Siulequtsiussaq

Isumaginninnermi Naammagittaalliuuteqartarfik, isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 10 imm. 5 naapertorlugu Naalakkersuisunut (Inatsisartunut) ukiumoortumik nalunaaruteqartarpoq.

Nalunaarummi qaammatisiutit malillugit ukioq malinneqartarpoq aammalu Isumaginninnermi Naammagittaalliuuteqartarfiup atuunnera, naammagittaalliuutit tiguneqartut aamma suliat naammassineqartunut kisitsisitigut paasissutissat pillugit naatsumik nassuiaammik imaqarluni.

Nalunaarut Isumaginninnermi Naammagittaalliuuteqartarfiup nittartagaani: maalaarut@nanoq.gl aamma aua@nanoq.gl takuneqarsinnaavoq.

Isumaginninnermi Naammagittaalliuuteqartarfiup, nalunaarutip nittartakkamut ikkunneqarnera pillugu taamaallaat kommunit, Kanukoka, Inatsisartut Ombudsmandiat, Rigsombudsmandi aamma Isumaginninnermut Ilinniarfik ilisimatissavai.

Isumaginninnermi Naammagittaalliuuteqartarfiup Allattoqarfiata isumaqatigiissuteqarneq malillugu ukiumoortumik nalunaarutip assilinera pappialanngorlugu tunniussinnaavaa imaluunniit nassiussinnaallugu.

Isumaginninnermi Naammagittaalliuuteqartarfik imatut attaveqarfigineqarsinnaavoq:

Najugaq:

Imaneq 29, 1, Postboks 689, 3900 Nuuk

Mail: maalaarut@nanoq.gl

Oqarasuaat: 32 80 33

Fax: 32 78 50

Naja Joelsen

Siulittaasoq

Naammagittaalliuuteqartarfimmut inatsisitigut tunngaviusoq

1980-imi Isumaginninnermi Naammagittaalliuuteqartarfiup atuunnera aallartippoq.

Isumaginninnermi Naammagittaalliuuteqartarfiup aalajangiisinnaatitaanera isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 8, imm. 1-imi aamma 2-imi allassimavoq.

Isumaginninnermi Naammagittaalliuuteqartarfik, isumaginninnermi maleruagassat malillugit kommunit imaluunniit Ilaqutariinnermut, avatangiisinut, ilageeqarnermut naligiisitaanermullu naalakkersuisoqarfik (siornatigut Isumaginninnermi Naalakkersuisoqarfik) aalajangiinerannut naammagittaalliuuteqartarfiuvoq.

Naammagittaalliuuteqartarfiup atuunnera peqqussummi §§ 9 – 11-imi erseqqinnerusumik inatsisitigut maleruagassaqartinneqarpoq.

Isumaginninnermi Naammagittaalliuuteqartarfik pillugu nalinginnaasumik

Isumaginninnermi Naammagittaalliuuteqartarfik isumaginninnermut suliassaqarfimmi nunami allaffissornikkut naammagittaalliortarfittut qullersaavoq.

Suliassat ataasiakkaat qanoq suliarineqartassanersut aalajangiiffigineqartassanersullu pillugu, ilitsersuutinit aamma oqartussaasunit allanilluunniit oqaaseqaatinut tunngatillugu arlaannaannulluunniit attuumassuteqanngitsumik allaffissornikkut, eqqartuussivimmut assingusumik oqartussaasuuvoq.

Isumaginninnermi Naammagittaalliuuteqartarfiup ilaatigut suliassaraa aalajangiinissaq:

  • siusinaartumik pensionisianut aamma utoqqalinermi pensionisianut suliani, Nunani avannarlerni isumaqatigiissut malillugu pensionisianut ilanngullugit
  • pisortanit ikiorsiissutinut tunngasut suliat
  • meeqqanut inuusuttuaqqanullu pineqaatissiinermi suliat, kiisalu allamut inissiinerit
  • Ineqarnermut tapiissutit
  • isumaginninnermut suliassaqarfimmi suliassani allani
  • Suliffeqarnermi ikiorsiissutit
  • Suliat paaqqinnittarfinnut tunngasut
  • Suliani isumaginninnermut suliassaqarfimmi aningaasartuutit akilerneqarnissaat pillugu kommunit marluk isumaqatigiinngissutigisaanni

Taamaattumik Isumaginninnermi Naammagittaalliuuteqartarfiup aalajangiineri aallaaviatigut inaarutaasuupput aammalu oqartussaasunut allanut naammagittaalliuutigineqarsinnaanatik.

Suliaqarnermi tamanna isumaqarpoq, aalajangiinerit amerlanerit isumaginninnermut suliassaqarfimmi kommuninit aalajangiiffigineqarsimasut innuttaasut naammagittaalliuutigisinnaagaat.

Isumaginninnermi Naammagittaalliuuteqartarfiup aamma siunertaraa kommuunini assigiimmik suleriaaseqarnissaq, tassuunakkut suliat assigiimmik nalilersorneqartarnissaat, apeqqutaanani kommunimi sorlermi aalajangiisoqarnersoq.

Isumaginninnermi Naammagittaalliuuteqartarfiup aamma siunertaraa, aalajangiinerit, pingaartumik tunngaviusumik aalajangiinerit, erseqqissumik iluatinnaateqartumillu kommuninut allanullu sulianut soqutigisaqartunut ilitsersuutitut suliaqarnermullu tunngavissiisassasut.

Taamaalilluni Isumaginninnermi Naammagittaalliuuteqartarfik, illoqarfinni sumiluunniit najugaqaraluaraanni sukumiisumik eqqortumillu aalajangiisoqartarnissaanut qulakkeerisooqataasarpoq.

2013-imi Isumaginninnermi Naammagittaalliortarfiup akisussaaffeqarfia annertusivoq, tassani 1. december 2013-imi atuutilermat Isumaginninnermik suliassaqarfimmi pissaanermik atuineq pillugu Inatsisartut Inatsisaat nr. 1, 21. november 2013-imeersoq. Inatsit malillugu Isumaginninnermik Naammagittaalliuuteqartarfik pisortatigut maalaaruteqartarfiummat, pissanganassaaq inatsip susassaqarfia malinnaavigissallugu, taassumalu malitsigisaanik naammagittaalliuutit tassunga tunngasut amerlassusaat.

Katitigaanera

Isumaginninnermi Naammagittaalliuuteqartarfik ukiumi 2013-imi ataatsimik siulittaasoqarpoq inatsisilerituujusumik aammalu sisamanik ilaasortaqarluni isumaginninnermut inatsisinik ilisimasaqartunik aammalu isumaginninnermi naalakkersuinikkut pissutsinik paasisimasaqartunik.

Siulittaasoq:

Naja Joelsen, Nuuk

Ilaasortat:

Nukákuluk Kreutzmann, Nuuk

Ânise Svane Johansen, Sisimiut

Lorette Henriksen, Nuuk

Ole Christiansen, Nuuk

Sinniisussat:

Søren Thestrup, Naja Joelsen-imut sinniisuusoq.

Johannes Rolskov, Nukàkuluk Kreutzmann-imut sinniisuusoq.

Tukummeq Qaavigaq, Ole Christiansen-imut sinniisuusoq.

Emilie Olsen, Lorette Henriksen-imut sinniisuusoq.

Ukiumoortumik Nalunaarusiami 2012-imeersumi allassimaneratuut, Ânise Svane Johansen sinniisoqanngilaq.

Isumaginninnermi Naammagittaalliuuteqartarfik ukiumi nalunaaruteqarfiusumi 2013-mi arfinileriarluni naammagittaalliuuteqartarfimmi ataatsimiippoq: 15. februar, 19. april, 28. juni, 30. august, 25. oktober aamma 16. december.

Ataatsimiinnerni tamaginni suliassat 15-44-t akornanniittut suliarineqarput.

Suliat amerlanerussuteqarnikkut aalajangiiffigineqartarput. Tassa imaappoq Isumaginninnermi Naammagittaalliuuteqartarfiup aalajangiineri siulittaasumit aammalu ilaasortatut toqqagaasunit aalajangiiffigineqartarput. Suliat ataasiakkaat tamarmik ataatsimiinnermi misissorneqartarput aalajangiiffigineqartarlutillu.

Naammagittaalliuteqartarfiup 2013-mi suliaqarnera

Isumaginninnermi Naammagittaalliuuteqartarfiup ukiumi 2013-mi, aalajangiinerit suli qaffasissumik pitsaassuteqartinnerisigut, innuttaasut inatsisitigut pisinnaatitaaffiisa qulakkeernissaat suli sammivaa.

Isumaginninnermut Naammagittaalliuteqartarfiup ukiut siuliisulli suliat kukkunillit 15-t utertippai Kommunini sullissinerup amigarnerujussua peqqutaallluni.

2013-mi naammagittaalliortarfiup suliassat 411 tiguai, suliallu 391-t inaarsarlugit, Naammagittaalliuuteqartarfiup oqaluttuarisaanerani, ukiumi ataatsimi suliat inaarsakkat aatsaat taama amerlatigipput.

Agguartaarinermi suliat suliarineqartarput ukiup ataatsip iluani.

Assersuussinermi erseqqissarneqarsinnaavoq, Isumaginninnermi Naammagittaalliortarfiup 2012-mi suliassat 389 tigusimammagit 273-llu naammassisimallugit.

Immikkuullarissumik sullissinermi piffiit pillugit:

Qulaani takuneqarsinnaasutut Isumaginninnermi Naammagittaalliortarfiup sullissinerup sivisussusaa 2013-mi sivikillissinnaasimanngilaa.

Sivisuallaartumik sullissineq annermik peqquteqarpoq, pisuni arlariinni, paasissutissanik Kommunit nassiussimaataartarneri, allattoqarfimmiit noqqaasoqaraangat. Suliani arlariinni paasissutissanik nassiussisoqanngitsuuittarpoq naak eqqaasitsissutinik/nukingisaarutinik arlalinnik nassiussisoqartaraluartoq. Allattoqarfiullu sullissisunut, socialchef-inut borgmesterinullu arlaleria saaffiginnittaraluarnerisigut, allakkatigut oqarasuaatikkullu, suli paasissutissanik eqqortunik kommuniniit noqqaaniarneq ajornakusoortarsimavoq.

Naammagittaalliuuteqartarfiup 15. Februar 2013 ataatsimiinnerminni aalajangermata, allattoqarfik nukingisaarummik ataasiarluni nassitsisalissasoq, suliat ataatsiakkaat pillugit, nukingisaarummilu oqaatigineqassasoq, paasissutissanik nassitsisoqanngippat, paasissutissat pigisat/tigummisat tunngavigalugit aaliangiisoqartalissasoq, juni 2013-mi suliani aalajangiisoqarpoq annermik naammagittaalliortut paasissutissatai tunngavigalugit kiisalu inuit allattorimaffianiit paasissutissat tunngavigalugit.

Tamakkulu nassatarisinnaavaat aaliangiussat kommuninut ulapinnarninngortitsisinnaasut. Kisiannili taamaakkaluartoq kommuninit qisuariartoqangaarsimanngilaq.

Immikkuullarissumik suliat innarluutilinnut tunngasut

Isumaginninnermut Naammagittaalliortarfiup ukiumoortumik nalunaarutaa 2011-mut tunngasumi taaneqarpoq, naammagittaalliuutit annermik innarluutilinniit ikiliartorneri ernumanartutut isigai, tamatumani kisitsisit annertujaamik apparsimammata, aaliangiisinnaanermut piginnaatitaaffik kommuninut tunniunneqarmat Ilaqutareeqarnermut, Avatangiisinut, Ilageeqarnermut Naligiisitaanermullu Naalakkersuisoqarfimmiit. Tamanna illuaaneq allanngunngilaq 2012-mi, naammagittaalliuutit tassani arfineq pingasuummata. Assinganik 2013-mi naammagittaalliuutit 13-iusimapput. Ukiut siulii assigalugit, naammagittaalliortuusimapput inersimasut annertuumik timimikkut innarluutillit imaluunniit meeqqanut annertuumik timimikkut innarluutilinnut angajoqqaajusut. Imaappoq, Isumaginninnermut Naammagittaalliuuteqartarfik eqqarsartaatsimikkut innarluutilinniit naammagittaalliuutinik tigusaqarsimanngilaq.

Isumaginninnermi Naammagittaalliortarfiup Ilaqutareeqarnermut Inatsisinillu Atortitsinermut Naalakkersuisoqarfik eqqaaseqqippaa tamanna sianigeqqullugu.

Isumaginninnermut Naammagittaalliuuteqartarfiup Ilaqutareeqarnermut Inatsisinillu Atortitsinermut Naalakkersuisoqarfik tamanna pillugu paasiteqqippaa.

Immikkuullarissumik malinninngittarneq pillugu:

Isumaginninnermut Naammagittaalliuuteqartarfik 2013-mi innuttaasunit arlalinnit saaffiginnissutinik tigusaqaqqippoq, qanoq iliussanerlutik nalornisut Naammagittaalliortarfimmit aalajangikkat kommuninit malinneqanngikkaangata. Saaffiginnissutini tamani Isumaginninnermut Naammagittaalliortarfik nalilersuiniartarsimavoq suna tamatumunnga pissutaanersoq. Pisuni paasinngitsuuinermik peqquteqarsinnaasuni, allattoqarfik kommuninut saaffiginnittarsimavoq. Pisuni allani allattoqarfik ajornartorsiummut naleqquttumik aaqqiiniartarsimavoq. Ajornartorsiut tamanna Isumaginninnermut Naammagittaalliortarfiup allattoqarfiata eqqummaariffiginiarpaa, nalilersorlugulu allatigut iliuuseqarfiginissaa pisariaqarnersoq.

Isumaginninnermi Naammagittaalliuuteqartarfimmi 2013-imi aalajangiinerit agguataarnerat

Naammagittaalliortarfiup ataatsimiinnerini ukunani aalajangiisoqarpoq:

Utoqqalinermi pensionisiat aamma siusinaartumik pensionisiat: suliat 42-t

Naartunermi, erninermi meeravissiartaarnermilu sulinngiffeqartarneq ullormusiaqartarnerlu: suliat 5

Pisortanit ikiorsiissutit: suliat 92

Suliffeqarnermi ikiorsiissutit: suliat 7

Meeqqanut inuusuttunullu ikiorsiissutit: suliat 25

Inunnut annertuumik innarluutilinnut ikiorsiissutit: suliat 5

Meeqqanut tapiissutit: suliat 2

Ineqarnermut tapiissutit: suliat 3

Meeqqanut akilersuutit: suliat 7

Paaqqinnittarfiit kommunillu iluminni akilersuinissamik pisussaaffii: suliat 1

Assigiinngitsut: suliat 0

Katillugit: suliat 0

Saniatigut Siulittaasoq aaliangiivoq suliat 84

Allattoqarfiup tigujumanngisai suliat 96

Allattoqarfiup sullissinermi kukkuneqarnera pissutigalugu utertippai suliat 15

Suliat allat suliat 0

Katillugit suliat 391

Qulaani taaneqartutut suliat 15-it kukkunilittut kommuninut utertinneqartariaqarsimapput. Tassanilu pineqarpoq annertuumik sullissinermi kukkusoqarsimanera, innuttaasumut inatsisitigut isumannaatsuunissamut assortuisuummata. Taamaattumik pisariaqarsimavoq suliat utertinnissaat kommunillu peqqullugit suliat suliareqqinneqassasut nutaamillu aaliangiisoqassasoq, taamaalilluni sullissineq aaliangiinerlu sullissinermi inatsit piumasaqaatit malillugit naammassiniassammata.

Naammagittaalliuuteqartarfiup suliassaq tigujumanngikkaangagu, tamanna peqquteqarsinnaasarpoq naammagittaalliornissamut piffissarititaasoq qaangerneqarsimappat imaluunniit Nammagittaalliuuteqartarfik sullissinissaminut pisinnaasai amigartut; tassani peqqutaasinnaalluni suliami aaliangiisoqarsimannginnera Isumaginninnermut Naammagittaalliuuteqartarfimmut naammagittaalliuutaasinnaasumik, imaluunniit suliaq pisortanit allanit suliarineqartussaanera peqqutigalugu.

Isumaginninnermi Naammagittaalliuuteqartarfiup ukioq 2013-mi tunngaviusumik aaliangikkat 38-it (P-afgørelser) saqqummiuppai, Isumaginninnermut Naammagittaalliuuteqartarfimmut naammagittaalliuutigineqarsinnaasunut assigiinngitsunut agguataarlugit. Aaliangikkat imarisai tamarmik naammagittaalliortarfiup nittartagaani atuarneqarsinnaapput aua@nanoq.gl.

Tunngaviusumik aaliangikkat ilai uani ukiumoortumik nalunaarusiami naggataagut saqqummiunneqarput.

Isumaginninnermut Naammagittaalliuuteqartarfik 2013-mittaaq saqqummiussaqartalerpoq aaliangikkanik najoqqutassiassatut atugassiat (vejledende afgørelser / V-afgørelser), tassaasut susassaqarfinni assigiinngitsuni aaliangiinerit nalinginnaasut, taamatullu innuttaasunit kommuninilu sulisunit atorluarneqarsinnaasut. Katillugit 13-it saqqummiunneqarput, taakkulu Naammagittaalliortarfiup nittartagaani atuarneqarsinnaapput, uani: www.aua.gl.

Isumaginninnermi Naammagittaalliuuteqartarfiup Allattoqarfia

Allattoqarfiup Isumaginninnermi Naammagittaalliuuteqartarfimmut allattoqarfimmi suliassat isumagisarai. Allattoqarfik Siunnersuisoqatigiinnut Aalajangiisartunullu Aqutsisoqarfiup ataaniippoq.

2013-mi allattoqarfimmi Isumaginninnermut Naammagittaalliortarfimmut sullissisuupput inatsisilerituut pingasut allaffimmiullu marluk.

Allattoqarfiup suliassarai:

  • Naammagittaalliutip tigusimaneranik uppernarsaaneq
  • naammagittaalliornissamut piffissaliussaq tunngavigalugu suliassat suliarineqarnissaasa itigartitsissutigineqarnerat
  • aalajangiisinnaatitaannginneq pissutigalugu itigartitsineq
  • paasissutissanik pissarsiniarneq
  • naammagittaaliuuteqartarfimmi ataatsimiinnissamut suliassanik piareersaaneq
  • naammagittaalliuuteqartarfimmi ataatsimiinernit imaqarnilianik allanneq
  • aalajangiinerit nassiussornissaat
  • tunngaviusumik aalajangiinerit tamanut ammasumik nittartakkami saqqummiunneqarnissaat

Allattoqarfiup aamma naammagittaalliuuteqartarfiup ataatsimiinnissaasa aaqqissuunnissaat isumagisaraa.

2011-mi Isumaginninnermi Naammagittalliortarfiup Ikiu peqatigalugu suleqatigiinnissamut isumaqatigiissutaa, tassani Naammagittaalliortarfiup sullissisua ataaseq IKIU peqatigalugu illoqarfinnut nunaqarginnullu assigiinngitsunut tikeraartoq, kiisalu sullissisup kommunimi sullissisut, politiit eqartuussiveqarfiillu paasititsiniaavigisimallugit, 2013-mi ingerlateqqinneqanngilaq.

Taamaattorli Siunnersuisartunut Aalajangiisartunullu Aqutsisoqarfimmi immikkoortortat assigiinngitsut, Sulisilluni Ajoqusernerit pillugit Sullissivik IKIU-lu peqatigalugit paasititsiniaallutik umiarsuarmik Qeqertarsuup tunuani nunaqarfinnut illoqarfinnullu angalapput. Taamaasillutik iluatsittumik piffiit arlallit tikinneqarpiarneq ajortut, piffissap sivikitsup iluani tikissinnaasimavaat. Tassani ilaatigut paasititsissutigineqarput kommuniniit aaliangikkanut, isumaginninnermut tunngasunut, maalaarsinnaanermut periarfissat. Amerlanerit maalaarsinnaanermut periarfissat ilisimasimanngilaat, nalinginnaasumillu kommuniniit maalaarnissamut ilitsersuisoqartarnani.

Innuttaasut arlallit soqutiginnillutik apeqqutilleerusussimapput, kiisalu siunnersorneqarnissamik ilitsersuunneqarnissamillu kissaateqarsimallutik.

Aammattaaq allattoqarfimmiit sulisoq ataaseq KANUKOKA-p Københavnimi ataatsimeersuarnerani peqataavoq, ilaatigut kommunini socialchef-it socialrådsformand-illu, aammalu Ilaqutareeqarnermut Inatsisinillu Atortsitsinermut Naalakkersuisoqarfimmiit danskillu kommuniinit peqataaffigineqartumut.

Ataatsimeersuarnermi immikkut sammineqarput innarluutillit pillugit suliat, kommunillu ataasiakkaat paasititsipput qassinik sullitaqarnerlutik il. il. Tassunga atatillugu Isumaginninnermut Naammagittaalliuuteqartarfik kommuninut erseqqissaavoq, paasissutissanik noqqaassutgineqartunik nassiussisarnissamik kiisalu Naammagittaalliuuteqartarfiup aaliangigai malissallugit, pisussaaffeqarnerarlugit.

Aamma allattoqarfiup sulisui marluk maj-imi Sisimiuni sullissisartunut pikkorissartitsipput pisortat ikiorsiissutaanut tunngasumik. Pikkorissaaneq ullunik marlunnik sivisussuseqarpoq, sullissisartunillu 20-nit peqataaffigineqarluni kiisalu isumaginninnermi aqutsisunit marlunnit. Pikkorissaaneq ilaatigut ataatsimut atuartitsinertut ingerlanneqarpoq, ilaatigullu eqimattakkuutaartumik suliassanik ingerlatsisoqarluni. Peqataasut tunniusimaqaat, pikkorissarnerlu nuannersumik qisuariarfigineqarsimalluni.

Assinganik sulisut Sisimiuni augustimi sulianut meeqqanut tunngasunik pikkorissartitsipput. Taannattaaq pikkorissarneq ilaatigut ataatsimoorussamik eqimattakkuutaartumillu suliaqarnertut ingerlanneqarpoq. Tassanissaaq pikkorissarnermi peqataasut amerlasimapput, akuulluarlutik soqutiginnillutillu. Kissaatigineqarsimavoq inunnik isumaginninnerup iluani pikkorissarnernik allanik ingerlatsisoqassasoq.