AALAJANGIISIMAVOQ

Ineqarneq pillugu Maalaaruteqarfik isumaqarpoq, Inissiaatileqatigiit erngertumik igaffiit aammalu uffarfiit nutartissagaa. Tamanna pillugu maalaarutinni taperserneqarputit.

Nassuiaat:

Ineqarnermi attartuineq pillugu isumaqatigiissummi takuneqarsinnaavoq inissiaq Najugaq B-XX, Najugaqarfimmiittoq decemberip ulluisa sisamaanni 1998-imi iserterfigisimagit. Attartuinermut isumaqatgiissut illit aammalu XX piginnittut sinnerlugit atsiugaavoq. Attartuinermut isumaqatigiissummi allaqqanngilaq kina piginnittuunersoq aammalu suliassamut tunngasutigut Ineqarneq pillugu Maalaaruteqarfiup XX-miit takussutissatut pissarsiatsinni takuneqarsinnaani kinarpiaq piginnittuunersoq.

Allakkani martsip ulluisa 15-iani 2011-imi igaffiup nutarternissaa qinnuteqaatigivat. Qinnuteqaatit suliassap pappiliartaaniinngilaq.

Inissiaatileqatigiit majip ulluisa 27-iani 2011 allakkatigut nalunaarfigaatit, taamanikkut aningaasameertoqarnera pissutigalugu periarfissaqanngitsoq igaffiit nutartertissallugu, ilanngullugu Inissiaatileqatigiit nalunaarput qinnuteqaatit suliareqqinniarlugu ukiup sisamararterutaata naalernerani.

Allakkani junip ulluisa arfineq-pingajuanni 2012 paniit illit sinnerlutit pisinnaatitsissummik tunineqareerluni Ineqarneq pillugu Maalaaruteqarfimmut saaffiginnissimavoq illit inissianni assigiinngitsunik aaqqitassat pillugit.

Allakkani ilaatigut allaqqavoq martsip ulluisa 15-iani 2011-imi qinnuteqaatigigit inissiat nutarteqqullugu, inissiat Najugaq B-XX, Najugaqarfimmiittoq, natiit aserfallassimaqisut suliaritinniarlugit nutarterlugit, iikkat qalipatsillugit aammalu sikaaviit amusartullu igaffimmiittut taarsertinniarlugit. Akissutigineqartumi allaffigitipputit aalajangiisoqarsimasoq qinnuteqaatit itigartinniarlugu. Ilanngullugu aamma nalunaarfigitipputit, piffisaq takulaariarlugu, aningaasassaqalerpallu naammattunik, taarsersugassat suliaritikkumaartut. XX-imiit pulaartoqarsimavoq natiillu assilitissimapput, igaffimmi amusartut assilisimavaat, taamaattoq sikaaviit assilitinneqanngillat naak taakkua aamma ilanngullugit qinnuteqaatigisimagitit taarsersoqqullugit. Panippit pissutsinik misissuereermat, paasilersimavaa, inatsisit atortuusut malittaralugit illiusoq iikkanik qalipaasussaasoq aammalu allaat natiit nutaamik qalilersortariaqassallugit.

Illit paniillu allakkassinni tikkuartorsimavarsi natiit ima aserfallassimatigisut allaat, natikkut pisuinnaraanngassi taava alersisi qasertuinnanngortarput, natiit aserfallassimanermik. Tamanna pillugu nateq linoleumi-mik qallertinniarlugit qinnuteqarsimavusi, qaavatigut (qisungasumik) isikkoqartillugu.

Ilanngullugu tikkuartorparsi, Inissiaatileqatigiit itigartitsimmatali ukioq ataaseq qaangiutereersoq, taamaalillusi naatsorsuutigilerissi qinnuteqaatersi akissaqartinneqalersimassasoq. Kiisalu aamma tikkuartorparsi maalaaruteqarnissinni tunngaviusoq paniit pisortatigut inatsiseqarnermi (offentligretlig lovsamling) kapitali 7, § 45, imm. 2, tassanilu aallaqqammat nutarterinissamik periarfissaqarmat sikaaviit amusariallu eqqarsaatigalugit, kiisalu igaffik tamaat natiillu aamma inatsisini pineqarmata, naak Illuutileqatigiit allassimasut ilissi nammineq iluarsartuussagissi.

Aperivusi natertaartoqarsinnaanersoq aammalu sikaaviit amusariallu taarsertinneqarsinnaanersut.

Ilanngullugu aamma suliassamut nalunaarutigineqarpoq matu aalajangersimasoq inissianni taarsertikkusukkit.

Allakkani julip ulluisa qulinganeersuni Illuutileqatigiit Ineqarneq pillugu Maalaaruteqarfik imatut akissuteqarfigivaat, imaattumik:

”1. Illuutileqatigiit matu takusarniaraat

2. Illuutileqatigiit sanasunik bestiiliisimasut natiit aaqqeqqullugit

3. Illuutileqatigiit sapaatip akunnerani 28-iani 2012-imi attaviginiaraatit igaffik takusarniarlugu nalilersorniarlugulu suut taarsersugassaanersut.

4. Januarip aallaqqaataa 1995 inissiamut isertersimavutit, taamaalillutit illup ilua aserfallalasimanera tamaat nammineq akisussaaffigigit aammalu qalipannissaa nammineq akilissagit. Inissiaatileqatigiit tassunga tunngatillugu tikkuartorpaa, akissutitut ilinnut allanneqarsimasoq kukkunerusoq: taamani oorissaaleqineq pillugu iluarsartuunneqarsinnaanngitsut, tamanna kukkunerusoq”.

Isumaqarsimagassi suliassaq isumaqatiginniutaasinnaasoq, saaffiginnissutersi Ineqarneq pillugu Maalaaruteqarfimmiit piffissami aalajangersimasumi uninngatinneqarallarsimavoq.

Junimi 2013-imi Ineqarneq pillugu Maalaaruteqarfik ilissinniit saaffiginnissutaaqqimmat suliassaq tigoqqissimavaat, Inissiaatileqatigiillu junip ulluisa tallimaani 2013-imi e-mailikkut imatut aperisimavaat:

”Matu takusarneqarsimava? Iluarsartippa imaluunniit taarsersortippa+

Natiit iluarsartuunneqarpat?

Inissiaatileqatigiiffiup sullissivia attartortup igaffia takusarnerarpaa, taarsersugassallu nalilerlugit aammalu qanoq inerneqarpa?”

Inissiaatileqatigiiffik junip ulluisa 28-iani 2013 e-mail-erluni imatut akissuteqarpoq:

”XX ajoraluartumik matu takusarsimanngilaa. Taamattoq XX-iup sullissivia utaqqivaa Innuttaasoq A inissiaminut uternissaa, ulluni makkunani matu ammarneqarneq ajormat. Ruujorit pisoqalisut taarsersugassaapput, taamaalilluni errorsivittaarsinnaaniassammat. Taamaalinerani XX matu takusarniarpaa.

Natiit qillersarneqarsimapput aammalu amerneqarsimallutik lak-imik, tamanna pisimavoq inuuvissiortussaq tikitsinnagu attartuisup kissaatigimmagu attartuisup

inuuia sioqqullugu naammassissasoq. Taamani nalunaarutigineqarpoq natiit qillersarneqassappata, attartuisoq nuukkallattariaqartoq attartuisullu inuuissiornissaanut angumersisinnaanngitsoq vakant-issaqanngimmat. Taamaalilluni attartortumut isumaqatigiissutigineqarpoq ilaquttani nuukkallarfigissagai. Attartuisup amiisorlu nammineq isumaqatigiissimapput suliassaq naammassiinnarumaartoq inuuissiortitsisoqareerpat (XX tassunga akulerutinngilaq, qalipaasumiillu tusarparput). XX-up sullissinermi siulittaasua nalunaarutigaa Innuttaasoq assut naammagisimaaraa, allaallumi aggerluni qujajartorsimasoq. Igaffia nutartissaaq aammalu uffarfiani iigaq salinneqassalluni. Tamanna pisariulaarpoq qalipaataa katagalissappat, saleqqaartariaqassammat nutaamik qalipatsinnagu,

Aap igaffik takuneqareerpoq aamma igaffik nalilerneqarpoq nutartigassatut attartuisorlu suliarinerata nalaanni inimini najugaqaannarsinnaanngimmat, vakanterumallutik allattuiffimmut allatsissimavoq (vakant), massakkorpiarlu ulikkaaveqqapput inissiat oquttut amerlangaarmata.”

Oktoberip ulluisa qulaaluaanni 2013-imi Ineqarneq pillugu Maalaaruteqarfik Inissiaatileqatigiinnut paasiniaavoq susoqarsimanersoq piffissami qaangiuttumi. Inissiaatileqatigiit nalunaarutigaat, sanasumik noqqaasimallutik matu oqorsarneqarniassammat.

Inatsisitigut tunngavia:

§84 malillugu, imm. 1 nr. 5, inissianik attartuisarnermi tunngatillugu Inatsisartut peqqussutaanni nr. 2, majip 12-iani 2005 allassimavoq Ineqarneq pillugu Maalaaruteqarfik maalaarutinik suliaqarsinnaasoq aserfallatsaaliineq iluarsartuussinerlu eqqarsaatigalugit, §45 malillugu.

Attartuinermut peqqussutaasumi §48-imi allaqqavoq, attartuisitsisoq pisussaatitaasoq inissiaqarfik isumagilluassallugu aammalumi attartukkap illersorneqarsinnaasumik aserfallanneqassasoq. Teknikkikkut atortorissaarutit ikkussorneqarsimasut kuuffinnut, kiassarnermut, gassimut, imermullu ajunngitsumik atorneqarsinnaasunngorlugillu aserfallanneqassapput. Taamatuttaaq aamma attartortitsisup pisussaaffigaa innaallagiamut toortagassat, panelit, matserfiit, kiassaatit, sikaaviit ikkussukkat, illup atortui il.il. isumagissallugit. Nutarterinerit allatigulluunniit iluarsartuussinerit aserfallassimanermik pisoqalinermillu ajortissimasut ima akulikitsigisumik isumagineqartariaqarput, najugaqatigiiffiup tamaat pisariaqartitsinera aammalu attartukkap qanoq issusaa apeqqutaalluni.

Nalilersuineq:

Illup iluani qalipagassat ilinnut tunngatinneqarput, tamannalu aamma nassuerutigereerpat, tamannalu pillugu Ineqarneq pillugu Maalaaruteqarfik immikkoortoq pineqartoq suliarissallugu pissutissaqartinngilaa.

Paasisagut malillugit natiit illit naammagisannik nutarterneqarput, tamannalu pillugu Ineqarneq pillugu Maalaaruteqarfiup naamagittaalliutinniik peerpaa.

Ineqarneq pillugu Maalaaruteqarfik isumaqarpoq, Inissiaatileqatigiiffik XX piginnittoq sinnerlugu aserfallattaaliinissamut pisussaaffini eqquutsissimanngilaa.

Ineqarneq pillugu Maalaaruteqarfik isumaqarpoq, attartornermut isumaqatigiissutip oqaasertalersornera najoqqutaralugu, piginnittup kinaassusaa ersersinneqanngimmat taava uani suliassami tigussaasumi attartortitsisuusimassasoq.

Inissianik attartortitsisarnerneq pillugu Peqqussummi §45 imm. 1 aamma 2 malillugu, inissianik attartuisarnermi tunngatillugu allassimavoq attartuisitsisoq pisussaaffigigaa najugaqaqatigiit (ejendommen) attartukkallu imminnut illersorluarsinnaasumik aserfallanneqassasoq aammalu nutarterisoqarlunilu iluarsaanneqartassasoq ima akulikitsigisumik, pisariaqartitsineq naapertorlugu najugaqaqatigiiffik attartukkallu pitsaassusaat naapertorlugit.

Tamanna imatut paasisariaqarpoq, attartortitsisoq aallaaviatigut nammineq aalajangertassagaa, suna pisariaqavissumik aserfallanneqarlunilu iluarsaanneqartariaqalernersoq, aammalu iluarsartuussinissamut suliassaq qanoq tulleriaarnikkut naammassiniagassaanersoq.

Attartortitsisup aserfallattariaqartunik paasisaqarpat, taava attartortitsisup pisussaaffigaa iluarsagassartai suliaritissallugit, ajoqutaasoq aaqqeqqullugu.

Paasitinneqarnerput tunngavigalugu Ineqarneq pillugu Maalaaruteqarfik isumaqarpoq tunngavilersorneqareersoq tassaasoq, igaffiup aammalu uffarfiup iluarsartuunneqarnissaa 2011-imiit nutarterlugit suliarineqareersimasussaagaluartut.

Assinganik aamma atuutsinneqassaaq, matu pineqartoq, takusagassaagaluartoq nalilersoqqullugu, takusarneqareersimasussaagaluartoq aammalu ingerlaannartumik email-imik julip ulluisa qulinganni 2012-imi tigusaqaannartut takusarneqarsimassagaluartoq nalilersoreerlugulu.

Attartuisarnermut Peqqussutip piffissalerlugu imarinngilaa, qanoq sukkatigisumik suliarineqartariaqartut aaqqiivigineqartariaqarnersut, taamaattumik aallaavittut isigalugu, attartartortitsisup piaarnerpaamik aserfallannissaa isumagisariaqarpaa.

Inissiaatileqatigiiffiup aningaasaqarniarnikkut periarfissakinnini pissutigalugu ineqarfinni igaffiusumut uffarfiusumullu akissaqannginnera, Inissiaatileqatigiiffiup pisussaaffianik annikillisaataanngilaq, nutartigassat iluarsagassallu aserfallassimanermik pisoqalinermillu tunngaveqarpata.

Ineqarneq pillugu Maalaaruteqarfik taamaalilluni pingaartissimavaa, 2011-imiilli inissiap aserfallalersimanera maalaarutigisimagit. Inissiaatileqatigiiffik julip ulluisa qulinganni 2012-imi aammalu junip ulluisa 28-iani 2013-imi maalarutit ilumoornerarsimavaa.

Inissiaatileqatigiit tamanna pillugu attartortitsisoq sinnerlugu piaarnerpaamik iliuuseqapallassaaq igaffiup aammalu uffarfiup iluarsartuunnissaa pillugu, nalilersussallugulu, matu pineqartoq taarserneqartariaqarnersoq.

Aalajangiineq:

Inissiaatileqatigiiffik attartortitsisoq sinnerlugu ini attartugaq aserfallannissaa illersorneqarluarsinnaasumik isumagisimanngilaa.

Inissiap attartukkap inissiat allattugaataanut iluarsisariaqartunut ilanngussimanera Inissiaatileqatigiiffiup akisussaaffianiit peersissinnaanngilaa, Inissiaatileqatigiit qaqugumulluunniit aserfallassimasunut iluarsisariaqartunullu akisussaaffia attartuisitsisartutut allanngornavianngimmat.

Inissiaatileqatigiit attartortitsisoq sinnerlugu piaartumik isumagisariaqassavaat igaffiup uffarfiullu iluarsartuunnissaa nutarternissaalu imaluunniit inissiamik allamik tunisariaqarlutit.

Tamanna pillugu maalaaruteqarninni taperserneqarputit.

Maalaaruteqarnissamik ilitsersuut:

Ineqarneq Pillugu Maalaaruteqarfiup aalajangiussai allaffissornikkut aqutsisunut allanut oqartussaasunut maalarutigineqaqqissinnaanngillat, §86 imm.7 malillugu, Inatsisartut peqqussutaat nr. 2, majip 12-iani 2005-meersumi inissianik attartuisarneq pillugu kingusinnerusukkut allannguutitalimmik allanngortoq malillugu. Attartuisup attartortitsisullu akunnerminni isumaqatigiinngissutaat kissaatigineqassappat eqqartuussivinnut ingerlateqqinneqarsinnaapput, taamaattoqarniarpallu attartuisup eqqartuussivimmut aggeqqusissummik tunniussissaaq. Tamanna aamma atuutsinneqarpoq, allakkatigut attaveqaqatigiinneq il.il., attartuisup Inissiaatileqatigiiffianiit ingerlanneqarsimappat.

Ineqarneq Pillugu Maalaaruteqarfiup aalajangiussai namminersornerusunut kommuninullu ineqarnermut attartuisutut unioqqutinneqartussaanngitsumik atuutsinneqarpoq, § 86, imm. 6. najoqqutaralugu.

Naammagittaalliuuteqartarfik sinnerlugu

Innuttaasoq B

Ineqarneq pillugu Naammagittaalliuuteqartarfiup siulittaasua

Inissiaatileqatigiiffik XX allakkap mumiganik tunineqarpoq.

Lovgrundlag (GL):

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq

§ 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit aalaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.

Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.

§ 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.

2) Aserfallatsaaliuineq iluarsaassinerlu, tak. § 45.