AALAJANGIINEQ

XX-ip aalajangiussai ullulerneqartut 26. januar 2011, 3. marts 2011 aammalu 24. april 2011 akuersaarneqarput. Imatullu oqaatigisariaqarluni, inissiaatileqatigiiffik pisussaatitaammat itigartitsissutigissallugu sivitsuinissani ini attartukkap attartorteqqinnerata isumaqatigiissusiornissaa qaammatit aqqaneq marluk sinnerpagit taassumalu kingorna itigartitsissutigissallugu inigisavit tigummiinnarnisaanut qularnaveeqqusiinissaq.

Taamaattumik taperserneqanngilatit maalaarutinnut.

Nalunaajaat:

Ini attartukkat attartortissimavat piffissami 1.januar 2010-imiit 1. juni 2010 tungaanut aammalu 1. september 28. februar 2011 ilanngullugu.

Ulloq 24.januar 2011 qinnuteqarputit sivitsueqqiinissamik.

XX-ip itigartitsissutigaa ulloq 26. januar 2011-imi sivitsussallugu inip attartorteqqinnissaanut isumaqatigiissut, tunngavigalugu inigisat qaammatini aqqaneq marlunni attartortereersimagakku. Inatsisitut tungavigisatut innersuuppaa inissiaatileqatigiiffiup § 58, imm. 1 inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq, aammalu maalaaruteqarnissamut ilitsersuilluni.

Ulloq 3. februar 2011 qinnuteqaateqaqqipputit sivitsuinissamik attartorteqqiinissamut isumaqatigiissummut tassanngalu oqaaseqaaseqarlutit, qinnuteqaativit sivitsornissaa akuersaarneqarsinnaassanngippat attartuinerit unitsissallugu februar 2011 naanerani, tassannga qinnuteqarlutit inimik attartuinissamut qularnaveeqquserneqarnissat.

Ulloq 3. marts 2011 XX-ip ilisimatsippaatit, inimik attartuineq atorneqassasoq siunertarisaminut, tamannalu ima oqaatigisariaqarluni, illit, attartortuusutut, inigisami tassannga ineqassasutit. Peqqussuteqarfigineqarputit, ullut 14-it qaangiutsinnagit pissutsit aaqqiivigeqqullugit. Taamaattoqanngimmat inigisavit attartortinneqarnera unitsinneqassammat. Inissiaatsileqatigiiffiup innersuuppaatit inissianik attartortitsisarnermut peqqussummut § 48, 2, imm. 3 aamma imm. 5 aamma § 73, imm. 2-mut ilitsersullu innersuullugu maalaaruteqarnissamut.

Ulloq 15. marts 2011-imi paasissutissatut ilannguppat, suliffeqarnerit pillugu utaqqiisaasumik nuukkallarsimallutit Najugaqarfik X-mut. Qinnuteqaateqarputit attartorteqqiinerup sivitsorneqarnissaanik, attartuisoq inissamik allamik piffissaq atorlugu nassaarniassammut, illillu nammineq suliassarisatit kingulliit isumaginiassagakkit Najugaqarfik Z-mi. Ilanngulluguttaaq paasissutissiissutigaat, aamma qinnuteqaateqartutit inimik attartuinissamut qularnaveeqqusiinissamik naapertorlugu inissianik attartortitsisarnermut peqqussutip § 58iat.

Ulloq 24. juli 2011-imi XX-i aalajangiussivoq itigartitsissummik qinnuteqaatinnut inimik attartuinissamut qularnaveeqqusiinissamik. Taassumunngalu tunngatillugu innersuussivoq inissiaatileqatigiiffik, inigisat attartortiinnarsimagit qaammatini aqqaneq marlunni. Inivit attartorteqqinnissaanut sivitsuiniarnermut itigartitsissummik tunniussisoqarsinnaasimavoq, tunngavigalugu inissiaatileqatigiiffik tigusaqarsimanngimmat takussutissamik uppernaasaataasumik sulisitsisumiit utaqqiisaagallartumik nuussimanermut. Allakkiat 13. juli 2011-ernisaq taamaattumik isigineqarpoq inimik attartuininnik unitsitsinermik, isumaqatigiittoqarporlu ullormik inivit qimannissaanut tunngatillugu misissuinissamik.

Maalaarummi 11. januar 2012-imeersumiit ilannguppat, Kalaallit Nunaanni Namminersorlutik Oqartussat peqqussutaata tunngassuteqartoq nuttarnerulernissamut aningaasaliissutit, peqqussuteqartoq uppernarsaammik minnerpaamik qaammatinik aqqaneq marlunni qulakkeerisumik suliassaqartitaanissamik, ajoraluarumik taassuma ajornakusoortilersimagaa, uteqqissinnaanissat piffigisannut ineqarfinnut. Taamaattumik tamanna tunngavigalugu qinnuteqarputit, itigartitsissut qinnuteqaatinnut inigisavit paariinnarnissaanut qularnaveeqquserneqarnissaa nutaamik naliliiffigineqassasoq.

Maalaarutippit ingerlaarsimanera nassuiaateqarfigaat ilanngullugulu, ukioq 2010-imi suleqatinniit Najugaqarfik X kajumissaarneqaravit suliffimmut tassunga qinnuteqaqqullutit, eqqarsaatersuuteqarsimanngitsutit, inissiamik piareersimasumik tunineqaravit meeqaannullu. Aningaasartuutaasut angalanermut akilerneqarput tapiissutitigut Namminersorlutik Oqartussaniit nuttarnerulernissamut aningaasaliissutitigut - taapiissutinillu tunineqarnissaq angussagaanni qinnuteqartoq takussutissiisariaqarpoq uppernarsaammik, suliffissamik qulakkeerinnissimanermik minnerpaamik qaammatini aqqaneq marlunni pisussami, soolu inigisanut tunngassuteqartut aamma inaalinneqareersimanissaat piumasaqaataalluni.

XX-i ulloq 24. februar 2012-imi maalaarummut oqaaseqaateqarpoq, ilanngullugulu suliap ingerlasimanera nassuiaateqarfigalugu.

Inerniliinermi ilannguppaa inissiaatileqatigiiffiup, oqaatsitigut allakkatigullu ilisimatinneqarsimasutit, attartorteqqiinermi qaammatit aqqaneq marluk atorsimagakkit tamannalu tunngavigalugu taamaattumik qinnuteqarsinnaanngitsutit inissiamik attartornissamut qulakkeerinnissummik - unalu peqqutiginngikkukku nuutsitaasimassasutit /inissinneqarallarlutilluunniit suliffiit aqqutigalugu. Qinnuigineqarputit uppernarsaatissamik pissarseqqullutit suliffeqarfigisanninngaanniit. XX-i tigusaqarsimanngilaq uppernarsaataasussamik. Ilanngulluguttaaq innersuussivoq inissiaatileqatigiiffik allagaqaatigisimasannut mail-mut ullulerneqartumut 15. marts 2011imi, tassannga ersermat, nuutsitaasimanngitsutit suliffeqarfigisanninngaanniit, kisiannili nammineq piumassuserisannik aalajangersimallutit Najugaqarfik Z-mut nuunnissannik.

XX-ip ilanngullugu saqqummiuppaa, inissimamik attartornivit unitsinneqarnera aammalu inimik atttartornissamut qulakkeerinninniarnerup itigiartitsissutigineqarnera attatsiinnarneqartoq.

Inatsisitigut tunngavilersuutit:

Erserpoq § 84-imi Inissianik attartortitsisarneq pillugu Inatsisartut peqqussutaanni nr. 2, 12. maj 2005-imeersumi, ineqarneq pillugu maalaaruteqartarfiup attartortut maalaarutaat ilaatigut makkununnga tunngasut suliarisarai, attartukkap attartorteqqinneqarneranut attartorteqqiinermut attartukkamik, naapertorlugu § 58-i.

Erserpoq § 58, imm. 1-imi aattartortitsisarneq pillugu peqqussummi, attartortup attartornissamik isumaqatigiissut maleruarsimaguniuk, attartortoq inigisaminik qimatsisimagallarnermini inigisaminik qaammatit aqqaneq-marluk tikillugit allamut attartortitsigallarnissamut pisinnaatitaavoq. Allamut attartortisigallarneq qaammatinit pingasunit sivikinnerutinneqarsinnaanngilaq. Attartortup inigisaminik allamut attartortitsigallarnera ukiut tallimat ingerlanerini taamaallaat katillugit qaammatini aqqaneqmarlunni pisinnaavoq, taamaattorli tak. imm. 2.

Imm. 2. naapertorlugu imm. 1-imi piffissamut killiliussaq apeqqutaatinnagu attartortup inigisaminik allamut attartortitsigallarnissaq qinnutigisinnaavaa, attartortup peqannginnissaa peqanngikkallarnerusimappat, aammalu nappaammik, ilinniagaqarnermik,

pineqaatissinneqarsimasunut inissiisarfimmiinnermik imaluunniit attartortoq nammineerluni imaluunniit inoqutaasa ilaat nuukkallartitaaneranik tamanna pissuteqarpat. Allamut attartortisigallarneq qaammatinit pingasunit sivikinnerutinneqarsinnaanngilaq.

Imm. 4 naapertorlugu attartortoq inigisaminnik allamut attartortitsigallarnissamut taarsiullugu pisinnaatitaapput, piffissap peqarfiginngisassamik naanerani inissiamut allamut innersuunneqarnissamut qularnaveeqqusiivigineqarsinnaagunik attartornerminnik unitsitsinissamut.

Peqqussutit ilanngunneqarput tamakkiisumik oqaaseqaataat ilanngullugit ataani allassimasuni.

Naliliineq:

Ineqarneq pillugu maalaaruteqartarfiup nalilerpaa, pisussaaffeqarnngitsutit init attartukkat attartorteqqissallugu qaammatit aqqaneq marluk qaangerlugit.

Tunngavigineqartoq tassannga tassaavoq, § 58-ip Inissianik attartortitsisarneq pillugu Inatsisartut peqqussutaanni nr. 2, 12. maj 2005-imeersup tunngaviatigut pisinnaatitsinngimmat attartorteqqiinissamik piffissarititaasoq qaangerlugu.

Ineqarneq pillugu maalaaruteqartarfiup ilanngullugu nalilerpaa, pisussaaffeqanngitsutit aalajangersakkap saneqqutsisinnaatitaaffianut peqqussutip § 58, imm. 2 naapertorlugu.

Peqqutaasoq tassannga unaavoq, illit nammineq piumassutsit naapertorlugu Najugaqarfik X-mut nuussimagavit. Tamannalu tunngavigalugu uppernarsarneqarsimanani, nuunnerit tunngaveqartoq utaqqiisaagallartumik ilinnit nuutsitsinerusoq.

Ineqarneq pillugu maalaaruteqartarfiup ilanngullugu nalilerpaa, pisussaaffeqanngitsutit inisiamik attartornissamik qulakkeerinninnisamik.

Peqqutaasoq tassannga unaavoq, Najugaqarfik Z-mut nuunninnut tunngatillugu illit aalajangersimagakku inigisat attartortissallugu attartuinerit unitsinnagu

qulakkeerinnissutaasussamik allamik inissiamik innersuunneqarsinnaaneq peqannginnerup killissarititaa naammassippat.

Inissianik attartortitsisarneq pillugu Inatsisartut peqqussutaanni § 58, imm. 4 erserpoq attartortoq inigisaminnik allamut attartortitsigallarnissamut taarsiullugu pisinnaatitaasut, piffissap peqarfiginngisassamik naanerani inissiamut allamut innersuunneqarnissamut qularnaveeqqusiivigineqarsinnaagunik attartornerminnik unitsitsinissamut. Imatullu isumaqarpoq, inigisat attartortissinnaagit imalluunnit attartornera unitsissinnaagit inissiamik attartortakkamik qularnaveeqqusiivigineqarnikkut. Attartortitsisarneq pillugu peqqussutip pisinnaatitsissutiginngilaa attartortumut, inini attartorteqqaariarlugu taassumap kingorna attartornera unitsillugu qularnaveeqqusiiviginernissamik.

Maalaarutivit oqaaseqaasiornera tunngavigalugu, suliap naliliiffigineqaqqinnissaa kissaatigigit, Ineqarneq pillugu maalaaruteqartarfiup ilisimatitsissutigissavaa, Ineqarneq pillugu maalaaruteqartarfik maanna tamakkiisumik naliliilluni aalajangiisimammat suliamut ilinnut tunngasumut.

Aaliangiineq:

XX-i pisussaaffeqartitaavoq itigartitsissuteqaateqassalluni sivitsuinissamut tunngasumik attartorteqqiinermi isumaqatigiissumut qaammatit aqqaneq marluk qaangiunneranni.

Pisussaaffeqanngilatit inissiamik attartornissamut qularnaveeqqusiivigineqassallutit inigisavit attartorunnaarnerani.

Maalaarutigisannik taperserneqanngilatit.

Aaliangiinermi peqataapput: Innuttaasoq B, Innuttaasoq C, Innuttaasoq D kiisalu Innuttaasoq E.

Aaliangiussaq akerliusoqarani akuerineqarpoq

Maalaaruteqarnissamik ilitersuut:

Ineqarneq pillugu maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, naapertorlugu Inatsisartut peqqussutaat nr. 2, 12. maj 2005-imeersoq ineqarneq pillugu kingusinnerusukkut allanngortinneqartoq. Kissaatigineqarpat aaqqiagiinngissut attartortitsisut aammalu attartortut akornanni ingerlateqqinneqassasoq nunatta eqqartuussiviannut, sassaqqusissut attartortumut tunniunneqassaaq eqqartuussiveqarfimmut. Tamannalu atuutsinneqarpoq naak attaveqatigiittarneq,il.il. pisimassagaluarpataluunniit attartortup allaffissornikkut suliffeqarfiutaatigut.

Ineqarneq pillugu maalaaruteqartarfiup aalajangiussai pituttuisumik atuutsinneqarput namminersorlutik oqartussanut aammalu kommuninut attartortitsisartunut inissianik, naapertorlugu § 86, imm. 6.

Nunatta eqqartuussisuuneqarfiata ilitsersuisarfia ammasarpoq oqarasuaatikkut saaffiginnittunut sisamanngornikkut nal. 14-15 akornanni oqarasuaat 368000.

På Boligklagenævnets vegne

Innuttaasoq F

Formand for Boligklagenævnet

Kopi til Boligselskabet X

Lovgrundlag (GL):

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq

§ 5. Illuutini Namminersornerullutik Oqartussanit kommunenilluunniit pigineqartuni inissiat inigineqanngitsut inissarsiortunut imatut tulleriinnilersuilluni innersuunneqartassapput, inissiat: 1) iluarsaassinernut isaterinernullu atatillugu Namminersornerullutik Oqartussat kommunellu inisseeqqinnissaannut atugassat, tak. § 67. 2) attartortunut iniminnik piginneqatigiilluni inissiatut pigisatulluunniit tiguserusunngitsunut, tak. § 24, imm. 1. 3) initaartinneqarnissamik siusinnerusukkut qularnaveeqqusiivigineqarsimasunut eqquutsitsiniarluni innersuunneqartussat, tak. § 57, imm. 4.

4) aapparisap toqukkut qimagaasup atorfimmut aalajangersimasumut inigitinneqartumik qimatsinissaanut atatillugu innersuussutigineqartussat, tak. § 62, imm. 2. 5) aapparisap toqukkut qimagaasup inimik innarluutilimmut immikkut aaqqissugaasumik tunniussaasimasumillu qimatsinissaanut atatillugu innersuussutigineqartussat, tak. § 62, imm. 3. 6) siunertanut aalajangersimasunut inniminnigaasut, tak. § 3, imm. 1, nr. 1 aamma 2. 7) sullissivinni sulisunut inissamut normumik atorneqanngitsumik pigisaqartunut atugassat, tak. § 9, 8) kommunet isumaginninnermi inissaqartitsinissaannut atugassat, tak. § 23, 9) nammineq kissaatigalugu nuunniartunut atugassat, tassunga ilanngullugu inigisanik paarlaannerit, tak. § 58, 10) utaqqisut allattorsimaffianni nalinginnaasumi allassimallutik inissarsiortunut atugassat, tak. § 6. Imm. 2. Imm. 1, nr. 1 – 5 naapertorlugu inissiat innersuunneqartut naleqquttumik angissuseqartinniarneqassapput pitsaassuseqassallutillu. Ineqarnermut aningaasartuutit tamarmiusut sapinngisamik inissiami qimanneqartumi aningaasartuutaasarsimasunit amerlanerunissaat pinngitsoorniarneqassaaq. Imm. 3. Namminersornerullutik Oqartussat kommuneluunniit siunertanut aalajangersimasunut atugassanik inissianik inniminniisinnaapput, tassunga ilanngullugit inissiat atorfinnut aalajangersimasunut atugassiissutigineqartussat. Imm. 4. Naalakkersuisut kommunet ataasiakkaat isumaqatiginiareerlugit inissiat imm. 1-imi taagorneqartut qanoq agguarneqarnissaat pillugu kommunenut tamanut immikkut aalajangersaasinnaapput.

§ 58. Attartortup attartornissamik isumaqatigiissut maleruarsimaguniuk, attartortoq inigisaminik qimatsisimagallarnermini inigisaminik qaammatit aqqaneq-marluk tikillugit allamut attartortitsigallarnissamut pisinnaatitaavoq. Allamut attartortisigallarneq qaammatinit pingasunit sivikinnerutinneqarsinnaanngilaq. Attartortup inigisaminik allamut attartortitsigallarnera ukiut tallimat ingerlanerini taamaallaat katillugit qaammatini aqqaneq-marlunni pisinnaavoq, taamaattorli tak. imm. 2.
Imm. 2. Imm. 1-imi piffissamut killiliussaq apeqqutaatinnagu attartortup inigisaminik allamut attartortitsigallarnissaq qinnutigisinnaavaa, attartortup peqannginnissaa peqanngikkallarnerusimappat, aammalu nappaammik, ilinniagaqarnermik, pineqaatissinneqarsimasunut inissiisarfimmiinnermik imaluunniit attartortoq nammineerluni imaluunniit inoqutaasa ilaat nuukkallartitaaneranik tamanna pissuteqarpat. Allamut attartortisigallarneq qaammatinit pingasunit sivikinnerutinneqarsinnaanngilaq.
Imm. 3. Attartortitsisup allamut attartortitsigallarnissaq akueriumanngissinnaavaa,
1) inissiaq innersuunneqarsimappat, tak. § 5, imm. 1, nr. 7,
2) inissiami ineqartussat katillutik ininit amerlanerusussaassappata, imaluunniit
3) attartortitsisoq allamut attartortitsigallarnissamut akerliunissamut naammaginartunik pissutissaqarpat.
Imm. 4. Namminersornerullutik Oqartussat kommuunillu inissiaataanni attartortittakkani najugaqartut inigisaminnik allamut attartortitsigallarnissamut taarsiullugu pisinnaatitaapput, piffissap peqarfiginngisassamik naanerani inissiamut allamut innersuunneqarnissamut qularnaveeqqusiivigineqarsinnaagunik attartornerminnik unitsitsinissamut, tak. § 5, imm. 1, nr. 3.
Imm. 5. Allamut attartortitsigallarnissap akuerineqarnissaanut piumasaqaataavoq, ineqarnermut akiligassap annerpaamik attartortup ineqarnermut, kiassarnermut, innaallagissamut, imermut il.il. aningaasartuutigisartagaasa amerlaqataannik annertussuseqarnissaa. Immikkut ittunik pissutissaqartillugu, soorlu pequtit attartorallarnermut ilaatinneqassappata akiliutissaq anginerutinneqarsinnaavoq. Attartorallakkamik attartorallartoq attartortitsisumut toqqaannartumik ineqarnermut akiliutissamik akiliisassaaq.
Imm. 6. Attartortoq pisinnaatitaavoq attartukkaminik utoqqiisaasumik allamit attartorallartumit qularnaveeqqusiissummik akiliisitsissalluni, attartukkamik utaqqiisaasumik attartorallartinneqartup attartortup pisussaaffiinut sillimmatissanik. Qularnaveeqqusiissut aamma inissiamik attartornermut siumoortumik akiliutit katillugit annerpaamik qaammatini arfinilinni attartornermut akiliutit amerlaqatigissavaat.
Imm. 7. Attartortitsisup attartukkamik attartorallarneq § 75-imi maleruagassat malillugit taamaatitsissinnaavaa.
Imm. 8. Naalakkersuisut attartukkamik attartortitsigallarneq ineqarnermullu qularnaveeqqusiissut pillugit maleruagassiorsinnaapput.

§ 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) Inissiamit aninermi inissiap qanoq issusia (iluarsaassineq nalinginnaasoq), tak. § 77.