Taamatut pisoqartillugu immikkut malittarisassaqarpoq, kiap uppernarsartussaaneraa, pisisartut inatsisaat naapertorluguluunniit amigaateqarsimappat.

Aallaavittut isigalugu illit atuisartutut uppernarsartussaavat, nioqqutissaq pisisarnermut inatsit naapertorlugu amigaateqartoq. Qaammatini siullerni arfinilinni nioqqutissap tigoreerneratigut taava taamaassorisat malittarisassartai atuutsinneqassapput.

Tamanna qulaajarneqassaaq:

  •  Ilumut nioqqutissaq akornuteqavippa
  •  Nioqqutissap ajoqutaa, tassaasimasinnaava nioqqutissaq aallaqqaammut ajoquteqareersoq
  •  Nioqqutissaq isumaqatigiissutit naapertorlugit isikkoqarpat


Uppernarsaatitaanermut malittarisassat:

Qaammatit 0-6: taamaassorisamut malittarisassaq atuuppoq

Qaammatit 6-24: Atuisartup uppernarsartussaavaa kukkuneq maalaarutigineqartoq tassaasoq niooqutissap tunniunneqarnermi nalaanni kukkusaasoq


Qaammatit 0-6: taamaassorisamut malittarisassaq

Kukkuneq imaluunniit amigaataasoq qaammatit siulliit arfinillit iluani tiguneqarneraniit takkutissappat, taava pisisarnermut inatsisaasoq naapertorlugu ”ilimagineqarsinnaavoq”, kukkuneq amigaataasorluunniit nioqqutissap pisiarinerani atuisumullu tunniunneratigut tassaneereersimassasoq.

Tamanna taaneqartarpoq ”ilimagisamik malittarisassaq”. Illit atuisutit uppernarsaatissaqanngilatit, taamaallaat takutissavat nioqqutissaq kukkuneqartoq imaluunniit amigaateqartoq, tamannalu massakkut naammagittaalliutigigit.


Tuniniaasoq nioqqutissaq misissorpaa

Naammagittaallioruit, taava tuniniaasup nioqqutissaq misissussavaa, tamatumanilu takusinnaaguniguk, illit nammineq pisuussutigigit, taava assersuutigalugu iluarsartinnaveersarsinnaava, illit nammineq akilernianngikkukku. Soorlu imaassinnaavoq assilivik sioqqanik pulaffigitissimasoq, qarasaasiaq colamik kuerarneqarsimasoq, imaluunniit sarfamut immiutaa sippulimmik atorneqarsimasoq.

Tuniniaasup taamaallaat naammagittaalliuutit itigartissinnaavaa, ersarilluinnarpat imaluunniit ilimanarluinnarpat, nioqqutissap ajoqusernera illit nammineq pisuussutigigit, tammannalu tuniniaasup takutittussaavaa, taamaassimassappat.


Tuniniaasup naammagittaalliutit itigartippagu

Nioqqutissap sanaartorneraneerpat imaluunniit sananeqaataa ajoquteqarpat, taava tuniniaasup piffisap sivikinnerusup iluani iluarsartissavaa, soorlu iluarsartillugu imaluunniit nutaamik taarserlugu. Tuniniaasoq taamaliorumanngippat taava pisisimanerit atorunnaarsissinnaavat.

Nioqqutissap ajoqutaa illit nammineq pisuussutigigukku, taava tuniniaasoq iluarsarnissaa eqqarsaatigalugu itigartitsisinnaavoq.

Tuniniaasup naliliinera isumaqatiginngikkukku, taava uppernarsartariaqassavat, nioqqutissap ilinnut tunniunneqarnerata nalaani ajoquteqarsimasoq, imaluunniit suliassaq Atuisartoqarnermut Naammagittaalliuuteqarfimmut tunniussinnaavat. Tuniniaasup naammagittaalliuut pisinnaatitaaffigippassuk itigartissallugu, taava qanoq iliuuseqaqqittoqarsinnaanngilaq. Taava nammineq akiliisariaqassaatit imaluunniit nioqqutissaq igiinnartariaqassallugu.

Tuniniaasup pisinnaatitaaffigisimanngippassuk naammagittaalliuut itigartissallugu, taava nioqqutissap iluarsartuunnissaanut imaluunniit nioqqutissap allamik taarsernissaannut pisinnaatitaaffeerutissaaq. Tamanna amerlasuutigut imatut paasineqassaaq, tassalu illit pisinnaatitaaffigilerit aningaasat utertissinnaallugit, tamanna kissaatiginerpaagukku.


Atuisup uppernarsaatitaasussaanera qaammatini 6-24-ni

Siullermik uppernarsassavat, nioqqutissaq kukkuneqartoq imaluunniit amigaateqartoq. Tamanna amerlanertigut ajornartorsiutaanavianngilaq, kukkunerit amigaatillu ajornanngitsunnguamik ersiinnartarmata. Kukkunerlu piffissap ilaatiguinnaq takkuttarsimappat, taava kukkuneq illit nassuiarluartariaqarpat, aammalu qanoq ilinerani takuttarnersoq ajunnginnerpaamik oqaluttuariniarsaralugu.


Nioqqutissaq isumaqatigiissutaasoq naapertorlugu atorsinnaanngippat

Nioqqutissamik pisiguit isumaqatigiissuteqarnallu, soorlu arlaatigut immikkuussuseqassasoq imaluunniit aalajangersimasumik immikkuuffaarittumik siunnertaqanngippat, taava nioqqutissap nioqqutissat allat assigalugit naliginnaasumik atorsinnaasariaqarpoq.

Illuatungaatigut neriorsorneqarsimaguit, nioqqutissaq arlaatigut immikkuullarissuusoq, nioqqutinik assingusunut allaanerulluni, taava illit uppernarsartussaavat tuniniaasup nioqqutissaq pillugu suna neriorsuutigisimaneraa, soorlu imaassinnaavoq nalunaaqutaq aqqartartup atugassarigaa.

Tuniniaasup oqaatigippassuk, illit akuerisimagit, nioqqutissaq nioqqutissanut allanut assingusunut nallersuunneqarsinnaanngitsoq, taava tuniniaasup uppernarsartussaavaa, nioqqutissap pisiarinerani illit tamanna akuerisimagit. Soorlu assersuutigalugu imaassinnaavoq nioqqutissap atorneqarnissaannut ilitsersuut pisiarinerani amigaataasimasoq.


Nioqqutissap ajoqutaa pisisarnermut inatsimmit tunngavilersuutigineqarsinnaava?

Paasiniagassaq tassaavoq, kukkuneq imaluunniit ajoqutaasup pissutaa tunniunneqarnerata nalaanni tassaniissimanersoq.

Amerlanertigut nalunarneq ajorpoq, ersareqimmat, nioqqutissiap sananeqarneraniit kukkusaasimasoq imaluunniit ajortunik atortulersugaasimasoq. Soorlu imaassinnaavoq meeqqat qamutaat qalipaataarukkiartupallattoq, imaluunniit kavaajap mersorfiatigut katagartoq.

Isumaqatigiinngissuteqartoqassappat, kukkuneq pisisartut inatsisaatigut naammagittaalliuuteqarsinnaatitaanersut, taava illit atuisartutut uppernarsartussaavat kukkuneq pineqartoq aamma naammagittaalliuutigineqarsinnaasoq. Uppernersarsinnaanngikkukku kukkuneq pisisartut inatsisaanniit naammagittaalliuutigineqarsinnaanersoq, taava misissorsinnaavat, soorlu assersuutigalugu Atuisumiit ikiorsinnaaneraatit.


Kukkuneq qularnaveeqqummi ilaatinneqarsinnaava?

Nioqqutissiaq qularnaveeqqusigaava, imaluunniit nioqqutissap ajoqutaa naammagittaaliutigisat, taava sillimmasiisumit tunisisup uppernarsartussaavaa, naammagittaalliuutigisat, qularnaveeqqusigaanngitsoq. Taamaalinerani taamaallaat illit uppernarsartussaavat pisiat akornuteqartoq.

Saqqummersitanut assigusut

Pitsanngornerulerteqataagit

Arlaannik isorisaqaruit imaluunniit aaqqitassaqarsorisaqaruit uani quppersagatsinni, pitsaanerpaamik aua.gl-imi misigisaqarluarnerussagavik uani uatsinnut allassinnaavutit