AALAJANGIINEQ

Inissiaatileqatigiit XX (matuma kingorna Inissiaatileqatigiinnik taagorneqartut) oqoqalersimaneq pillugu misissuinerit pisariallit ingerlappai, misissuinermilu innersuussutaasut naapertorlugit pitsanngorsaalluni.

Tamatuma kingorna oqueruppoq.

Taamaasilluni inissiaatileqatigiit inigisavit silaannarissuunissaanut tunngatillugu naammaginartumik iliuuseqarsimannginnerarlugit maalaarutit akuerineqanngilaq.

Nassuiaat:

Inissiamik attartornissamut isumaqatigiissut januaarip 22-ani 2009 ulluligaq naapertorlugu, februaarip aallaqqaataani 2009 inissiaq Najugaq B-XX attartulerpat.

Inissiamut iserterninnut atatillugu ilinniit inissiaatileqatigiinnilluunniit inissiap silaannarissusaa pillugu ajornartorsiuteqarneranik paasissutissiisoqanngilaq.

Oqoqarneq aneerasaartaarfimmullu matup ussiinnera naammaginnginnakkit, decembarip 18-ani 2012 e-mail-ikkut Inissiaatileqatigiit kigaappallaamik suleriaaseqarnerat Ineqarneq pillugu Maalaaruteqartarfimmut maalaarutigaat. Sap. ak. pingasut missaat matuma siorna, oktobarip tallimaani 2011 misissuineq pillugu ZZ-ip nalunaarusiaata assinganik nassinneqarsimanerit ilisimatitsissutigaat. Aneerasaartarfimmut matup ussiinnera pillugu septembarimi oktobarimilu inissiaatileqatigiinnut arlaleriarlutit saaffiginnittarsimanerit ilanngullugu oqaatigaat.

Inissiaatileqatigiit Ineqarneq pillugu Maalaaruteqartarfimmut allagaat februaarip 26-ani 2013 ullulikkat naapertorlugit, illit iserterninniit 2011-ip ukiaa tikillugu sanaartukkat assigiinngitsut- ilaatigut sanasut suliassat suliarineqarsimapput. Tamatuma saniatigut oktobarip tallimaani 2011 oqoqarnersoq misissuisoqarpoq nalunaarusiamilu innersuussutaasut oqummut tunngasut malinneqarput. Qaammatip ataatsip missaata qaangiunnerani misissueqqittoqarmat, oquk akuerineqarsinnaasumik annikitsuinnaavoq. Misissuineq naammassiniariartoq nalunaarusiamik nassinneqarsimannginnerit Inissiaatileqatigiit ajuusaarutigaat. Nalunaarusiaq Inissiaatileqatigiit allagaannut ilanngullugu nassiunneqarpoq. Aneerasaartarfimmut matu suli ajoqurteqarsorigukku, Inissiaatileqatigiinnut saaffiginninnikkut aaqqiivigineqassasoq, Inissiaatileqatigiit naggasiullugu oqaatigaat.

Nalunaarusiaq ilanngussaq naapertorlugu inissiaq attartukkat oktobarip tallimaani 2011 akuerineqarsinnaanngitsumik annertussusilimmik oqoqarnersoq ZZ-ip misissorpaa. Nalunaarut naapertorlugu ineeqqami akunnattumik oqoqarpoq sinittarfimmilu annertuumik oqoqarluni. Inimi/igaffimmi annikitsumik oqoqarpoq. Oqoqalersimanermut suna patsisaanersoq imaaliallaannaq paasineqarsinnaanngimmat, pujoralannut milluaammik HEPA-mik sorujuiaatilimmik pujoralaajaasoqarnissaa uffarfiullu nutarterneqarnissaa inassutigineqarpoq.

HEPA-mik sorujuiaatilimmik pujoralannut milluaasulerluni eqqiaasoqaarnera ilisimatitsissutaavortaaq.

Taama eqqiaareernerup kingorna sap. ak. 4-5 qaangiummata misissuinerit nutaat annikitsuinnarmik oqoqarnera takutippaat.

Allakkani maajip 31-ani 2013 ullulikkani Ineqarneq pillugu Maalaaruteqartarfimmit paasissutissat taakku pillugu oqaaseqaateqaqquneqaravit paasissutissat oqaaseqaateqarfiginngilatit.

Inatsisit tunngavigineqartut:

Inissianik attartortitsisarneq pillugu Inatsisartut peqqussutaat nr. 2 maajip 12-ani 2005-imeersoq § 84 naapertorlugu, ineqartut maleruagassanik ilaatigut § 45 naapertorlugu inigisap aserfallatsaalineqarneranut iluarsaanneqarneranullu tunngasunik suliaqarnissaq, Ineqarneq pillugu Maalaaruteqartarfiup piginnaatitaaffigaa.

Peqqussummi tassani § 45 naapertorlugu Namminersornerullutik Oqartussat ( maanna Namminersorlutik Oqartussat) kommunillu init attartortittagaasa, inissiap inigisallu isumannaatsumik aserfallatsaalineqarnissaat attartortitsisup pisussaaffigai.

Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit aalaakkaasut, illup iluani atortut il.il. aserfallatsaalineqarnissaat attartortitsisup pisussaaffigai. Nungullarsimanerup pisoqalisimanerullu kingunerisaanik illuutinik ininillu nutarterinerit iluarsaassinerillu, pisariaqartitsineq naapertorlugu isumagineqartassapput.

Naliliineq:

Suliaq naapertorlugu Inissiaatileqatigiit oqoqarneq pillugu missuisitsisimapput, illit inigisanni oqoqarnera paasineqartoq, Inisiaatileqatigiit oquk peerniarlugu/anikillisinniarlugu inassuteqaataasutut eqqiaasitsisut, kingornalu misissuinermi iluaqutaasimanera paasineqartoq.

Ineqarneq pillugu Maalaaruteqartarfiup paasissutissat taakku oqaaseqaateqarfigeqqullugit qinnuigimmatsit oqaseqaateqarsimanngilatit.

Ineqarneq pillugu Maalaaruteqartarfiup tamanna pitsanngorsaataasunik iluarisimaarinninnertut paasisariaqarsoraat.

Aalajangiineq:

Inissiaatileqatigiiffiup – oqoqarneranik misissuinerit iliuusaareersullu saniatigut – inigisanni iliuusissanik allanik aallartitsinianngilaq.

Maalaaruteqarsinnaaneq:

Inissianik attartortitsisarneq pillugu Inatsisartut Peqqussutaanni nr. 2-mi maajip 12-ani 2005-imeersumi kingorna allannguuteqartumi § 86 imm. 7 naapertorlugu, Ineqarneq pillugu Maalaaruteqartarfiup aalajangigaa pisortaqarfinnut allanut suliakkiissutigeqqinneqarsinnaanngilaq. Attartortitsisup attartortullu akornanni aaqqiaanngissutip eqqartuussivikkut suliassanngortinnissaa kissaataappat, allakkatigut attaveqatigiinneq il.il. attartortitsisup ingerlatseqatigiiffianit isumagineqarsimagaluarpalluunniit, attartortitsisumik eqqartuussivimmut tunniussineq, nunap immikkoortuani eqqartuussivimmut ingerlatinneqassaaq.

Ineqarneq pillugu Maalaaruteqartarfiup aalajangigai, § 86 imm. 6 naapertorlugu, Namminersornerullutik Oqartussanit (Namminersorlutik Oqartussanit) kommuninillu inissianik attartortitsisuusunit atuutsinneqartussaapput.

Maalaaruteqartarfik sinnerlugu

Innuttaasoq B

Siulittaasoq

Assinganik nassinneqartoq: Inissiaatileqatigiit XX

Lovgrundlag:

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq

Aserfallatsaaliuineq, iluarsaassineq atuinerlu

§ 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.

Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit