Nioqqutissamik pisigaangavit, taava pisinnaatitaaffigivat pisinermi uppernarsaammik tunineqarsinnaatitaagavit, soorlu Pisinermut uppernarsaat. Suliffeqarfiup pisinermi uppernarsaat tunniunnaveersaaqqusaanngilaa. Pisiarluunniit quersuarmiit tuniniagaappat aamma pisinermi uppernarsaateqartussaavoq. Pisinermi uppernarsaatit tamatigut toqqortarissavat minnerpaamik ukiuni marlunni, pisinnaatitaaffitit atuutsinniarukkit.

Pisinermut uppernarsaammi imaluunniit akilikkat uppernarsaataani sapinngisamik imatut allaqqasussaavoq:

  • Nioqqutip taaguutaa imaluunniit suussusia
  •  Akia
  •  Ulloq pisiffik
  •  Niuertarfiup atia
  •  Isumaqatigiissutit tamalaat, soorlu, nioqqutissap pisiarinera peqqissimissutigisinnaavat
  •  Pisinermut uppernarsaat ukiuni marlunni toqqortarissavat, nioqqutissaq pillugu naammagittaalliortitaasinnaagavit.

Nioqqutissap ajoqutai amigaatillu pillugit naammagittaallioruit, taava tuniniaasup pisinnaatitaaffigivaa uppernarsaammik takujumassalluni, nioqqutissaq pineqartoq ilumut pisiniarfimmit tassani pisiaasoq takujumallugu, qanga pisimanersoq, aammalu qanoq akilersimanerit. Tamanna aamma atuuppoq, isumaqatigiissuteqarsimaguit ullut arfineq-pingasut qaangiutsinnagit pisiat peqqissimissutigisinnaallugu. Tamatumani pisinermi uppernarsaat illit uppernarsaatigissavat, peqqissimissutigigakku piffissaritaasup iluani pisiarisimagakku.


Nioqqutit akilersorlugit pisiat aammalu ingerlaavartumik tunniussinerit

Nioqqutissiaq akilersorlugu pisiarisimagukku, imaluunniit ingerlaavartumik tunniussinikkut pisimagukku, soorlu pisartagaqarlutit, taava pisinermi uppernarsaatit minnerpaamik ukiuni tallimani toqqortariaqarpatit. Pisinerit taamaattut inatsimmut pisoqalisoornissamut tunngatinneqarput, piumasaqaallu atsaat ukiut tallimat qaangiukkaangata pisoqalisoortarput.

Tuniniaasup oqaatigippagu, akilersukkatit imaluunniit ingerlaavartumik tigusartakkatit akilertarsimanngikkitit, taava illit uppernarsarsinnaasariaqarpat, tamanna ilumoortuusoq. Pisinermi uppernarsaatitit toqqortorsimanngikkukkit, taava imaariataarsinnaavoq akileeqqittariaqartutit.


Nioqqutip qularnaveeqqusigaanera

Qularnaveeqqusigaasimaguit, taannalu ukiut marluk sinnerlugit atuutsinneqarpat, taava pisinermut uppernarsaat aammalu qularnaveeqqusiinermut uppernarsaat toqqortarissavat, nioqqutigisap qularnaveeqqusigaatillugu.

Qularnaveeqqusigaanerup uppernarsaataani allaqqasussaavoq suna qularnaveeqqusiinermut ilaatinneqarnersoq, aammalu qaqugukkut atorunnaarsitaassanersoq. Aamma allaqqasussaavoq qularnaveeqqusiineq kimut tunniunneqarsimanersoq.

Qularnaveeqqut toqqortissavat, qularnaveeqqut piffisatigut atuutsillugu.


Pisinermut uppernarsaat imaluunniit akilikkat uppernarsaataa tammarsimappat

Pisinermut uppernarsaat imaluunniit akilikkat uppernarsaataa nassaarisinnaanngikkukku, taava imaassinnaavoq pisisimanerit allatigut uppernarsarsinnaagit. Soorlu akiliuteqarninni Dankort atorsimasinnaavat, aningaaserivimmiit kontop allattorsimaffiatigut imaluunniit mobilimik akiliisimatillutit susoqarsimaneranik allattorsimaffik atorsinnaalluni.

Uppernarsaatit taamaattut taamaallaat atoqqusaapput, pisinermi nioqqutissiaq taannaqqissaaq pisiarisimagukku. Arlalinnik pisisimaguit uppernarsarsinnaanngilat nioqqutit ataasiakkaat qanoq akeqarsimanersut. Uppernarsaatit allat aamma tassaasinnaapput nioqqutigisap taarseqqqusaaneranik


Pisinermut uppernarsaatit atuarneqarsinnaanngitsut

Pisinermi uppernarsaatit ilaatigut atuarneqarsinnaajunnaartarput, imaluunniit arlaatigut atuaruminaallisarpoq. Tamanna pappiliap pitsaassusaaneersuuvoq aamma naqinnerit naqitsissutaata periusaaneersuuvoq.

Pisiniarfiup akisussaaffigaa pisinermut allagartap minnerpaamik ukiunik marlunni atuuffeqassasoq, kisianni ilinnut ajornakusoorsinnaavoq uppernarsassallugu nioqqutigisaq sorleq pineqarnersoq pisinermut uppernarsaat atuarneqarsinnaajunnaarsimappat.

Akisuumik nioqqutissamik pisingaangavit, taava naatsorsuutigineqarsinnaavoq nioqqutissiaq sivisunerusumik atorsinnaassasoq, taava pisinermik uppernarsaammik naliginnaarmik pappiliami sanaamik piumasinnaavutit, imaluunniit pisinermut uppernarsaat kopeersinnaavat. Tamanna kingusinnerusukkut iluaqutigerujussuat.

Aamma isumassarsialatsiaasinnaavoq pisinermut uppernarsaat assilillugu. Digital-imik kopiigaq original-iatut uppernarsaatitut atorsinnaavoq.

Saqqummersitanut assigusut

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit