlugu, taava aningaaserivik naliginnaasumik aningaasat ilinnut utertittussaavai. Aningaaserivik taamaaliorumanngippat, Atuisartoqarnermut Unammilleqatigiinnermullu Aqutsisoqarfimmut naammagittaalliorsinnaavutit.


Pisartagaqarneq pillugu naammagittaalliutit

Suliffeqarfik nammagittaalliutiginiagaq Nunatsinni angerlarsimaffeqarpat taava Atuisartoqarnermut Unammilleqatigiinnermullu Aqutsisoqarfimmut naammagittaalliorsinnaavutit

Atuisartoqarnermut Unammilleqatigiinnermullu Aqutsisoqarfimmut ilaannikkooriarluni aamma suliffeqarfimmut Nunatta avataanersumut naammagittaalliuut suliarisinnaasarpaa. Tamanna tigussaasumik suliassamiit suliassamut nalilerneqartassaaq.

Danskit suliffeqarfiutaat pineqarpat, aningaasallu pineqartut katillugit 1.050 kroner-iniit amerlaneruppata, taava toqqaannartumik attaveqaat online atorlugu uunga naammagittaalliorsinnaavutit: Center for Klageløsning i Danmark.

Nunani allani nittartagaasuni niuertaruit taava sissuertariaqassaatit, tamanna akisoorujussuusinnaavoq aammalu pisariusinnaalluni suliffeqarfik pineqartoq nunani allaniippat, aammalu amerlasuutigut tuluit oqaasii atorlugit ingerlanneqartariaqarluni.

Malugilissagukku, suliffeqarfiup salloqittarlutit unammillernerit, poortukkat misiliutissaat assigisaalu atornerlunnerai, taava Atuisoq taassuminnga ilisimatissinnaavat. Konto-nniit aningaasanik tigusisoqarsimappat – imaluunniit akiligassanik nassitsivigineqaruit – pisartagaqartinniarlutit uffa isumaqatigiissutaanngitsoq, taava Atuisumi aamma periarfissaqarputit siunnersortissallutit.

Saqqummersitanut assigusut

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit