Tamanna unioqqutinneqarpat – soorlu pisiaq akornutilik nioqquteqartumit aaqqiiviginiarneqanngippat, arlalitsigut akeqanngitsumik ikiorserneqarnissamut periarfissaqarputit.

Taama pisoqartillugu Atuisartoqarnermut Unammilleqatigiinnermullu Aqutsisoqarfik imaluunniit Atuisartut Pisisartullu Maalaarutaannik Aalajangiisartut attavigisinnaavatit.

Atuisartoqarnermut Unammilleqatigiinnermullu Aqutsisoqarfik
Atuisutut pisinnaatitaaffitit unioqqutinneqaqqunagit inuussutissarsiutillit atuisut illersorneqarnissaat pillugu inatsisinik maleruaanerat, Atuisartoqarnermut Unammilleqatigiinnermullu Aqutsisoqarfimmit nakkutigineqarpoq. Pisinnaatitaaffinnut assersuutitut ilaatigut makku taaneqarsinnaapput:

  • Pisiap ajoqutillip pisiarineraniit ukiut marluk iluanni naammagittaalliuuteqarsinnaatitaaneq
  • Pisinermiit ukiut marluk qaangiutinnginneranni – pisiap ajoquteqarnerata amigaateqarnerataluunniit paasineraniit qaammatit marluk iluanni – naammagittaalliuuteqarneq tamatigut piffissaliussamik eqquinerussaaq
  • Qarasaasiakkut niuernermi pisianik ullunik 14-inik piffissaqarluni utertitsisinnaaneq
  • Akikillisanik neqeroorutinillu pisinermi naammagittaalliuuteqarsinnaatitaaneq

Pisinnaatitaaffiit qulaani taaneqartut avaqqunneqarsinnaanngillat – assersuutigalugu ukiup ataatsip iluani naammagittaalliuuteqarsinnaanerit atsiornikkut akuerisimagaluarukkuluunniit – ukiut marluk iluanni naammagittaalliuuteqarsinnaanerit avaqqunneqarsinnaanngilaq.

Pisinnaatitaaffiit assersuutissallu arlalippassuupput. Illit nammineq qanoq inissisimanerit nalornissutigigukku Atuisartoqarnermut Unammilleqatigiinnermullu Aqutsisoqarfik attavigisinnaavatit. Atuisartututtaaq pisinnaatitaaffinnut tunngasumik nalinginnaasumik apeqqutissaqaruit Atuisartoqarnermut Unammilleqatigiinnermullu Aqutsisoqarfik attavigisinnaavatit.

Atuisartut Pisisartullu Maalaarutaannik Aalajangiisartut
Niuertup illillu akunnissinni aaqqissinnaanngisassinnik isumaqatigiinngissuteqarussi, Atuisartut Pisisartullu Maalaarutaannik Aalajangiisartunut niuertoq naammagittaalliuutigisinnaavat.

Atuisartut Pisisartullu Maalaarutaannik Aalajangiisartut suliap ingerlannissaanut pisinnaatitaaffeqarninni naliliivigereerunikku illuatungeriillu tusarniaavigineqareerpata suliaq aalajangiivigissavaat.


Atuisartut Pisisartullu Maalaarutaannik Aalajangiisartut 3-nik ilaasortaqarput, ataaseq atuisartunut atorfeqarfinnit ataatsimoorlutik innersuunneqartoq, ataaseq inuussutissarsiornermi atorfeqarfinnit ataatsimoorlutik innersuunneqartoq aamma  Atuisartoqarnermut Unammilleqatigiinnermullu Aqutsisoqarfiup pisortaa. Ilaasortat ukiunut sisamanut toqqagaasarput.

Atuisartut Pisisartullu Maalaarutaannik aalajangiisartut ullumikkut aqunneqarnermikkut ima inissisimapput:

Freja Lisby Nielsen (siulittaasoq)

Jenseeraq Poulsen

Anita Hoffer

Assiliaq: Inatsisartut Allattoqarfiat

Tuniniaanissamik nittarsaassisarneq aamma nalunaaqutsersuisarneq pillugu Inatsisartut inatsisaat nr. 39, 9. december 2015-imeersoq (tuniniaanissamik nittarsaassisarnermut inatsit)

Akinik misissuisarnerit pillugit Namminersornerullutik Oqartussat nalunaarutaat nr. 28 28. november 1996-imeersoq

Inuussutissanik allagartalersuisarneq pillugu Namminersornerullutik Oqartussat nalunaarutaat nr. 1, 2. februar 1994-imeersoq

Pisineq pillugu inatsit - Pisineq pillugu inatsit Kalaallit Nunaannut atuuppoq, tak. Inatsit nr. 102, 6. april 1906-imeersoq, taannalu Kalaallit Nunaannut atuutilersinneqarpoq inatsimmi nr. 104-mi 31. marts 1965-imeersumi, allanngortinneqartukkut inatsisikkut nr. 409-kkut 30. novembari 1965-imeersukkut, peqqussutikkut nr. 586-ikkut 19. novembari 1973-imeersukkut, peqqussutikkut nr. 12-ikkut 9. januar 1980-imeersukkut, peqqussutikkut nr. 350-ikkut 14. juni 1980-imeersukkut, peqqussutikkut nr. 633-kkut 31. decembari 1980-imeersukkut, inatsisikkut nr. 271-ikkut 2. maj 1990-imeersukkut aammalu peqqussutikkut nr. 990-ikkut 14. oktober 2011-imeersukkut.

Peqqussut normu 995 14. oktober 2011-meersoq Kalaallit Nunaanni atuisunut isumaqatigiissutit ilaat pillugit inatsit naapertorlugu peqqissimisinnaatitaanermik paasissutissiisarneq pillugu nalunaarut

Peqqussut nr. 990 Isumaqatigiissutit aamma pisuussutaateqarnermut tunngassutilinni neriorsueqatigiinnerit inatsisitigut pisussaaffiliisut allat inatsisillu ilaat allat (Atuisartunik isumaqatigiissuteqartarnerit il.il. ilaanni piumasaqaatit naleqqutinngitsut) pillugit inatsimmik allannguineq, illuutinik il.il. pisinermi atuisartunik illersuinissaq pillugu inatsit aamma pisisarneq pillugu inatsisip allanngortinneqarneranik inatsit (atuisartutut pisinermi il.il. malittarisassanik nutarterineq) pillugit inatsimmi aalajangersakkat ilaannik Kalaallit Nunaannut atortuulersitsineq pillugu peqqussut

Atuisutut isumaqatigiissutit ilaat pillugit inatsisip Kalaallit Nunaannut atuutilersinneqarnissaa pillugu peqqussut nr. 989


Atuinermit saqqummiussat