Avataaniit tassalu ass. illoqarfimmit allamit internetsikkut, allatitsivissatigut oqarasuaatikkulluunniit pisisimaguit, pisinerillu peqqissimissutugigukku ullut 14-it qaangiutsinnagit pisiat utertsissinnaavat.

Kiat akikillisaq
Arnaq atisaarniarfimmi 999 koruuninik akilimmik kiatisivoq. Ullut marluk qaangiummata kiat taanna affaannarmik akeqalerluni akikillineqarmat, arnap kiatip affaannarmik akilerlugu pisiarisinnaasima-nera pillugu pisinini peqqissimissutigalugu, pisiniarfimmut maalaaruteqarpoq. Pisiniarfiup kiat utertikkumanngilaa.

Utertitsisinnaannginneq
Kiat pisiniarfimmi pisiaammat, kinguninngua akikillilerneqaraluarpalluunniit arnap peqqissimilerluni utertissinnaanngilaa. Tuniniakkap qanittumi akikillineqarumaarnissaa - imal. pisiniarfiup akikilliliingajalernera pillugu ilisimatitsinissamut- tuniniaasoq pisussaaffeqanngilaq.

Peqqissimisinnaatitaannginneq
Pisiniarfimmi piffissap aalajangersimasup iluani pisiavit taarserneqarsinnaanera pillugu allagarsiisoqarsimanngippat pisisutut peqqissimisinnaatitaanngilatit. Pisiniarfiilli amerlanersaasa  tunissutip taarserneqarsinnaanera neqeroorutigaat. Tamanna inatsisitigut piumasaqaataanngilaq pisiniarfimmiilli kiffartuussinertut neqeroorutaalluni.

Ullut 14-it iluanni peqqissimisinnaatitaaneq
Allatitsivissalli, nittartagaq oqarasuaalluunniit atorlugit ass. illoqarfimmit allamit pisiguit, pisiavit tiguneraniit ullut 14-it qaangiutsinnagit peqqissimisinnaatitaavutit. Illit nammineq pisiasap takusinnaanissaanut naliliivigisinnaanissaanullu periarfissaqarsimannginnerit matumani allaassutaavoq. 

Peqqissimisinnaatitaanerit atorusukkukku

Atuisartut pisisinnaanermut isumaqatigiissusiorsinnaanerat pillugu inatsit naapertorlugu avataaniit pisiniarnermi ullut 14-it iluanni peqqissimisinnaatitaavutit. Ass. internetsikkut pisiat peqqissimissutigigukku ullut 14-it qaangiutsinnagit pisiannik utertitsiniarninnik tuniniaasoq ilisimatissavat. Utertitsinermi nassiunnerata ilinnit akilerneqarnissaa maluginiassavat. Pisiavit utertinnissaanut atatillugu nassiussinermut akiliinianngikkuit- ass. nassiussaq tigutinnagu piumasaqaativit taamaatiinnarnera nalunaarutigissavat.

Peqqissimisinnaatitaanerup aallarnerfia
Ullut 14-it taakku pisiavit allagarsianut/nassiussanut ilitsivinnut (postboksinnut) najukkannulluunniit apuunneqarneraniit naatsorsorneqartarput. Pisineq peqqissimissutaasinnaassappat paasissutissat inatsisitigut piumasaqaataasut ilisimatitsissutaasimassapput. Ass. tuniniaasup aqqa najugaalu taamatullu peqqissimisinnaatitaanerit ilisimatitsissutaasimassapput. Paasissutissat taakku pissarsiarisimanngikkukkit peqqissimisinnaatitaaneq paasissutissat pissarsiarineranniit aatsaat naatsorsorneqalissaaq. Ass. Atuagassiamik/aviisimik pisartagaqalernissaq pisiarigukku taamaallaat atuagassiap siulliup tigunnginneraniit tamatuma atuunnera maluginiagassaraat, tamatuma kingorna isumaqatigiissummut pituttugaalissaatit.