Tunngaviusumik akissutissaq ersarissoq taasaavoq- naagga! Pisiniarfiit inuussutissat piunertussusaannut killissarititaasumik qaangiisimasunik nioqquteqaqqusaanngillat. Piunertussutsimut killigititaasoq qaangiuppat, pisiassat pisiniarfimmiit peerneqarnissaat pisiniarfiit pisussaaffigaat. Pisoqarsinnaavorli inuussutissanik piunertussutsimik qaangiisimasunik nioqquteqarnissamut akuersissuteqarfiusinnaasunik.

Inuussutissanik allagartalersuisarneq pillugu nalunaarummi aalajangersakkani ilaatigut inuussutissanik allagartalersuisarneq qaqugulu nioqqutigineqarsinnaajunnaarnissaat maleruagassiuunneqarpoq. Nalunaarut naapertorlugu inuuussutissat poortoriikkat piunertussusilerlugit allagartalerneqarsimanissaat piumasaqaataavoq. Piunertussutsinik allagartalersuinerni ”piunertussusaa minnerpaamik ulloq….” imal. ”piunertussusaa minnerpaamik ulloq….ilanngullugu” atorneqarajupput. Inuussutissalli ilaat ”atorneqarfissaa ulloq kingulleq….”-mik allagartalerneqassapput. ”Atorneqarfissaa ulloq kingulleq” –inuussutissanut ulloq taanna qaangiutereersoq nerineqarunik peqqissutsimut navianaateqarsinnaasunut atorneqartarpoq.

Pissutsini immikkorluinnaq ittuni, pisiniarfiit kioskillu immikkut akuersissummik tunineqarnikkut, inuussutissanik piunertussutsimut killissarititaasumik qaangeereersunik nioqquteqarsinnaapput. Inuussutissalli ”atorneqarfissaa ulloq kingulleq” allagartalikkat, ulloq pineqartoq qaangiutereersoq nioqqutiginissaannut akuersissuteqartoqanngisaannarpoq. Pissutsit immikkut ittut tassaasinnaapput sikusimanera pissutigalugu, pisiniarfinnut nioqqutissanik apuussisinnaannginneq.

Pisiniarfinnut inuussutissanik piunertussutsimut killiliussap qaangiutereernerani nioqquteqarnissamut immikkut akuersissummik pissarsisimasunut, allagarsiat akuersissummik imallit pisiniarfimmi takusassanngorlugit nivingatinnissaat piumasaqaataavoq. Allakkat pisiniarfimmi kikkunnit tamanit takuneqarsinnaasunngorlugit nioqqutissallu pineqartut eqqaannut nivinngarneqassapput. Allakkani inuussutissat suut piunertussutsimut killiliussap qaangiutereernerani tamatumalu kingorna qanoq sivisutigisumik nioqqutaasinnaanerat nassuiarneqarpoq. 

Pisiniarfik inuussutissanik piunertussutsimut killigititaasup qaangiutereernerani nioqquteqartoq paasigukku, imal. pisiniarfiup inuussutissanik piunertussutsimut killiliussap qaangiutereernerani tuniniaanissamut immikkut akuersissummik tunineqarsimanera nalornissutigigukku, Atuisoqarnermut Unammilleqatigiinnermullu Aqutsisoqarfik attavigisinnaavat.