Aallaqqaasiut

Kalaallit Nunaanni Atuisartut siunnersuisoqatigiiffiat aammalu Unammilleqatigiinnermut Aalajangiisartut kattunneqarmata sulisuvut suliassaat amerlanerulersimapput, tamatumalu kingunerisaannik atuisartut siunnersortaat aamma angalanerulersimavoq.

Siunersortip angalanerani nunaqarfiit siulersuisui suli annertunerusumik paasitinneqarsimapput sunarpiaq suliassarineraat.

Tamakkua saniatigut aamma najukkami Pilersuisoq A/S-ip pisiniarfiutaani illoqarfinnilu nunaqarfinni niuertarfinni namminersortuni aamma nioqqutissat ulluliinermikkut pisoqalisoortunik misissuisoqarpoq.

Atuisartut Siunnersuisoqatigiiffiata nutarternissaa, takussaanerulernissaa tusaamasaanerulernissallu anguniagalersornikkut aqqutissiuunneqassasoq, soorlu tusagassiuutikkut aammalu nunaqarfinni illoqarfinnilu ataatsimiittarnerit- pikkorissartarnerillu amerlanerusut aqqutigalugit.

Aningaasaqarnikkut sulisoqarnikkullu atugassarititaasut killeqarmata, illoqarfinni nunaqarfinnilu annerusumik susoqartitsinissaq killeqalernikuuvoq, naak malunnaatilimmik pisariaqartitsoqartoq.

Ataatsimoortumik allattoqarfipput atuisunut qanilaartumik suleqatiginnipput, atuisullu apeqqutaat sukkanerusumik akisalersimavagut sulisut suliaminnik ilinniarluarsimasut atulernerisigut.

Ataatsimoortumik allattoqarfipput Avannaamioqatigiit killiit atuisartuisa suleqatigiinnerat annertunerulersimavoq, sulilu siunissami nukittorsarniarneqarluni.

Oqaatiginngitsoorumavarput Siunnersuisoqatigiit tapiiffigineqarnissaminnik pisariaqartitsimmata tamannalu Naalakkersuisoqarfimmut oqaluuserineqassaaq, tamatumanilu sullissinerput suli pitsaanerulissappat, aammalumi atuisut ataatsimiititaliaat nukittorsarneqassappat, taava Siunnersuisoqatigiit ukiuni siuliiniit naleqqiullugu, Naalakkersuisunut suli annertunerusumik siunnersuisarnissaa anguniarneqartariaqarpoq.

Siunnersuisoqatigiit aammalu Allattoqarfik 2003-imi killilimmik aningaasalersugaagaluartut suliassatik naammaginartumik suliarisimavaat; tamannami pisimavoq Atuisartunut pisisartutullu siunnersuisartoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit Inatsisartut inatsisaat nr. 10, 13. november 1986-imeersoq naappertorlugu.

Taamatut oqaaseqarlunga Siunnersuisoqatigiit sinnerlugit suleqativut 2003-mi suleqatigiilluarsimanitsinnut qujassuteqarniarpunga, neriullunga suleqatigiinneq suli nukittornerussasoq tamannami atuisartunut Nunatsinniittunut tamanut iluaqutaassammat.

Nikolaj Ludvigsen

Kalaalit Nunaanni Atuisartut Siunnersuisoqatigiivini siulittaasoq.

Siulequtsiussaq

Atuisut Siunnersuisoqatigiivisa taassumalu allattoqarfiata sulinerisa tunngavigaat Atuisut Siunnersuisoqatigiivi, Atuisut ataatsimiititaliaat, tuniniaaniarneq, akit, nalunaaqutsersuineq aamma Atuisut Maalaaruteqartarfiat pillugit Inatsit nr. 10, 13. november 1986-imeersoq, taakkualu suliassaraat:

  • akit niuernermilu atugassarititaasut akuersornanngitsut akiorniarnissaat
  • pissutsinik nioqqutissanik sullississutinillu atuisut nalilersuisarnissaannut pingaaruteqartunik qaammarsaaneq aqqutigalugu atuisunik ilisimasaqarnerulersitsiniarneq, aammalu atuisut inatsisitigut pisinnaatitaaffiinnik qaammarsaaneq aqqutigalugu atuisunut paasisimasaqarnerulersitsiniarneq
  • inuussutissarsiornermik ingerlataqartunut, pisortanut inatsisartunullu atuisut isumaannik saqqummiussisarnissaq
  • kommuunini atuisut ataatsimiititaliaannut siunnersuisarneq aammalu taakkua siunnersuisoqatigiinnut suliassiissutigisartagaannik suliarinnittarneq
  • kapitali 7 naapertorlugu inatsisip aalajangersagartai malillugit nakkutiginninneq (tuniniaaniarnermik, nalunaaqutsersuisarnermik poortuutaasartunillu)
  • nioqqutissat nioqquteqartullu aalajangersimasut iluanni akinik iluanaarutinillu misissuisarneq

Atuisut Siunnersuisoqatigiivi 7-nik ilaasortaqarput, taakkulu ukunannga katitigaapput SIK (Sulisartut Kattuffiat), KANUKOKA (Kommuunit Kattuffiat), ARNAT PEQATIGIIT KATTUFFIAT, KNAPK (Aalisartut piniartullu Kattuffiat), kiisalu ilaasortat pingasut inatsisartunit toqqagaasut. Atuisut Siunnersuisoqatigiivisa ilaasortai toqqarneqartartussaapput Atuisut Siunnersuisoqatigiivi, Atuisut ataatsimiititaliaat, tuniniaaniarneq, akit, nalunaaqutsersuineq aamma Atuisut Maalaaruteqartarfiat pillugit Inatsimmi nr. 10, 13. november 1986-imeersumi § 3, imm. 3, naapertorlugu, qinigaaffillu ukiunik 4-nik sivisussuseqartartussaalluni.

Taakkua 2002-mi decembarimi inatsisartunit toqqagaasimapput, Siunnersuisoqatigiillu 24. januar 2003- mi inissitsiterlutik ataatsimiissimapput, taamanikkullu siulittaasussatut Olga Poulsen toqqarneqarluni.

Olga Poulsen-ip 07.11.2003-mi tunuarnera peqqutigalugu Siunnersuisoqatigiit katitigaanerat allannguuteqarsimavoq Siunnersuisoqatigiillu 12.12.2003-mi ataatsimiinnissaat tikillugu Pele Jensen siulittaasuugallartutut toqqagaasimalluni, ataatsimiinnermilu tassani Olga Poulsen-ip sinniisussaa Hans Kreutzmann (IA) isertinneqarsimavoq.

Allannguinerup kingunerisimavaa Atuisut Siunnersuisoqatigiivisa katitigaanerat 12.12.2003-miit imaalisimammat:

Siulittaasoq Nikolaj Ludvigsen, KANUKUKA-mit toqqagaasoq
Siulittaasup tullia Pele Jensen, Inatsisartunit toqqagaasoq
Paulus Broberg, SIK-mit toqqagaasoq
Godmand Rasmussen, Inatsisartunit toqqagaasoq
Hans Kreutzmann, Inatsisartunit toqqagaasoq
Uthilie Heilmann, ARNAT PEQATIGIIT KATTUFFIAT-nit toqqagaasoq
Ole Jørgen Davidsen, KNAPK-mit toqqagaasoq

2003-mi suliniutaasimasut

Kalaallit Nunaanni Atuisut Siunnersuisoqatigiivi 2003-mi amerlaqisunik assigiinngiiaaqisunillu suliaqartarsimapput, soorlu suliarineqartarsimallutik atuisut saaffiginnissutaasa akissuteqarfigineqarnissaat, kommuunini atuisunut ataatsimiititalianik nunaqarfiillu siulersuisuinik kiffartuussinerit, tuniniaaniarnermi aalajangersakkanik, akinik, ullulersuinernik il.il. nakkutilliinerit.

Suliassaatit aamma saaffiginnissutaasartut

Oqaluuttaatikkut saaffiginnissutinut atatillugu allattoqarfiup inatsisilerinermi ilitsersuisarfiata pingaartumik sammisarsimavai taarsiinissamut / utertitsinissamut tunngatillugit ajornartorsiutaasartut, kiisalu tunisisup akiligassaanik iluarsaassititsiniartarnerit, tassa imaappoq naammagittaalliorsinnaatitaanermik qularnaveeqqusiissutinillu atuisinnaatitaaneq.

Oqaluuttaatikkut saaffiginnissutinut tunngatillugu Allattoqarfiup ileqqorisarpaa atuisut pisinnaatitaaffiinik pisussaaffiinillu paasinartumik nalinginnaasumillu ilitsersuisarneq, tassa saaffiginnissummut tunngatillugu atuisut pisinnaatitaaffiinnut tunngassuteqartut pillugit. Allattoqarfiup paasisimavaa allattoqarfiup ilitsersuisarnera atuisunit paasiuminartinneqartarlunilu ulluinnarni atorneqarsinnaalluartutut isumaqarfigineqartartoq.

Saaffiginnissutaasartorpassuit pissutigalugit Ataatsimoorussamik allattoqarfiup Atuisut pisinnaatitaaffii pisussaaffiilu pillugit quppersagaq naqiterteqqissimavaa, pitsanngorsaavigeqqilaarlugu, tassa isikkuatigut imarisaatigullu, quppersagarlu naqiterneqarluni kalaallisut qallunaatullu allagaalluni. Quppersagaq taanna

2. april kommuunit atuisunut ataatsimiititaliaannut tamanut nassiussuunneqarsimavoq kommuunit allaffiinut, utaqqisarfinnut, ilinniarfinnut nunaqarfinnilu siulersuisunut ingerlateqqinneqarnissaa qinnutigineqarluni. Quppersagaq Nuup Kommuneani kommuunip atuisunut ataatsimiititaliaata sulissuteqarneratigut Nuuk Ugeaviisimut ikillugu decembarip qaammataani illunut tamanut agguaanneqarsimavoq. Tamatuma siornagut Nuummi atuisut ataatsimiititaliaata quppersagaq ilinniarfinnut, nakorsiartarfimmut, kigutileriffimmut, atugaateqarfimmut il.il. tunniussuussimavaa. Allattoqarfiup paasinninnera naapertorlugu atuisut arlalitsigut ajornartorsiuteqartarnerannik quppersakkap ikiorsiivigisimavai, tassami apeqqutigineqartartut imaqarnerulersimapput aammalu Allattoqarfimmut saaffiginnissutaasartut ikileriaateqarsimallutik.

Pilersuisoq A/S-mik suleqateqarneq

Allattoqarfiup Pilersuisoq A/S-mik suleqateqarnera ingerlaavartumillu oqaloqatiginnittalernera aallartippoq tuniniaanermut pisortap Frederik Olsen-ip 13. januar-imi ataatsimeeqatigineqarneratigut. Ataatsimiinneq pitsaasunik angusaqarfiuvoq.

Nioqqutissanik pilersuineq pitsanngorsaaviginiarlugu Pilersuisoq A/S-ip suliniarnera paasisaqarfigilluarneqarneruniassammat tuniniaanermut pisortap Frederik Olsen-ip oqaatigisimavaa kissaatiginartoq atuisunut siunnersortip Ilulissani 6. – 11. marts nunaqarfinni niuertut pikkorissartinneqarnissaannut peqataanissaa. Tamatuma kingornagut allakkatigut siunnersorti Anne Sofie Hardenberg Pilersuisoq A/S-imit aggersarneqarpoq. Pikkorissarnermi peqataasimapput nunaqarfinni 18-nini niuertut Aasianniit Uummannaq tikillugu, tassanilu nunaqarfimmiut atuartinneqarsimapput ukioq 2002-mi nunaqarfitsik qanoq angusaqarfiusimanersoq pillugu, aammalu nammineerlutik oqaluttuarisussaasimallugu sooq ingerlalluartoqarsimanersoq imaluunniit ingerlalluartoqarsimannginnersoq, aammalu tunisinermut isertitanullu, kasiilikkanut annaasanullu naleqqiullugit missingersuutit eqqortinneqarsimanersut. Siunnersorti atuartitsinermi nunaqarfinni niuertut naligalugit peqataasimavoq. Tamatuma kingornagut siunnersortip Atuisut Siunnersuisoqatigiivisa inatsisaat pingaarneq oqaluttuarisimavaa, tassaasoq Inatsit nr. 10, 13. november 1986-imeersoq, §§§ 4, 6 aamma 7. Allattoqarfimmi isumaqatigiissutigisimavarput nunaqarfinnut nioqqutissanik pilersuineq pillugu apeqqutinik Ataatsimoorullugu allattoqarfiup siunissami nuna tamakkerlugu misissueriaasissai siunnersortip Pilersuisoq A/S-imut saqqummiutissagai. Atuisunut suleqateqarnerup pitsanngorsaavigineqarnissaa eqqarsaatigalugu Pilersuisoq nunaqarfinni assigiinngitsuni niuertarfiit pillugit ataatsimiititalianik pilersitsiartuaalersimasoq Frederik Olsen-ip ataatsimiinnermi ilisimatitsissutigaa. Niuertarfiit pillugit ataatsimiititaliamut nunaqarfimmi niuertoq siunissami atatitsiniartuusassaaq atuisunullu qanittumik attaveqartuusassalluni. Isumasioqatigiinnermi peqataanermut atatillugu uppernarsine-

qarsinnaasimavoq atuisut tungaannut sullissinerup pitsanngorsaavigineqarnissaa pillugu Pilersuisoq A/S ilungersorluni naleqquttunillu alloriaateqarniarsarisoq. Aammalumi atuisut pisinnatitaaffimminnik paasinninneruleraluttuinnarput.

Atuisunut ataatsimiititaliat aamma nunaqarfinni siulersuisut

Atuisunut siunnersortip angalasarnermini ajornanngikkaangat atuisunut ataatsimiititaliat ataatsimeeqatiginiartarpai. Ilulissaniinnermini siunnersorti atuisunut ataatsimiititaliap ataatsimiinneranut peqataasimavoq, taakkulu arlalinnik apeqqutissaqarsimapput siunnersortip najuunnerani qulaarsivigerusutaminnik. Siunnersorti Upernavimmiinnermini kommuunimi atuisunut ataatsimiititaliamik borgmesterimillu ataatsimeeqateqarsimavoq. Aammattaaq taakkua apeqqutissaqarsimapput qulaarsivigerusutaminnik, siunnersortimit akissuteqarfigineqarsimasunik.

Juunip naajartornerani Pilersuisoq A/S-ip atuisunut siunnersorti nunaqarfiliartaammik Targa 33-mik kujammut Nuummiit Qaqortumut sinersornissamut qaaqqusimavaa. Sinersornermi nunaqarfiit illoqarfiillu tamarmik aqqutaaniittut aqqusaarneqartussaasimapput. Angalaarnermi tassani siunnersortip suliassaa pingaarneq tassaasimavoq nunaqarfinni siulersuisut atuisut tungaannut nutaamik suliassariligaat pillugit ataatsimeeqatigisarnissaat. Atuisut Siunnersuisoqatigiivi, Atuisut ataatsimiititaliaat, tuniniaaniarneq, akit, nalunaaqutsersuineq aamma Atuisut Maalaaruteqartarfiat pillugit Inatsit nr.10, 13. november 1986- imeersumi aalajangersarneqarsimavoq nunaqarfinnut siulersuisut 01.01.2002-imiit nunaqarfinni atuisut ataatsimiititaliaattut atuutilissasut aammalu nioqqutissat qaangiuttoorsimasinnaasut pillugit Pilersuisoq A/S-ip niuertarfii nakkutigisarissagaat. Tamatuma saniatigut nunaqarfimmi niuertoq ilisimatittassavaat inatsisit qanoq piumasaqaateqarnersut. Angalanermi KNR-ip ilanngutassiortuanik ilaasoqarsimavoq, taassumalu angalanermi Pilersuisoq A/S-ip sulisuisa marluusut suliaat immiussimavai, kiisalu aamma atuisunut siunnersortip Arsummi sulinera immiussimallugu. Siunnersortip nunaqarfimmi siulersuisunut ilaasortaq Hanne Jakobsen ataatsimeeqatigisimavaa, kiisalu niuertarfimmi nioqqutissanik qaangiuttoortoqarsimanersoq misissorsimallugu. Atuisunut siunnersortip sulinera KNR-TV-mi november 2003-mi taallugu ”Qulequtaq” aallakaatinneqarsimavoq. Aallakaatitaq minutsinik 25-nik sivisussuseqarsimavoq imarisaalu isiginnaartartunit nersualaarneqarsimalluni. Angalanermi uppernarsineqarsimavoq nioqqutissat qaangiuttoornikut nunaqarfinni niuertarfinni nalinginnaasumik ajornartorsiutaasoq. Qaqortumiinnermi atuisunut ataatsimiititaliaq ataatsimeeqatigineqarsimavoq, tassanilu siunnersortip angalanermi sulerisimanini oqaluttuarisimavaa. Taamatuttaaq siunnersortip angalanermini uppernarsisimavaa nunaqarfinni siulersuisut atuisut pillugit sulinissaminnik tusarlerneqarsimanngitsut.

Atuisunut siunnersorti Pilersuisoq A/S-imit piffissami 7. – 11. april 2003-mi nunaqarfinni niuertut Upernavimmi isumasioqatigiinnissaannut aggersarneqarsimavoq. Upernavik 10-nik nunaqarfeqarpoq. Isumasioqatigiinnerup imaa Ilulissanisulli issimavoq.

Pilersuisoq A/S-imit qaaqqusaalluni atuisunut siunnersortip Anne Sofie Hardenberg-ip Atuisut Siunnersuisoqatigiivisa allattoqarfianinngaanneersup 21. – 28. juli tikeraarsimavai Uummannap nunaqarfii arfineq marluk, Upernaviup nunaqarfii pingasut Ilulissallu nunaqarfii avannarliit pingasut. Angalaarneq Pilersuisup assartuutaanik ingerlanneqarsimasoq pingaartumik siunertaqarsimavoq Ilulissanit Uperna- vimmut Pilersuisup illoqarfinni nunaqarfinnilu niuertarfiinik alakkarterinissamik, kisiannili aamma kioskit supermarkedillu namminersortut atuisunut siunnersortimit angalanermi orninneqartarlutillu misissuataarneqartarsimapput. Soorlu Atuisut Siunnersuisoqatigiivisa kissaatigalugu oqaatigisarsimagaat atuisunut ataatsimiititaliat sumiiffikkaartuniittut suleqatigineqarnerisa nukittorsaavigineqarnissaa, ta- manna angalanermi piviusunngortinneqarsinnaasimavoq nunaqarfinni siulersuisut amerlanersaat ataat- simeeqatigineqartarsimammata, tassami taakkuupput nunaqarfinni atuisunut ataatsimiititaliatut atuuttut. Aammattaaq nioqqutissat qaangiuttoornikut nunaqarfinni niuertarfinni tikinneqartuni nalinginnaasumik ajornartorsiutaasimavoq.

Siunnersuisoqatigiit septembarimi Qaqortumi ataatsimiinnerannut atatillugu nunaqarfiit pingasut Siunnersuisoqatigiit ilaasortaannit tikeraarneqarsimapput. Aammattaaq taamanikkut uppernarsineqarsimavoq nioqqutissanik qaangiuttoornikunik nioqquteqarneq nunaqarfiit ulluinnarni nioqqutigisaanni annertuumik ajornartorsiutitut isumaqarfiginartoq. Tamatuma kingornagut atuisunut siunnersorti Nanortaliliarsimavoq Kalaallit Nunaata illoqarfiisa kujallersaanni kiisalu Kalaallit Nunaata nunaqarfiisa kujallersaanni pissutsit qanoq innersut alakkarteriartorlugit. Atuisut ataatsimiitialiaannik ataatsimeeqateqarsimavoq apeqquteqarfigineqartarsimavorlu qulaarsivigerusunneqartunik. Aalajangiunneqarsimavoq Atuisut ataatsimiititaliaat nunaqarfinnut kujallernut pingasunut angalaassasoq, taakkunanilu nunaqarfinnut siulersuisut ataatsimeeqatigineqartassasut atuisut ataatsimiititaliaattut suliassaannik oqaluttuunneqarniassammata. Kalaallit Nunaanni nunaqarfiit avannarlersaasulli Kalaallit Nunaanni nunaqarfiit kujallersaanni nioqqutissanik qaangiuttoornikunik nioqquteqarneq takuneqarsinnaasut naapertorlugit taamatuttaaq ajornartorsiutaatigaaq.

Tassalu siunnersorti 2003-mi angalangaatsiartarsimavoq, tassami qaammatit pingasut ingerlaneranni illoqarfiit tallimat nunaqarfiillu 21-it niuertarfii alakkarteriffigisarsimavai.

Siunnersortip angalasarneri tunuliaqutaralugit Atuisut Siunnersuisoqatigiiffiata allattoqarfiata Pilersuisoq A/S-ip pisortaqarfia saaffiginnissuteqarfigisimavaa, aammalu inuussutissarsiutinik ingerlataqartunut ilisimatitsissutigisimallugit suliassaqarfimmi tassani malittarisassat atuuttut. Matuma ataani naqissusiivigineqarsimavoq nioqqutissanik qaangiuttoornikunik nioqquteqassagaanni piumasarineqartoq immikkut akuersissummik piniaqqaarsimanissaq, aammalu immikkut akuersissuteqarfigineqarsimaneq taamaallaat tuniniaanerup ingerlanerani atuuttussaatitaasartoq.

Atuisunik atuartitsineq (Illup avataani Allattoqarfiup suliai):

Allattoqarfiup 18. februar 2003-mi Nuummi ilinniarfeqarfiit tamaasa allaffigisimavai. Allakkani nalunaarutigineqarsimavoq 15. marts 2003-mi atuisut silarsuaq tamakkerlugu ulluannut atatillugu Allattoqarfiup akeqanngitsumik neqeroorutigigaa apeqqutinik ulluinnarni aporfiusartunik inatsisilerinikkut ikiuussinnaanini, tassa oqaatsit paasiuminartut atorlugit.

Atuartitsinermi apeqqutit makkua qitiutinneqassallutik:

  • Pisinermut inatsit (assersuutigalugu qularnaveeqqusiissummik naammagittaalliorsinnaassutsimillu, peqqissimisinnaatitaanermik atuisinnaatitaaneq)
  • Isumaqatigiissuteqarnermut inatsit (assersuutigalugu nioqqutissanik pisinermi aamma sullinneqarnissami qaqugukkut ”kingusinaartoqartarpa”?)
  • Matukkut tuniniaasarnermut inatsit (assersuutigalugu internettikkut allakkerisarfikkoortumillu tuniniaanermi immikkut ittumik pisinnaatitaaffiit)

Ilinniarfik ataasiinnaq pulaarneqarnissaminik kissaateqarsimavoq, tassalu STI-mi atuarfik. Tamatuma kingunerisaanik atuisunut siunnersorti Anne Sofie Hardenberg ulloq 6. maj 2003-mi Isumaginninnermi Peqqinnissamilu, Niuertarfinnut Niuernermillu ilinniagaqartunut oqalugiarsimavoq.

Nuup Kommuuniata atuisunut ataatsimiititaliaata qaaqqusinera tunngavigalugu 13. marts 2003-mi allattoqarfiup sulisui atatsimiititaliamut ilisimatitsissuteqariartorput / annikitsumik isumasioqatigiissitillutik.

Allattoqarfiup siunnersuusiorfigisimavaa kommuunimi atuisunut ataatsimiititaliap Atuisullu Siunnersuisoqatigiiffiata allattoqarfiata annertunerusumik ataani uku taagorneqartut suleqatigiiffigilissagaat:

  • Atuisut pisinnaatitaaffii il.il. pillugit paasisitsiniaaneq
  • Nioqqutissanik qaangiuttoornikunik nakkutiginninneq
  • Akit nalunaaqutsersuiffigineqartarnerinik nakkutiginninneq: Karsimi aki kukkusoq
  • Nalunaartarnissat allat
  • Killiffiit nalilersuinerillu

Ataatsimiititaliaq arlalinnik oqaluuserisassaateqarsimavoq, soorlu inatsisilerineq, ilisimasanik avitsiffigeqatigiittarneq, ”Kalaaliaraq” aamma atuisunut atuartitsisarneq.

Fødevaredirektoratimik suleqateqarneq

Fødevareministeriap inuussutissat pillugit Danmarkimi ataatsimeersuartitsineranut Atuisunut siunnersorti peqataasimavoq: ”Nerisassat peqqinnartut pillugit peqatigiinnissaq” ulloq 2. oktober 2003, ataatsimiinnerlu fødevareministerimit Marianne Fischer Boel-mit ammarneqarsimalluni. Inuit 205-it kattuffinneersut, sullissivinneersut, folketinngimeersut pisortallu oqartussaasuinit allaneersut peqataasimapput. Inuussutissat nutaat peqqinnartullu pillugit misilittakkanik taartigeeqatigiinnissamut oqallisiginninnissamullu inuit imminnut naapeqatigiissinneqarsimapput, aammalu Danmarkimi inuit nappaataat imaannaanngeqisoq ”pualaneq” akiorniarlugu nutaanik suleqatigiiffissanik inerisaaniarnissaq oqaluuseritinneqarsimalluni.

Siunnersortip aammattaaq Fødevareministeriap atuarfinnut suliartortillugit angalatitai malinnaavigisimavai, tassa atuarfiit ilaasa kissaatigisarsimammassuk orninneqarnissartik nerisassat nerisarnerlu pillugit siunnerfiliorniarsarigamik. (”Sooq qanorlu”). Angalatitsinermut siunertaasimavoq atuarfinni sullissivinnilu peqqinnartunik pitsaasunillu nerisassiortarnerup nerisarnerullu siuarsaaviginiarneqarnissaat. Siunnersorti aammattaaq angalaqatigiit nammineerlutik ilinniartitaaneq pillugu ullorititaannut peqataasimavoq, tassungalu Danmarkimi angalaqatigiit ilaasortarisaat trettaniusut tamarmik peqataasimapput.

Nutaarsiassatut allakkiaq tunngavigalugu: ”Meeqqat qaarsilasut pinnguarluarnerusarput” Nerisat tamaasa pillugit, siunnersortip ulloq 04.09.2003 Frederiksberg-imi fritidsklubbit marluk assigiinngilluinnartunik angajoqqaajutillit pulaarsimavai. Taamaaliorsimavoq takuniarlugu qanoq ingerlasoqarnersoq aammalu qanoq aqutsisoqarnersoq, kisiannili aamma paasiumallugu fritidsklubbit taakkua marluusut meeqqanit suut paasisarneraat.

Nittartagaq

Atuisut Siunnersuisoqatigiivisa nittartagaa www.atuisoq.gl maajip qaammataani pilersinneqarpoq, imarisaalu ingerlaavartumik tammatsaaliorneqassallunilu nutarterneqartassaaq.

Atuisut atuagassiaat Atuisoq

Atuisut Siunnersuisoqatigiiffiata nammineerluni atuagassiaa ”Atuisoq” 2003-mi pingasoriarluni saqqummersimavoq. Saqqummernerit marluk TV-mi radioaviisimilu eqqartuiffigineqarluarsimapput.

Akinik misissuineq

Atuisut Siunnersuisoqatigiiffiat ukiumoortumik nuna tamakkerlugu nioqqutissanik inuussutissanut tunngassuteqartunik Pisiffik A/S-mi, Pilersuisoq A/S-mi Brugsen-mi allanilu misissuisitsisarpoq. Tamatumunnga pissutaavoq allattoqarfiup malinnaavigerusummagu assartuinermut akit 1. maj-imi appartin

neqarsimanerat ulluinnarni nioqqutissanut atuisunut iluaqutaasumik akinik appasinnerulersitsinermik sunniuteqarsimanersoq. Akit pillugit paasissutissat kommuunini atuisunut ataatsimiititaliat aqqutigalugit piniarneqartarunnaarsimapput, kisiannili ulluinnarni nioqqutissanik nioqquteqartut akinut paasissutissaasiviinnit toqqartumik aaneqartalersimallutik.

Akinut paasissutissanik katersisarnerup allannguuteqarnera

Inuussutissanut tunngassuteqartut akiisa ukiumoortumik misissuiffigineqartarnerat massakkut Allattoqarfimmit imaalillugu ingerlanneqartalerpoq Brugsen-ip, Pisiffik A/S-ip aamma Pilersuisoq A/S-ip ”akinut paasissutissaasivii” aqqutigalugit. Niuertarfissuarni taakkunani pingasuusuni ulluinnarni nioqqutissat akii piniarneqartalerput niuertarfissuit taakkua pingasuusut qullersaqarfii aqqutigalugit. Taamatut nutaamik periaaseqalernerup qulakkiissavaa paasissutissat eqqortuusarnissaat. Akinik kukkusumik katersisimaneq atuisut tungaannut kukkuluttortitsisinnaasarpoq, aammalu suliffeqarfinnut akuusunut ilumuunngitsuliornerusinnaasarluni. Tamatuma saniatigut siunnersuutip Forbrugerombudsmandip akinik misissuisarnissaq pillugu kaammattuutigisaa maleruarpaa: nioqqutissat assigiiaat kisimik misissuinermut ilanngunneqarsinnaatitaapput (nioqqutissat assigiimmik nalunaaqutallit annertussusillillu).

Maannamut akinik katersisarnerit imatut ingerlasarsimagaluarput kommuunini atuisunut ataatsimiititaliat immersugassamik nassinneqartarlutik, immersugassamilu nerisassarpagaaluit atuisunut ataatsimiititaliat niuertarfinnut ornigullutik akiinik misissuiffigisartagaat allattorneqarsimasarlutik. Immersugassaq immersorneqareeraangami eqqortumik immersorneqarsimasutut niuertarfimmi sulisumit uppernarsaaserneqariarluni Atuisut Siunnersuisoqatigiivisa allattoqarfianut utertinneqartarpoq. Takuneqarsinnaasarsimavoq akinut immersukkat kukkunertaqartartut. Ulloq 03.12.2002-mi Bo Vestergaard-ip Brugsen-illu pisortaata Carsten Lynghøj-ip ataatsimeeqatigiinneranni Brugsen-ip pisortaata 2002-mi akinik katersinermi kukkunerusimasut tikkuartuiffigisimavai. Aammattaaq ilisimatitsissutigisimavaa aamma taamatut ukiut siuliini pisoqartarsimasoq. Isornartorsiummut Pilersuisoq A/S aamma Pisiffik A/S isumaqataasimapput, Atuisullu Siunnersuisoqatigiivisa Siunnersuisoqatigiit 28. januar ataatsimiinneranni akuersissutigisimavaat allattoqarfiup akinik nutaamik periaaseqarluni misissuisarnissamik inassuteqaataa.

Assartuinerup iluarsartuussiffigeqqinneqarnera

1. maj assartuinerup iluarsartuussiffigeqqinneqarneranut atatillugu Danmarkimiit assartukkat avannamukartut akii appariaateqarsimapput. Tassunga atatillugu Brugsen-ip Pisiffiullu neriorsuutigisimavaat assartuinermut akit appartinneqarnerat atuisunut ajunngitsumik kinguneqassasoq, tassa akit appasinnerulersinneqarnerisigut.

Neriorsuutit eqqortinneqarsimanersut takuniarlugu allattoqarfiup 9. april Brugsen-imi, Pisiffimmi Pilersuisumilu nioqqutissaat 222-it akii pissarsiariniarsimavai. Nioqqutissat toqqartorneqarnerannut tunngaviusimavoq taakkua tunisaanerpaasartut akornanniittutut naatsorsuutigineqarsinnaanerat (imigassamik

akullit, kimittuut tubalu peerlugit). Nioqqutissat taakkorpiaat akii allattoqarfiup 10. juni pissarsiariniaqqissimavai. Uppernarsineqarsinnaasimavoq nioqqutissat misissuiffigineqartut Pisiffimmi Brugsen-imilu akii agguaqatigiissillugit 6 procentimik appariaateqarsimasut. Brugsen-imi, Pisiffimmi, Pilersuisumi Sparimilu nioqqutissat 200-nit amerlanerusut akii ”Atuisumi” septembarimi saqqummersumi avammut tusarliunneqarsimapput, tassungalu ilanngullugu saqqummersinneqarsimalluni titarneq atorlugu takussutissiaq, tassani takutinniarneqarsimalluni assartuinerup iluarsartuussiffigineqarnerata kingornagut nioqqutissat aalajangersimasut akimikkut qanoq appariaateqarsimanersut.

 

Inuussutissanut Siunnersuisoqatigiit

Peqqinnissamut Naalakkersuisup 2003-mi ukiaanerani Bo Vestergaard (BV) Inuussutissanut Siunnersuisoqatigiinnut – siunnersuineq aamma nerisassat aamma aalataarneq - pilersinneqaqqittunut ilaasortassatut toqqarsimavaa. Inuussutissanut Siunnersuisoqatigiit suliassaraat nerisassat aalataartarnerlu pillugit inuiaqatigiit peqqissusiannut siuarsaataasinnaasunik alloriaatissaasinnaasunik naalakkersuisunut ilaaso tamut siunnersuuteqartarnissaq. Nerisassat akillu, ussassaarutit meeqqanut inuusuttunullu sunniisarnerat kiisalu atuisut tungaannit isigalugu isummanik assigiinngitsunik immikkut ilisimasanik BV ilangaaqqusiissuteqartarpoq.

Siunnersuisoqatigiit inissitsitereernerata kingornagut BV Inuussutissanut Siunnersuisoqatigiinnut maannamut siulittaasuuvoq.

Nunat Avannarliit suleqatigiinnerat

Nunat Avannarliit suleqatigiiffiat Neytendasamtøkin-imi, Island-imi, Savalimmiunilu atuisut kattuffiinnit kiisalu Atuisut Siunnersuisoqatigiivisa allattoqarfiannit ilaasortaqartoq 2003-mi pilersinneqarsimavoq. Nordisk Konsument Udvalg-ip ukiumut marloriarluni ataatsimiittarnerinut atatillugu suleqatigiit naapeqatigiittarput. Errorsiviit privatimik eqqussuunneqartarnerat pillugu suliniut 2003-mi naammassineqarpoq. Suliniut Ataatsimoorullugu allattoqarfimmit piareersaavigineqarsimavoq, tassanilu qulaajaavigineqarsimallutik nammineerluni eqqussuisarnermi aningaasanut inatsisinullu tunngassuteqartut, tassa nunat illoqarfiisa pingaarnersaannut tikisitsisarnerni nammineerluni eqqussisarnerup aningaasatigut inatsisitigullu nalinginnaasumik atuisut pisisarnerannut naleqqiullugit sunniutigisartagaat. Errorsivinnik privatimik eqqussuisarneq pillugu allakkiaq Atuisup decembarimi saqqummernerani tamanut tusarliunneqarsimavoq. Inuiaqatigiinni inuttakitsuni atuisut unammilleqatigiinnermullu oqartussaasut assigiinngitsut imminnut katigunneqarsinnaanerat pillugu pitsaaqutinik ajoqutinillu nalunaarusiorniarnermut Savalimmiuni atuisut kattuffiat suliniummut siuttuutitaavoq. Naatsorsuutigineqarpoq nalunaarusiap 2004-mi ukiup sisamararterutaani siullermi naammassineqarumaarnissaa.

Atuisut Siunnersuisoqatigiivi inuiaqatigiinni

Ukiup ingerlanerani atuisut pisinnaatitaaffii inatsisillu atuisunut tunngassuteqartut pillugit Atuisut Siunnersuisoqatigiivisa suliniutigisarsimasai pillugit Siunnersuisoqatigiit allattoqarfillu arlaleriartarlutik tusagassiuutitigut tusarliussisarsimapput. Tusagassiuutitigut nalunaarutit tusagassiorfinni nassiussivigineqartuni tigulluarneqartarsimapput. Tamanna takuneqarsinnaasarsimavoq nassiussereernerup kingornagut tusagassiuutitigut nalunaarutit tusagassiorfinni sammineqartarnerisigut, tamannalu aamma takussutissaasarsimavoq atuisunut tunngassuteqartunik tusagassiuutit soqutiginnilluarnerannut.

Qulequttat tusagassiuutitigullu nalunaarutit tusagassiorfinni oqallisigineqarsimasut ilaatigut makkuupput:

Kalaallit nerisassaataasa nalunaaqutsersorneqartarnerat

Siunnersuisoqatigiit Kujataani ataatsimiinnerannut atatillugu Olga Poulsen-ip oqaatigisimavaa kalaallit nerisassaataasa pitsaanerusumik nalunaaqutsersuiffigineqartarnissaannut pisariaqartitsineqartoq. Taannalu tunngavigalugu Atuisartunut Siunnersuisoqatigiit kissaatigaat, inatsimmi nalunaaqqutersuisarneq pillugu piumasaqaateqartoqassasoq, tunisinerup ullua nalunaaqutsersuinermi allassimassasoq - ullorlu poortorneqarfia pinnagu, taamaalillunilu atuisup nioqqutissap pisoqaassusaa ilisimalissammagu.

Cigarittit akii

Atuisup decembarimi saqqummernerani ilanngutassiap takussutissiorfigisimavaa ullormut cigaritsit 20-it pujortartaraanni tamanna ukiut 1-5-it ingerlaneranni aningaasatigut qanoq naleqarnersoq. Atuagassiami assersuusiorfigineqarsimavoq aningaasat taakkorpiaat atorlugit suut allat pissarsiarineqartarsinnaagaluarnersut. Atuagassiaq Qanoruumi issuaavigineqarpoq.

Radiukkut aallakaatittakkat

Nunaqarfinni niuertut 7. – 11. marts isumasioqatigiissinneqarnerinut atatillugu atuisunut siunnersorti Anne Sofie Hardenberg Kangaatsiami Kangerlummilu nunaqarfinni niuertut peqatigalugit Avannaata Radioatigut apersorneqarput. Silarsuarmi tamarmi Atuisut ulluanni apersuineq taanna aallakaatinneqarpoq. Radiukkut aallakaatitassiami tassani sammineqarpoq Pilersuisup A/S-ip Atuisullu Siunnersuisoqatigiiffiata nutaamik suleqatigiilernerat, kiisalu tamatumani neriuutigineqartut suunersut. Ulloq taanna

Olga Poulsen aamma Kujataata Radioatigut apersorneqarpoq, tassanilu eqqartorneqarpoq Atuisut Siunnersuisoqatigiivisa suut suliarisarneraat.

Toqqaannartumik kalaallisut aallakaatitamut allattoqarfik 17. marts KNR-radiomit qaaquneqarpoq qulequtarineqarluni: ”Isumaqarpunga” – nalunaaquttap akunneranik ataatsimik sivisussuseqartoq. Sammineqartoq tassaavoq: ”Atuisut Siunnersuisoqatigiiffiata suut suliareqqissavai”.

Atuisunut siunnersorti Anne Sofie Hardenberg aamma allaffimmiuuneruneq Kristine Lyberth aallakaatitassiamut peqataapput atuisullu apeqqutissaqartut akissuteqarfigisarlugit. Aallaqqaammut isumaasimagaluarpoq tusarnaaqataaginnassasut. Kissaatitut saqqummiussuunneqarput; nuna tamakkerlugu atuisut isumasioqatigiissinneqarnissaat, kalaalimineerniarfiit pitsanngorsaavigineqarnissaat, uumasut nakorsaasa misissuisarnissaat, sukkortunut pisiassat amerlanerulersinneqarnissaat, kalaalimernit akisuallaarnerat, aammalu Siunnersuisoqatigiit kalaalimernit akiisa pinngortarnerannik misissuisinnaanersoq. Taakkua saniatigut ujartorneqarpoq Pilersuisoq A/S-mi nioqqutissanik neqerooruteqartoqartarnissaa, kiisalu sakkut akiisa misissuiffigineqarnissaat.

Avannaata Radioatigut toqqartumik aallakaatitassiamut atuisunut siunnersorti decembarimi peqataavoq, aallakaatitsinermi tassani tusarnaartartup piumasaqaatigalugu nunaqarfinnut siulersuisut sapinngisamik piaarnerpaamik atuisunut tunngassuteqartunik suliunnaarsinneqarnissaat, tassa tusarnaartartoq taanna isumaqarmat tamanna taakkua suliassaannut attuumassuteqanngitsoq.

Atuisartut Siunnersuisoqatigiit 2003-imi naatsorsuuttai

 

 

Ataatsimut allatseqarfik

31.12.2003

 

 

2.452.842

Missingersuutit

t.kr.

 

2.250.000

Unammileqatigiinnermut Ataatsimiititaliaq

291.675

626.000

Katillugit

2.744.517

2.876.000

 

Atuisartunut Siunnersuisoqatigiit aammalu Maalaruteqartarfittut Ataatsimiititaliaq

 

 

Nutserinerit il.il.

20.934

 

Ataatsimiinnernut aningaasartuutit

7.255

 

Nunani avannarlerni suleqatigiinneq

49.080

 

Siunnersortit, inatsilerituut, naatsorsuusserisoq il.il

2.798

 

Saqqummersitaq, quppersagaq

21.983

 

Angalanerit, ullormorsiat, hotel

325.268

 

Atuisoq

237.244

 

Katillugit

664.562

824.000

Ukiumut aningaasartuutit katillugit

3.409.079

3.700.000

Atuisut Siunnersuisoqatigiiffiata allattoqarfia

Ulloq 31.03.2003 allaffimmiuuneq Kristine Lyberth atorfimminit tunuarpoq. Fuldmægtig, Morten Wiegand atorfimminit tunuarpoq 31.12.2003-mi. Atorfinitsinneqarnissaanik isumaqatigiissuteqarfigineqarpoq Cand.merc.-jur. Troels Linderoth Hansen, taannalu fuldmægtigitut 1. februar 2004-mi ikkutissaaq.

Ataatsimoorullugu allattoqarfiup 31.12.2003-mi atorfilittai ukuupput:

  • Niels Peter Gundelach, Allattoqarfiup pisortaa
  • Bo Vestergaard, Fuldmægtigi
  • Anne Sofie Hardenberg, Siunnersorti